Luke 24
24
Jesus uola muli
(Mat 28.1-10; Mrk 16.1-8; Jhn 20.1-10)
1Kahaka po keaho kela kapu, nahine la eko nalo manoni lakou nikanakana la, kena io i kaluma la. 2Nakama la uꞌike kehaku kokoꞌa la nahakaꞌape avale ikaha. 3Ia keualoko nakama la uo iloko kelua haku la, nakama la useꞌike kinokama Kealiꞌi Jesus, 4kena umasalo haeꞌo. Vahola oia, sakoꞌolua nakama ekuu aꞌe kevahi nakama la. Naauꞌahu koꞌolua la eꞌivaꞌiva poi heꞌemo. 5Kena nahine la umakaꞌu haeꞌo, kena ihamalu ilalo. Ia koꞌolua la eme aꞌe nahine la, “Okou sesee kama eola i keꞌina nakama umake nei ma ia? 6Jesus useai inei. Kama la uola muli. Ea, okou emanaku hea kama la nikakala aku okou i Galilee? 7‘Kelaa hekama mehaꞌali aꞌe {kama ekipu kama} i nakama haisala. Kena nakama la mekii kama la iluna {kolosi}. Ia kama la meola muli i keaho kanahakolu.’ ” 8Kena nahine la umanaku nakakala Jesus la.
9Vahola, nahine la ukaꞌa ikaha ma keꞌava la, kena io nomaka sehui ma kahi nakama kaukali la, ia ma nakama kela enoho ma lakou. Kena nahine la ehaꞌali aꞌe hea lakou niꞌike la. 10Anei namale nahine la; Mary Magdalene, Joanna, ia ma Mary kina James. Ia alahine ekaꞌa ma lakou hoi.
Nahine la eme aꞌe nakama heheaꞌu Jesus la hea lakou niꞌike i keꞌina kelua haku la. 11Ia nakama la sehakina nahine la, ia ihakaꞌoko pela nahine la ekakala havailalao oia. 12Ia Peter umasiꞌe iluna nokele i keꞌava haku la, kena ihakiu nomaka napamalo Jesus emoe pela oia. Kena Peter ehaele ikaha, emasalo soia.
Keala i Emmaus
(Mrk 16.12-13)
13Keaho la, koꞌolua nakama kela nikaꞌa ma Jesus la uo i kemakaꞌina emale ma Emmaus, kemakaꞌina emao ikaha*f22* ma Jerusalem. 14Koꞌolua la ehaele kakala namea hakoa kela nihuli mai la. 15Keualoko koꞌolua la ekakala, Jesus soia ehaele aꞌe nokaꞌa ma lakou. 16Ia Keakua epui sakoꞌolua la isemakino Jesus. 17Ko Jesus ime aꞌe, “Ana nikakala pehe olua ehaele kakala na?”
Ia koꞌolua la uhamau, kena iꞌila haaloha aꞌe. 18Kena kekama emale ma Cleopas ume aꞌe, “Aꞌoe soꞌoe semakino namea kela uhuli mai vahonei iloko Jerusalem?”
19Ko Jesus ime aꞌe koꞌolua la, “Nimea pehe?”
Ko koꞌolua la ime aꞌe, “Kelono Jesus i Nazareth. Kama la hekama haimahi kehakae nakakala Keakua, ia ehuli mai namahi aia, ia ihananiu imua namaisu Keakua ia ma keonohenua. 20Namaakua hamakua lakou ma nakama hananiu makou la eau aꞌe kama la ihakonukonu ikaia imake, nokii kama la iluna {kolosi}.
21“Makou uhakina imua pela kama la amehakana makou na{Jiu} ikaha ma nahaisala makou la. Ia kenei kanahakolu naaho imuli kama la umake la. 22Kena keaho nei, nahine makou la ekakala mai makou nomasalo haeꞌo. Kahaka nei, nakama la ekaꞌa i kelua haku. 23Ia nakama la selave kinokama Jesus. Nahine la uo mai nome mai makou pela ma lakou eꞌike na{enselo}. Ia na{enselo} la eme aꞌe lakou pela Jesus uola muli. 24Kena alakama keukulana makou uo i kelua haku la hoi. Nakama la elave poi hea nahine la nikakala mai makou la, ia seꞌike Jesus.”
25Kena iko Jesus ime aꞌe koꞌolua la, “Olua oivale, ia enase kehakina nakakala nakama hakae nakakala Keakua la. 26Nakama la ekakala aku pela ma keMesaea meihalono lihu, kena ihananiu ialuna.”
