Luk 7
7
A Iesu ien mamh m'ertu na pariana mlin na m'rnur a Rum
(Matiu 8:5-13)
1Naran itvr sera v'nenan udlani asnr nelnal, iv'a arna v'anu a Kapaniam. 2Atlera, mlin a Rum iamk ilak, m'rnuran inelnal iv'amk. Hin dui p'as na m'akarienan iamk im'at, itv'i ti ipam'a. 3Naran irn ti avrur a Iesu, itap'er eltar ardu a Isrel avrav'a asnn kavmiman ani a ti ipama kamhmah a dui na m'akarienan. 4Hir, naran avrama asn a Iesu, avmiman ani ihua, kavvr ti a, “Iviviln a ti pasr lm'an aulera. 5Sena ti hin ilap'as a nakd nvv'i m'ertu a Isrel, kahl nmah tamatam'em'.”
6Laha, a Iesu isapar. V'eti naran imima asn nmah, mlin na m'rnur hara itap'er tv'aln kinkin avrav'a asnn, kavvr ani kavvr ti a, “Mlin, maan parei ipahuadau sanak, sena ti naviviln a ti pama al nmahak. 7Sena si lera nv'ah ti naviviln a ti p'ama asnm, v'eti ipavr ti Nakm pavr v'nen uaki, dui na m'akarienak ipama kap'as ml. 8Sena ti kana nv'i dui nlak a nv' mlin uraur, m'rnur kinkin avlak a nv' nut huak. Ipavr ti p'evr a dui ipamk kavr ti a, ‘Pav'el,’ v'eti hin ikv'el pr. Kavr a dui uraur, kavr ti a, ‘Pama,’ hin ikama pr. Kavr a dui na m'akarienak kavr ti a, ‘Pan si lera,’ hin ikani pr.”
9Naran a Iesu irn v'nen lera itah ani kap'atalu anr m'ertu udlani avsapei kavr ti a, “Nvr a kam'i, Kana napasla m'ertu iamk v'ahienan ilil inap'ei aulera, nala ki iamk asnr m'ertu a Isrel.” 10Laha, m'ertu la ittep'a sarar hara avrahum'alet ml, kavla ti dui na m'akarien la im'at hara, itp'as ml udlani.
A Iesu iani ti a natn a tvtanu iamk ithal ml
11Dav'a, m'ih nen, Hin m'er m'ertuan avstudau avrav'a arna v'anu iamk, nahan iv'i a Nain. Nelnal avstudau avsapei. 12Naran imima asn pn liu na naml na v'anu, pavrni, avpap dui iamk itam'a sarei kavuirv'a aut arna v'anu. Aula im'a ra iv'i net tvtanu kamk uaki. M'ertu arna v'anu lera istudau avsapei. 13Naran a Mlinad ilei, irn istu ani, kavr ani, kavr ti a, “Matakal.” 14Kav'el kadama kaier pap. Sarei, m'ertu avpap dui lahara avp'tir. Laha, a Iesu ivr ani, kavr ti a, “Natk, nvr anh, pathal.” 15Laha, dui la itam'a sarei hara, ithal kalak kav'ana. Sarei, a Iesu itum'alet an a unian ml.
16Laha, hir udlani avlini a dedrenien, kavpatei Atua kavvr ti a, “Pruvet lil iamk itp'tir sarei asnd,” kavvri ml kavvr ti a, “Atua ima asnr m'ertuan kamhmah anr.” 17Laha, v'nen ivrur si lera ier v'anu udlani iter a Sutia m'a nut udlani itertalu atlera.
A Sun Paptais itep'a v'nen asn a Iesu
(Matiu 11:2-19)
18M'ertuan a Sun avvr si lera udlani ani. 19Sarei, a Sun iv'ara a m'ertuan arru katap'er arv'a asn a Iesu, karvr ti a, “?Nakm kv'i Dui la ikama pr, v'aha p'vtala dui uraur?”
20Dav'a dui lera arma asnn karvr ti a, “A Sun Paptais itep'a kam'em' a ti p'erma asnm karmiman anh karvr ti a, ‘?Nakm kv'i Dui la ikama pr, v'aha p'vtala dui uraur?’ ” 21Arna naran nen a Iesu imhmah a m'ertu istudau arna m'etienar m'a si udlani ianr, kasran m'im'iln stu kani ti m'ertu istudau avv'i m'etapis avledu sei ml.
22 #
Aisaia 35:5,6;
Aisaia 61:1. Laha, a Iesu ivrpranr kavr ti a, “Parhau karvr an a Sun si udlani ktrlei katrrn sarei. M'etapis avla sei ml, m'ertu tlr istu avv'eldau ml, m'ertu lep'ersi iuar, p'akr ima kap'as ml, m'ertu drlnar iprs avrn sei ml, m'ertu atvram'a sarei avsilv' ml, m'ertu siar ihei atvrp'ep'a sera v'nen p'as anr. 23M'ertu v'ahienan iahrs sanak, hin iparn ipap'as.”
