Taa -GP (NT) Drama

Wali mosumo temponya roa to danapangangkoni nto Yahudi roti to tare raginya. Roa etu rato’oka Roa Paskah. Wali tempo etu kepala-kepala nto pampue pasi tau to mampoguru porenta i Musa, sira mangaliwu jaya see sira maya mampopate yau i Yesu. Sira mampobuuka kojo ewa wimba daraika see tau boros taa mangansani apa tau boros etu malagi sira to mampobuuka i Yesu Ia to pantuntu tuntu i mPue Allah. Wali kepala-kepala nto pampue pasi yununya sira mampokeka bara danapoja’a ntau boros ane mampopate yau i Yesu.


Wali tempo etu i Kepala Measa mamposuak samba’a anaguru i Yesu to sampuyu pei dua etu. Sanga ngkai to raposuak etu i Yudas to rato’oka seja Iskariot. Wali i Yudas yau resi kepala-kepala nto pampue pasi resi kepala-kepala ntau to mangajagai banua i mPue Allah. Ia magombo-gombo resi sira mangkonong ewa wimba danaika mamposora yau i Yesu resi sira. Wali sira masanang kojo raya nsira pasi mamparajanjika damangawaika i Yudas doi. Wali i Yudas singkonong, see naka ia mangaliwu jaya to matao damamposora yau i Yesu tempo tare tau boros.


Wali yako etu ratamo eo to napangangkoni nto Yahudi roti to tare raginya. Ri eo etu nasambale yau nsira ana nu domba to darakoni ri Roa Paskah. Wali tempo etu i Yesu mampokau i Petrus sira dua i Yohanes, Ia manganto’o, “Inta pei pasigenaka kita pangkoni nu Roa Paskah.”
Wali sira mampotanaka resi Ia, sira manganto’o, “Imbare Komi rani kami mampasigena pangkoni etu?”
Wali Ia manganto’oka sira, “Inta njo’u kota. Tempo komi masua ri raya ngkota etu, komi dasimparata pei tau to mamposa’a tampa nue to la’u ue ri rayanya. Wali lulu ngkai etu imbare banua napasua. Wali ane jela ri banua etu, to’oka tau pue banua etu, ‘Guru ngkita manganto’oka kami mampotanaka bara imbare songi to danapake damangkoni ri Roa Paskah sindara-ndara pei anaguruNya?’ Wali tau pue banua etu damansuduka komi samba’a songi to bae. Songi etu ndate juya kadua ntampenya pasi ndatemo samparia anu to kita damampake. Wali ndate ria semo komi damampasigena pangkoni.”
Wali ojo karoonya i Yesu magombo, anaguruNya dua mba’a etu mayoko, yau ri kota. Rata nja’u ria, mawali samparia ewa wimba to nato’oka i Yesu sira. Wali sira dua mampasigena pangkoni to darakoni ri tempo Roa Paskah etu.
Panewa yako etu ane ratamo temponya mangkoni, i Yesu yau njo’u banua to pangampasigena nu anaguruNya pangkoni etu. Panewa Ia matunda mangkoni sindara-ndara pei anaguruNya to sampuyu pei dua etu to rato’oka seja pomakauNya.


Wali ri rayanya sira mangkoni etu, i Yesu manganto’oka sira, “Aku rani kojo rayangKu mangkoni ri Roa Paskah si’i sindara-ndara pei komi re’e katawanya Aku mangarata kasesa. Apa Aku manganto’oka yami komi, ane karoonya kita mangkoni nene si’i, Aku tawa damangkoni wo’u muni ri Roa Paskah. Pei ri tempo to darata, tempo i Pue Allah mawali Makole ri lino, tempo etu semo Aku damangkoni wo’u. Apa tempo etu Aku roomo mangika palaong to mampakanasa batuanginya Roa Paskah si’i.”
Wali yako etu i Yesu mangoko sangkir to la’u tule anggur pei manganto’oka i Pue Allah, “Tarima matao.” Roo see Ia manganto’oka anaguruNya, “Oko si’i pei inu ratilaka samba’a pei samba’a. Apa Aku manganto’oka wo’u komi, Aku tawa damanginu wo’u muni tule anggur. Pei ri tempo to darata, tempo i Pue Allah mawali Makole ri lino, tempo etu panewa Aku damanginu wo’u.”
Wali yako etu Ia mangoko roti pei manganto’oka i Pue Allah, “Tarima matao.” Roo see Ia mangampesu-mpesutimo roti etu panewa Ia mangantilaka anaguruNya. Ia manganto’o, “Oko pei koni, apa si’i korongKu anu to Kuwaika komi. Konimo see taa nukalingan ngkomi Aku.”
Pasi ewa see seja tempo sira roomo mangkoni i Yesu mangoko wo’u sangkir to la’u tule anggur. Panewa Ia manganto’o, “Anu to nuinu ngkomi ngena si’i, si’i semo raangKu. Apa Aku damate mangkapateka komi, wali raangKu ri tempo Aku mate etu, raangKu etu mawali tondong parajanji to bou to naika i mPue Allah resi to lino. Pei lo’a, tau to damamposora yau Aku, tau etu matunda seja ri meja si’i sindara-ndara pei Aku. Aku Wiyaa nto Lino, pei monso pu’u Aku damate ewa to roomo rapakanasa yami ri raya ntuntu i mPue Allah. Pei tau to damamposora yau Aku, ia damasesa kojo.”
Wali ojo pangandonge nu anaguru i Yesu gomboNya etu, sira mula masipotanaka rani mangansani bara to imba sira to damangika palaong to etu.


