Muria, Far Western: Muria Far Western (NT)

Muria Far Western

पजा येसु आपुनोर बारा खास चेलाहकुन हेरे केयस, अशुत्मातुन पसिहाना सबोय प्रकारतांग बिमारि अनि कमजोरितुन सुदरे कियाना अदिकार हितुर।
येर बारा खास चेलाह लोकुरा पोरोय इदाम मन्ता,
पहलेटोर पतरोस पोरोयतोर शिमोन,
अनि ओनोर तमो अन्दरियास,
जबदिनोर मरि याकुब,
अनि ओनोर तमो युहन्ना,
फिलिप्पुस,
अनि बरतुल्मे,
थोमा अनि टाक्स येतवाल मत्ति,
अलफायिनोर मरि याकुब,
अनि तदे,
शिमोन कनानि,
अनि येसुन पयपिहतुर ओर इस्करियोति यहुदा।


येसु आपुनोर खास बारा चेलालोरकुन सेवा साटि लोहानपा ओरकुन इदाम आग्या हितुर, “यहुदि आयोर लोकुरकनिके हन्माट, अनि सामरि जातितोर लोकुरा प्रदेशते हन्माट। मति इस्रायेल परिवारतोरा लेस्कता बेळांगना हेरेय हन्ट। अनि निमाट हन्दानपा ‘स्वरग राज्य हेरे वाता’ इदाम वेहचोर हन्ट। बिमार लोकुरकुन सुदरे किम्ट, हातोरकुन जितो किम्ट, कोळि बिमारि लोकुरकुन शुद्ध किम्ट, दुष्टात्मातुन पसिहाट। मिकुन फुकोटते इद आशिष हिन्तोना इन्जोर निमाट वने इद आशिष दुसरोन फुकोटते हिम्ट। आपुन हन्दान्पा पिसवितिगा सोनो या चान्दि या तांबाता डबुंग इरमाट। हन्दान्पा जोरिया पयमाट, रन्ड बन्डिंग पयमाट, हरपुह अनि बळगा पयमाट। बाक्याकि रोजि केवान ओना जेवन पुटिला पहाजे। बोदायि सहेर या नाटेनिगा दाकिट ते अगा बोर विस्वास योग्य मन्तोर इन्जोर मालुम किम्ट। अनि अगडाल पसियविट अचोवनाह ओनाय लोतिगा मन्ट। निमाट बोदे लोतिगा हन्दान्पा ओद लोतोरकुन सुख-शान्ति इन्जोर वेहाट। ओद लोतोरक विस्वासयोग्य मन्दानुर ते मिया नमस्कारता सुख-शान्ति ओरागा अवार, मति ओरक विस्वासयोग्य हिलवेक मिया नमस्कारता सुख-शान्ति मिया हेरे मल्स वायार। बोरायि मिकुन स्विकार केवोर अनि मियांग पोल्लोंग केन्जोर आयनुरक ते ओद लोताल या ओद नाटेनिगडाल पसियानपा आपुना काल्कना डुन्डोतुन कसियसिम्ट। अनि परमेस्वरना न्यायता दिया मिया पोल्लो केन्जोर ओद नाहकतुन सदोम अनि अमोरा देशताल वने पकाय जास्ति दन्ड हियानुर इन्जोर नना मिकुन खरोय वेहान्तोना।”


येसु ओरकुन असा इतुर, “नना मिकुन बेळांग लेहका हुंडराहना नडुम लोहान्तोना इन्जोर तरास लेहका बुद्धिवाले अनि परेवा लेहका निषकपट बनेमाम्ट। मति लोकुरकताल हुशार मन्ट, बाक्याकि ओरक मिकुन हजोर सभातिगा सोपे कियानुरक, अनि आपुना समाज मन्डलितिगा मिकुन सोटाते हियानुरक। निमाट नावोर चेलाह आन्दिट इन्जोर मिकुन अदिकारि अनि राजाहना मुने ओयनुर, अनि निमाट ओरकुन अनि यहुदि आयोर लोकुरकुन नावा गवाहि हियाना सन्दि आयार। ओरक मिकुन पयस कोरटतिगा ओयनुर असके मिकुन बाताल इन्दाना या बदाम इन्दाना मन्ता इन्जोर चिन्ता केमाट बाक्याकि बारायि अगा मिकुन इन्दा लागार, ओद ओदे बेरा पवित्र आत्मा मिकुन वेहचियानुर। बाक्याकि वळकवाल निमाट आयविट, मति मिवोर स्वरगतोर बाबोना आत्मा मियागा वळकान्तोर।”
येसु असा ओरकुन इतुर, “तमो, तमोन अनि बाबो मरिन हव्काना साटि सोपे कियानुर, अनि बालक अवाल-बाबोना विरोदते तेदचुन ओरकुन हव्काहनुरक। नावा पोरोयता कारणते सबोय लोकुरक मिकुन होंग कियानुरक, मति बोर आकरि वनाह हिमत पयस मन्दानुर ओरे पिसानुर। ओरक मिकुन उन्दि प्रदेशते सतेह कियानुर ते दुसरो प्रदेशतिगा विचोर हन्ट। नना मानेयतोर मरि मलस वायनुर अचोवनाह निमाट इस्रायेल लोकुरा सबोय प्रदेश वलियस मारिहवि आयकिट इन्जोर नना मिकुन खरोय इन्तोना।”
येसु असा ओरकुन इतुर, “चेलाल आपुनोर गुरुताल हजोर आयोर, अनि दास आपुना मालकालताल हजोर आयोर। गुरुना लेहका चेला आयनुर ते ओन सन्तुष्ट आयिला पहाजे अनि दास मालकाना लेहका आयनुर ते ओन सन्तुष्ट आयिला पहाजे। ओरक लोतोर मालकान दुष्टात्माता मुक्याल मन्तोर बेलजबुल इदाम इन्किट ते ओना लोतोर लोकुरकुन बचोन खराब पोरोय इन्दानुर?”


