Rukaxi 22
22
Kura Ketsutsi kemɨtiyetuanikekai
(Ruk 22:1-2 – Mat 26:2-5, Mar 14:1-2, 10-11)
1Merikɨtsɨ Paa mɨkakuxanariyarietɨka 'ixɨarariyari kanahurakaitɨni, Patsikwa 'ixɨarariyari mɨtitewakai. 2Hikɨ mawari wewiwamete tewa'aitɨwamete meta 'inɨarikɨ memɨte'ɨkitametetɨkai tixaɨtɨ mekatenikuwautɨwekaitɨni Ketsutsi kememɨtemienikekai, teɨteri mewamakatɨ.
3Hikɨ Kauyumarie Kura 'Itsikariutitanaka hetsie kaneutahani, mɨkɨ tamamata heimana memɨyuhuta mɨwanɨkai. 4Heyaka mawari wewiwamete tewa'aitɨwamete meta wakuyaxima wahetsɨa, katiniwarutaxatɨani Ketsutsi kemɨtiwayetuirienikekai. 5Mɨkɨ mekaniyutemamawiekaitɨni, mekaniuyu'enieni kename tumini me'i'ɨitɨanikekai. 6Mɨkɨta yakatiniutanaki'erieni, hikɨ katinikuwaunekaitɨni kepauka 'aixɨa mɨyɨnikekai mɨwayetuirienikɨ teɨteri me'umawekaku.
Ti'aitame 'ikwaiya
(Ruk 22:7-34 – Mat 26:17-35, Mar 14:12-31, 14:18-21, 1Kur 11:23-25, Wa 13:21-30, 37-38)
7Merikɨtsɨ kepauka Paa mɨkakuxanariyarietɨka 'ixɨarariyari maye'a, kepauka muxa nunutsi mutimemieriwa Patsikwa 'ikwaiyari hetsiemieme. 8Hikɨ Ketsutsi kaniwarutanɨ'ani Pekuru meta Wani mɨpaɨ tiwarahɨawetɨ:
—Xekenehu 'aixɨa xeketenekuyuri Patsikwa 'ikwaiyari temekwanikɨ.
9Mɨkɨ mɨpaɨ mekatenitahɨawe:
—Hakewa pɨmatsihenake 'aixɨa temɨtehekuyurienikɨ.
10Mɨpaɨ katiniwarutahɨawe:
—Xeme xeheutahaxɨaximekaku kiekaritsie tewi mana pɨxe'anukunake ye'ɨ 'ahanatɨ hekuhanɨka. Mɨkɨ xekenanuweiya kiita hakewa meutahani. 11Mɨpaɨ xeketenetahɨawi kiekame: “Ti'ɨkitame mɨpaɨ paine: ¿Hakewa kii mɨkɨ muwa nemɨtiwa'ɨkitɨa wahamatɨa Patsikwa 'ikwaiyari nemukwani?” 12Mɨkɨ kii taɨta xeheutiwitɨme kanixexeitsitɨamɨkɨ hipame kii 'amuyeyewa naitɨ 'ureyepikame. Muwa 'aixɨa xeketeneyuri.
13Hikɨ mekanekɨne, mekaneitaxeiya kemɨtiwarutahɨawixɨ. Muwa Patsikwa 'ikwaiyari hetsiemieme 'aixɨa mekateniukuyurieni.
14Hikɨ 'aye'aku, mexatsie kaniutiyerɨni meta nɨ'arimama yaxeikɨa. 15Hikɨ mɨpaɨ katiniwarutahɨawe:
—Kwinimieme nepihiwe'eriekai xehamatɨa 'ikɨ 'ixɨarari 'ikwaiyari nemɨkwanikɨ nekatikwiniwetɨ 'akuxi. 16Yanepɨtixekɨhɨawe, tawari 'ikɨ nepɨkakwani mexi ka'aye'awe tita 'ixɨarari mɨti'inɨariyari Kakaɨyari ti'aitametɨkaku.
17Hikɨ tekɨxi 'anuhanaka pamɨpariyutsi 'ipitɨaka Kakaɨyari mɨpaɨ kaniutayɨni:
—Xekenanuhani 'ikɨ, yuxexuitɨ xekenanuti'inɨataxɨa. 18Mɨpaɨ nepɨxerahɨawe, tawari kaxie hayari nepɨka'anu'ieni mexi ka'aye'awe Kakaɨyari mitsutɨani ti'aitatɨ.
19Hikɨ paa 'anu'ɨka pamɨpariyutsi 'ipitɨaka Kakaɨyari 'ititaraka kaniwarumini mɨpaɨ 'utaitɨ:
—'Ikɨ kaninewaiyaritɨni xehetsiemieme mɨyetuiyani, 'ipaɨ xeketeneyurieka xemɨnetsiha'eriwanikɨ.
