Luk 2
2
A Kristu iak asn a Meri
(Matiu 1:18-25)
1Arna naran lera mlin lil a Rum, nahan iv'i a Ukastas, itu v'nen hua a ti apaspan m'ertu udlani avlak arna v'anuan kulul a nahar arna puk. 2Ki lera iv'i tertauamu aulul a naha m'ertu inap'i lera, iv'i naran a Kuirinias iv'i kavman lil a Siria. 3Laha, m'ertu udlani avrav'a arna pi nmahar a ti apulul a nahar arna puk.
4Inap'i lera a Susev' idan a Nasaret, iv'i v'anu iamk a Kalili, kadav'a a P'etliem arna nut a Sutia, iv'i v'anuan a Divt, sena ti ispkar nl nam'elan a Divt. 5A ti apulul a nahar m'ei a Meri, iv'i a naun itul sarei, v'eti idam'atr m'ei. Hin a Meri ittkar sarei. 6Dav'a, naran arlak atlera, ier naran na ti ipalev' sei. 7Laha, ilev' a Natn Dui iv'i titiamu, kanpakari a kalik kataui im'atr al kis na suada pluk, sena ti m'lnar ihei al nmaha v'anudl.
Ensel avpatei Atua kavvrp'ep'a v'nen p'as anr dui avp'aur sivsiv
8Arna v'anu lera dui kinkin avlak a nut hm'hm'a kavp'aur sivsivar lihat. 9Laha, pavrni, enselan a Mlin Eia ima kap'tir asnr, si p'sp'asan a Mlin Eia ier kaspat anr, laha avdedrn ani istudau. 10V'eti ensel ivr anr kavr ti a, “Mavdedrn. Pavrni, kana nuirma v'nen pas asnm'i, a ti m'ertu udlani apavrn ipap'as ipastudau. 11Dika, arna v'anuan a Divt, Dui pa iamk iak sanam'i, ipalev'la m'ertu kav'i a Kristu iv'i Mlin Lilad. 12Si laha ipav'iv'ani. Kam'i pavpasla Mardel nen, anpakari kataui im'atr al kis na suada pluk.”
13Iv'amk m'a ti ensel avstudau kavp'lt m'ei kavpatei Atua, kavvr ti a,
14“!P'vpatei Atua ilak arna nut eieia dau!
!Tamat ipaiak asnr m'ertu avlak arna nadep'!
!Vtmienan Atua ipaier m'ertu!”
15Laha, naran ensel avlnr kavrahau eia, ardu avp'aur sivsiv avvrvr a hir kavvr ti a, “Ip'as a ti p'vrav'a a P'etliem kavla sei ittu sera hin, la a Mlin Eia itv'iv'en sarei a nakd hara.” 16Laha, avv'el kavrada kavpaslei a Meri m'ei a Susev' m'a Mardel pa lahara im'atr al kis na suada pluk. 17Kavlei, sarei ti kavvrp'ep'a v'nen la ensel itvr sarei anr ivrur Mardel hara. 18Laha, m'ertu udlani la avrn v'nen lera ha avtah ani istudau, sena si udlani dui na sivsiv avvr anr. 19V'eti a Meri iuada v'nen udlani lera kav'hv'ahi nakl arna nln. 20Sarei, ardu na sivsiv avrahau kavpatei Atua, kavani ti nahan iv'a eia, sena ti si udlani avrni kavlei itu hin inep'a nut ensel ivr anr inap'ei.
Avan p'au nen a Iesu
21 #
Livai 12:3;
Luk 1:31. Arna satl na napn, iv'i naran na ti apan p'au nen, atu nahan, iv'i a Iesu. Naha lera ensel itvr sarei an a Meri naran idatkar.
Aruirv'a a Iesu al nmah tamat
22Arliliak inep'a nut v'nen huan a Musis ivri inap'ei a ti aparviviln arna nahn Atua. Dav'a napn nar ihiris, arlev' Mardel karuirv'a a Serusalem a ti apartau an a Mlin Eia. 23#Avruh 13:2,12.Inep'a nut v'nen huan a Mlin Eia ivri inap'ei, kavr ti a, “Dui titiamu udlani apavr ti avv'i nkan a Mlin Eia.” 24#Livai 12:6-8.Laha, artrp'n sei v'nen huan a Mlin Eia ivri, kartau ani, iv'i “navimar iru v'aha net vntau iru.”
