Mateo 4
4
An Pagtintar Kan Jesus
(Marcos 1:12-13; Lucas 4:1-13)
1Pakatapos sani gin-giyahan si Jesus san Espirito Santo pakadto sa disyerto agod matintaran san demonyo. 2Nag-ayuno si Jesus sin 40 na adlaw kag 40 na gab-i. Pakatapos ginutom siya. 3Sani nag-abot an nagatintar kag sinabihan siya, “Kun matuod na anak ka man gayod san Dios sugua ini na mga bato na magin tinapay.”
4Pero nagsabat si Jesus, “Nasurat sa Banal Na Kasuratan, ‘Dili lang tinapay an makapabuhay sa tawo kundi an kada surmaton san Dios.’,”#4:4 Kitaa sa Deuteronomio 8:3
5Pakatapos gin-upod siya san demonyo sa banal na syudad kag pinatindog sa alituktok san templo. 6Tapos, ginsabihan naman, “Kun matuod na anak ka man gayod san Dios, lumukso ka hali didi kay nasurat,
‘Pagasuguon niya an iya mga anghel na atamanon ka.
Kaya pagahuyutan ka ninda agod bisan an imo mga tiil dili masakitan sa bato.’,”#4:6 Kitaa sa Salmo 91:11,12.
7Pero ginsabihan siya ni Jesus, “Nasurat man, ‘Dili mo dapat pagporbaran an Ginoo na imo Dios.’,”#4:7 Kitaa sa Deuteronomio 6:16.
8Gin-upod naman siya san demonyo sa tuktok san hataas gayod na bukid kag ginpakita sa iya an tanan na kahadian san kinab-an kag san kabantugan sani. 9Tapos, sinabihan siya, “Ini tanan ihahatag ko sa imo kun magluhod ka kag magsamba sa akon.”
10Pero, sinabat siya ni Jesus, “Humali ka, Satanas, kay nasurat,
‘Sambaha an Ginoo na imo Dios kag siya lang gayod an imo dapat pagsirbihan.’,”#4:10 Kitaa sa Deuteronomio 6:13.
11Pakatapos binayaan siya san demonyo kag nag-arabot an mga anghel agod mag-ataman sa iya.
Nagatuna Si Jesus Pagtukdo
(Marcos 1:14-15; Lucas 4:14-15)
12Niyan pakabarita ni Jesus na ginpapriso si Juan nagbalik siya sa Nazaret sa Galilea. 13Dili nagdugay naghali siya didto kag nag-istar sa Capernaum sa higad san danaw na lungsod sa lugar san Zebulun kag Neftali. 14Nangyari ini agod matuman an ginsabi san propeta na si Isaias na,
15“Mga tawo didto sa lugar san Zebulun kag Neftali,
sa may kalundan man sa patabok san Jordan kag sa Galilea na may nagaistar na damo na mga dili-Judio,
16kamo na nabubuhay sa kadulman san kasal-an nakakita sin grabe na kapaw-an.
Idto man na mga nagaistar sa lugar na may anino san kamatayon nabanaagan sani!”#4:16 Kitaa Isaias 9:1,2.
17Tuna sadto nagpahayag si Jesus sani na mensahe, “Magbasol kamo san iyo kasal-an kag magbaya sani kay haros magtuna na an pagahadi san Dios.”
Nagatawag Si Jesus San Una Na Mga Disipulos
(Marcos 1:14-20; Lucas 5:1-11)
18Myintras nagalakat si Jesus sa higad san danaw san Galilea nakita niya an magmanghod na Simon na ginatawag na Pedro kag san manghod sani na si Andres. Mga parapangisda sinda kaya adto didto sinda sa lawod nagapanglambat. 19Nagtawag siya sa inda, “Mag-upod kamo sa akon kay tukduan ta kamo na magin mga parapanglambat sin mga tawo.” 20Ginbayaan dayon ninda an mga lambat kag nag-upod sa iya.
21Sa uruunhan may nakita naman siya na duha pa na magmanghod na sinda Santiago kag Juan na mga anak ni Zebedeo. Adto sinda sa inda sakayan na nagatungkap san inda mga lambat kaupod an ama, tapos gintawag sinda ni Jesus. 22Kaya ginbayaan man dayon ninda an inda ama na si Zebedeo sa sakayan kag nag-upod naman kan Jesus.
Si Jesus Nagapangayo Sin Mga May Sakit
(Lucas 6:17-19)
23Ginpanglibot ni Jesus an bilog na Galilea na nagapangtukdo sa inda mga sinagoga, nagapahayag san Maayo Na Barita san kahadian kag ginapaayo an manlain-lain na sakit kag mga dipirensya sa lawas san mga tawo. 24Tapos an barita manungod sa iya nakalukop sa bilog na Siria. Kaya gindara sa iya an tanan na mga masakiton na may manlain-lain na ginabatyag kag kasakitan. Amo man an mga nagkasurudlan san maraot na espirito, mga buntugon kag mga paralitiko kag ginpaayo naman niya sinda tanan. 25Damo na katawuhan an nagsurunod sa iya. Taga-Galilea sinda, taga-Decapolis, taga-Jerusalem, taga-Judea kag may hali pa sa unhan san Jordan.
सध्या निवडलेले:
Mateo 4: msb
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 1993, Wycliffe Bible Translators, Inc. All rights reserved.
