Text: © Alliance biblique de Côte d'Ivoire, 2003 Audio: ℗ 2007 Hosanna

Alladian - 2003 Edition (NT)

Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.

Hɩ mɛẅi lɔ, Ɛẅɛnwrɔn mrɛ́n anwrɔn ɛkoẅi-anhɔ̀n mán ɛẅì ɛvà-anhyrɛ̀ nbɩ kɩ wá yɔ ɔkɔhɔ̀n anwrɔn anhyrɛ̀-yrɛ̀, yɔ hɛ́ nɛ̀n ezì anmàn hɔ̀n lɔ fɛn, mán ɛyri lɔ fɛn léyi nɛ̀n wá le, nɛ́n mumù ne le ci nɔn. Nɛ dɔ́ yɔ le: “Ɛci-kuɛ kɔhɔ̀n vri ndù, tɛ́n ɔkɔhɔ̀n-hán-bɔ̀ ẅiɛ kɩ dù. Nyɛ́n sɛ́n ɛkɛ̀tɛ́-nɛ́n-zi kɛ̀ wá ɔkɔhɔ̀n-hán-bɔ̀ bobrebe ɔkɔhɔ̀n kɛ̀ hɔ̀n kuɛ ɛci kè sɩ́ ɛbemɛ̀n. Nyɛ́n bɩ́ ɛnlevri! Mɛ wá nyɛ̀n ɔkɔhɔ̀n hán kɔkɔsɛ̀-ẅì hɔ̀n léyi ke dú ovú lɛtù hɔ̀n wanzi nɔn. Nyɛ́n bɩ́ bɩ́ ɔkùa kotokú, nyɛ́n bɩ́ bɩ́ bagɛ̀n-kpò, nyɛ̀n bɩ́ bɩ́ annanwrú; nyɛ́n bɩ́ sannyɔn ɛnlevri wanzi nyɛ́n bi ɔwrɔn nyɛ́n nyan. Ɛnvra léyi nye le bru ebɩ́ tɔ̀n mɛ̀n nɔn, nyɛ́n gɔ̀ dɔ̀ le: ‘Anwɔwɔ ke dú ebɩ́ ndɔ lɔ tɛn.’ Ke dú kɛ anwɔwɔ wrɔn dú ebɩ́ lɔ mɛ̀n hô, ny'anwɔwɔ lɔ kɛ lɛ và dú nɛ̀n edomɛ̀n; ke sɩ̀ dù ɔmu lɔ hô, nyɛ́n bɩ́ ny'anwɔwɔ bi-nyan lɔ nyɛ́n sɔhɔ́. Nyɛ́n yɛ́ ebɩ́ ndɔ lɔ mɛ̀n, nyɛ́n zî ɛci, nyɛ́n mi ɛnshi léyi yɛ lɛ tán nyɛ̀n nɔn, ɔmuhi ɔkɔhɔ́n-hán-wrɔn, ẅɛn n'ɔwɔɛ̀n-dì kɔrɛ̀levri nɔn. Nyɛ́n bɩ́ ci èbɩ́-bɩ́, nyɛ́n hɔ́n ebɩ́ nyàntɛn tɔ̀n mɛ̀n. Ɛnvra léyi nyɛ́n le bru anmàn tɔ̀n, hɩ yɔ lɛ ẅɛn nyɛ̀n nɛ̀nnyàn-wrɔn nɔn, nyɛ́n zî ɛci léyi yɛ lɛ và sɩ́ nyɛ̀n nɔn; nyɛ́n kɔrɛ ɛnlɔẅiɛ-bɔ̀ léyi dú anmàn lɔ, ô nyɛ́n dɔ́ anmàn-bɔ̀ lɔ le: ‘Anhobɩ́ Nɛ̀ncüì-dúyri bá nyɛ̀n ɛtɛsɛ̀n.’ Tɛ́n, ke dú kɛ nye bru anmàn tɔ̀n, kɩ ye sɩ́ ji yɔ ẅɛn nyɛ̀n nɛ̀nnyàn-bɔ̀, nyɛ́n srɔ andrɛnmɔɛ́n mɛ̀n, ô nyɛ́n dɔ̀ le: ‘Bɔ́ korɛ ny'anmàn hi-wɔ̀n, léyi brɛ́ bɔ̀ annan nɔn cüe. Zɛtɛn nyɛ́n cɔ̀ nyɛ́n nyri anvrɛnvrɛn le: Anhobɩ́ Nɛ̀ncüì-dúyri bá nyɛ̀n ɛtɛsɛ̀n.’ Mɛ dɔ́ nyɛ̀n le: ɛmrɛ̀n-ci bì lɔ, Sodɔmɛ̀n anmàn gbàn-wɔɛ̀n-dì kɛ lɛ cɛcɛ vrán anmàn ndɔ lɔ tɛn.”


