ДУУЛАЛ 121:1-7
ДУУЛАЛ 121:1-7 Ариун Библи, 2004 (АБ2004)
Би харцаа уулс уруу өргөнө. Хаанаас надад тусламж ирэх вэ? Миний тусламж тэнгэр ба газрыг бүтээсэн ЭЗЭНээс ирдэг. Тэр чамайг хөл алдуулахгүй. Чамайг хамгаалагч Тэрээр үүрэглэхгүй. Харагтун, Израилийг хамгаалагч Тэрээр Үүрэглэх ч үгүй, унтах ч үгүй. ЭЗЭН бол чамайг хамгаалагч. ЭЗЭН бол чиний баруун гар тал дахь чиний сүүдэр юм. Өдрөөр нар ч чамайг хорлохгүй, Шөнөөр сар ч хөнөөхгүй. ЭЗЭН чамайг бүх хор хөнөөлөөс сахин хамгаална. Тэр чиний сэтгэлийг сахина.
ДУУЛАЛ 121:1-7 Ариун Библи 2013 (АБ2013)
Харцаа би уулс өөд өргөнө. Хаанаас надад тусламж ирэх вэ? Тэрхүү тусламж минь тэнгэр газрыг бүтээгч ЭЗЭНээс. Тэр хөлийг чинь эс гуйвуулна. Чамайг хамгаалагч Тэрээр үл үүрэглэнэ. Харагтун, Израилийг хамгаалагч Тэрээр Үүрэглэх ч үгүй, унтах ч үгүй. ЭЗЭН чамайг хамгаалагч, ЭЗЭН чиний баруун гар тал дахь сүүдэр чинь юм. Шөнөөр саранд ч Өдрөөр наранд ч чи цохиулахгүй. ЭЗЭН чамайг муу бүхнээс хаацайлж, Тэрээр амийг чинь хамгаална.
