Mateo 10
10
Jesús Doce Ye'yecohua'ire Soiye
(Mr 3.13-19; Lc 6.12-16)
1Jesupi i̱ doce ye'yacohua'ire soini tutu i̱sipi, huatiohua'ire etoye cui'ne si'a ju̱'i dahuë jujuye cui'ne ai yo'ojë a'si ju̱'icohua'ire jujuyeje̱.
2Ñeje hue'ecohua'i paë'ë. I̱ doce jëjo saocohua'i cato: Simón cui'ne ja̱re i̱pi Pedro hue'equë paji'i. I̱ yo'jei Andrés paji'i. Jacobo cui'ne i̱ yo'jei Juan paë'ë, Zebedeo mamajë. 3Felipe, Bartolomé, Tomás paë'ë. Cui'ne Mateo pa'i do'i curiquë tsi'soquë pa'isiquë paji'i. 4Yequë Simónje paji'i, judío pa̱irepa de'oye pa'iyere cuasajë yo'o tsëcapë aquë. Cui'ne Judas paji'i, Jesure yehuoja̱'quëje̱.
Jesús Jëjo Saoye, I̱ Ye'yacohua'ire
(Mr 6.7-13; Lc 9.1-6)
5I̱ ye'yacohua'ire Jesús ñeje quëani jëjo saopi:
“Judío pa̱i peocohua'i quë'ro saima'pë caquë cui'ne cacama'pë pa'ijë̱'ë, Samaria quë'roje̱. 6Coa judío pa̱i quë'rose'e sani quëajë̱'ë, yëi ñama ne huesëse'eje̱ pa'iohua'ise'ere. 7Tsoe ti̱'api, Maija'quë cua̱ñe te̱'tere pa'iye, cajë quëajë̱'ë. 8Ju̱'icohua'ire jujucaijë̱'ë. Ju̱'isicohua'ire ne huëojë̱'ë. Si̱'si dahuë ju̱'icohua'ire a'si peocohua'ire necaijë̱'ë. Huatire eto saojë̱'ë. Do'i peoye jujucaijë̱'ë, mësarute do'i peoye i̱sise'eje̱ cui'ne.
9Curiquë sama'pë pa'ijë̱'ë. 10Mësaru ju'icose'ere ju'ijë saijë̱'ë. Te'e ju'i ca̱ sajë̱'ë. Topëje̱ saye pa̱jë'ë, zapatoje̱. So̱quë tupëje̱ si'aye peocohua'i saijë̱'ë. Co'amaña nequë cato i̱ ne do'ipi a̱iquë api.
11Ja̱je pa'ina, mësarupi pa̱i daripëna pa̱nita'a te'ohua'ise'e pa'i hue̱'ñana ti̱'asicohua'i pani co'ejë̱'ë, de'oye ca pa̱ini. Ti̱'ani i̱ huë'ena pëajë̱'ë, quëa tëjini sai macaja̱'a. 12Huë'ena cacacohua'i pani pëpajë̱'ë, de'oye pa'ija̱jë cuasacaijë. 13Ja̱je pëpajëna, ja̱ huë'e pa'icohua'ipi yëjëna, i̱ohua'ina de'oye pa'iye je̱ocani pëpani saijë̱'ë. Ja̱je pa'iquëta'are ja̱je pëpajëna, coecohua'i pa'ito, ja̱ pëpase'e jiojë̱'ë. 14Cui'ne mësarute co'ejë cui'ne asayeje̱ coecohua'i pa'ito, ja̱ maca ja̱ huë'epi pa̱nita'a ja̱ daripëpi etani ne'ña mësaru tsa'cuse'ere hue'sena ti̱'to to̱jë'ë. 15Nuñerepa cayë. Ja̱je yo'osicohua'ire sa̱iñe pasipi, pa̱i yo'ose'e ña mu'se ti̱'asi maca. Ja̱ maca ja̱ohua'ire Sodoma cui'ne Gomorra daripë̱a yo'ose'e se̱ña maca co'ayere papi yo'oye pasipi.
