ЕГИПЕТЭЭС ГАРСАН НЬ 1:1-14
ЕГИПЕТЭЭС ГАРСАН НЬ 1:1-14 Ариун Библи 2013 (АБ2013)
Гэрийнхнээ дагуулж Иаковтай хамт Египетэд очсон Израилийн хөвгүүдийн нэрс нь Реубен, Симеон, Леви, Иуда, Иссахар, Зебулун, Бениамин, Дан, Нафтали, Гад, Ашер нар юм. Иаковын үр удам бүгд далан хүн бөгөөд харин Иосеф Египетэд байлаа. Иосеф хийгээд түүний ах дүү нар мөн тэр үеийнхэн бүгд өөд болов. Гэвч Израилийн хөвгүүд үржиж, өнөржин олширч, улам хүчтэй болсоор тэд тэр газрыг дүүргэв. Иосефыг мэдэхгүй шинэ хаан Египетэд гарч иржээ. Тэрээр ард түмэндээ —Үзэгтүн! Израилийн хөвгүүдийн ард түмэн биднээс олон бас хүчтэй боллоо. Тэдэнд нарийн ухаанаар хандацгаая. Тэгэхгүй бол тэд олширч, дайн гарах үед биднийг үзэн яддаг хүмүүстэй нийлэн бидний эсрэг байлдаж энэ газраас гарах болно гэв. Ингээд тэднийг хүнд хүчир ажлаар туйлдуулахын тулд тэдний дээр ажил хянагчдыг тавив. Тэд Фараонд зориулж Питом, Рамесес гэдэг агуулах хотуудыг барилаа. Гэвч тэднийг хэдийчинээ зовоох тусам тэд төдийчинээ олширч, улам бүр тархлаа. Тиймээс египетчүүд Израилийн хөвгүүдээс болж айдаст автав. Египетчүүд Израилийн хөвгүүдийг ажилд албадан шахав. Тэднийг албадан шахсан хүнд хүчир ажлууд болох шавар зуурах, тоосго цохих мөн хээрийн янз бүрийн ажлаар тэдний амьдралыг египетчүүд гашуун зовлонтой болгов.
ЕГИПЕТЭЭС ГАРСАН НЬ 1:1-14 Ариун Библи, 2004 (АБ2004)
Өөрсдийн гэрийнхнийг дагуулж Иаковтай хамт Египетэд очсон Израилийн хөвгүүдийн нэрс гэвэл, Реубен, Симеон, Леви ба Иуда, Иссахар, Зебулун ба Бениамин, Дан ба Нафтали, Гад ба Ашер юм. Иаковын үр удам бүгд далан хүн байв. Харин Иосеф Египетэд байсан. Иосеф, түүний ах дүү нар болон тэр үеийнхэн бүгд нас барав. Гэвч Израилийн хөвгүүд өсөн, улам үржиж, олшрон, онцгой хүчтэй болж, тэр газрыг дүүргэв. Иосефыг мэдэхгүй шинэ хаан Египетэд гарч ирэв. Тэр өөрийн ард түмэнд —Үзэгтүн! Израилийн хөвгүүдийн ард түмэн биднээс олон, бас хүчтэй боллоо. Тэдэнд нарийн ухаанаар хандацгаая. Тэгэхгүй бол тэд олон болж, дайн гарах үед биднийг үзэн яддаг хүмүүстэй нийлж, бидний эсрэг байлдаж, энэ газраас гарах болно гэв. Тиймээс тэднийг хүнд хүчир ажлаар зовоохын тулд тэдний дээр ажлын дарга нарыг тавив. Тэд Фараонд зориулж Питом болон Раамсес гэдэг агуулах хотуудыг барив. Гэвч тэднийг хэдий чинээ зовоох тусам тэд төдий чинээ үржиж, улам бүр тархлаа. Тиймээс египетчүүд Израилийн хөвгүүдээс болж айдаст автав. Египетчүүд Израилийн хөвгүүдийг хүнд хүчир ажилд албадан шахав. Тэдэнд оноосон хүнд хүчир ажлууд болох шавар зуурах, тоосго цохих болон хээрийн янз бүрийн ажлаар египетчүүд тэдний амьдралыг гашуун зовлонтой болгов.