Pasi yako etu anaguru i Yesu sira masibanta mangkonong to imba sira to darato’oka to bae kojo angganya. Wali i Yesu manganto’oka sira, Ia manganto’o, “Ane makole-makole ntau to si’a to Yahudi, sira mampakasaaka tau mangalulu porenta nsira. Pei nempo ewa wetu sira tiroo rani rato’oka ‘tau to manoto’. Pei ane ri oyo ngkomi si’a ewa see. Ane ri oyo ngkomi, i sema to rani mawali bae angganya, tau etu to tao-tao mawali ewa tau to kodi kojo angganya. Pasi i sema to rani maporenta, tau etu to tao-tao ia mawali ewa to papolaong. Apa ane ewa pampobuuka ngkomi, to imba to bae-bae angganya, bara tau to matunda mangkoni bara to papolaong to mangkenika ia pangkoninya? Gete, tau to matunda mangkoni semo! Pei nempo ewa wetu, Aku to nato’oka ngkomi bae anggaNya, pei Aku re’e ri oyo ngkomi ewa to papolaong. Wali ane komi, nempo Aku mangarata pansoba, pei komi tare mampiyaika Aku. Wali see naka ewa naika mPa’angKu mangawaika Aku kuasa damaporenta, ewa see seja daKuwaika komi kuasa damaporenta seja sindara-ndara pei Aku. See naka ane ratamo temponya Aku mawali Makole ri lino, komi maya mangkoni pasi manginu sindara-ndara pei Aku. Pasi komi maya matunda ri gadera to mawali tondong kuasa ngkomi pei mamporentang suku nto Israel to sampuyu pei dua.”


Wali yako etu i Pue Yesu manganto’oka i Petrus, Ia manganto’o, “O Simon, Simon, padongeka gombongKu si’i. Apa i Kepala Measa roomo marapi damangansoba komi samparia. Pasi ia nawaika i mPue Allah mangika palaong to etu. Wali tempo ia mangansoba komi etu, pansoba etu maya raporapaka ewa mangantapis pae, apa yako pansoba etu damiyala pangaya ngkomi bara ewa wea bara ojo ewa otanya. Pei Aku roomo mampokaika korom, Simon, see korom taa dapura kojo pangayamu. Korom damangandolika tangomu yako resi Aku pei tempo korom mangandolika muni tangomu resi Aku, tempo etu pakaroso pangaya nu yunumu si’i.”
Pei ojo pangandonge i mPetrus gombo i Yesu etu, ia manganto’o, “Pue, aku taa kojo damangandolika tangongku yako resi Komi. Ane Komi ratarungku aku damangalulu Komi. Pasi ane Komi rapopate yau, aku nempo rapopate yau seja sindara-ndara pei Komi, aku buya rayangku.”
Pei i Yesu mangansono, “Petrus, Aku manganto’oka korom, re’e katawanya manu matotoro’o nene si’i, korom togo ngkanimo damamposapuka Aku. Korom damanganto’oka sa’e korom taa mangansani Aku.”

