Luk 5

Yesu a iwa sɛ̃iaɔ sisia

(Mat 4.18-22; Maa 1.16-20)

1Zĩewa Yesu zɛa Gɛnɛzalɛti isida gɔ̃sɔ̃lɛ, ɔ̃ bila kã̀aaaazi Lua yãmaa yãi, wàlɛ naɛwà. 2Ɔ̃ à go'ilɛna è kalɛa gɔ̃sɔ̃lɛ mɛn pla, kpɔwɛnaɔ bɔ̀lɛ, aalɛ ń taaluɔ pipi. 3Ɔ̃ à gɛ̃̀ gópiɔ do pɔ dɛ Simɔ pɔ ũ guu, à wabikɛ̀wà aà ɔzɔ̃i aà go gɔ̃sɔ̃wa yɔɔ. Ɔ̃ zɔ̃lɛa gópiu à yãdà bilaɛ.

4Kɛ́ à yã'ò a làa, ɔ̃ a ò Simɔɛ: Gɛ́ ń góo isia à taaluzu, á kpɔ kṹ. 5Simɔ wèwà à mɛ̀: Mae, wa zĩkɛ̀ e gu gɛ̀ dɔ̀ò, wi pɔe kũo, ãma lá mmɛ ń ò, má kpá. 6Kɛ́ aa kɛ̀ màa, aa kpɔ nàaa gìligili e an taaluɔ ye kɛ̃kɛ̃i. 7Ɔ̃ aa ɔkɛ̀ ń zĩkɛndee pɔ ku gópi do guuɔnɛ aa mɔ dɔńlɛ. Kɛ́ aa mɔ̀, aa kpɔ kà gó mɛn plapiɔ pai e aa ye kpalɛi. 8Kɛ́ Simɔ Piɛɛ è màa, à kùlɛ Yesu gbázĩ à mɛ̀: Go ma saɛ Dii, asa duunkɛnan ma ũ. 9Simɔ ń gbɛ̃́ pɔ aa sãnuɔ bilikɛ̀ mpii kpɔ gìligili pɔ aa kũ̀pi yãi. 10Màaɛ Zaki ń Zãao, Zebede nɛ pɔ aa dɛ zĩkɛndeeɔ ũ ń Simɔo bilikɛ̀ lɔ. Ɔ̃ Yesu ò Simɔɛ: Nsu to vĩa n kũo. Za gbã gbɛ̃nazĩna ɔ̃ ńyɔ̃ɔ wɛɛlɛ. 11Kɛ́ aa kà ń ń góo gɔ̃sɔ̃lɛ, ɔ̃ aa pɔpiɔ tò we pii, aa bɔ̀ tɛaazi.

Kusude gbãgbãa

(Mat 8.1-4; Maa 1.40-45)

12Zĩewa Yesu ku wɛ̃lɛe guu ɔ̃ gɔ̃ɛ pɔ kusu lìaala mɔ̀. Kɛ́ à Yesu è, à wùlɛ a gbɛɛu à wabikɛ̀wà à mɛ̀: Dii, tó n wei, ńyɔ̃ fɔ̃ ǹ gbãbɔmɛɛ. 13Ɔ̃ Yesu ɔbɔ̀ a nàwà à mɛ̀: Ma wei, gɔ̃ gbãlɛsai. Wegɔ̃ɔ aà kusu làa. 14Ɔ̃ Yesu òɛ̀: Nsu o gbɛ̃e mao. Gɛ ǹ nzĩa ɔlɔ sa'onaɛ, ní sa pɔ Mɔizi dìlɛ o n gɔ̃a gbãlɛsai seela ũ gbɛ̃́ɔnɛ.#Lev 14.1-32

15Yesu bao lìgua dɛ yãala. Bila ì kãaa, kɛ́ wà aà yãma, mɛ́ kɛ́ aà ń gbãgbã ń ń gyãɔ yãi. 16Ɔ̃ Yesu ì kɛ̃má à gɛ́ wabikɛ gusaɛ.

Gbɛ̃́ kaaũa gbãgbãa

(Mat 9.1-8; Maa 2.1-12)

17Zĩewa Yesu lɛ́ yãdanɛ́. Falisieɔ ń Mɔizi ikoyãdanɛdeeɔ zɔ̃lɛa we. Aa bɔ̀ Galile ń Yude wɛ̃lɛɔ guu pii ń Yelusalɛũo. Lua gbãa kuaanɔ, ɔ̃ àlɛ gyãeɔ gbãgbã. 18Ɔ̃ gbɛ̃eɔ mɔ̀, aa gbɛ̃́ kaaũa sɛa ń makɛlɛo, aalɛ zɛwɛɛlɛ aa e gɛ̃aanɔ aa aà dilɛ Yesu aɛ. 19Kɛ́ aai gɛ̃kĩi eo dasi yãi, ɔ̃ aa dɛ̀dɛaanɔ kpɛ́ musu. Aa kpɛ́pi fɔ̃̀, ɔ̃ aa aà pìla ń a makɛlɛo zã guu Yesu aɛ. 20Kɛ́ Yesu è aalɛ a naaikɛ à mɛ̀: Ma gbɛ̃́, n duuna kɛ̃̀ma.