Ai Yo'oye
16Ai yo'oyena mësarute yë'ë jëjo saoyë, yëi ñamaje pa'iohua'ini yai jopona. Ja̱je pa'ina, a̱ñaje pa'iohua'i pa'ijë̱'ë, ta̱'ñe asajë yo'ocohua'i. Ja̱je pa'iohua'ita'a yecohua'ire sa̱ñope nema'cohua'ipi su'teje̱ pa'iohua'i pa'ijë̱'ë. 17De'hua ñajë'ë, mësarute pa̱ipi co'acohua'i a'ë cajë ëjaohua'ina i̱sija̱'cohua'i a'ë, cui'ne të'caja̱'cohua'i a'ë, pa̱i tsi'sisi huë̱'ñapi. 18Cui'ne mësarute saja̱'cohua'i a'ë, cua̱ñecohua'i quë'rona cui'ne pa̱i ëjaohua'i quë'rona, yë'ë do'ire. Ja̱je yo'ojëna, mësaru quëaja̱'cohua'i a'ë yë'ë pa'iye ayere. Ja̱ohua'i asajëna, cui'ne judío pa̱i peocohua'i asajëna, quëaja̱'cohua'i a'ë. 19Mësaruni ëjaohua'ina i̱sisicohua'i pa'ito co'a ju̱'ima'pë pa'ijë̱'ë. ‘¿Me caja̱'cohua'i a'ni?’ cuasajë ca ja̱'ñere co'ema'pë pa'ijë̱'ë. Maija'quëpi i̱sija̱'quë api, coca caye ti̱'asi maca. 20Maija'quë joyo i̱siyepi caja̱'cohua'i a'ë, ja̱je pa'ina.
21Maja'yë jupëpi yo'je tsi̱re tse̱a je̱o cua̱ñoja'cohua'i a'ë, huani je̱aja'cohua'ire. Cui'ne pëca ja'quëohua'ipi mamajëre tse̱a je̱o cua̱ñoja'cohua'i a'ë. Mamajëpi pëca ja'quëohua'ire sa̱ñope yo'oja̱'cohua'i a'ë. Ja̱je yo'ojë mamajëpi pëca ja'quëohua'ire huahuo je̱oja'cohua'i a'ë. 22Si'a pa̱i mësarute coeja̱'cohua'i a'ë, yë'ë do'ire. Ja̱je pa'itoje̱ quëcoquë cui'ne nuñerepa pa'i caraja̱isiquëpi ja̱ëpi huasosiquë pa'ija̱'quë api. 23Pa̱i daripëre pa'ijëna, tse̱añu'u cajë co'ecohua'i pa'ito catijë̱'ë, yequë daripëna. Ja̱je pa'ina, nuñerepa cayë. Pa̱i Mamaquë, ja̱ yë'ta'a mësaru si'a Israel pa̱i dari quëa saoma'në daija̱'quë api.
24Ye'yequë cato i̱te ye'yaquëje̱ pa'irepa peoji. Necaiquëje̱ i̱ ëjaëje̱ pa'irepa peoji. 25Ye'yequëpi i̱te ye'yaquëje̱ pa'i ti̱'ani i̱je pa'i a'ë cuasaye pa'iji. Cui'ne co'amaña necaiquëpi i̱ ëjaëje̱ pa'i ti̱'ani i̱je pa'i a'ë cuasaji. Ja̱je pa'ina, yë'ëni yure i̱ti huë'e ëjaëni huati ëjaëpi cani ¿Me mësaruteje̱ caye pa̱ñe'ni?
Neni Mai Ca'raye Pa'iquë'ni
(Lc 12.2-7)
26Ca'rama'pë pa'ijë̱'ë, pa̱ire. Si'aye ña ja̱'ñese'e pa'iji. Yahue sitona yo'ose'eje̱ ña ja̱'ñese'e pa'iji. Si'aye asa ja̱'ñese'e pa'iji. 27Yë'ë nea hue̱'ña case'ere mësarupi mia hue̱'ñana cajë̱'ë. Cui'ne yë'ë yahuese'ere, mësarupi ti̱ñarepa huë̱'ña ë̱mëje totopi nëcajë cuijë̱'ë. 28Ca'rama'pë pa'ijë̱'ë, ca̱pë huani je̱ocohua'ire joyo huani ti̱'ama'cohua'ire. Ai jerepa ca'rajë̱'ë, ca̱pë nejoquë cui'ne joyoje̱ toa yejana nejoquëre pani.
