མ་ཏི། 19
19
ཁ་བེརེ་བེ་ག་ཀོར་གེ།
1ཡི་ཤུ་གི་ ཨོ་ཐ་བ་ གསུངས་ཉི་ཆུམ་དེན་གེ་ རོག་ག་ལིལ་གེ་བྱོན་ཉི་ ཡར་དཱན་རི་དྲང་ག་ ལོག་ཐུར་ལོ་ཀ་ཆོ་ཁཱན་ ཡ་ཧུ་དི་ཡ་ག་ཆ་འོག་ག་ཏཱན་ བྱོན་མ༌ལ། 2སོ་ངོ་མང་པུ་ཐུར་གི་ རོ་ཀ་ཕྱག་ཞུ་ཉི་ དི་ཝ༌ལ། ཉི་ཉ་ག་ རོ་ཀི་ རོག་ཏེ་བ་ དྲག་ཉི་གནང་མ༌ལ།
3རོ་ཀེ་རྒྱུགས་ལ་ལེ་དེན་གེ་ ཕ་རི་སི་པ་ཚེ་བང་ རོ་ཀ་སྐུན་མདུན་ག་ཨུན་ཐཱན་ དེན་ཐ་ཧང་ཆོ་ཝ་ཐུར་ ཕེ་ཝག་ཙ་གི་ རོ་ཀ་མེ་ཝག་ཙ་ཀབ་ཉི་ ཁ་བེརེ་བེ་ཆོག་པེ་སྨོ་དག་ཉི་ ཇི་མ༌ལ།
4ཡི་ཤུ་གི་ རོག་ཏེ་བ་ཀ་ལན་གནང་ཉི་ ཧང་བཀོད་ཁཱན་གི་ གོ་དང་པ་བཀོད་པེ་གང་ཀ་ ཕེ་ཝག་ཙ་ མེ་ཝག་ཙ་ཨ་ཉི་ བཀོད་པ་ག་ཀོར་གེ་ ན་ཤི་གསུང་རབ་ མ་ལྷག་ཅི་སྨོ་དག་ཉི་ གསུངས་མ༌ལ། 5དཀོན་མཆོག་གི་ གསུངས་མ་ཅ་ ཨོ་ཉི་ཨ་དེན་གེ་ ཕེ་ཝག་ཙ་གི་ རོ་ཀ་ཨ་པ་དང་ ཨ་མ་ཐུབ་ཐཱན་ཐཱན་ རོ་ཀ་མེ་ཝག་ཙ་ཀབ་ཉི་ཆོ༌ལེ། ཉི་རོག་ཉིག་ཙིང་ཤོ་ ཐུར་རིན༌ཅ། 6ཨོ་ཐེན་ཨ་ཉི་ རོག་ཉིག་ཙིང་ཤོ་ ཉིག་ཙིང་མང་གི་ཝ་ ཐུར་རིན༌ཅ། ཨོ་ཉི་ཨ་དེན་གེ་ དཀོན་མཆོག་གི་ ཏབ་ཐུར་ཛོམ་ཁཱན་ཁེ་པ་ སོ་ངོ་གི་ བེརེ་བེ་མ་ཆོག་པ་དག༌ཉི།
7ཨོ་ཉེན་གི་ནེ་ལ་ ཕེ་ཝག་ཙ་གི་ རོ་ཀ་མེ་ཝག་ཙ་ ཁ་བེརེ་བེ་ག་ འགན་རྒྱ་ཅོད་ཉི་བིན་ཐཱན་ ཐུབ་ཐ་ལེ་ཆོག་པེ་དག་ཉི་ མོ་ས་གི་ ཧང་ཨ་ཉི་གསུངས་མ་ཡ་དག་ཉི་ རོག་ཏེ་བ་ཀི་ ཞུ་ཝ༌ལ།
