MOATLEM 12
12
Ajah Chêmsiet
1Ere sanpoatko Hirot Lowang#12.1: Lowang Hirot: Hirot Agripa I, Palistan pênte. ma Asâthem hehnâng bengchêmsiet wah. 2Atema, Jon naa Jems, dãngma ritdoakwah. 3Are junko Jews heh khuhah lahma khe phumma atema Piter min loatkhhekwah. (Arepa wichhi lesak pheban phhek lokuh sanpoatko dângwah.) 4Piter lokhhek lahma phâtek nâng sekwah, ngale sipâhi wabelili roamlahma khubeli nâng bemthukwah. Hirot ma Adankhoam lokuh râdiko nok atang mathahko sekhâmrãng thônghun wah. 5Erohwah Piter phâtek nâng sekwah, rohkomin Asâthem hehma Joban nâng ate rãngma nyahrãng hungkoh lahma rangsoam wah.
Piter Phâtek wah Laangphe
6Hirot ma nènep nok atang mako loatsietmin ngama ngat rangpenko, Piter abemte sipâhi wanii tungko juplahma dângwah. Atenâng janru wannii ma khhek lahma dângwah, ngale phâtek nâng lupwângthin kowah pankâsek thongko abemte sipâhi heh dângwah. 7Lemlienma Teso ngintatte ereko hongchephû lahma eretheko wenphiak hôngphiak hokwah. Ngintatte pumma Piter nâng chhoakkhoko lolahma satsiet lahma ngatwah, “Sitsiak dango! Toanchep o!” Phumma lemlienma Piter dekwah janru heh jâritwah. 8Erediko ngintatte pumma atenâng ngatwah, “Nang roamdit pa dit o, ngale nang dapheng pa phengreo.” Phumma Piter ma eroh moatwah, ngale ngintatte pumma ngatwah, “Nang khetpa toanpoh lohma nga demnâng karoo.” 9Ngintatte pumma moeka pa linlin dangale dangmah a ere pejô lejet thangma Piter phâtek khenwah johloat chhoanwah; atema thânkheba rethem ekang ngama thônghun wah. 10Thinma khebengwah bemte heh dankhoam lahma ere diwah bemte hehmin dankhoam lahma athôan wah hahdaang nâng loatkatthin jankâsek tâko hokkatwah. Phumma jankâsekpa atedede laangjâ lahma loatchhoan wah. Ngintatte le Piter nii chuthe taangkhoam diko, ngintatte pumma Piter phethien lahma chhoanwah.
11Erediko Piter ma atenâng chenni dangeka erepa jetrii lahma ngatwah, “Ade phumma arepa linlin ngama lâjettek! Teso ma nga Hirot wah pepângrãng ngale Jews mihnyan hehma themawa eka hehwah pepângrãng ate ngintatte chienkat era.”
12Piter ma linlin loatchhoantek ngama jetrii lahma Jon Mak nyong Mariam humnâng wângwah, ereko ajahthem mihnyan khôan lahma rangsoam wah. 13Piter ma rangsâma kâsekko rahkôngwah, phumma janchhônya haa wathe ate mînpa Roda kâseklaang rãng katwah. 14Atema Piter kahrapa jin lahma nyahrãng khuhah nungma kâsek lelaang thangma ngakchhoan wângwah, ngale atema Piter rangsâko cheplahma tonga ngama thôkoh wah. 15Thinma atenâng ngatwah, “Nanga apa rekoa!” Phumma atema arepa linlin ngama chaanritwah. Ephumma thinma ngatwah, “Arepa ate ngintatte tadanga.”
16Ere thukomin Piter ma kâsekko rahkong lahma dângwah. Athôanko thinma kâsekpa laangka lahma Piter chohkhe wah, ephumma thin bârit rewah. 17Piter ma thinnâng nektin en ngama dekma thakkohwah, ngale Teso ma phâtek khenwah ate chhoanroh loatsiettah a ereheh thinnâng thôkoh wah. Atema thinnâng ngatwah, “Arepa Jems le putedâlemte ahan hehnâng thôkoh en,” erediko thintâwah loatchhoan lahma thehan nâng chhoanwah.
18Rangkhahko Piter nâng chenni dangeka ngama phâtek bemte heh nyahrãng mokritwah. 19Hirot ma Piter lemrãng chienwah, rohkomin thinma chohlemho. Ephumma Hirot ma abemte sipâhi heh sekhamwah, ngale erediko bemte heh ritphe thukwah.
Arediko Hirot Judia wah Kasaria nâng kalahma poatthe tôngkatwah.
Hirot Rit Ngin
20Tair le Sidon wah mihnyan heh demnâng Hirot nyahrãng rinkhah wah, ephumma enângwah mihnyan khuthe roamlahma ate demnâng chohmînrãng hokwah. Khebeng khoko thinma Hirot humbemte Blastas demnâng bengjetmîn wah, ephumma Blastas ma thinnâng chohsok wah. Erediko Hirot tânâng wãngwak lahma nomerãng roatsep wah, chenrãngma ngako thinma phhekchhah pa Lowang Hirot diakwah chohwah.
21Jâthe rangwo khôanwak lahma Hirot ma lowang khet keplahma lowang tôngthinko tonglahma mihnyan hehnâng thôkoh wah. 22Phumma erekowah mihnyan hehma, “Arepa mihnyan ma jab dangmah, Joban ma jabeka!” ngama rakwah. 23Phumma lemlienma Teso ngintatte ma Hirot loangwatwah, chenrãngma ngako atema Joban mîn dongthukmah. Erediko dongma phheklahma ritwah.
24Phumma ere sanpoat komin Joban jabkhab pa jêngjah jahchhoan ngale jêngdong dongwãng rewah.
25Barnabas le Sol niima thin moatlem heh tamo lahma#12.25: enâng wah; wanwanthe nâng arepa enâng ngama raangeka. Jeroselem wah Jon Mak thin demnâng sietlahma ngakwâng wah.
सध्या निवडलेले:
MOATLEM 12: NOKTBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