24Naran m'ertuan a Sun atrhau sarei, ivr anr nelnal kavrur a Sun kavr ti a, “?Tituei kam'i kvrav'a arna nut kaka sena ti pavla v'ata? ?Kvv'ah ti hin inep'a sera viep' nalen itv'i? 25V'eti kvrav'a a ti pavla v'ata? Kvv'ah ti pavla dui iua klus ip'as istudau? Pavrni, m'ertu avua klus p'sp'as kaviak a si udlani, hir avlak al nmahar mlin lilil. 26?V'eti kam'i kvrav'a a ti pavla v'ata? ?Pruvet iamk? Aau, nvr a kam'i, aulera ilil kasiv' pruvet. 27#Mal 3:1.Hin iv'i dui Paivul ivruri kavr ti a, ‘Pavrni, Kana p'etep'a dui ipamk ipav'i v'nenak katauamu anh. Hin ipandedp' alam ipatauamu.’ 28Nvr a kam'i, asnr m'ertu tav'et ilav'i, pruvet nki iahamk ilil kasiv' a Sun, v'eti m'ertu isusupadau arna v'anuan Atua ilil kasiv'i.”
29 #
Mat 21:32; Luk 3:12. Naran nelnal udlani m'er ardu na takis avrn v'nen lera avm'ahu a ti sei Atua iani iviviln, sena ti hir, a Sun iten sera paptais anr. 30V'eti arvarisi m'er dui na v'nen hua ahavm'ahu a sei Atua irn ti apavani, sena ti hir, a Sun iahan paptais anr.
31V'eti a Mlinad ivr ti a, “?P'evr v'ata kav'iv'en p'klr m'ertu avsilv' hilaha? ?Hir avnep'a v'ata? 32Hir avnep'a mardel avlak arna nut aulul a sei kavv'rv'ara a hir kavvr ti a, ‘Kam'em' nviv ner, v'eti kam'i kaavsilu. Kam'em' nvtakal, v'eti kam'i kaavvalau.’ 33Sena ti a Sun Paptais ima, iahan p'ret, iam'n naui m'iel, v'eti kam'i kvvr ti a, ‘Hin m'im'iln stu ilak a nln.’ 34V'eti Kana, nv'i Net M'ertu, nma kahatat kam'n nauei, v'eti kam'i kvvr ti a, ‘Palei. Aulera iv'i dui ihatat iel kav'i dui na m'nm'nien, kav'i tv'alr dui na takis m'er m'ertu stu.’ 35V'eti pariar m'ertu udlani avsapa v'ahien p'as iv'iv'en ti v'ahien lera iviviln.”
A Iesu imhmah a tav'et stu iamk arna si stuan
36Varisi iamk imiman an a Iesu a ti ipahatat asnn. Laha, iv'a al nmaha Varisi lera kalak kahatat. 37#Mat 26:7; Mak 14:3; Sun 12:3.Laha, pavrni, tav'et stu iamk arna v'anu lera irn v'nen a ti a Iesu ihatat al nmaha Varisi. Laha, iuirma putel iamk aani a nav'et, nahan iv'i alapasta, la ilini a ueil m'in ip'as ha. 38Kap'tir a tahn kavalau, ui m'aten irarev' arna tln kasilei. Laha, iva tln a nil ptn kasmi kasran ueil aranan. 39Naran Varisi la imimani ha ila si lera, iv'hv'ahi a nln kavr ti a, “Imvr ti dui lera imv'i pruvet, imrndu hin ak iari, karndu ti iv'i tav'et inap'i, sena ti iv'i tav'et stu.”
40V'eti a Iesu ivrprani, kavr ti a, “Saimun, nrn ti p'evr si kinkin anh.”
Ivr ti a, “Tisa, pavr a kana.”
41A Iesu ivr ti a, “M'ertu iru arkaun asn dui iamk, tv'aln ikaun a 500,000 vatu, tv'aln 50,000 vatu. 42Naran aharpasla m'lnen ml, hin im'ahu a ti akaruli ml. Sena si lera, pavr a Kana, ?Hin ak asnr arru lahara ipalap'as ani ipasiv' tv'aln?”
43A Saimun ivrprani, kavr ti a, “Nsarei tv'aln la ikaun ilil ha.” Ivr ani, kavr ti a, “Kvrdaui.” 44Laha, ivav hin kap'a tav'et lahara kavr an a Saimun kavr ti a, “?Kla tav'et laha? Kana nma al nmaham, v'eti kaatu Kana nauei kinkin p'esilei a tlk, v'eti hin itsila sera tlk a ui m'aten kavei a nil ptn. 45Nakm kaakis m'a Kana, v'eti tav'et laha ism tlk dav'a naran nma eim dav'a ier hilaha. 46Nakm kaatp' ueil kinkin arna ptk, v'eti tav'et laha ittu sera ueil, m'in ip'as, arna tlk. 47Sena si lera nvr anh, ti ntlev'la sera si stuan la inelnal istudau ha, sena ti hin ilap'as a Kana istudau. V'eti ipavr ti p'elev'la si stua m'ertu ipasusupa, hin ipalap'as a Kana ipasusupa uaki.”
48Sarei, ivr a tav'et kavr ti a, “Ntlev'la sera si stuam udlani.”
49Laha, duanar m'ertu avlak kavhatat m'ei avvrvr a hir kavvr ti a, “?Aulera iv'i a hin ak a ti ipalev'la si stu?”
50Laha, ivr a tav'et lahara kavr ti a, “V'ahienam itlev'la sarah arna si stuam. Pav'el arna tamat.”
Одоогоор Сонгогдсон:
Luk 7: nmb
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023 Presbyterian Reformed Church of Australia