8ཉི་ཡི་ཤུ་གི་ རོག་ཏེ་བ་ཀ་གསུངས་མ་ལ་ ན་ཧ་སེམས་ ཀག་ཏར་ཆོ་ཝ་ཨ་དེན་གེ་ མོ་ས་གི་ ན་ཧ་ཁ་བེརེ་བེ་ཆོག་པེ་དག་ཉི་ གསུངས་མ་གི༌ལ། མ་པ་ཏ་ གོ་ཙུག་པེ་གང་ཀ་ཤོ་ ཨུ་ཉུ་ད་བུ་མཱན་ཆི། 9ཉི་ཇི་གི་ ན་ཧ་ཡེག་ཅ་ ཨི་བི་གི་ རོ་ཀ་མེ་ཝག་ཙ་གི་ དམ་ཚིག་མ་ཝ་ག་ལའི་ མ་ཨ་ནེ་བུ་ ཁ་བེརེན་ཐཱན་ བཱརའ་ཀབ་ཉི་ གཉེན་ཕི་ཝ་ཐུར་ ཨོ་ཉ་སོ་ངོ་གི་ གཉེན་གྲོགས་གེ་ཕིས་ཀ་ ལུས་འབྲེལ་ཨན་ཅ་གི་ལ་དག༌ཉི།
10ཕེ་ཝག་ཙ་དང་ མེ་ཝག་ཙ་བ་ཀ་བར་ཀ་ ཨོ་ཐེན་རང་གི་ནེ་ཏ་ གཉེན་རང་མ་ཕི་ཝ་ དྲག་པེ་གི་ཝ་ལ་དག་ཉི་ སློ་མ་བ་ཀི་ རོ་ཀ་ཞུ་ཝ༌ལ།
11ཡི་ཤུ་གི་ རོག་ཏེ་བ་ཀ་གསུངས་མ་ལ་ ཨོ་ཐ་ཡེ་ཁཱན་ཤོ་ སོ་ངོ་ཐམས་ཅན་གི་ ཆ་ཐ་ལེ་མར་བ། དག་པ་ཀབ་ཉི་ རོག་ཏེ་བ་ཀ་བི་ཁཱན་ སོ་ངོ་བ་ཀི་ཤ་ ཆ་ཐ་ལེ་རེ༌བེ། 12སོ་ངོ་ཚེ་བང་ ཕོ་ལེ་མོ་ལེ༌ཅ། ཉི་རོག་ཏེ་བ་ ཀེ་ལ་ཀབ་ཉི་རང་ ཨོ་ཉེན་ཨ་ཉི་ཀེ་ཝ་གི༌ལ། སོ་ངོ་ཚེ་བང་ སོ་ངོ་གི་ ཕོ་ལེ་མོ་ལེ་ཅོད་པ༌ཅ། ཉི་ཚེ་བང་ ཞིང་ཁམས་ག་ རྒྱལ་སྲིད་ག་དེན་གེ་ གཉེན་མ་ཕི་ལཱན་ཆོན༌ཅ། ཨོ་ཐ་ཆཱས་ག་ ཆ་ཐ་ལེ་རེ་ཁཱན་སོ་ངོ་གི་ ཆ་ཐཱན་ཆེན་དག་ཉི༎
ཡི་ཤུ་གི་ ཝག་ཙ་བ་ཀ་ དབང་གནང་མ༌ལ།
13ཡི་ཤུ་གི་ ཝག་ཙ་བ་ཀ་ཐུང་ཀ་ རོ་ཀ་ཕྱག་ཀེན་ཐཱན་ སྨོན་ལམ་ཞུན་གནང་ཆེན་དག་པ་གི་ ཝག་ཙ་ཚེ་བང་ རོ་ཀ་སྐུན་མདུན་ག་ཕ་ཝ༌ལ། དག་པ་ཀབ་ཉི་ ཝག་ཙ་བ་ཕ་ཁཱན་བ་ཀ་ སློ་མ་བ་ཀི་ བཱརག་པ༌ལ།
14དག་པ་ཀབ་ཉི་ ཡི་ཤུ་གི་གསུངས་མ་ལ་ ཝག་ཙ་བ་ ཇང་ཆོ་ས་ག་ ཨོ་ཕེ་བི། རོག་ཏེ་བ་ ཁག་པེ་མ་ཁེ༌ལ། ཧང་ཡ་དག་ནེ་ལ་ ཞིང་ཁམས་ག་རྒྱལ་སྲིད་ཤོ་ རོག་ཏེ་བ་ད་བུ་ཆོ་ཁཱན་བ་ཀ་གི་ལ་དག༌ཉི། 15ཉི་རོག་མ་བྱོན་མེ་གོ་མ་ རོ་ཀི་ རོ་ཀ་ཕྱག་ རོག་ཏེ་བ་ཀ་ཐུང་ཀ་ཀེན་ཐཱན་ དབང་གནང་མ༌ལ༎
བེ་དིང་ཡམ་ལང་།