Wali yako etu i Yesu mampatiendoka samparia anaguruNya mangkonong palaong to nawali seore, Ia manganto’o, “Pobuuka seore tempo Aku mampokau komi yau pei manganto’oka komi ne’e mangkeni doi, tas, bara sandal to yabi yako sandal to nupake ngkomi. Wimba tempo palinja ngkomi etu, bara re’e to napo’ipu ngkomi?” Wali sira mangansono, “Tare.”
Wali i Yesu manganto’oka sira, “Pei tempo si’i Aku manganto’oka komi to tao-tao komi sigena mangararamaka koro ngkomi, see naka ane bara re’e doi, keni doi etu. Pasi ane bara re’e tas, keni seja. Pasi ane komi tare wada, matao ane mampobalu yau juba pei mangampake doi etu damangoli wada. Apa Aku manganto’oka komi, gombo to ratulis ri raya ntuntu i mPue Allah mangkonong Aku, gombo etu taa maya taa datibanang. Wali gombo to mangkonong Aku etu manganto’o,
‘Ia rabotus panewa Ia rato’oka seja samba’a tau to mangewa porenta i mPue Allah.’
(Yesaya 53:12)
Wali gombo etu tamo masae datibanang.”
Wali anaguru i Yesu manganto’o, “Lo’aja Pue, kami dua mata wada mami.” Wali i Yesu manganto’oka sira, “Ane ane wetu ganam.”


Wali yako etu i Yesu yau ri Tongku Saitun ewa to biasa resi Ia. Pasi tempo Ia yau etu anaguruNya yau mangalulu Ia. Rata nja’u ria Ia manganto’oka anaguruNya, “Pakai-kai see nempo ragoda, komi taa mangaluluka.” Roo see i Yesu yau wo’u njo’u sangkodi, bara togo mpuyu meter kalongkonya. Rata nja’u ria Ia mambokotu pei makai-kai resi i Pue Allah. Ia manganto’o, “O Pa’a, ane bara re’e jaya, limba kasusa to dakurata si’i. Pei ne’e raluluka pamporaningKu. Biakamo pamporani ngKomi semo damawali.”
Wali ojo karoonya i Yesu manganto’o pokai-kai etu, rata samba’a pomakau i mPue Allah yako ndate saruga, ma’i mampakaroso Ia. Roo see i Yesu mawali mapari wo’u kasesa ndayaNya, see naka Ia maroso wo’u pokai-kaiNya resi i Pue Allah. Pasi panenya ewa raa saka ntede tudu ri wawo ntana.
Wali ojo karoonya Ia makai-kai etu, Ia makore pei mawolili muni resi anaguruNya, pei Ia mangarata sira tongo ngkayorenya apa sira manganga kojo naika ngkamawo ndaya nsira. Wali i Yesu mangalike sira pei manganto’oka sira, “Maka pei komi yore? Pambangumo pei pakai-kai see nempo ragoda, komi taa mangaluluka.”


Wali tongo-tongonya i Yesu mampogomboka anaguruNya etu, ratamo tau boros. Pasi tempo sira ma’i etu, re’e tau to mata njaya nsira, tau etu semo tau to rato’oka i Yudas. Ia samba’a anaguru i Yesu yako ri sampuyu pei dua mba’a etu. Wali ojo karata i Yudas etu ia mangampago i Yesu damanganengu Ia. Pei i Yesu mampotanaka resi ia, Ia manganto’o, “O Yudas, korom manganengu Aku, Wiyaa nto Lino, pei wimba, korom bara mangampake tondong pamporayang etu damamposora yau Aku?”
Wali anaguru i Yesu to re’e mangalulu Ia tempo etu, sira mangansani anu to damawali, see naka sira manganto’o, “Wimba Pue, kami bara mangansayuka yau sira wada?” Wali samba’a sira mangasayu yau ira ntalinga to tondo ngkana nu to papolaong ngkepala nto pampue to bae angganya.
Pei i Yesu manganto’o, “Gete, ne’e!” Roo see Ia mampotaka talinga ngkai etu pei mampakatao muni.
Wali yako etu Ia magombo resi kepala-kepala nto pampue pasi kepala-kepala ntau to mangajagai banua i mPue Allah pasi tau tu’a nto Yahudi. Ia manganto’oka sira, “Maka pei komi mangangkeni wada pasi pampomobak ma’i damangansoko Aku? Wimba, komi mampobuuka Aku si’i bara tau to kara-kara? Gete, ponto-ponto eo kita sindara-ndara nja’u banua i mPue Allah, wali maka pei komi taa mangansoko Aku nja’u ria? Pei biakamo, tempo si’i semo tempo to rawaika resi komi damangansoko Aku, mangalulu pamporani i ngKepala to pantipu to mangkuasang samparia anu to maja’a to raporapaka ewa wuri.”


