If you have would like a copy of this version please contact info@davarpartners.org

Pahari Mahasu New Testament, CC-BY-SA-4.0, The Love Fellowship (Text), Pahari Mahasu New Testament Audio Bible, CC-BY-SA-4.0, Davar Partners International, 2021 (Audio)

Pahari Mahasu New Testament

This work is licensed under Creative Commons Attribution-ShareAlike 4.0 License.

इऊं बुशेऊ कु छ़ौ दिना बासिऐ यीशुऐ पतरस और याकूब और तेसरौ भाई यहुन्ना आपु आइलै प्राथना कौरदै निऐं, और सै एकान्ता दी केज़ी उंच़ी धारा दी डेवै। ज़ैबै यीशु प्राथना कौरदै लागौ, तैबै प्राथना कौरदै-कौरदै यीशु रै मुंआ रौ रूप बौदल़ुई गौ, और यीशु रै जुड़कै उज़ल़ै हुइयौ च़मकुंदै लागै। तिऐ तिउंकै पुराणै ज़मानै रै दुई भविष्यवक्ता दिशै, सै थै यीशु आइलै बुशै लाइंदै लागै औन्दै। एथ माथै पतरसै यीशु लै बोलौ, “ओ प्रभु, आमारौ इदै रौइणौ भौलौ आ। अगर तेरी इच़्छ़ा हुआ ता हाऊं इदै चीन ताम्बु चाणाऊ। एक ताऊं कालै, एक मुसा भविष्यवक्ता कालै, और एक एलियाह भविष्यवक्ता कालै।” ज़ेबी सेऊ बोलदै थौ लागौ औन्दौ कि तेबी ई सौरगा दी बादल कौठै हुऐ और सै बादल़ा दी घेरुई गौऐ, और तैबै बादल़ा मांझ़िऐ कु एक हाक शुणुई “एऊ मैरौ प्यारौ छ़ोहरु आ, एसकु हाऊं भौरी खुश ऊ एसरी शुणौ तैबै च़ेलै इणौ शुणियौ धौनी पौड़ी गौऐ, और सै भौरी डौरी गौऐ।” यीशुऐ च़ेलै काऐ डेइयौ सै छ़ुंऐ, और तिउंलै बोलौ, “उज़ीयौ, डौरौ नाईं।” तैबै तिंउऐ आपणी आखी खोली और तिंउऐ तिऐ यीशु एखुली देखौ। ज़ेबी सै टिरा कु डेउंदै थै लागै औन्दै ता यीशुऐ तिउंलै एज़ौ हुकम दैऔ, “ज़ेबी झ़ांऊ आदमी रौ छ़ोहरु मौरै औन्दै मांझ़िऊ कु ज़िउंदौ नाईं हुआ लौ, तेबी झ़ांऊ ज़ो कुछ़ तुमुऐ देखौ आ कासी कै ना बोलीयौ।” एथ माथै यीशु रै च़ेलेउऐ तेसकु पुछ़ौ, “तैबै शास्त्री लोग कैलै बोलाई कि एलियाह सौभी कु पैहलै आशा?” यीशुऐ तिउंलै ज़वाब दैऔ, “एलियाह ज़रूर आशा, और सब कुछ़ सुधारा लौ। पर हाऊं तुमुलै बोलाऊ कि एलियाह आशी गौ आ, और लोगुऐ सेऊ नाईं रवावौ। पर ज़िणौ च़ाऔ तिणी ई तेस आइलै कियौ। एज़ी रीती कु आदमी रौ छ़ोहरु भी तिंउरै हाथा कौरी दुःख उठावा ई। तैबै यीशु रै च़ेलेउऐ सौमझ़ौ कि यीशु आमुकै यहुन्ना बपतिस्मौ दैणै वाल़ै रै बारै दी बोलौ आ।”


