Lukas 24
24
Yeesus sayn peleepung
Mateus 28.1-10; Markus 16.1-10; Yohan 20.1-10
1Sontachs moynts, kans frii, sin ti fraae pis ans kraap kang un hon ti parfume woo se prepareyert hate mit kehool. 2Ti hon kesiin tas te xteen woo tas kraap tsuu kemach hat wech kehool kep waar. 3Awer, wii se rin kang sin, hon se net em Hër Yeesus sayne khërwer kefun 4un wuste net was se tënke solte. Uf mool, sin tswaay mëner tsum foerxayn khom, mit ways klënsich tsaych. 5Un ti fraae hon pang kriit, hon sich kekniit un sayn kesicht uf te potem kehal. Tan hon ti mëner tëne kesaat:
— Warom suucht teyer tswixich te toote weyer leewent is? 6Tee is net too hii, awer is witer peleept kep. Erinert aych tas, wii Tee in te Kalilëya waar, Eyer aych kesaat hot: 7“Te Soon fom Man mus ap kep wëre fer ti sinter, mus pekraytst kewe un mus peleewe am trite taach”.
8Tan, hon ti fraae an tëm sayn wërter traan ketënkt, 9un, wii se tsurik khom sin, hon se tas ales fertseelt fer ti elef aphostle un fer ti anere al. 10Tii fraae waare Maria Matalena, Yohana un Maria, Tiaako sayn mama. 11Awer, ti aphostle hon tas woo ti fraae fertseelt hon en tumheet kefun un hon es net keklaapt. 12Awer, Pheeter is uf kextii un is pis ans kraap kelaaf. Hot sich kepikt fer se kuke un hot ploos ti layn tiicher kesiin un sonst niks. Too is eyer tsurik noo hëm kang, ferwunert mit tëm woo paseyert waar.
Uf em weech noo Emauus
Markus 16.12-13
13An tëm selwiche taach, waare tswaay fon Yeesus sayn aanhënger noo en wile am keen woo Emauus kenënt waar, woo unkefeyer tseen khilomeeter wayt fon Yeruusalëm playpt. 14Tii waare am xpreche iwich ales was paseyert waar. 15Soo lang wii tii am fertseele un tiskuteere waare, is te aychente Yeesus ticht pay tëne khom un hot aankefang mit tëne se keen. 16Awer etwas hot net kelos tas tii em erkhëne teere. 17Tan hot Yeesus kefroot:
— Was sayt teyer am fertseele iwer weech?
Tii hon xtil kehal, mit traurichkheet, 18un eene fon tëne, woo Cleopas keheest hot, saat:
— Meechst tuu te eensichste pewooner fon Yeruusalëm sin woo net wees was tort paseyert is, in tëne letste taache?
19Too hot eyer kefroot:
— Was is tort paseyert?
Tii hon keantwort:
— Was mit Yeesus fon Nasarëë paseyert is. Tee man waar en profët un, fer Hërkot un fer tas kanse folek, waar er mechtich in akte un in wërter. 20Ti xëfe fon te priister un unsere fiirer hon em ap kep un hon em pekraytst. 21Un unser hofnung waar tas es tee weyer woo unser israelite folek pefraye teet. Awer, es sin xon tray taache woo tas ales paseyert is. 22Phaar fraae fon unser krup hon uns erxtaunt kelos, wayl sin foer taach pis ans kraap kang 23un hon tëm sayne khërwer net kefun. Sin tsurik khom am saan tas se ëngle kesiin hon un tas tii kesaat hon tas eyer leewent is. 24Phaar fon unsere krup sin pis ans kraap kang un hon kesiin tas wërklich paseyert waar was ti fraae kesaat hate, awer hon Yeesus net kesiin.
25Tan saat Yeesus tëne:
— Teyer tauert mool lang fer se ferxteen un fer se klaawe an ales was ti profëte kesaat hon! 26Wayl es waar neetich tas te Mesias layte mit mache mist un soo fon Hërkot ti kans kloor kriin khënt.
27Un hot ti kanse thekste fon te Hayliche Xrifte woo fon iim kexproch hon auskeleet, am aanfange mit Mooses sayn puch un ti xrifte fon te kanse Profëte.
