The Kisi Old Testament

Kisi Bible © Bible Society in Liberia, 2015.

A̍ bōōndi̍i̍ ke̍ŋ, māsāa̍ ā wa̍ nda̍ hi̍ɔ̍ɔ̍lu̍, Āmīlu̍a̍fɛ̄ɛ̄l, o̍ wa̍ māsāa̍ le̍ Ba̍bi̍lɔ̄ŋ ndo̍ ni̍, a̍ A̍līɔ̄ɔ̄, māsāa̍ le̍ Ɛ̄la̍a̍sā, a̍ Chɛ̄dɔ̄la̍wo̍mā, māsāa̍ le̍ Ɛ̍lām, a̍ Ti̍dāl, māsāa̍ le̍ Ko̍yīm. Mi̍ māsāa̍ ha̍ā ā chūāū nda̍ māsāā che̍le̍ŋ, nda̍ ŋu̍ɛ̍ɛ̍nu̍ ku̍ndā. Nda̍ cho̍ ha̍ā ni̍, Bɛ̍lūā, o̍ wa̍ māsāa̍ le̍ So̍dɔ̄m ndo̍, a̍ Ba̍a̍sīā, māsāa̍ le̍ Kōmo̍o̍lūā, a̍ Si̍na̍bī, māsāa̍ le̍ A̍di̍māā, a̍ Sīɛ̄mɛ̍bā, māsāa̍ le̍ Sɛ̄bo̍yīm, a̍ māsāa̍ le̍ Bɛ̍lā. Bɛ̍la̍ nda̍ vēēlū vɛ̍lɛ̄ ni̍ āā, So̍wā. Mi̍ māsāā ŋu̍ɛ̍ɛ̍nu̍a̍a̍ ha̍ā ā dūāū so̍vɛ̄i̍ya̍a̍ ndāa̍ dīōm pīlɛ̍, ma̍ chūūŋgi̍āŋ o̍ fo̍ndāŋndo̍ dīōla̍ŋ āā, Si̍dīm, o̍ pēmbo᷄ŋ tɛ̄ɛ̄ŋ. Ā vēēlū ni᷄ŋ fo̍ndāŋ ko̍ŋ dīōla̍ŋ āā, Pēē Mɛ̄ŋmā Īhɛ᷄llo̍ le̍ wo̍. Le̍ wɔ̄sīla̍ŋ tɔ̍ a̍ lā tīɔ̍ɔ̍ŋ māsāa̍ le̍ So̍dɔ̄m, a̍ Kōmo̍o̍lūā, a̍ A̍di̍māā, a̍ Sɛ̄bo̍yīm, a̍ Māsāa̍ Bɛ̍lā, ā wa̍ Chɛ̄dɔ̄la̍wo̍mā o̍ bā bɛ̄ŋgu̍. Kɛ̍ o̍ wɔ̄sīlā tɔ̍ a̍ lā yāa̍ la̍ŋ, ma̍ chɛ̄la᷅ŋ le̍ ndu̍ fūlāa̍ o̍ bā bɛ̄ŋgu̍. O̍ wɔ̄sīlā tɔ̍ a̍ lā hīɔ̍ɔ̍lu̍la̍ŋ, mi̍ Chɛ̄dɔ̄la̍wo̍mā nda̍ māsāa̍ nda̍ wa̍ o̍ dīōm pīlɔ̍ɔ̍ ni᷄ŋ nda̍ ā hu᷅ŋ sa̍ā kāa̍la̍ŋ lā pīlɛ̍la̍ŋ a̍ sɔ̍ŋgɔ̄ɔ̍, ndu̍yɛ̍ ma̍ yām kāa̍la̍ la̍ŋ. La̍ŋ la̍ cho̍ la᷅ŋ ni̍. Kāa̍le̍ Lu̍ɛ̍fēm nde̍ŋ, a̍ wa̍ Āsītɛ̄lɔ̄ɔ̄ Ka̍na̍yīm nda̍, a̍ kāa̍le̍ Su̍sīm nde̍ŋ, a̍ wa̍ Ha̍ām nda̍, a̍ kāa̍le̍ I̍mīm nde̍ŋ, a̍ wa̍ Sīāvɛ̄ɛ̄ki̍li̍a̍a̍tēm nda̍, a̍ kāa̍le̍ Ho̍lu̍a̍i̍tīi̍le̍ŋ, a̍ wa̍ o̍ lɛ̄ŋndē īpēmbūle̍ŋ Sɛ̍yāā wa̍. Ma̍ fūūlūū a̍ chɔ̄ūwo̍ Ɛ̍pa̍lūāŋ di̍ o̍ po̍llo̍ hōlnɔ᷄ŋndo̍. O̍ ko̍ŋ kɔ̍ɔ̍lī, ma̍ mūli᷄ŋ, ma̍ kūā Ɛ̄ŋmi̍si̍pā mā vēēlū ni᷅ŋ lo̍ŋ āā Ka̍dɛ̍sī, ma̍ kɔ̍ yo᷅m lɛ̄ŋndē Āma̍la̍kāi̍tīi̍ya̍ fa̍ū, a̍ lɛ̄ŋndē Āmɔ̄lu̍a̍a̍tīi̍ya̍ a̍ wa̍ Hāsāsɔ̄ŋ Ta̍māā wa̍.