“Muzhie dú vɛ tɛn Korazɛn! Muzhie dú vɛ tɛn Bɛtsahida! Ɔmuhi, ke dú kɛ anvɛmɛ̀n-frɛ́n-ci hɔ̀n lɔ fɛn léyi yɔ hán ny'anmàn lɔ nɔn, ye bɩ yɛ hán Tirɛ̀n mán Sìdɔn kpɔsɔ wú hô, ɛnvra sheshemɛ̀n de y'anmàn-bɔ̀ lɔ kɛ lɛ yɛ́ ɛnhibɩ́, ke le ku ɛceci gbrɔ̀gbrɔ̀ edù, kɩ yɔ le bɩ́ nwɔ̀n yɔ ku edomɛ̀n, ô kè ye le yɔ crɔn ɛnkruɛ. Hɩ le kruhú de ɛmrɛ̀n-ci bì lɔ, ɛgbàn-wɔɛ̀n-dì kɛ lɛ cɛcɛ kɛ tàn Tirɛ̀n mán Sidɔn, kɩ nyɛ tɛn lɔ ke le sevri. Vɛ́n Kapɛrnahümɛ̀n, e tro le e le ci ɛwú hàn mán ɛ̀ cɔ́ anhobɩ́ɛ? Ye le sɩ́ mɛ́n ɛnhi hàn mán ɛ lɛ cɔ́ owú-bɔ̀ anmàn.” Zhezü vru kɛ dɔ́ n'ɛsɛnkɛn-bɔ̀ le: “Ɔwrɔn léyi ke die nyɛ̀n nukùɛ nɔn, ne die mɛ̀n nukù, ɔwrɔn léyi kɛ wrɔ́ nyɛ̀n ze nɔn, nɛ wrɔ́ ɔwrɔn léyi wá mɛ̀n ɔkɔhɔ̀n nɔn ze.”

Ɔkɔhɔ̀n-wá-bɔ̀ ɛkoẅi-anhɔ̀n mán ɛẅì ɛvà-anhyrɛ̀ lɔ vru ɛmɛẅí và pɔpüɛ̀ kɛ brà kɩ kɛ dɔ̀ le: “Ɛẅɛnwrɔn, anhɛ́n gbangbàn hɔ̀n mán ke die bɔ̀ nukù, ɛnvra léyi bɔ̀ wá ɛnyanmàn tán yɔ v'ebɩmɛ̀n nɔn!” Kɩ Zhezü kɛ dɔ́ yɔ le: “Mɛ̀n kán anwa-wrɔn dú anhobɩ́ bore hán anhobɩ́ léyi kɛ kɛ́n ɛnhyà nɔn hɔ́. Nyɛ́n die nukùɛ: mɛ̀n tán nyɛ̀n ɛkɔrɛsrɔn ô nyɛ́n nán esù ɛnlɛbri mán ɛkrá ɛwú, ô nyɛ́n boyɛ egbri-wrɔn kɔrɛ̀-srɔn lɔ fɛn, kɩ eci-gbàngbàn zriɛmɛ́n ke sɩ̀ hán nyɛ̀n. Tɛ́n ke sɩ́ ji le nyɛ́n brá pɔpüɛ̀, ɔmuhi anhɛ́n gbangàn ke die nyɛ̀n nukùɛ nɔn; tɛ́n pɔpüɛ̀ kɛ̀ brá nyɛ̀n ɔmuhi ye merɛ́n ny'ebí dú owrúemɛ̀n anhobɩ́ nɔn.”