20Yaxeikɨata katiniuyurieni tekɨxi hepaɨtsita mete'ukwaku, mɨpaɨ kaniutayɨni:
—'Ikɨ tekɨxita mieme tɨratu mɨhekwa kanihɨkɨtɨni nexuriyakɨ 'aixɨa mɨ'itɨarieni, xehetsiemieme kemɨtitayeuriyani. 21Perutsɨ kemɨ'ane mɨnetsiyetuani 'ena paka, mamaya mexatsie pama hakewa nemaka. 22Yuri Tewi kenemɨtitewa, nekaniyemieni nemɨmierienikɨ, kemɨti'aitsie yamɨtiyɨnikɨ, perutsɨ xɨa'ui kemɨ'ane mɨnetsiyetuani.
23Mɨkɨ mekanitsutɨani niuki mexɨatɨatɨ kemɨ'ane mɨkɨ mɨxatakai kename mɨya tiyurienikekai 'utaitɨ.
24Metatsiereta meyuniukimatɨ mekanakɨne kemɨ'ane mɨkɨ matsi waɨkawa meuyewetse mayanikekai. 25Ketsutsi mɨpaɨ katiniwarutahɨawe:
—Nuiwarite tewa'aitɨwamete mekateniwa'uxitɨaka yuteɨterima, meta mɨkɨ wahetsie 'itsɨkate memɨhɨkɨ yuhetsiemieme mɨpaɨ mekaniutiyuaneni kename 'aixɨa meteyuruwamete. 26Xeme pɨta mɨpaɨ xepɨkayɨaka. 'Apɨta, kemɨ'ane xeme mɨmariwe mɨkɨ kemɨ'ane tixaɨtɨ mɨkatihɨkɨ hepaɨ keyɨaneni, meta kemɨ'ane mɨtixe'aitɨa mɨkɨ kemɨ'ane xehetsiemieme mɨti'uximaya hepaɨ keyɨaneni. 27Kexeteku'eriwa, ¿kemɨ'ane matsi pumariwe, kemɨ'ane kiekametɨtɨ mɨtikwa'a, kemɨ'ane miparewie timikwatɨ, mɨkɨ nutsu pumariwe? Xɨari kiekame matsi pumariwe. Perutsɨ ne xetsata nepuyeika xehetsiemieme neti'uximayatɨ pɨta. 28Xeme nehetsie xekateniwiyakaitɨni xekatehayewatɨ ne'inɨatsienekaku. 29Ne'ukiyari kemɨnerayeitɨa ti'aitame, neta yaxeikɨa te'aitamete nekanixe'ayeitɨamɨkɨ. 30Nehamatɨa xekatenikwaikuni xekateni'ikuni mexa 'aurie ne'akaime neti'aitametɨkaku, 'itsɨkate xekanakɨnikuni, 'uwenitsie xe'ayaxeme xekateniwa'aitɨakakuni teɨteri tamamata heimana huta 'Ixaheri nuiwarimama.
31»Neuxei, Tsimuni, yumarima 'aixɨa, Kauyumarie pɨxe'uta'iwau, pɨxeta'inɨata, pɨxetikatse tɨriku hepaɨ. 32Ne matsi nepɨnetanenewi 'ahetsiemieme pemɨkatihayewakɨ yuri peti'erietɨ. 'Ekɨta kepauka pemɨtihayewa peheuyewautsetɨ keniwatuikani 'a'iwama».
33Mɨkɨ mɨpaɨ katinitahɨawe:
—Ti'aitame, nepɨnewaɨriya 'ahetsie nemɨtiwiyani tsepa nemanutahɨiya tsepa nemumierie.
34Ketsutsi mɨpaɨ katinitahɨawe:
—Pekuru 'aku, mɨpaɨ nepɨmatikɨhɨawe, wakana katahiwawekaku 'akuxi hikɨ, 'ekɨ haikakɨa pekani'aku'imawamɨkɨ, kename pekanetsimate pe'utaitɨ.
35Hikɨ mɨpaɨta katiniwarutahɨawe:
—Kepauka nemɨxeheutanɨ'axɨa kɨtsiuri, xerai, kakai xekate'upikame, ¿tixaɨ xeteheuyehɨakai 'aku?
Mɨkɨ mɨpaɨ mekatenitahɨawe:
—Tixaɨ.
36Mɨpaɨ katiniwarutahɨawe:
—Hikɨtsɨ pɨta mɨpaɨ pɨkatiyɨni, kemɨ'ane kɨtsiuri mexeiya keheihurieni, xerai meta yaxeikɨa. Kemɨ'ane mɨkaheixeiya kuya kutsiraya yɨ'ɨkari ke'utuani ke'inaneni. 37Yanepɨtixekɨhɨawe, peuyewetse nehetsie maye'atɨarienikɨ mɨpaɨ kemɨre'uxa: “'Inɨari niukiyari tsanamete wahepaɨ kaniu'itɨarieni”. Naitɨ nehepaɨtsita kemɨre'uxa kanaye'atɨarieximeni.