27Ko Jesus iaoaꞌo koꞌolua la nakuaa Moses ia ma nakakala nakama hakae nakakala Keakua, imakino laua nakipukipu aia.
28Kulana nakama la usasaika aꞌe kemakaꞌina Emmaus, eꞌila pela Jesus sehakaꞌoko maia menoho ilaa. 29Kena iko koꞌolua la ime aꞌe kama la, “Noho inei. Kemela uhiahi, kapili ipo.” Kena iko Jesus io ma koꞌolua la nonoho ilaa.
30Keualoko Jesus enoho ma nakama la noꞌai, kama la eko nahalaoa noloku aꞌe Keakua, kena ikohikohi ivavae aꞌe i nakama la. 31Keualoko la, nakama la uꞌila aꞌe nomakino Jesus, ia kama la uhakeꞌi noseai. 32Ko koꞌolua la ikakala solaua, “Keualoko Jesus niaoaꞌo mai kaua iluna keala la, nohaꞌali mai kaua kehakaꞌoko kelauniu kapu, kaua hihalono haeꞌo.”
33Vahola oia, koꞌolua la umasiꞌe iluna nokaꞌa muli i Jerusalem, nolave sehui ma kahi nakama kaukali la ma alakama enoho ma lakou la. Koꞌolua la ehaꞌuku nakama la hakoa, 34kena ime aꞌe, “Kealiꞌi uola muli hamaoni. Kama la ehakuu aꞌe soia i Simon.”
35Kena koꞌolua la ekakala aꞌe hea laua eꞌike iluna keala la hoi, ia hea laua emakino Jesus keualoko kama la nikohi halaoa la.
Jesus ehakuu aꞌe soia i nakama kaukali aia la
(Mat 28.16-20; Mrk 16.14-18; Jhn 20.19-23; Act 1.6-8)
36Keualoko koꞌolua la oikakala, Jesus ekuu aꞌe lakonu nakama la, kena ime aꞌe, “Noho laoi okou.”
37Kena nakama kaukali la eoho nomakaꞌu. Nakama la ehakaꞌoko ma lakou eꞌike kipua. 38Kena iko Jesus ime aꞌe, “Aiea okou emakaꞌu naea? Okou sehakina oia? 39Ila mai nalima anau ma navae anau. Kenei anau nei. Apaꞌe mai nohahaa, imakino okou pela anau eola. Kipua sehikinokama penei.” 40Kena Jesus ehuli aꞌe nakama la nalima ma navae aia.
41Nakama kaukali la umasalo nohihia haeꞌo, ia ehainakaa kehakina pela kama la eola hamaoni. Kena Jesus ume aꞌe nakama la, “Okou eisi naꞌai?” 42Ko nakama la iau aꞌe keme ponohi emoa. 43Kena Jesus uko ponohi la noꞌai imua lakou.
44Kena Jesus eme aꞌe, “Keualoko anau ninoho ma okou, anau eme aku penei, ‘Nakuaa Moses, ia ma nakama hakae nakakala Keakua, ia ma nahua keloku la hakoa ehaꞌali aku nakipukipu anau. Nakakala la meihuli aku nohamaoni.’ ”
45Kena iko Jesus iaoaꞌo nakama la nomakino kehakaꞌoko kelauniu kapu. 46Kama la eme aꞌe, “Ekakaa mai pela ma ‘keMesaea mehalono lihu nomake, ia keaho kanahakolu uola muli.’ 47Kena nakama kaukali aia la meꞌamaka i Jerusalem nokaukaꞌu aꞌe naonohenua hakoa i kemale aia, pela ikiꞌe ikaha ma nahaisala lakou, imea Keakua ihaialoha aꞌe lakou. 48Okou uꞌike name nei hakoa. 49Halono. Anau meihaunalia aku Keanana Kapu, ehau poi Kamana anau nime aku la. Ia okou inoho i Jerusalem ikae keualoko okou meko namahi ialuna la.”
Jesus uvaꞌai muli kevaelani
(Mrk 16.19-20; Act 1.9-11)
50Keualoko Jesus uhakaꞌi nakama kaukali aia la ikaha ma Jerusalem nokapili aꞌe Bethany, kama la usau nalima aia iluna nohakapu nakama la. 51Ia kulana kama la oihakapu, kama la uvae ikaha ma nakama la nosau lia iluna kevaelani. 52Kena nakama la ehihia lo, kena ivaꞌai muli Jerusalem, 53nonoho iloko hale kapu nohamaha kahi Keakua.
Одоогоор Сонгогдсон:
Luke 24: ojv
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 1999, Wycliffe Bible Translators, Inc. All rights reserved.
