Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወይቤሎሙ እግዚእ ኢየሱስ ለአርዳኢሁ አሐዱ ብእሲ ባዕል ቦቱ መጋቢ ወአስተዋደይዎ ኀቤሁ ከመ ዘይዘሩ ሎቱ ንዋዮ። ወጸውዖ እግዚኡ ወይቤሎ ምንትኑዝ ዘእሰምዕ በእንቲኣከ እንከሰ አግብእ ሐሳበ ምግብናከ እስመ ኢትከውነኒ እንከ መጋቤ ሊተ። ወኀለየ ውእቱ መጋቢ ወይቤ ምንተ እሬሲ ናሁ ይስዕረኒ እግዚእየ እምግብናየ ሐሪሰሂ ኢይክል ወስኢለሂ አኀፍር። አአምር እንከሰ ዘእገብር እምከመ ሰዐረኒ እግዚእየ እምግብናየ ከመ ይትወከፉኒ ውስተ አብያቲሆሙ። ወጸውዖሙ ለእለ ይፈድይዎ ዕዳ ለእግዚኡ ወይቤሎ ለቀዳማዊ ሚመጠን ዕዳ ዘትፈድዮ ለእግዚእየ ወይቤሎ ምእተ በመስፈርተ ባዶስ ቅብዐ። ወይቤሎ ናሁኬ መጽሐፍከ ንበር ወጸሐፍ ፍጡነ ኀምሳ ላዕሌከ። ወይቤሎ ለካልኡሂ አንተሰ ሚመጠነ ትፈድዮ ለእግዚእየ ወይቤሎ ምእተ በመስፈርተ ቆሮስ ሥርናየ ወይቤሎ ናሁኬ መጽሐፍከ ንበር ወጸሐፍ ፍጡነ ሰማንያ ላዕሌከ። ወንእዶ እግዚኡ ለመጋቤ ዐመፃ እስመ ከመ ጠቢብ ገብረ እስመ ውሉደ ዝ ዓለም ይጠበቡ እምውሉደ ብርሃን በዓለሞሙ። ወአነሂ እብለክሙ ግበሩ ለክሙ አዕርክተ እምንዋየ ዓመፃ ከመ አመ የኀልቅ ንዋይክሙ ይትወከፉክሙ እሙንቱሂ ውስተ አብያቲሆሙ ዘለዓለም። ወዘሰ በውኁድ ምእመን በብዙኅኒ ምእመን ውእቱ ወዘሰ በኅዳጥ ዐማፂ በብዙኅኒ ዐመፂ ውእቱ። ወሶበ በንዋየ ዐመፃ ሃይማኖት አልብክሙ በንዋየ ጽድቅ መኑ የአምነክሙ። ወሶበ በንዋየ ባዕድ ሃይማኖት አልብክሙ ዘዚኣሁ መኑ እንከ ይሁበክሙ። አልቦ ገብር ዘይክል ተቀንዮ ለክልኤቱ አጋእዝት ወእመአኮ አሐደ ያፈቅር ወካልኦ ይጸልእ ወእመአኮ ለአሐዱ ይትኤዘዝ ወለካልኡ የአቢ ኢትክሉኬ ለእግዚአብሔር ተቀንዮ እንዘ ንወየ ታፈቅሩ። ወሰሚዖሙ ዘንተ ኵሎሙ ፈሪሳውያን ተቃጸብዎ እስመ መፍቀርያነ ንዋይ እሙንቱ። ወይቤሎሙ፤ አንትሙሰ ትጼደቁ ለዐይነ ሰብእ ወእግዚአብሔር የአምረክሙ ልበክሙ እስመ ዘበኀበ ሰብእ ዐቢይ በኀበ እግዚአብሔር ትሑት ወምኑን ውእቱ።

ኦሪትኒ ወነቢያትኒ እስከ ዮሐንስ እምትካት ሰበኩ በእንተ መንግሥተ እግዚአብሔር ወኵሉ ይትገፋዕ በእንቲኣሃ። ወባሕቱ ይቀልል ሰማይ ወምድር ይኅልፍ እምትደቅ አሐቲ ቃል እምኦሪት ወእምነቢያት። ወኵሉ ዘይድኅር ብእሲቶ ወያወስብ ካልእተ ዘመወ ወዘኒ ያወስብ ኅድግተ ዘማዊ ውእቱ ወእንተሂ ደኀራ ምታ ለእመ ቀርበት ካልአ ዘመወት።

ወሀሎ አሐዱ ብእሲ ባዕል ወይለብስ ሜላተ ወለየ ወልብሰ ቢሶስ ወቀጠንተ አልባስ ወይትፌሣሕ ወይትፌጋዕ ኵሎ አሚረ። ወሀሎ አሐዱ ነዳይ ዘስሙ አልዓዛር ግዱፍ ውስተ ዴዴሁ ለባዕል ወይሰክብ እንዘ ይደዊ በሕማመ ቍስል። ወይፈቱ ይጽገብ እምፍርፋራት ዘይወድቅ እማእዱ ለባዕል ወከለባትሂ ይመጽኡ ወይልሕሱ ቍሰሊሁ። ወእምዝ ሞተ ዝኩ ነዳይ ወወሰድዎ መላእክት ውስተ ሕፅነ አብርሃም ወሞተ ባዕልኒ ወተቀብረ። ወበሲኦል አንሥአ አዕይንቲሁ እንዘ ሀሎ ውስተ ደይን ወርእዮ ለአብርሃም እምርኁቅ ወለአልዓዛር ውስተ ሕፅኑ። ወጸውዐ ወይቤ አባ አብርሃም ተሣሀለኒ ወፈንዎ ለአልዓዛር ከመ ይጥማዕ ጽንፈ አጽባዕቱ ማየ ወያቍርረኒ ልሳንየ እስመ ሐመምኩ በዛቲ እሳት። ወይቤሎ አብርሃም ተዘከር ወልድየ ዘከመ ፈጋዕከ ወተፈሣሕከ በሕይወትከ ወአልዓዛርሰ ከማሁ ክመ በተጽናስ ወይእዜሰ ከማሁ ክመ ውእቱ ይትፌሣሕ በዝየ ወአንተሰ ተሐምም። ወምስለ ዝንቱ ኵሉ ጸድፍ ዐቢይ ይከልአነ ማእከሌነ ወማእከሌክሙ ከመ እለሂ ይፈቅዱ እምለፌ ይኅልፉ ኢይክሀሉ መጺአ ኀቤክሙ ወእለሂ መንገሌክሙ ኢይዕድዉ ኀቤነ። ወይቤሎ እስእለከ አባ አብርሃም ትፈንዎ ለአልዓዛር ቤተ አቡየ። እስመ ሀለዉ ኀምስቱ አኀውየ ይንግሮሙ ወይስምዑ ወኢይምጽኡ እሙንቱሂ ውስተ ዛቲ ብሔረ ሕማም። ወይቤሎ አብርሃም ቦሙ ሙሴ ወነቢያት ኪያሆሙ ለይስምዑ። ወይቤሎ አልቦ አባ አብርሃም አሐዱ እምነ ምዉታን ለእመ ኢሖረ ኀቤሆሙ ወለእመ ኢነገሮሙ ኢየአምኑ ወኢይኔስሑ። ወይቤሎ አብርሃም ለእመሰኬ ሙሴሃ ወነቢያተ ኢይሰምዑ እመሂቦ ዘተንሥአ እምዉታን ኢይሰምዕዎ ወኢየአምንዎ።

ऐका ወንጌል ዘሉቃስ 16