38Hikɨ mɨkɨ mɨpaɨ mekaniutiyuani:
—Ti'aitame, neuxei 'ena kutsirate hutatɨ.
Ketsutsi mɨpaɨ katiniwarutahɨawe:
—Neuxei 'ariri.
Ketsutsi kemɨtiyutanenewi Ketitsemanitsie
(Ruk 22:40-46 – Mat 26:36-46, Mar 14:32-42)
39Merikɨtsɨ wayeyaka kaneyani hakewa me'axekai Huriwa Maku'u yemuriyaritsie, teyɨ'ɨkitɨwamete mekaniweiyakaitɨni. 40Hikɨ muwa heta'aka mɨpaɨ katiniwarutahɨawe: «Xekeneyunenewieka, kapa 'axaxete'uyurienikɨ xemɨta'inɨatsienitsie». 41Hikɨ yuxaɨta kananayeyani memakutekaitsie yatewa kaniuyani tete kemɨrehɨiwa yakɨtɨtɨ, 'utitunumakeka kaniyutanenewieni, 42mɨpaɨ 'utaitɨ: «Ne'ukiyari, xɨka pe'awaɨriyani, yanepɨra'eriwakaku mɨka'aye'anikɨ kenemɨtikwinitɨarieni, matsi kemɨnetinake ne pɨkatixaɨ, kemɨmatinake 'ekɨ pɨta yaketiuyɨni». 43Hikɨ niuki tuayame matsiɨkɨtɨ kanayuyeitɨani hɨxiena taheima mieme 'itɨrɨkariyatɨ. 44Hikɨ kwiyɨanetɨ hiwerikakɨ, matsi kwini mieme yutatuatɨ kaniyunenewiekaitɨni, kwaxiyaya xuriya tsuniriyari hepaɨ kani'anenekaitɨni kwiepa kaxɨrɨwetɨ.
45Kepauka mɨtiutahayewaxɨ yunenewietɨ 'anukukeka teyɨ'ɨkitɨwamete wahetsɨa nuaka mana kaniwarutaxeiya mekutsume hiwerikakɨ. 46Mɨpaɨ katiniwarutahɨawe:
—¿Titayari xetekutsu? Xekenanuku'uti xekeneyunenewieka kapa 'axaxete'uyurienikɨ xemɨta'inɨatsienitsie.
Ketsutsi kemɨtiuwiyarie
(Ruk 22:47-53 – Mat 26:47-56, Mar 14:43-50, Wa 18:3-11)
47Merikɨte 'utaniukakaku 'akuxi yumɨiretɨ teɨteri mekaniu'axɨani, xewitɨ kaniwarawitɨkɨkaitɨni tamamata heimana memɨyuhuta mɨwanɨkai Kura titewatɨ. Ketsutsi 'aurie kaniutakeni 'i'itsenike. 48Peru Ketsutsi mɨpaɨ katinitahɨawe:
—Kura, ¿penetsi'itseme penetiyetuani Yuri Tewi kenemɨtitewa?
49Teɨterimama metemarietɨ kemɨtiyɨanekai mɨpaɨ mekaniutiyuani:
—Ti'aitame, ¿takutsiratekɨ tetewatakwini?
50Xewitɨ mɨkɨ tewi mawari wewiwamete tiwa'aitɨwame hetsɨa mieme ti'uximayatame nakaya kanawiteni tserietana mieme. 51Peru Ketsutsi mɨpaɨ kaniutayɨni:
—'Ari xeketeneuhayewa.
Hikɨ 'imayɨaka nakaya 'aixɨa kaniuyurieni. 52Hikɨ Ketsutsi mɨpaɨ katiniwarutahɨawe mawari wewiwamete tewa'aitɨwamete, kuyaxi tukipa miemete, meta 'ukirawetsixi memeyekɨ me'iwiyake:
—¿Kari xepeyekɨ 'ixiparate meta kɨyexite xete'u'ɨtɨ xenetsiwiyake, kemɨtiwiwiyarɨwa tinawayame? 53Tukarikɨ xehetsɨa ne'uyeikakaku tukipa xepɨkanetsi'umayɨa. Peru hikɨ xetukari kanihɨkɨtɨni yamɨtiyɨnikɨ, Yɨwikame heitserie pexeiya hikɨ.