O̍ ko̍ŋ, māsāa̍ So̍dɔ̄m chi̍e̍e̍ ni̍, a̍ māsāa̍ Kōmo̍o̍lūā, a̍ māsāa̍ A̍di̍māā, a̍ māsāa̍ Sɛ̄bo̍yīm, a̍ māsāa̍ Bɛ̍lā, mā vēēlū ni᷄ŋ lo̍ŋ āā, So̍wā, nda̍ ŋu̍ɛ̍ɛ̍nu̍ ma̍ dūāūnu᷅ŋ na̍a̍ pi᷅lɛ̍ ma̍ kūā o̍ pēmbo᷄ŋ tɛ̄ɛ̄ŋ Si̍dīm. Ma̍ kɔ̍ chi᷅ŋa̍la᷅ŋ ma̍sāā hi̍ɔ̍ɔ̍lu̍a̍a̍ a̍ sɔ̍ŋgɔ̄ɔ̍ lo̍ŋ. Māsāā hi̍ɔ̍ɔ̍lu̍a̍a̍ ka̍ŋ nda̍ cho̍ ha̍ā ni̍. Chɛ̄dɔ̄la̍wo̍mā, māsāa̍ le̍ Ɛ̍lām, a̍ Ti̍dāl, māsāa̍ le̍ Ko̍yīm, a̍ Āmīlu̍a̍fɛ̄ɛ̄l, māsāa̍ le̍ Si̍nāā, a̍ A̍līɔ̄ɔ̄, māsāa̍ le̍ Ɛ̄la̍a̍sā. Fo̍ndāŋ nda̍ vēēlū ko̍ŋ āā, Si̍dīm, o̍ pēmbo᷄ŋ tɛ̄ɛ̄ŋ ndo̍, so̍o̍ŋnda̍ pa̍a̍ndūlā nda̍ a̍a̍ ka̍lā Ko̍tɛ̍i̍yo̍ la̍ŋ lā wa̍ lo̍ŋ ta̍u̍. Yōmɔ̄ɔ̄ kōŋ māsāa̍ So̍dɔ̄m a̍ Kōmo̍o̍lūā nda̍ pūa̍a̍ chɔ̄ūwa̍, ma̍ sa̍āŋ kīlta̍ŋ, mi̍ ā ti᷄ŋ ā kēī dēlī o̍ so̍o̍ŋnda̍ la̍ŋ ni᷄ŋ. Mi̍ ā tūa̍a̍ ā nyāānu᷄ŋ o̍ pēmbo᷄ŋ. O̍ ko̍ŋ, wāŋnda̍ So̍dɔ̄m a̍ Kōmo̍o̍lūā, mi̍ ya̍a̍mɔ̍ɔ̍wa̍a̍ ndāa̍ ā pūŋgā nyɛ̄ o̍ nyɛ̍ wa̍ o̍ chi̍e̍e̍ŋ nda᷄ŋ, nyɛ̄ dīāā ni̍ kpo̍u̍, ma̍ kūānu᷄ŋ a̍ mu̍ŋ. E̍bīlām po̍ pɔ̄mbɔ̄ ndɔ̄ wo̍ Lɔ̍tū, o̍ wa̍ īchāli̍ So̍dɔ̄m ndo̍, ndu̍ bɛ̍ɛ̍ ma̍ bīī ndu̍, ma̍ chɔ̄ɔ̄vīāā nyɛ̄m ndɔ᷄ŋ ma̍ kūa̍ŋ a̍ ndu̍.
