1 САМУЕЛ 11:1-15
1 САМУЕЛ 11:1-15 Ариун Библи 2013 (АБ2013)
Аммон хүн Нахаш хүрч ирж, Иабеш-гилеадыг бүслэн хуарагнав. Иабешийн бүх эрс Нахашт —Бидэнтэй гэрээ байгуулаач, бид танд үйлчилье гэцгээв. Харин аммон хүн Нахаш тэдэнд —Би та нартай дараах нөхцөлд гэрээ байгуулна. Та нарын бүгдийн чинь баруун нүдийг би ухаж аваад, бүх Израильд шившиг авчирна гэж хариулав. Иабешийн ахмадууд түүнд —Израилийн нутаг даяар элч нарыг явуулахын тулд бидэнд долоо хоногийн хугацаа өгөгтүн! Хэрэв биднийг аврах хүн олдохгүй бол бид чам уруу гарч очъё гэв. Тэгээд элч нар Саулын Гибеа уруу ирж, тэндхийн бүх хүний сонорт энэ үгсийг дуулгасанд ард олон бүгд дуугаа өндөрсгөн уйлалдав. Тэгэхэд Саул үхрээ туун талбайгаас буцаж ирж байв. Саул —Хүмүүс юунд уйлалдаад байна вэ? гэсэнд тэд Иабешийн хүмүүсийн үгсийг түүнд хэлж өгөв. Энэ үгсийг сонсоод Бурханы Сүнс Саулын дээр бууж, түүний уур хилэн ихэд дүрэлзэв. Тэр хос буулгатай үхрүүдийг авч цавчин хуваагаад, элч нарын гараар Израилийн нутаг дэвсгэр даяар илгээж —Саул болон Самуелын араас үл дагагчийн үхэр үүнтэй адил болно гэж хэлүүлэв. Ард олныг ЭЗЭНээс эмээхүй нөмөрсөнд тэд нэгэн хүн мэт ирцгээв. Саул тэднийг Безект тоолов. Израилийн хөвгүүд гурван зуун мянга, Иудагийн эрчүүд гучин мянга байв. Тэд ирсэн элч нарт —Иабеш-гилеадын хүмүүст “Маргааш нар хурцаар шарж эхлэхэд та нарт аврал тусламж очих болно” гэж хэлэгтүн гэв. Тийнхүү элч нар буцаж ирэн Иабешийн хүмүүст мэдэгдэхэд тэд баярлав. Тэгээд Иабешийн эрс —Маргааш бид та нар уруу гарч очно. Та бидэнд тааллаараа л үйлдэгтүн гэв. Дараа нь өдөр Саул хүмүүсээ гурван анги болгон хуваав. Өглөөний харуулын үеэр тэд хуарангийн голд цөмрөн орж, өдрийн халуу шатах хүртэл аммончуудыг хядав. Амьд үлдсэн хүмүүс нь бутран тарж, нэг дор хоёр хүн хамт үлдсэнгүй. Тэгэхэд ард олон Самуелд —Саул бидний хаан болох юм уу? гэж хэлсэн хүн хэн бэ? Тэр хүмүүсийг нааш нь өг! Бид тэднийг алах болно гэлцэв. Гэвч Саул —Өнөөдөр хүн алж болохгүй. Учир нь өнөөдөр ЭЗЭН, Израильд авралыг өгсөн гэв. Тэгээд Самуел ард олонд —Явцгаая, Гилгал өөд өгсөцгөөе. Тэнд очин хаанчлалыг шинэчилцгээе гэлээ. Тийнхүү бүх ард түмэн Гилгал уруу явж, тэнд ЭЗЭНий өмнө тэд Саулыг хаан болгов. Тэд бас ЭЗЭНий өмнө эвийн тахилуудыг нядалж, тэнд Саул болон Израилийн бүх хүн асар ихээр баярлацгаав.
1 САМУЕЛ 11:1-15 Ариун Библи, 2004 (АБ2004)
Аммон хүн Нахаш хүрч ирж, Иабеш-гилеадыг бүслэв. Иабешийн бүх хүмүүс Нахашт —Бидэнтэй гэрээ байгуулбал, бид танд үйлчилье гэцгээв. Харин Аммон хүн Нахаш тэдэнд —Дараах журмаар би та нартай гэрээ байгуулна. Та нарын бүгдийн чинь баруун нүдийг ухаж аван, ингэснээрээ бүх Израиль дээр зэмлэл болгоё гэж хэлэв. Иабешийн ахлагчид түүнд —Израилийн нутаг даяар элч нарыг явуулахын тулд бидэнд долоо хоногийн хугацаа өгөгтүн! Хэрэв биднийг хэн ч аврахгүй бол бид чам уруу гарч очъё гэв. Тэгээд элч нар Саулын Гибеа уруу ирж, тэндхийн бүх хүмүүст эдгээр үгсийг дуулгасанд бүх хүмүүс чанга дуугаар уйлалдав. Саул үхрээ туун, талбайгаас буцаж ирж байв. Саул —Хүмүүс уйлалдаад, юу болж байгаа юм бэ? гэж асуусанд тэд Иабешийн хүмүүсийн үгсийг түүнд хэлж өгөв. Саулыг эдгээр үгсийг сонсоход, Бурханы Сүнс Саулын дээр хүчтэй буув. Саул маш их ууртай болов. Тэр буулгатай үхрүүдийг авч, цавчин хуваагаад, элч нарын гараар Израилийн нутаг даяар илгээж, —Саул болон Самуелын араас үл дагагчийн үхэр үүнтэй адил болно гэж хэлүүлэв. Ард олон ЭЗЭНээс айж, нэгэн хүн мэт ирцгээв. Саул тэднийг Безект тоолов. Израилийн хөвгүүд гурван зуун мянга, Иудагийн эрчүүд гучин мянга байв. Тэд ирсэн элч нарт —Иабеш-гилеадын хүмүүст ийнхүү хэлэгтүн. “Маргааш үд дунд та нар аврагдах болно” гэж хэл гэв. Тийнхүү элч нар буцаж ирэн Иабешийн хүмүүст мэдэгдэхэд, тэд баярлав. Тэгээд Иабешийн хүмүүс —Маргааш бид та нар уруу гарч очно. Та нар өөрсдийн тааллаар биднийг яахаа мэдэгтүн гэж өгүүлэв. Дараагийн өглөө Саул хүмүүсээ гурван анги болгон хуваав. Өглөөний харуулын үеэр тэд хуаран уруу нь цөмрөн орж, үд хүртэл аммончуудыг хядав. Амьд үлдсэн хүмүүс нь бутран тарж, нэг дор хоёр хүн хамт үлдсэнгүй. Тэгэхэд ард олон Самуелд —Өмнө нь Саул биднийг захирах уу?” гэж хэлсэн хүн хаа байна? Тэр хүмүүсийг авчрагтун. Бид тэднийг алах болно гэлцэв. Гэвч Саул —Өнөөдөр хүн алж болохгүй. Учир нь өнөөдөр ЭЗЭН Израильд авралыг гүйцэлдүүлэв гэв. Тэгээд Самуел ардуудад —Гилгал уруу явцгаая. Тэнд очин хаанчлалыг шинэчилцгээе гэж хэлэв. Тийнхүү бүх ардууд Гилгал уруу явж тэнд ЭЗЭНий өмнө тэд Саулыг хаан болгов. Тэд тэндээ бас ЭЗЭНий өмнө эвийн тахилын өргөлүүдийг өргөж, Саул болон Израилийн бүх хүмүүс агуу ихээр баярлацгаав.