29Te'e curi të'quire caya pi̱'are i̱sicohua'i a'ë, mësaru. Ja̱je a'ri do'icohua'ita'are, ja'quëpi ë̱sequëna, te'ije̱ to̱meñe pa̱cohua'i a'ë. 30Ja̱je pa'ina, mësaru si̱opë nañaje cue̱cuese'e a'ë, te'e mease'e si'aye cue̱cuese'epi pa'iji. 31Ja̱je pa'ina, ca'rama'pë pa'ijë̱'ë. Mësaru a'ë, pi̱'a jerepa do'icohua'i.
Jesure Cacaiye Pa'iji
(Lc 12.8-9)
32Pa̱i ña hue̱'ñana Jesús acohua'i a'ë cacaisicohua'ire yë'ëje̱ cui'ne yë'ë ja'quë ma'tëmo pa'iquë ña hue̱'ñana yë'ë pa̱i a'ë, caquë quëasi'i. 33Ja̱je pa'iquëta'are pa̱i ña hue̱'ñana yë'ëre cacaima'cohua'ire yë'ëje̱ cui'ne ja'quë ma'tëmo pa'iquë ña hue̱'ñana cacaiye pa̱ja'quë a'ë.
Jesús Do'ire Pa̱ipi Hua Saiye
(Lc 12.51-53; 14.26-27)
34De'oye pa'i ja̱'ñere necaisiquë iye yejana daji'i, cuasama'pë pa'ijë̱'ë, yë'ëre. Yë'ë cato coa ai jerepa sa̱ñope yo'oyere dahuë. 35Pa̱ipi pëca ja'quëre sa̱ñope yo'o ja̱'ñere dahuë. Mamacopi pëca ja'core sa̱ñope yo'oyere, cui'ne mamaquë nëjopi huaore pë̱icore paja̱'coa. 36Ja̱je yo'ojë cajë te'e tsëcapëta'a pa̱i ñape i̱ohua'i pë̱icohua'ire paja̱'cohua'i a'ë.
37Pëca ja'quëni cui'ne pëca ja'coni yë'ëre oiye jerepa oiquë pani do'i peoquë pa'iji. Cui'ne mamaquëni pa̱nita'a mamaconi yë'ëre oiye jerepa oiquë pani do'i peoji, yë'ëre. 38Cui'ne i̱ pa'iyere ai oi yë'ëre pe'tema'quë pani do'i peoquë pa'iji, yë'ëre. 39Jëasi'i caquë yo'oquëpi i̱ pa'iyere coa nejo huesoja̱'quë api. Ja̱je pa'iquëta'are yë'ë do'ire yo'oquë i̱ pa'iyere cuasaquë jëasi'i caquë yo'oquëpi i̱ pa'iyere coa nejo huesoja̱'quë api. Ja̱je pa'iquëta'are yë'ë do'ire yo'oquë i̱ pa'iye nejosiquëpi pa'iye ti̱'aja'quë aquëpi.
Yo'osi Do'ire I̱si Co'amaña
(Mr 9.41)
40Mësarute de'oye tsioquë pani yë'ëni de'oye tsioji. Yë'ëni de'oye tsioquë pani yë'ëre jëjo daosiquëni de'oye tsioji. 41Maija'quë yo'o ja̱'ñere quëacaiquëni de'oye yo'oquë pani ja̱re ja̱ohua'ire i̱si co'amaña ayere i̱ñe pa'iji, nesi do'i. De'o pa̱ini de'oye tsioquë pani ja̱re nuñerepa pa'icohua'ire i̱si co'amaña ayere i̱ñe pa'iji, nesi do'i. 42Yë'ëre tuiquë macani oco mañare o̱cuasicohua'i pani de'o co'amaña i̱si cua̱ñoja'cohua'i a'ë.”
Одоогоор Сонгогдсон:
Mateo 10: sey
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2012, Wycliffe Bible Translators, Inc. All rights reserved.