اَن عیسا مسیح، داوودٚ پٚسر، ایبرأهیمٚ پٚسر شجره نأمچه ایسه.
ایبرأهیم ایسحأقٚ پِئر بو، و ایسحأق یعقوبٚ پِئر، و یعقوب یهودا و اونی برأرأنٚ پِئر بو. یهودا فارص و زراحٚ پِئر بو کی اوشأنی مأر تامار نأم دأشتی، فارص حصرونٚ پِئر بو، و حصرون رأمٚ پِئر. رام عمینادابٚ پِئر، عمیناداب نحشونٚ پِئر، نحشون سلمونٚ پِئر بو. سلمون بوعزٚ پِئر بو کی اونی مأر راحاب بو، بوعز عوبیدٚ پِئر کی اونی مأر روت نأم دأشتی، و عوبید یَسا پِئر بو. یَسا داوودٚ پأدیشأ پِئر بو داوود سولیمأن پِئر کی اونی مأر، پیشتر اوریا زن بو. سولیمأن رحبعامٚ پِئر بو، و رحبعام ابیا پِئر، و ابیا آسا پِئر بو. آسا یهوشافاطٚ پِئر بو، یهوشافاط یورامٚ پِئر، یورام عُزیا پِئر بو. عُزیا یوتامٚ پِئر، یوتام آحازٚ پِئر، و آحاز حِزِقیا پِئر بو. حِزِقیا مَنَسّا پِئر، مَنَسّا اَمؤنٚ پِئر، اَمؤن یوشیا پِئر بو. یوشیا یکنیا و اونی برأرأنٚ پِئر بو کی ایسرأییلٚ قومٚ تبعیدٚ زمأت بابِلٚ میأن، بودونیأ بأمؤده. تبعیدٚ پٚسی بابِلٚ میأن:
یکنیا سالتی‌ئیل پِئر و سالتی‌ئیل زروبابِلٚ پِئر بو. زروبابِل اَبی هودٚ پِئر بو، اَبی هود ایلیاقیمٚ پِئر، و ایلیاقیم عازورٚ پِئر. عازور صادوقٚ پِئر، صادوق یاکینٚ پِئر، یاکین ایلی هودٚ پِئر بو. ایلی هود اِلعازارٚ پِئر، اِلعازار متّانٚ پِئر، و متّان یعقوبٚ پِئر بو. یعقوب یوسفٚ پِئر، و یوسفم مریمٚ مرد بو. مریمٚ جَا، عیسا بودونیأ بأمؤ، کی اونٚ لقب مسیح بو.
اَطؤیی، همٚتأنی کی اوشأنٚ نأم اَ جؤر ببرده بوبوسته، جٚه ایبرأهیم تأ داوود، چأرده نسل، و جٚه داوود تأ یوهودیأنٚ تبعیدٚ زمأت، بابِلٚ میأن، چأرده نسل، و تبعیدٚ زمأتٚ جَا تأ مسیحٚ زمأت چأرده نسل بود.

عیسا بودونیأ اَمؤن اَطؤ ایتفأق دکفته، هو مسیحی کی وأستی بأمؤبی: مریم، عیسا مأر، یوسفٚ حلقه بینیشأنِی بو، ولی جٚه قبلٚ اَنکی عروسی بوکوند، معلوم بوبوسته کی روح‌القدسٚ جَا شکم اوسأده. اونٚ مرد، یوسف، خودایَ شنأختی و خورومٚ مردأی بو و نخأستی مردومٚ ورجأ اونَ روسوأ بوکونه، پس تصمیم بیگیفت خلوتی جٚه اون سیوأ وأبٚه.
اون اَ فیکرأنٚ میأن خؤرَه غرقَ بوسته بو کی ایتأ فٚرٚشته خودا جَا، خأب دورون اونٚ ظأهیرَ بوسته و بوگفته: «یوسف، داوودٚ زأی، نوأترسئن کی مریم اَمرأ عروسی بوکونی، چونکی اونی شکمٚ دورونٚ زأی، جٚه روح‌القدسٚه. اون ایتأ پٚسر زأیِه، و تو وأستی اونَ عیسا نأم بٚنی، چٚره کی اون خو مردومَ اوشأنٚ گونأیأنٚ جَا نیجأت دِهه.»
تومأمٚ اَشأن ایتفأق دکفته کی خوداوند گبأن کی اونی نبی زوأنٚ اَمرأ بوگفته بوبوسته انجأم بٚبه: «ایتأ باکره دؤختر شکم اوسأنه، ایتأ پٚسر زأی زأیِه، و اونَ عمانوئیل دؤخأنده.» عمانوئیل عِبری زٚوأنٚ دورون بِه «خودا اَمی اَمرأ» ایسه.
هَطو کی یوسف خأب جَا ویریشته، خوداوندٚ فٚرٚشته فرمأنٚ مأنستَن انجأم بٚدأ و مریمَ بأوٚرده بٚخأنه کی اونی زن بٚبه؛ ولی اونی اَمرأ نوخوفته تأ او زمأت کی اون خو زأکَ بٚزأ؛ و یوسف اونَ «عیسا» نأم بٚنأ.

ऐका متا ۱