Wali yako etu, tau mangansoko i Yesu, pei mangkeni Ia njo’u banua ngkepala nto pampue to bae angganya. Pasi tempo Ia rakeni etu, i Petrus mangalulu Ia pei ia longko yako ri payuNya. Wali rata nja’u banua ngkepala nto pampue etu, tau to maroo-roo ri tongonatanya sira mampotuwu apu ri tongonya tongonata etu. Wali sira matunda maneru ri awe nu apu etu pasi i Petrus matunda seja sindara-ndara pei sira. Yako etu re’e samba’a to papolaong to we’a to mangkita i Petrus matunda maneru nja’u ria. Wali tau we’a etu mangalo’aka kojo ia panewa manganto’o, “Tau si’i re’e seja sindara-ndara pei i Yesu!”
Pei i Petrus mamposapu gombonya, ia manganto’o, “Indo, aku taa kunsani ngkai to to’o ngkorom etu!”
Pei taa masae yako etu, re’e tau to yusa to mangkita ia pei manganto’o, “Korom seja samba’a yunu ngkai etu!”
Pei i Petrus manganto’o, “Gete Pa’a, si’a kojo!”
Wali yako etu, bara kagananya samba’a jam, re’e wo’u tau to mangkita i Petrus. Tau etu matantu kojo rayanya see naka ia manganto’o, “Monso pu’u tau si’i re’e sindara pei i Yesu, apa ia seja tau Galilea.”
Pei i Petrus manganto’o, “Gete Pa’a! Aku taa kojo mangansani kesaa batuanginya gombo to to’omu etu.” Pei tongo-tongonya i Petrus manganto’o gombo etu, manu mansaka matotoro’omo.
Wali tempo etu i Pue mangandolika tangoNya pei mangalo’aka resi i Petrus. Panewa i Petrus mangendo muni gombo to nato’oka yami i mPue ia. Gombo etu semo manganto’o, “Re’e katawanya manu matotoro’o nene si’i, korom togo ngkanimo damamposapuka Aku.” Wali i Petrus miyai yako ri tongonata pei ngasa-ngasa tumangi.


Wali yako etu tau to mangajagang i Yesu mula mampokore pasi mangantidas Ia. Sira mangabombong lio i Yesu panewa mangajanggur. Sira manganto’oka Ia, “Ane monso pu’u Korom to pantuntu tuntu i mPue Allah, matantu Korom napaponsanika i mPue Allah i sema tau to mangajanggur Korom. Wali to’oka kami i sema mangajanggur Korom!” Pasi boros wo’u gombo to nato’o nsira manganto’o maja’a i Yesu.


Wali yako etu ojo kaeonya rao samparia tau tu’a nto Yahudi pasi kepala-kepala nto pampue pasi tau to mampoguru porenta i Musa sira siromu apa sira semo to biasa mangabotus tau to mangewa porenta-porenta nto Yahudi. Wali i Yesu rakeni mampotango sira. Wali sira manganto’oka Ia, “Ane monso pu’u Korom i Kerisitu, Makole parajanji i mPue Allah, to’oka kami.
Wali i Yesu mangansono, “Nempo Aku manganto’oka komi, komi taa damangaya gombongKu. Pasi nempo Aku mampotanaka resi komi sabanya naka pei komi taa mangaya Aku semo i Kerisitu, Makole Parajanji i mPue Allah, ane ewa see komi taa damangansono. Pei Aku manganto’oka komi, yako ri tempo to si’i Aku, Wiyaa nto Lino, damatunda ri tampa to bae angganya ri tondo ngkana i mPue Allah anu makuasa.”
Wali ojo pangandonge nsira gombo i Yesu etu, sira samparia mampotanaka wo’u resi i Yesu, sira manganto’o, “Ane ewa see, bara monso pu’u Korom bara Ana i mPue Allah?
Panewa i Yesu mangansono, Ia manganto’o, “Monso pu’u ewa nuto’o ngkomi.”
Wali ojo pangandonge nsira gombo i Yesu etu, sira manganto’o, “Gete! Kesaa taporanika wo’u matamanasa? Kita mangandongemo gombo to si Ia etu. Ia mampoanika Ana i Pue Allah!”

ऐका Lukas 22