येसु असा इतुर, “इन्जोर निमाट मानेयकुन वरियमाट, बारायि मकता मन्ता ओद सबोय उन्दि दिया जरुर दिसार। अनि गुपित मन्ता ओद सबोय चिज उन्दि दिया जरुर तोहानुर। नना बोद मिकुन आन्दारते इन्तोना अदेन निमाट वेळिचितिगा इन्ट, नना बाताले मिया कविदिगा पुसपुस इतोना अदेन निमाट ओरा लोन पोरो अन्जुन वेहाट। केवल मेन्दुलतुन हव्क परान्तोर मति आत्मातुन हव्क परोर इदाम लोकुरकुन वरियमाट। मति मेन्दुल अनि आत्मा इव रन्डासकुन नरकतिगा नाश किया परान्तोर ओर परमेस्वरिन वरियाट। गारासुळियाना बारेता हुळा अदेन बाताले किमत हिले, बाताल उन्दि डबुते रन्ड गारासुळियाल पिटेंग मोमविट बहे? ते वने मिवोर बाबो परमेस्वर पुनवाय अवेहनिगाडाल उन्दि वने दरतितिगा अरिलापरो। मिया तलातिगा बचोक कल्क मन्तांग अदेन वने परमेस्वर पुन्तोर। इन्जोर निमाट वरियमाट, पकाय गारासुळिया पिटेंगताल मिया किमत पकाय मन्ता।”


येसु असा इतुर, “बोरायि मानेयना मुने नाकुन मानेमायनुर ओन नना वने आपुनोर स्वरगतोर बाबोना मुने मानेमायका। मति मानेयना मुने बोरायि नाकुन पुनोन इन्दानुर ते ओन नना वने स्वरगतोर नावोर बाबोना मुने नना पुनोन इनका।”


येसु असा ओरकुन इतुर, “नना दरतितिगा मिलेह कियान साटि वातोना इदाम समजेमायमाट, नना मिलेह कियाला आयो मति अलग कियालाय वातोना। नना मानेयतुन ओनोर बाबोना विरोदते, अनि पेडिन अदेना अवहारिना विरोदते, अनि कोळयान आपुना पोयाळना विरोदते कियान साटि वातोना। मानेयनोर दुश्मन ओनोर लोतोरेय लोकुरक आयनुरक।”
येसु ओरकुन इतुर, “नावाताल पकाय अवाल या बाबोन मया किन्तोर नावा योग्य हिलेर, अनि पेकाल या पेडिन नावाताल पकाय मया किन्तोर ओर नावा योग्य हिलेर। अनि आपुना कुरुस ताहचुन आपुना तकलिपतुन सहेन किस नावा परके ताकोर, ओर नावा योग्य हिलेर। इद दुनियाता जिवातुन पकायि महत्व हिस आपुना जिवातुन पिसहाना कोसिस किन्तोर ओर मानेय अनन्त जिवन पुटिहला परोर। अनि नावा साटि इद दुनियाता जिवन हिन्तोर ओर मानेय अनन्त जिवन पुटहानुर।”


येसु असा ओरकुन इतुर, “मिकुन स्विकार किन्तोर, ओर नाकुन स्विकार किन्तोर, अनि नाकुन स्विकार किन्तोर, ओर नाकुन लोहवालिन स्विकार किन्तोर। परमेस्वरना पोल्लो वेहवालिन ओर परमेस्वरना पोल्लो वेहवाल मन्तोर इदाम समजेमास येतान्तोर ओर मानेयतुन परमेस्वरना पोल्लो वेहवालना प्रतिफळ पुटार; अनि परमेस्वरना मुने येताना योग्य मानेयतुन, परमेस्वरना मुने येताना योग्य मानेय इदाम समजेमास येतान्तोर ते ओन परमेस्वरना मुने येताना योग्य मानेयना प्रतिफळ पुटार। बोरायि येर हुडलोरनिगाडाल वरोन नावोर चेलाल समजेमास केवल उन्दि गिलास दळिंगता एर उहिर ते ओर आपुना प्रतिफळ पुटहानुर इन्जोर नना मिकुन खरोय इन्तोना।”

ऐका मत्ति 10