O̍ ko̍ŋ kɔ̍ɔ̍lī, mi̍ wānā pi᷅lɛ̍ hīālu᷄ŋ, mbo̍ hu᷄ŋ di̍mūl E̍bīlām, Hi̍būlūi̍nɔ̍. A̍ bōōndi̍i̍ ke̍ŋ, E̍bīlām wa̍ īchāli̍ o̍ fo̍ndāŋndo̍ īkɛ̄i̍, dīōla̍ŋ āā, fo̍ndāŋ yɔ̄mīī tɔ̍ɔ̍ma̍a̍. Po̍ pi᷅lɛ̍ dīōla̍ŋ āā, Ma̍mi̍lūē A̍mɔ̍lu̍a̍i̍tīi̍nɔ̍, ndu̍ ndu̍ o̍o̍ nɔ̍ fo̍ndāŋ kōŋ ni̍. Ma̍mi̍lūē ko̍ŋ pɔ̄mbūāā ndūa̍a̍ wa̍ Ɛ̍si̍kɔ̄ɔ̄ nda̍ A̍nɔ̄ɔ̄ ni̍. Ndu̍yɛ̍, chɛ̄la᷅ŋndo̍ wa̍ E̍bīlām tɛ̍ɛ̄ŋ nda̍ pūa̍a̍ ya̍a̍ wa̍ ha̍ā le̍ wāa̍ māāli̍āŋndo̍.

Mɛ̄ɛ̍ E̍bīlām tu̍e̍ī māā ā bīī wānāyɛ̍ī ndūɛ̍i̍ Lɔ̍tū o̍ chɔ̄ūwo̍ ma̍ kūa̍ŋ a̍ ndu̍, mbo̍ vēēlū pūa̍a̍ wa̍ ndu̍ o̍ bā wa̍. Ndu̍yɛ̍ ndu̍ o̍o̍ nɔ̍ pūa̍a̍ kɛ̄mɔ̄ɔ̍ lēyāa̍ a̍ ŋ̄wāŋ tɔ̍ a̍ wānāā ŋɔ̄ma̍a̍ (318), a̍ ve̍lu᷄ŋ o̍ ki̍ām ndɔ̄ɔ̍ ni᷄ŋ ma̍ pɛ̄ɛ̄kū a̍ sɔ̍ŋgɔ̄ɔ̍ o̍kɔ̄ɔ̄ wa̍. Mbo̍ sīm nda̍ lāchī ma̍ lō ya̍a̍mɔ̍ɔ̍wa̍a̍ ka̍ŋ dīōmɔ̄ɔ̍ ha̍a̍a̍ ma̍ fūūlūū di̍ Da᷅ŋ chi̍e̍e̍. Fūūlūūwo̍ Da᷅ŋ, mi̍ E̍bīlām pi̍ɔ̍ū pūa̍a̍ ndūa̍a̍ a̍ ku̍ndāla̍ŋ. Ma̍ kɔ̍ de᷅l ya̍a̍mɔ̍ɔ̍wa̍a̍ ka̍ŋ chōo̍ a̍ nyūmnda̍ŋ, ma̍ chūā nda̍ tōūwɔ̄ɔ̍ ma̍ fūūlūū a̍ nda̍ Ho̍bāā chi̍e̍e̍, ba᷅ lūāŋ ndo̍, le̍ kɔ̄la̍ŋ Dāma̍si̍kɔ̄ɔ̄. Nyɛ̄ o̍ nyɛ̄ ya̍a̍mɔ̍ɔ̍wa̍ nda̍ a̍a̍ pu̍ŋga̍ a̍ wāŋndā chīe̍e̍ya̍a̍ nda̍ bīī ya̍, wānā pɔ̍nɔ̍ ni̍, wānā la̍nɔ̍ ni̍, a̍ Lɔ̍tū pi̍la̍ a̍ nyɛ̄ o̍ nyɛ̄ ndu̍ o̍o̍ nɔ̍, mi̍ E̍bīlām pu̍ū kpo̍u̍, mbo̍ hūŋ a̍ nda̍.