Pekuru kemɨtiyuku'imawakai
(Ruk 22:55-62 – Mat 26:69-75, Mar 14:66-72, Wa 18:16-18, 25-27)
54Merikɨte me'iwiyaka mekaneihana mawari wewiwamete tiwa'aitɨwame kiita mekani'atɨani. Pekuru kaniweiyakaitɨni yatewa. 55Hikɨ takwa hixɨapa metinaika mana mekaniutiyaxe meta Pekuru wahamatɨa kaniutiyerɨni. 56Hikɨ xewitɨ 'ɨimari mana mɨti'uximayakai 'ixeiyaka hekɨaripa 'ukaime 'ixeiyatɨ mɨpaɨ kaniutayɨni:
—'Ikɨta hamatɨana kaniuyeikakaitɨni.
57Mɨkɨ kaniyuku'imawakaitɨni mɨpaɨ 'utaitɨ:
—'Uka 'aku, ne nepɨka'imate.
58Yareutewikakuta xewitɨ 'ixeiyaka mɨpaɨ kaniutayɨni:
—'Ekɨtsɨ xewitɨ mɨkɨ wa'iwa pekanihɨkɨtɨni.
Pekuru mɨpaɨ kaniutayɨni:
—Tewi, ne nepɨkahɨkɨ.
59Hikɨ xeihurayari 'aye'aku yakɨtɨniketɨ xewitɨta heitseriemekɨ mɨpaɨ kaniutayɨni:
—Yurikɨ 'ikɨ hamatɨana kaniuyeikakaitɨni, neuxei Karereya kiekame kanihɨkɨtɨni.
60Pekuru mɨpaɨ kaniutayɨni:
—Tewi, ne 'atsinepɨkatimate kepemaine.
Yapauka haniukakaku 'akuxi, wakana kenetahiwa. 61Ti'aitame ta'aurie 'aweka kaneutaniere Pekuru kaniuxeiya. Hikɨ Pekuru Ti'aitame niukieya kanaye'erieni kemɨtitahɨawixɨ: «Wakana katahiwawekaku 'akuxi hikɨ, 'ekɨ haikakɨa pepɨ'aku'imawani kename pekanetsimate pe'utaitɨ». 62Wayeyaka kaniutatsuani kwini mieme tiyuhiwerietɨ.
Ketsutsi kemɨtinanaimariekai kemɨtikuweiwakai
(Ruk 22:63-65 – Mat 26:67-68, Mar 14:65, Wa 18:22-23)
63Hikɨ teɨteri Ketsutsi memɨ'ɨwiyakai mekanitsutɨani me'inanaimatɨ meta mekanikuwayakaitɨni. 64Hɨxiena meheikɨhɨaka, mekanikuwayakaitɨni, meta mɨpaɨ mekateniku'iwawiyakaitɨni:
—Ketatineutahekɨatɨa, kemɨ'ane pɨmatsi'uwa.
65Waɨkawa matsi mɨpaɨ mekatenikɨhɨawekaitɨni 'axame'utiyuatɨ.
Ketsutsi kemɨtiutahɨawarie 'itsɨkate wahɨxie
(Ruk 22:67-71, 23:2-3, 18-25 – Mat 26:63-66, 27:11-26, Mar 14:61-63, 15:2-15, Wa 18:19-21, 29-37, 39–19:16)
66Merikɨtsɨ 'ukatareku mekaniyukuxeɨrieni teɨteri wa'ukiyarima meta mawari wewiwamete tewa'aitɨwamete, meta 'inɨarikɨ memɨte'ɨkitametetɨkai, mɨkɨ mekani'atɨani memayuxeɨriekaitsie. 67Mɨpaɨ mekatenitahɨawe:
—Ketatineutaxatɨa, xɨka 'ekɨ Kɨritsitu pehɨkɨtɨni.
Mɨpaɨ katiniwaruta'eiya:
—Xɨka yanetixe'utahɨawe, yuri xepɨkaneteta'eririeni. 68Xɨka nexeku'iwawiyanike xepɨkanetsita'eiyakeyu, meta xepɨkanetsixɨnakeyu. 69Peru hikɨtɨtɨ Yuri Tewi kenemɨtitewa Kakaɨyari Naimekɨmɨtɨrɨkaɨye tserieta nepakani.
70Yunaitɨ mɨpaɨ mekatenitahɨawe:
—'Aa, ¿'ekɨ xeniu Kakaɨyari petinu'aya?
Mɨkɨ mɨpaɨ katiniwarutahɨawe:
—Xemetsɨ mɨpaɨ xekaniutiyuaneni kename nehɨkɨ.
71Hikɨ mɨkɨ mɨpaɨ mekaniutiyuani:
—¿Ketitayari 'akuxi tetewareuyehɨwa tehekɨatamete? tametsietɨ tepi'eni tetana mieme.
Одоогоор Сонгогдсон:
Rukaxi 22: hch
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2020, Wycliffe Bible Translators, Inc.