16སོ་ངོ་ཐུར་ ཡི་ཤུ་ག་ སྐུན་མདུན་ག་བཅག་ཐཱན་ སློབ་དཔོན་ ཚེ་མ་འགྱུར་བརྟན་པ་ ཉོང་པེ་དེན་གེ་ ཇི་གི་ལའི་ལེག་པུ་ ཧང་ཨ་ལེ་ཁེ་ལེ་ཡ་དག་ཉི་ ཞུ་ཝ༌ལ།
17ཉི་རོ་ཀི་ རོ་ཀ་གསུངས་མ་ལ་ ནཱན་གི་ ཇ་ག་ལེག་པུ་ ཧང་གི་ལ་སྨོ་ ཧང་ཨ་ཉི་ཇིམ་ཅ་ཡ། ལེག་པུ་ཤོ་ དཀོན་མཆོག་ཐུར་ཤ༌ཅ། ཚེ་མ་འགྱུར་བརྟན་པ་ ཉོང་པེ་གི་ལ་དག་ནེ་ལ་ ནཱན་གི་བཀའ་རྒྱ་བ་ཀ་ ཆ་གནས་ཐ་ལེ་ཁེ་ལེ་དག༌ཉི།
18ཧང་བཀའ་རྒྱ་བ་ཡ་དག་ཉི་ ཨོ་ཉ་ཡམ་ལང་གི་ ཇི་མ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ནཱན་གི་ སོ་ངོ་ཤེ་ལེ་མང་ཕ། གཉེན་གྲོགས་གེ་ཕིས་ཀ་ ལུས་འབྲེལ་ཨ་ལེ་མང་ཕ། དྲོ་ཝཱན་ཨ་ལེ་མང་ཕ། འཛོམས་དཔང་ཨ་ལ་ཀབ་ཉི་ སོ་ད་ཕི་ལེ་མང་ཕ། 19ན་ག་ཨ་པ་དང་ཨ་མ་ག་ གུས་ཞབས་ཨའི། ཉི་ན་ག་ནོག་མིན་བ་ཀ་ ནཱན་ནཱན་ཏེན་ཕང་པ་ད་བུ་རང་ ཕང་ཅོ་དག༌ཉི།
20ཨོ་ཉ་ཡམ་ལང་གི་ ཞུ་ཝ་ལ་ ཇི་གི་ཨོ་ཐ་བ་ ཐམས་ཅན་ག་ ཆ་གནས་ཐ་ཝ༌ཅ། ཉི་ཨོམ་ ཇི་གི་ཨ་ལེ་ཁེ་ཝ་ག་ ཨོམ་ཆང་རང་ ཧང་ཅ་ཡ་དག༌ཉི།
21ཡི་ཤུ་གི་ རོ་ཀ་གསུངས་མ་ལ་ ནཱན་ནཱན་ཏེན་རང་ ཅོན་ད་སུར་རང་ མ་ཝ་རི་ལེ་གི་ལ་དག་ནེ་ལ་ དིན་ཐཱན་ ན་ག་ཆོ་ཁཱན་ ཐམས་ཅན་རང་ ཙོང་ཐཱན་ དུག་པུ་བ་ཀ་སྦྱིན་པ་ཕི། ཉི་ན་ག་རྒྱུ་ ཞིང་ཁམས་ག་སག༌པེ། ཉི་ཤ་ ནཱན་ལོག་ཐཱན་ ཇ་ག་ཚིང་ཚིང་ཨོ་དོ་དག༌ཉི།
22དག་པ་ཀབ་ཉི་ ཨུ་ཐུ་ད་བུ་ ན་ཐ་ལ་ཀབ་ཉི་ ཨོ་ཉ་ཡམ་ལང་ ཤོ་ནང་མ་ཕེ་ཝ༌ལ། ཧང་ཡ་དག་ནེ་ལ་ རོག་གནམ་མེད་ས་མེད་ བེ་དིང་ཆོ་ཝ༌ལ།
23ཡི་ཤུ་གི་ རོ་ཀ་སློ་མ་བ་ཀ་ གསུངས་མ་ལ་ ཇི་གི་ ན་ཧ་ཐྲང་ཉི་ཡེག་ཅ་ བེ་དིང་སོ་ངོ་བ་ ཞིང་ཁམས་ག་རྒྱལ་སྲིད་ནང་ཀ་ ནུ་ཕེ་ག་གནམ་མེད་ས་མེད་ ཀ་ལུ་ཨོ་ཕེ། 24ཇི་གི་ ན་ཧ་ལོག་ཉི་རང་ཡེག་ཅ་ བེ་དིང་སོ་ངོ་བ་ ཞིང་ཁམས་ག་རྒྱལ་སྲིད་ནང་ཀ་ ནུ་ཕེ་གེ་ཏ་ ང་མོ་ཁམ་ན་ནང་ཀེ་ནུ་ཕེ་ག་ ཡ་ལུ་ཨོ་ཕེ་དག༌ཉི།