A Simiun ila ti Atua ipalev'la m'ertu arna si stu
25Laha, pavrni, arna nut a Serusalem dui iamk ilak, nahan iv'i a Simiun. Hin iv'i dui p'as katu tamat nakl katrah ti Atua ipamhmah a Isrel. Hin M'im'iln P'as ilak aranan. 26Hin M'im'iln P'as itv'iv'en sarei ani a ti ikahm'a iktauamu a ti ipalei a Kristuan a Mlin Eia. 27Laha, M'im'iln P'as iani ti iv'a al nmah tamat naran a tetian m'ei a unian a Iesu aruirv'a a ti aparsapa p'kl v'nen hua ivri. 28Laha, a Simiun ilev' a Iesu karmani kapatei Atua kavr ti a,
29“Mlin Eia, kana nv'i dui na m'akarienam, hilaha km'ahu a ti p'ehiris a silv'ienak arna tamat,
Inep'a nut ktvr sarei inap'ei.
30Sena ti m'atak itla sera ti palev'la m'ertu arna si stuar.
31Nakm kandedp' a navanel nen arna nah m'ertu udlani.
32 #
Aisaia 42:6; 49:6; 52:10. Iv'i nut ren ipav'iv'en navanel anr v'anudl,
Kav'i si p'sp'asar m'ertuam avv'i Isrel.”
33A Susev' m'ei a unia Mardel artah a v'nen ivrur a Iesu. 34Laha, a Simiun imhmah anr kavr an a Meri iv'i a unia Mardel kavr ti a, “Palei, Atua itv'li sera Mardel laha a ti ipani ti m'ertu a Isrel ipanelnal apavrars, m'ertu a Isrel ipanelnal apavp'tir, kataui a ti ipav'i v'iv'enien ipamk m'ertu apavsip'lani, 35a ti ipav'iv'en sei iter al v'ahienar m'ertu ipastudau. V'eti nakm panep'a ti tali lil ipavahap'n v'ahienam.”
Ana ivrur a Iesu ti ipulla m'ertu arna si stu
36Arna nut lera ml tav'et iamk ilak, iv'i tav'et iv'i pruvet, nahan iv'i Ana. Hin iv'i a natn tav'et a Vanuil, iv'i nl nam'elan Aser. Hin itv'i sera v'nm'aran stu iamk. Itr asn a naun kalak m'ei pai isaru. 37Hilaha iv'i tvtanu. Paian inelsatl pln iv'a (84). Ialn nmah tamat naran, v'eti ipatei Atua iel, lihat m'a ren, kaln tim'ah katu tamat. 38Arna naran nen lera hin ima asnr kavr ip'as ml an a Mlin Eia kavrur Mardel anr nelnal avtrah ti Atua ipulla m'ertu a Serusalem.
Avm'alet ml arna v'anuar, iv'i a Nasaret
39 #
Mat 2:23. Naran atran sera si udlani v'nen huan a Mlin Eia ivri, avm'alet ml a Kalili arna v'anuar iv'i a Nasaret. 40Laha, Mardel lera ima kalil kahua arna v'ahienan karndu sei istudau. Vtmienan Atua iter aranan nakl.
Artisa lil avtah a sei a Iesu ivri naran idv'i mardel uam
41 #
Avruh 12:1-27; TVH 16:1-8. Laha, arna pai udlani, a unian m'ei a tetian arv'a a Serusalem arna tim'ah na Pasuva. 42Naran hin paian inal lman iru avsapa p'klr ardu a Isrel kavrav'a asn tim'ah lahara ml. 43Sarei, ti napn na tim'ah lera ihiris, arhau, v'eti a Iesu ilak uam a Serusalem. A Susev' m'ei a unian a Iesu aharrndu si lera. 44Karv'ah ti itsapar nelnal, karv'el napn iamk, laha kartala ani asnr m'ertu arna nl nam'elar m'er m'ertu uraur arledaur. 45Artala ani dav'a, aharlei, sarei arm'alet ml a Serusalem kartala ani uam. 46Dav'a dav'a napn itl iv'siau, laha arpaslei al nmah tamat, karla ti ilak asnr tisa kav'rn anr kamiman v'nen hapr anr. 47Laha, hir udlani la avrni ha avtah ani istudau, sena ti irndu sei istudau kavrpren mamahr. 48Naran arru arlei, artah ani istudau. Laha, a unian ivr ani, kavr ti a, “?Natk, Nakm kan si lera a kam'em' sena v'ata? Palei, kam'em' m'ei a tetiam nrtala anh karrn istu istudau.”
49Laha, ivrpranr kavr ti a, “?Inap'i hin krtala a Kana? ?Kaarrndu ti iviviln a ti nklak pr asn a Tetiak?” 50V'eti aharrndu sei ivruri.
51Laha, iv'el kavrav'a auei m'er kavrav'a a Nasaret kasapa v'nenar nakl. V'eti a unian iuada v'nen lera udlani arna nln. 52#1 Sam 2:26; V'nen 3:4.Dav'a, a Iesu ima kalil mau arna p'akn karndu sei mau arna v'ahienan, dav'a ti Atua m'er m'ertu avrn ip'as ani mau.
Одоогоор Сонгогдсон:
Luk 2: nmb
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2023 Presbyterian Reformed Church of Australia