21Yãdanɛdepiɔ ń Falisipiɔ an laasoo guu aa mɛ̀: Dén gbɛ̃́ pɔ lɛ́ dɔɛ ń Luao bee ũi? Demɛ a fɔ̃ duunakɛ̃mái, Lua ado baasio? 22Yesu ń laasoo dɔ̃̀, ɔ̃ à ń lá à mɛ̀: Bɔyãi álɛ laasoo bee taa kɛ á sɔ̃ guui? 23Tó má ò aà duuna kɛ̃̀wà, ge tó má ò aà fɛlɛ aà taa'o, a kpele mɛ́ àai? 24Má ò màa kɛ́ àɔ dɔ̃ Gbɛ̃nazĩn Nɛ duunakɛ̃ama iko vĩ dũniau la. Ɔ̃ a ò gbɛ̃́ kaaũapiɛ: Má ònɛ, fɛlɛ ǹ n makɛlɛ sɛ ǹ ta n bɛ. 25Wegɔ̃ɔ à fɛ̀lɛ zɛ̀ ń wáa, à a wulɛbɔpi sɛ̀, à tà a bɛ, àlɛ Lua saaukpa. 26Baade pii lɛ́ gɔ̃̀ ɛlɛa, ɔ̃ aa Lua saaukpà. Vĩa ń kṹ maamaa aa mɛ̀: Wa dabu è gbã.

Levi sisia

(Mat 9.9-17; Maa 2.13-22)

27Bee gbɛa Yesu bɔ̀, ɔ̃ à ɔsina pɔ wì mɛ Levi è zɔ̃lɛa ɔsikpɛu. Yesu òɛ̀: Mɔ ǹ tɛmazi. 28Ɔ̃ à fɛ̀lɛ à pɔpii tò we à tɛ̀aazi.

29Ɔ̃ à pɔnablɛ zɔ̃ɔ kɛ̀ a bɛ, à Yesu sìsiwà ń ɔsinaɔ ń gbɛ̃pãleɔ dasi, aalɛ pɔble. 30Ɔ̃ Falisiɔ ń ń Mɔizi ikoyãdanɛdeɔ yãkũtɛ̃kà aà iwaɔzi aa mɛ̀: Bɔyãi álɛ pɔble álɛ imi ń ɔsinaɔ ń luayãdansaiɔi? 31Ɔ̃ Yesu a zãsìmá à mɛ̀: Gbɛ̃́ gbãa bàa ku ń lootoooo, sema gyãe. 32Mi mɔ gbɛ̃maaɔ sisii aa nɔsɛlilɛo, sema duunkɛnaɔ.

33Ɔ̃ wa òɛ̀: Zãa iwaɔ ìɔ lɛye, aaɔ wabikɛ kɔ̃sɔ̃kɔ̃sɔ̃. Màaɛ ń Falisiɔ iwaɔ lɔ. Ãma n gbɛ̃́ɔ aaìɔ pɔble wàɔ imiɛ. 34Ɔ̃ Yesu wèmá à mɛ̀: Á we nɔsɛna gbɛ̃́ɔ lɛye gɔɔ pɔ nɔsɛnapi kuńnɔe? 35A gɔɔ a mɔ́ kɛ́ wa nɔsɛnapi bɔ ń guu. Gɔɔ bee ɔ̃ aa lɛye sa. 36Yesu yãlɛ̀ɛũnɛ́ lɔ à mɛ̀: Wìli pɔkasa dafu lí wa dì a zi guuo. Tó wa kɛ̀ màa lé, pɔkasa dafu a yaaɛ, mɛ́ a zi a kɔ̃sɛ ń a dafu pɔ wa dìupioo. 37Wìli vɛ̃ɛ dafu ka báa tuu zi guuo. Tó wa kɛ̀ màa, vɛ̃ɛ dafu a tuu pũnaɛ, i kɔlɛ, tuu i ɔ̃ɔkpa. 38Wì vɛ̃ɛ dafu ká báa tuu dafu guuɛ. 39Gbɛ̃́ pɔ dɔɛkɛ̀ ń vɛ̃ɛ zio lí a dafu saaukpao, ì mɛ a zi mɛ́ na.

सध्या निवडलेले:

Luk 5: Boo2024

ठळक

सामायिक करा

कॉपी करा