25ཨུ་ཐུ་ད་བུ་ ན་ཐ་ལ་ཀབ་ཉི་ རོ་ཀ་སློ་མ་བ་ གནམ་མེད་ས་མེད་ ཡིད་ཆི་ཉི་ ཞུ་ཝ་ལ་ ཉི་ཏ་ ཨི་བི་གི་ ཐར་པ་ཉོང་པེ་ཡ་དག༌ཉི།
26ཡི་ཤུ་གི་ རོག་ཏེ་བ་ཀ་གཟིགས་ཐཱན་ གསུངས་མ་ལ་ ཨུ་ཐུ་ཤོ་ སོ་ངོ་གི་ ཨ་ལེ་མར་བ། དག་པ་ཀབ་ཉི་ དཀོན་མཆོག་གི་ མཛད་པེ་མར་ཁཱན་ ཧང་རང་མཱན་ཅ་དག༌ཉི།
27པ་ཏྲུས་གི་ རོ་ཀ་ཞུ་ཝ་ལ་ ཨ་ཤི་ཐམས་ཅན་རང་ ཐུབ་ཐཱན་ཐཱན་ ན་ག་ཕྱག་ཞུ་ཝ༌ཅ། ཉི་ཨོམ་ ཨ་ཤི་ཧང་ཉོང་པེ་ཡ་དག༌ཉི།
28ཡི་ཤུ་གི་ རོག་ཏེ་བ་ཀ་ གསུངས་མ་ལ་ ཇི་གི་ ན་ཧ་ཐྲང་ཉི་ཡེག་ཅ་ འཛམ་གླིང་སིང་མ་ནང་ཀ་ སོ་ངོ་ག་ཟ་གི་ རོ་ཀ་གཟི་བརྗིད་ག་ ཁྲི་ཐུང་ཀ་ལང་ཐཱན་ དབང་པེ་གང་ཀ་ ནའི་ཇ་ག་ཕྱག་ཞུ་ཁཱན་བ་ཀི་བུ་ ཁྲི་སོང་ཉིག་ཙིང་ཐུང་ཀ་ལང་ཐཱན་ ཨིས་རེལ་ག་ མི་རིགས་སོང་ཉིག་ཙིང་ག་ ཁྲིམས་ཅཱད་པེ་དག༌ཉི། 29ཉི་ཨི་བི་གི་ ཇ་ག་མིང་ག་ཡོར་ཀེ་ རང་ཏེན་ག་ཕའི་དང་ཡུང་ཟི་བ་ ཕ་མ་དང་ཝག་ཙ་བ་ ཉི་ས་གཞི་ཨོ་ཉ་བ་ ཐུབ་ཐ་ཝ་ཅ་གི་ལ་སྨོ་ ཨོ་ཉ་སོ་ངོ་གི་ ཨོ་ཉ་གེ་ 100 ཐེབ་ཉོང༌པེ། ཉི་ཚེ་མ་འགྱུར་བརྟན་པ་བུ་ཉོང༌པེ། 30དག་པ་ཀབ་ཉི་ གོ་མ་ཆོ་ཁཱན་མང་པུ་ཐུར་ ཇུ་ཀ་ལུས༌པེ། ཉི་ཇུ་ཀ་ཆོ་ཁཱན་མང་པུ་ཐུར་ གོ་མ་ཤེག༌པེ༎
Одоогоор Сонгогдсон:
མ་ཏི། 19: TNTB
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Tshangla New Testament
© 2023, The Bible Society of India
all rights reserved