John 3
3
Nicodemus ehaele aꞌe Jesus
1Kela heFarasi, kanamale Nicodemus. Kama la hekama hamakua na{Jiu}. 2Kama la ehaele aꞌe kepo novasili aꞌe Jesus penei, “Rabai, makou eailoa pela Keakua ehaunalia mai aꞌoe iaoaꞌo mai makou. Kama la enoho ma aꞌoe. Kela hea aꞌoe elavaa kehuli mai nahaꞌaku la.”
3Ko Jesus ime aꞌe, “Anau eme aku kehamaoni. Ame hekama sehanau muli, kama na selavaa kekae kenoholana Keakua.”
4Ia Nicodemus eme aꞌe, “Ia ame kanaka la umakua, kama na amehanau pehe? Kama na selavaa kevaꞌai muli iloko kemanava kina aia la nohanau muli.”
5Kena Jesus ume aꞌe, “Anau eme aku kehamaoni. Ame hekama sehanau i kevai ia ma Keanana Kapu, kama na selavaa kekae kenoholana Keakua. 6Nakama kela ehanau mai kekama eisi keola kekama oia. Ia nakama kela ehanau mai Keanana Kapu eisi keola Keanana Kapu. 7Aꞌoe sekau kemasalo keualoko anau eme aku aꞌoe, ‘Okou ihanau muli.’ 8Keualoko kemakani la emaili mai, aꞌoe elono kemakani la. Ia aꞌoe semakino kemakani la ehaele ihee, ia ehamai ihee. Nakama ehanau mai Keanana Kapu eme pela hoi.”
9Ko Nicodemus ime aꞌe, “Ia namenei meihuli mai pehe?”
10Jesus eme aꞌe, “Aꞌoe eaoaꞌo keonohenua Israel. Ia aꞌoe seimakino laoi namenei? 11Anau eme aku kehamaoni. Makou ekakala nia makou ailoa. Makou ekakala aꞌe namea makou eꞌike. Ia okou seailoa hea makou ekakala nei. 12Anau ekakala aku namea kemaalama nei, ia okou seihakina anau. Ia okou meihakina pehe, keualoko anau meikakala aku namea kevaelani? 13{Kama ekipu kama} ehaele iho kemaalama nei. Kena kama la soia elavaa kehaele iluna kevaelani.”
14Moses esau keꞌaka la iluna i keꞌina ekukuaha la. Ehau poi Keakua meisau {kama ekipu kama} la iluna. 15Nakama hakoa kela ehakina i aia meiko keola eola kahi. 16Keakua ealoha nakama kemaalama nei hakoa, kena iau iho kaukahi kama aia. Pela oai kekama ehakina i kama la meselano, ia meola naualoko hamau. 17Keakua sehaunalia iho kanakama la i kemaalama nei pela ihai aꞌe naonohenua la. Seai. Emeia kama la meikonaꞌi nakama la iola.
18Keakua mesehakonukonu nakama kela ehakina kekama aia la. Ia Keakua nahakonukonu avale nakama kela sehakina. Maikinimea nakama la sehakina kama hokahi aia la. 19Kenei kehakaꞌoko hamakua. Kemasina ekae iho kemaalama nei. Ia keonohenua la sehihai kemasina la. Ia ehihai avale nakipukipu epouli. Maikinimea nakama la epenapena kahi namea saꞌino. 20Nakama kela epena namea saꞌino la sehihai kemasina, ia seo aꞌe i kemasina la, aoki kemasina la mehaꞌali aꞌe namea saꞌino lakou epena la. 21Ia oai kekama ekaukali hamaoni Keakua, kama la ehaele aꞌe kemasina la. Ihuli aꞌe pela aia epena namea hakoa i namahi Keakua.
Jesus laua ma John Baptist
22Kena Jesus ma nakama kaukali aia la uo valoko Judea, nonoho ma nakama keꞌina la, kena ihaauꞌau kapu nakama la. 23Keualoko la, John ehaauꞌau kapu hoi i keꞌina Aenon, kapili kemakaꞌina Salim. Keꞌina la ekomaꞌi namakaa vai. Ia kena komaꞌi kekama eo aꞌe John ihaauꞌau kapu lia lakou. 24Keualoko la hoi, John seipono lia i kelokapu.
25Nakama kela ekakaꞌa ma John la ehakauoki ma kekama na{Jiu} la i kekuaa kesolo nalima. 26Kena nakama la uo nome aꞌe John, “Rabai, aꞌoe emanaku kekama nikili olua i kelaa vahi ke{liva} Jordan, kama aꞌoe ekakala la. Vahonei kama la uhaauꞌau kapu alakama, ia nakama hakoa eo aꞌe kama la.”
27Ko John ime aꞌe, “Poi Keakua sehimea au aꞌe kekama, kama la mesehimea eko. 28Okou elono nakakala anau nei, ‘Anau seai o keMesaea. Ia Keakua ehaunalia mai anau ihaele imua nokanakana keala kama la.’ 29Keualoko kaupeala meꞌavana kaupu, kela keꞌavana aia. Ia nasoa aia la meihakali nohalono kaupeala la. Ia nakama la meihihia keualoko lakou meilono keleo kama la. Anau ehihia pela hoi. 30Kama la mehaele nohananiu, ia anau mehaele nomoulalo i aia.”
Jesus ehamai i kevaelani
31Kekama kela ehaele iho ikaha ma kevaelani ehananiu iluna namea hakoa. Ia nakama kemaalama nei enoho kahi i kemaalama nei, kena eailoa kekakala namea kemaalama nei oia. Ia kekama kela ehaele iho ikaha ma kevaelani ehananiu iluna namea hakoa. 32Kama la ekakala mai hea aia elono, ia hea aia eꞌike. Ia keonohenua la sehihalono nakakala aia la. 33Ia nakama kela ehalono nakakala aia la ehuli aꞌe pela Keakua ehamaoni. 34Keakua ehaunalia iho kama la, kena kama la ekakala mai nakakala Keakua la. Kena Keakua eau aꞌe kama la namahi Keanana Kapu hakoa. 35Kamana elaoi kanakama, kena iau aꞌe namea hakoa ilolosi kama la. 36Nakama kela ehakina kama Keakua la meola naualoko hamau. Ia ame hekama sehalono kama la, kama na meseola. Ia Keakua meiloko kahi aꞌe kama na.
Одоогоор Сонгогдсон:
John 3: ojv
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 1999, Wycliffe Bible Translators, Inc. All rights reserved.