Mɛ̄ɛ̍ E̍bīlām ye᷅m Chɛ̄dɔ̄la̍wo̍mā a̍ māsāa̍ ā pīli̍a̍a̍ yōmɔ̄ɔ̍ kōŋ, mbo̍ mūli᷄ŋ mi̍i̍ŋgōo̍ o̍ ndu̍ lo̍. Mɛ̄ɛ̍ o̍ wa̍ mīīŋgōo̍, mi̍ māsā bɛ̍ndōo̍ le̍ So̍dɔ̄m o̍ hūŋ ndu̍ dēmūl o̍ pēmbo᷄ŋ tɛ̄ɛ̄ŋ Si̍a̍vɛ̄ɛ̄, mā vēēlū ni᷅ŋ ndo̍ŋ āā kpōlōŋ kpo̍lo̍ŋ māsāa̍. O̍ ko̍ŋ, mi̍ Mɛ̄kīsɛ̍dɛ̍kī o̍ wa̍ māsāa̍ le̍ Sa̍lɛ̄m chi̍e̍e̍ wo̍ chūū E̍bīlām bēe̍dīi̍yo̍ a̍ mūɛ̄īya̍ŋ. Mɛ̄kīsɛ̍dɛ̍kī wo̍ ho̍ō ndu̍ wa̍ wāna̍ so̍lī sa̍lāa̍ o̍ Mɛ̄lɛ̄ka̍ Bɛ̄ndōo̍ lo̍ wo̍ ni̍, Mɛ̄lɛ̄ka̍ hi̍o̍ū kpo̍u̍ wo̍. Ndu̍yɛ̍, mi̍ Mɛ̄kīsɛ̍dɛ̍kī du̍a̍ū E̍bīlām sa̍lā, āā, “Mɛ̄lɛ̄ka̍ Bɛ̄ndōo̍, o̍ hi̍o̍ū kpo̍u̍ wo̍, Mɛ̄lɛ̄ka̍ to̍o̍si̍a̍a̍ fo̍ndāŋ ndɔ̄ɔ̍ chōo̍ cho̍o̍ a̍ chi̍e̍ēŋndo̍ wo̍, ō dɔ̄u̍ nūm E̍bīlām sa̍lā fɔ̍. Ndu̍yɛ̍, Mɛ̄lɛ̄ka̍ Bɛ̄ndōo̍ o̍ hi̍o̍ū kpo̍u̍ wo̍, o̍ ma̍la̍ nūm E̍bīlām ma̍ yām ya̍a̍mɔ̍ɔ̍wa̍a̍ nu̍mnda̍ wo̍, sāŋgālāa̍ wa̍ o̍ ndu̍ lo̍.” O̍ ko̍ŋ kɔ̍ɔ̍lī, nyɛ̄ o̍ nyɛ̄ E̍bīlām bi̍ī o̍ chɔ̄ūwo̍, tē lā wa̍ pɛ̍ tɔ̍, ō fāŋa̍ ō pīlɛ̍ lēchōo̍. Mbo̍ kē Mɛ̄kīsɛ̍dɛ̍kī lā pīlɛ̍ŋ pi̍lɛ̍ŋnda̍ la̍ŋ lēchōo̍ ki̍nɛ̍i̍.
Mi̍ māsāa̍ le̍ So̍dɔ̄m o̍ di̍mūl E̍bīlām āā, “Nyɔ̄ɔ̍ŋ ki̍nɛ̍i̍ nūm chu̍a̍ mu̍ŋ, mā mi̍ŋgi̍ ya̍ hɔ̍ɔ̍vāā nīa̍a̍ o̍ bā.”
Kɛ̍, mi̍ E̍bīlām di̍mūl māsāa̍ So̍dɔ̄m āā, “I̍ me̍na̍ŋ po̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, o̍ cho̍ le̍ kpo̍u̍ wo̍, o̍ to̍o̍si̍a̍a̍ fo̍ndāŋ ndɔ̄ɔ̍ chōo̍ cho̍o̍ a̍ chi̍e̍ēŋndo̍ wo̍, māā nyɛ̄ o̍ nyɛ̍ cho̍ nyɛ̄ nūm, ō pīlɛ̍ bɛ̍ɛ̍ I̍ chu̍ē le̍. Kɛ̍īyo̍, kɛ̄lɛ̄ŋgāā yōōlē kɔ̄ɔ̄vɛ̄i̍le̍ŋ bɛ̍ɛ̍ lē lo᷄ ya̍ o̍ bā le̍, yɔ̄ŋi̍ ŋ̄ dīmi̍ āā, ‘Nyɛ̄m nu᷅ŋ su̍li̍ E̍bīlām ni̍.’ Ō fūla̍ o̍ nyɛ̄ dīāā pūa̍a̍ dē wo̍ kɔ̄ɔ̄lī, nyɛ̄ chēle̍ŋ bɛ̍ɛ̍ I̍ cho̍ lo̍ō le̍. Kɛ̍ A̍nɔ̄ɔ̄ ni̍, a̍ Ɛ̍si̍kɔ̄ɔ̄ a̍ Ma̍mi̍lūē, mā ke̍ nda̍ nyɛ̄m na̍a̍ ŋ̄ bīī o̍ chɔ̄ūwo̍ wo̍ŋ ŋ̍ nda̍a̍ŋ. Kāni̍ fu̍u̍le̍, na̍a̍ nda̍ā ŋ̍ kɔ̍ chi̍e̍ī ya̍a̍mɔ̍ɔ̍wa̍ ni̍.”

ऐका Chɛ̄nɛ̍se̍ē 14