Popular Bible Verses from मत्ती 2

सामायिक करा

तिंयां नाठै तेसा ज़ैगा ज़िधी ईशूओ ज़ल्म त हुअ द। तिन्नैं भाल़अ सह शोहरू तेऊए आम्मां मरिअमे कल़टी दी और तिन्नैं उटी बाखा पल़ी करै माथअ टेक्कअ और सोभ लागै तेऊए भगती करदै। तेखअ खोल्ही तिन्नैं आपणीं-आपणीं बोझ़ल़ी और तेता का दैनी सुंन्नअ, लोवान, खुशबूदार किम्मती तेल और कई च़िज़ा भैंट।

ज़धू यहूदा लाक्कै बेतलेहम गराऊंऐं ईशूओ ज़ल्म हुअ, ता तिन्नां धैल़ै त तेऊ देशै हेरोदेस राज़ैओ राज़। ता पुर्बा देशा बाखा का आऐ येरुशलेम नगरी लै जोतषी और तिधी पुजी करै लागै तिंयां इहअ पुछ़दै, “एऊ देशै आसा हुअ द यहूदी लोगे राज़ैओ ज़ल्म; सह किधी ज़िहअ हुअ? हाम्हैं भाल़अ पुर्बा बाखा तेऊओ तारअ और हाम्हैं आसा आऐ दै तेऊ सेटा माथै टेकदै।” (गणांई 24:17)

सह लागअ सरगै तिन्नां का आजू-आजू हांढदअ ता तिंयां लागै तेऊ पिछ़ू-पिछ़ू हांढदै और सह तारअ खल़्हुअ ठीक तेसा ज़ैगा प्रैंदै ज़िधी तेऊ शोहरूओ ज़ल्म त हुअ द। (लुका 2:20)

तेखअ दैनी तिन्नां लै परमेशरै सुपनै चतैनगी, “हेरोदेस राज़ै सेटा लै निं बापस डेऊई।” तिंयां बी तिधा का उझ़ुऐ और तिंयां नाठै होरी बाता आपणैं देशा लै। तिन्नां डेऊणैं का बाद आअ प्रभूओ एक स्वर्ग दूत युसुफे सुपनै। तेऊ स्वर्ग दूतै बोलअ युसुफा लै इहअ, “हे युसुफ, खल़अ उझ़ू, एऊ शोहरू और एऊए आम्मां संघा निंईं करै डेओआ इधा का मिसर देशा लै और ज़ेभै तैणीं ताल्है हुंह आप्पै निं बोलूं, तेभै तैणीं रहै तिधी, किल्हैकि हेरोदेस राज़अ आसा लागअ द एऊ शोहरू लोल़अ और तेऊ आसा लाअ द अह मारी पाई।”