ज़ेबी सै भीड़ा काऐ पौउंच़ै, ता एक आदमी यीशु काऐ आशौ, और घुण्डै माथै टेकियौ बोलदै लागौ, “ओ प्रभु, मैरै छ़ोहरु माथै दया कर! कैलैकि तेसरै मुंआ दी आशा ई शेफै, और सेऊ भौरी दुःख उठावा। और केबी सेऊ आगी दी और केबी सेऊ पाणी दी लोटा सा। मुंइऐ तैरै च़ेलेऊ कु औरज़ की थी कि मैरौ मांऊ ठीक कौरौ, पर सै मैरौ मांऊ ठीक नाईं कौरी बौल़ै।” यीशुऐ ज़वाब दैऔ, “का कौरुलै, तुमुकै मुं माथै इबी झ़ांऊ विश्वास नाईं आसतौ? तुमारौ मन ता भौरी काठौ आ, हाऊं केबी झ़ांऊ रौआऊ तुमु आइलै और केबी झ़ांऊ सहन कौराऊ? आपणौ छ़ोहरु इदै आण। तैबै यीशुऐ सै बुरी आत्मा डांटी, और सै बुरी आत्मा तेसकु निकल़ी गोई। और सेऊ छ़ोहरु तेबी ठीक हुई गौ।” तैबै च़ेलेउऐ एखुलै दी यीशु काऐ आशीयौ बोलौ, “आमुकै सै बुरी आत्मा कैलै ना गाड़ुई?” यीशुऐ तिउंलै बोलौ, “आपणै विश्वासा रै कामी री वज़ाह कु, कैलैकि हाऊं तुमुलै सौच़्च़ौ बोलाऊ, अगर तुमारौ विश्वास राई रै गुल़ै रै बराबर भी हुआ, ता इऐ पहाड़ी कु बोली सौका, ‘इदरु डेइयौ इदै डेऊ, ता सेऊ डिया लौ। और कोई भी बूश तुमुलै कठिण नाईं हुआ ली।’ पर इऐ ज़ाती बिण प्राथना और उपवासा कौरी नाईं निकुल़दी।”


ज़ेबी यीशु और तेसरै च़ेलै गलील परदेशा दी थै, ता यीशुऐ तिऊं लै बोलौ, “आदमी रौ छ़ोहरु लोगु रै हाथा दी पकड़वाइआ सा। सै तेस झ़ांगाई, और सेऊ चिजै दिनै ज़िउंदौ हुआ। एथ माथै सै भौरी उदास हुऐ।”

ज़ेबी सै कफरनहूम इलाकै दी पउंच़ै, ता परमेश्‍वरा रै घौरा रै मामलौ निणै वाल़ेउऐ पतरसा काऐ आशीयौ तेसकु पुछ़ौ, “का तुमारौ गुरु परमेश्‍वरा रै घौरा रौ मामलौ नाईं दैंदौ?” पतरसै बोलौ, “ओ, दिआ सा।” ज़ेबी सै घौरा दी आशै, ता यीशुऐ पतरसा कु पुछ़णै कु पैहलै ई तेसलै बोलौ, “ओ शमौन, तू का सुंच़ाई? धौतरी रौ राज़ौ मामलौ कासकु निआं ई? आपणै छ़ोहरु कु या पराऐ कु?” पतरसै यीशु लै बोलौ, “बिगानै कु। यीशुऐ पतरसा लै बोलौ ता छ़ोहरु बौच़ी गौऐ।” तैबै भी एथीलै कि आमै तिउंलै ठोकर ना लाइलै, तू झ़िला रै डिका काऐ डेइयौ ज़ाल़ पा, और ज़ो माच़्छ़ी पैहलै निकल़ा ली, तिऐं निऊं। तियांरौ मूंह खोलदी बारै ताउंकै च़ांदी रौ एक सिक्कौ मिला आ, तेस नीईंयौ मैरै और आपणै बौदल़ै तिउंकै दैऔ।

ऐका मत्ती 17