Ɛnvra zri lɔ mɛ̀n, Ɛnhɛ́n Prɔnprɔn hán Zhezü pɔpüɛ̀ yɩ́ ɛnbɔrɛ mɛ̀n, kɩ Zhezü kɛ dɔ̀ le: “Ô Dade, ɛẅɛnwrɔn léyi hán anhobɩ́ mán ɛnhi nɔn, mɛ tán mɛ́n ɔkùɛn, ɔmuhi ɛ̀ hán tán ɛẅì hɔ̀n cɔ́ v'ankà-bán-ankà lɔ nyrì, ankà-bán-ankà léyi, è sɩ̀ tàn ankà-nyri-bɔ̀ mán owrú-kán-bɔ̀ nɔn. Hɛ̀ɛ̀, Dade, ɔmu lɔ de e ji le kè dù nɔn.
Dade tán mɛ̀n ɛci hɔ̀n lɔ fɛn. Ɔwrɔnẅì zriɛmɛ̀n kè sì nyrì ɔwrɔn léyi dú Ɛnẅì nɔn, ke dú kɛ ke sɩ̀ dù Dade, kɩ ɔwrɔnẅì zriɛmɛ̀n kè sɩ̀ nyrì ɔwrɔn léyi dú Dade nɔn, ke dú kɛ kè sɩ̀ dù Ɛnẅì lɔ mán anwrɔn hɔ̀n léyi Ɛnẅì lɔ ke ji kɛ̀ hán tán kè nyrì nɔn.”
Zɛtɛn Zhezü crɛ ezì kɛ́n n'ɛsɛnkɛn-bɔ̀ kɛ dɔ́ yɔ, yɔ zri kɩ: “Nyɛ́n dú ɛnbɔrɛ-bruemɛ̀n, ɔmuhi nyɛ́n kán eci léyi nyɛ kàn nɔn! Tɛ́n mɛ dɔ́ nyɛ̀n le, Ɔwɔ-mùanwú-ankà-dɔ́-bɔ̀ hɔ̀n bobrebe mán ɛnnɛ̀ncüì hɔ̀n ji ô kɛ̀ kán eci leyi nyɛ kàn nɔn, kɩ kè sɩ̀ cɔ̀ n'ɛkán-yri, ô yɔ yá ndɔ léyi nyɛ yá nɔn, kɩ yɔ sɩ̀ cɔ̀ n'ɛyá-yri.”