28Wii se ticht an tas plats khom sin woo se hiin am keen waare, hot Yeesus kemach wii wën eyer wayter keen teet. 29Awer tii hon aankehal tas eyer playwe solt, am saan:
— Playp pay uns, wayl tas xon xpeet is, un ti nacht khomt xon tichter.
Tan is Yeesus rin kang fer mit te tswaay se playwe. 30Hot sich an te tix kesetst mit tëne, hot es proot kehool un hot Hërkot ketankt. Tëm noo hot eyer es proot keteelt un hot es tëne kep. 31Tan sin tëne ti aue uf kang, un tii hon Yeesus erkhënt. Awer tee is ferxwun. 32Tan hon se kesaat, eene fer te anere:
— Hot es net aus kesiin tas unser hërts keprënt hot in te prust wii eyer uf em weech mit uns kexproch hot un uns ti Hayliche Xrifte auskeleet hot?
33Tii sin klaych uf kextii un sin tsurik noo Yeruusalëm kang, woo se ti elef aphostle fersamelt kefun hon mit anere Yeesus aanhënger. 34Un ti aphostle hon kesaat:
— Te Hër is wërklich peleept kep un Simon hot em kesiin!
35Tan hon ti tswaay fertseelt was uf em weech paseyert waar un wii se te Hër erkhënt hon wii Eyer tas proot keteelt hot.
Yeesus khomt tsum foerxayn fer ti tisiple
Mateus 28.16-20; Markus 16.14-18; Yohan 20.19-23; Akte 1.6-8
36Soo lang wii tii tas am fertseele waare, is Yeesus uf mool tswixe tëne tsum foerxayn khom un saat:
— Tas te friite mit aych sich ferhalt!
37Tii hon sich ferxrok un hon fiil pang kriit un hon ketënkt tas se en kexpëns am siin weere. 38Awer tee saat:
— Warom sayt teyer ferxrok? Warom sin soo fiil tswayfle in ayre khop? 39Kukt mayn hënt un mayn fiis un siit tas es ich selwer sin. Thupt aan mich tan tuut teyer klaawe, wayl en kexpëns hot khee flayx un khee knoche, wii teyer siit tas ich hon.
40Yeesus hot tas kesaat un hot sayn hënt un sayn fiis ketsaycht. 41Ti aphostle hon imer noch net keklaapt, wayl ti waare tsuu froo un ferwunert. Tan hot Yeesus kefroot:
— Het teyer etwas too fer se ese?
42Tii hon tëm en xtik keprootne fix kep, 43woo eyer kehool hot un hot em foer tëne kes. 44Tëm noo, saat eyer:
— Wii ich noch pay aych waar, saat ich tas ales paseere must woo kexrip waar iwich mich in Mooses sayn Kesetse, in te Profëte sayn picher un in te Salme.
45Tan hot Yeesus tëne sayne sin uf kemach tas tii ti Hayliche Xrifte ferxteen khënte 46un saat:
— Was kexrip is is tas te Mesias layte mit mache must un am trite taach witer peleepe. 47Un tas, in tëm sayne naame, ti mensaaj iwich royung un fertsayung fon te sinte aan kesaat keept fer ti kanse natsioone, in Yeruusalëm am aanfange. 48Teyer sayt tsayer fon tëm tings. 49Un ich xike aych was mayne Fater ferxproch hat. Awer waart hier in Yeruusalëm, pis ti macht fon uwe iwich aych khomt.
Yeesus kept noo em himel kenom
Markus 16.19-20; Akte 1.9-11
50Tan hot Yeesus al pis aus te xtat kenom, pis ans plats Petania. Too hot er ti hënt kehoop un hot se keseechent. 51Soo lang wii eyer se am seechne waar, is Yeesus fon tëne wech kang un is noo em himel kenom kep. 52Tii hon em atoreyert un sin tsurik noo Yeruusalëm kang fol mit frayt. 53Un waare ti kans tsayt uf em hoof fom thëmpel keplip, Hërkot am loope.
Одоогоор Сонгогдсон:
Lukas 24: NTHunsrik
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
2022 Sociedade Bíblica do Brasil