Ɛnyanmàn-gbànvri-ankà-yé-wrɔn tɔ̀n ke ji kɛ̀ krɔn Zhezü antanwrɔn, kɩ ke yrɛ nɛ̀n le: “Ankà-yé-wrɔn, eci tán de ke ji le mɛ̀n hán ô mɛ̀n cɔ́ ɛwúvà léyi ke sɩ́ trɔa nɛ́n?” Zhezü kɛ dɔ́ nɛ̀n le: “Ecitan de ye merɛ́n bɔ́ ɛnyanmàn wrú lɔ mɛ̀n nɛ́n? Hɩ léyi ɛ krɛ̀ nɔn, anhɔntan ɛ hán ɛ yá?” Ɔwrɔn lɔ mrɛ́n ɔmùan le: “ ‘Ke ji le ɛ̀ cüɛ́n Ɛẅɛnwrɔn v'Ɔwɔ, v'ɛnbɔrɛ lɔ fɛn mɛ̀n, vɛ́n wàwúyɛ lɔ fɛn mɛ̀n, v'ecüì lɔ fɛn mɛ̀n, mán v'ɛnhɛ́n lɔ fɛn mɛ̀n.’ Zɛtɛn: ‘Ɛ̀ cüɛ́n ɛnyrán-wrɔnẅì kɛ̀ hán vɛ́n mumù hɔ́.’ ” Zhezü kɛ dɔ́ nɛ̀n le: “Ɛ dɔ̀ zrɔ. Ɛ̀ hán ɔmu lɔ kɩ, e le dú ɛwúvà mɛ̀n.” Tɛ́n, ɛnyanmàn-gbànvri-ankà-yé-wrɔn lɔ, ke ji kè nyrì ke dú kɛ nɛ̀n sɩ̀ zɛ̀n ɛnyanmàn wú. Kɩ ne yrɛ Zhezü le: “Antɔn dú annyran-wrɔnẅìɛ?” Zhezü mrɛ́n ɔmùan le: “Ɔwrɔn tɔ̀n dú Zherüzalɛmɛ̀n anmàn kɛ hɔ́n Zheriko, kɩ anwrɔn-wri-bɔ̀ bɩ́ ankà cɔ́ nɛ̀n, yɛrɛ n'ɛceci lɔ fɛn, kɔ́n nɛ̀n eji, kɩ nan hɔ̀n, teze nɛ̀n owù mán ɔkɔrɛ̀ cá mɛ̀n. Ɛnvra zri lɔ Ɔwɔ-cice-wrɔn tɔ̀n ci ɛnlevri zri lɔ. Ɛnvra léyi nɛ̀n kán ɔwrɔn lɔ dɛ́ nɔn, nɛ̀n ci ɛyri nyàntɛn nɛ́n hɔ̀n. Ɔmu zri lɔ, Ɔwɔ-kɔhɔ̀n-hán-wrɔn tɔ̀n ci ɛnlevri zri lɔ, kán ɔwrɔn lɔ, kɩ nɛ̀n bɩ́ ɛnlevri nyantɛn nɛ́n nan hɔ̀n. Tɛ́n Samari-wrɔn tɔ̀n, kɛ hɔ́n ɛyri, ci ɛnlevri zri lɔ kɩ cɔ́ ɔwrɔn léyi ye wrí eci edù nɔn. Ɛnvra léyi nɛ̀n kán yi nɔn, ɛnhyɔ̀bɔ̀ vri cɔ́ nɛ̀n. Nɛ̀n vru nɛ́n sɔ̀nba yi ɛtɛsɛ̀n, nɛ̀n bɩ́ ɛnzhì mán ɛntàn wɔnsɛn, nɛ̀n juru yi eci-fɔ́n, nɛ́n korà. Zɛtɛn nɛ̀n bɩ́ yi nɛ̀n wá kpàngɔ wú, nɛ̀n sɩ́ yi nɛ̀nnyàn-bɔ̀-dúyri, nanvrɛn lɔ nɛ̀n wá yí esuvá. Ɛnvra léyi ɛcɛ̀n cüe nɔn, nɛ̀n bɩ́ ɔkùa kpɔprɛ̀ anhyrɛ́, nɛ̀n tán ɔwɔn-nɛ̀n-zi lɔ kɩ nɛ dɔ́ yi le: ‘Ɛ̀ wá ɔwrɔn ndɔ lɔ esùva; ɛnvra léyi me le vru mɛ̀n ci ɛnu lɔ nɔn, me le di mɛ́n ɔwɔɛ̀n, ɔkùa léyi ɛ̀ jrɛ́ fɛ́ ɛwú n'ɛwú nɔn.’ ”
Zhezü ke yrɛ ɛnyanmàn-gbànvri-ankà-yé-wrɔn lɔ le: “Anwrɔn anhɔ̀n lɔ, tɛ́tan de, e tro le dú ɔwrɔn léyi ye wri eci edù nɔn, nɛ́n nyrán nɛ́n?” Ɛnyanmàn-gbànvri-ankà-yé-wrɔn lɔ kɛ dɔ̀ le: “Ɔwrɔn léyi wá nɛ̀n ɛsùva anvrɛnvrɛn nɔn.” Zɛtɛn Zhezü kɛ dɔ́ nɛ̀n le: “Ɛ̀ hɔ̀n, ô ɛ̀ hán eci zri lɔ.”

Zhezü mán n'ɛsɛnkɛn-bɔ̀ dú ɛnlevri, ye bru anmàn tɔ̀n léyi ɛnnyɔnwrɔn tɔ̀n léyi ye bi Martɛ̀n nɔn, bɩ́ nɛ̀n sɩ́ ɛbemɛ̀n. Martɛ̀n ẅɛn nɛ́n muan-ẅì ɛnnyɔnwrɔn-ẅì ye bi Mari, hɔ́n yɛ́ ɛẅɛnwrɔn annan tɛsɛ̀n, kɩ ke die n'ankà-yé lɔ nukùɛ. Martɛ̀n dú ɛcrɛ̀ciemɛ̀n, ɔkɔhɔ̀n bobrebe hán mɛ̀n. Nɛ̀n srɔ kɩ nɛ dɔ̀ le: “Ɛẅɛnwrɔn, hɩ le Mari ke teze mɛ́n zri mɛ hán ɔkɔhɔ̀n lɔ fɛn nɔn, ke sɩ́ hán mɛ́n eci zriɛmɛ́n? Ɛ̀ dɔ́ nɛ̀n, ô nɛ̀n wá mɛ̀n ɛkɔrɛ̀.” Ɛẅɛnwrɔn kɛ dɔ́ nɛ̀n le: “Martɛ̀n, Martɛ̀n, e ku ɛnkrɛ̀ta kɩ ɛ kán ɛgbàn ɛci bobrebe krukú, tɛ́n, eci zri kɩ ẅɛn vɔnshɛ́. Mari bɩ́ eci anvrɛnvrɛn léyi ye sɩ̀ bɩ̀ sɔhɔ́ nɔn.”

ऐका Lükɛ̀n 10