Lukas 22
22
Te plaan fer Yeesus umpringe
Mateus 26.1-5; Markus 14.1-2; Yohan 11.45-57
1Es waar ticht am Proot oone Heep Fest, woo Oostre kenënt waar.#Êx 12.1-27 2Te priister sayn xëfe un ti relichioons Kesets mayster hon kepleent wii se Yeesus khënte heelich umpringe wayl se pang hate fom folek.
Yuutas tuut Yeesus ap kewe
Mateus 26.14-16; Markus 14.10-11
3Too is Sataan in Yuutas Iskariotes, woo eene fon te tswelef aphostle waar, rin kang. 4Yuutas is xpreche kang mit te priister sayn xëfe un mit te ofitsiaale fon te soltaate fom Thëmpel fer ap mache wii eyer Yeesuus tëne ap kewe teet. 5Ti sin mechtich froo kep un hon ferxproch iim kelt kewe. 6Yuutas hot es aan kenom un hot aankefang en xans suuche fer Yeesus tëne ap kewe, oone tas es folek es kewaar keept.
Yeesus xikt ti Oostre aanrichte
Mateus 26.17-25; Markus 14.12-21; Yohan 13.21-30
7Te taach fom Fest fom Proot oone Heep is khom, taach woo ti yute kleene xeef kexlacht hon fer ti Oostre fayre. 8Too hot Yeesus Pheeter un Yohan kexikt, un saat:
— Keet un prepareyert tas Oostre nachts ese fer uns.
9Tii hon kefroot:
— Woo wolt Teyer hon tas meyer es nachts ese mache sole?
10Yeesus hot keantwort:
— Heyert! Wën teyer in ti xtat khomt, wërt teyer en man trefe woo en waser kruuch traat. Keet tëm noo pis ans haus woo eyer rin keet 11un saat fer te hër fon tëm haus: “Te Mayster hot frooe kexikt in was fer plats fom haus woo eyer un sayn tisiple es Oostre nachts ese ese tuun.” 12Tan tsaycht tee man aych en kroos kemeepelt xtup im iwerxte xtok. Prepareyert tort es nachts ese.
13Ti tswaay tisiple sin kang un hon ales kefun kraat soo wii Yeesus kesaat hat.
Em Hër sayn Nachts Ese
Mateus 26.26-30; Markus 14.22-26; 1Korintios 11.23-25
14Wii ti uertsayt khom is, hot Yeesus sich uf sayn plats am tix kesetst mit te aphostle 15un saat tëne:
— Ich wolt tsu kërn tas Oostre Fest mit aych ese, eep ich mayn layte mit mache! 16Awer ich saan aych tas ich nii mee tas Nachts Ese ese, pis ich es echte Nachts Ese ese im Kotes Raych.
17Too hot Yeesus te wayn khelich kehool, hot Kot ketank, un saat:
— Hoolt tas un teelt es unich aych. 18Ich saan aych tas ich nii mee fon tëm wayn trinke pis te Kotes Raych khomt.
19Too hot eyer es proot kehool un hot Kot ketankt. Hot es proot in xtiker keproch un hot es fer ti aphostle kep, un saat:
— Tas is mayne khërwer, woo fer aych keopfert kept. Macht tas fer aych an mich se erinere.
20Noo em ese, hot eyer es selwiche kemach mit em wayn khelich, un saat:
— Tas is te khelich fon te nay alians tswixich Hërkot un sayn folek, alians woo karanteyert kept torich mayn pluut, woo weche aych ferxut kept.#Jr 31.31-34 21Awer kukt mool: tee woo mich aan kept hukt too pay mich am tix! #Sl 41.9 22Wayl te Soon fom Man xtërept soo wii te Hërkot es kepleent hat. Awer, owee fon tëm woo te Soon fom Man am hinerkeen is!
23Too hon ti aphostle unich sich kefroot weyer fon tëne tas mache teet.
Weyer is te importanteste?
24Ti aphostle hon aankefang unich sich se xtrayte, weche weyer fon tëne importanter kerechent keept.#Mt 18.1; Mk 9.34; Lk 9.46 25Too saat Yeesus:
— Ti kheeniche fon tee welt unertrike tas folek, un ti kowerneyer wëre froynte fom folek keruuft. 26Awer, unich aych tëref es net soo sin. Kraat es keeche teel, te importanteste mus sin wii te keringste un tee woo kowerneyert mus sin wii tee woo petiint.#Mt 23.11; Mk 9.35 #Mt 20.25-27; Mk 10.42-44 27Weyer is te importanteste? Tee woo am tix sitst fer se ese ore tee woo petiint? Natierlich is es tee woo am tix sitst. Awer unich aych sin ich wii tee woo petiint.#Yo 13.12-15
28— Teyer waart imer mit mich in mayn layte. 29Tesweche, soo wii mayn Fater mich ti recht kep hat fer kowerneere, kewe ich fer aych ti selwich recht. 30Teyer wërt ese un trinke an mayne tix in mayne Raych un teyer setst aych uf troone fer ti tswelef xtame fon Israel se xulkeere.#Mt 19.28
Yeesus awiseyert Pheeter
Mateus 26.31-35; Markus 14.27-31; Yohan 13.36-38
31Yeesus saat wayter:
— Simon, Simon, pas kuut uf! Sataan hot erlaupnis kriit fer aych proope. Tee tuut aych siipe, wii te pauer weets siipt tas er fom xtroo ketrënt kept. 32Awer ich sin fer tich am peete, Simon, tas tich net te klaawe feelt. Un, wënst tuu tsurik noo mich khomst, animeyer tayn priiter.
33Too saat Pheeter fer Yeesus:
— Ich sin fërtich fer in ti katee khome un fer se xtërwe mit aych!
34Un Yeesus saat:
— Ich saan tich, Pheeter, tas hayt, eep te haan kreet, tuust tuu tray mool saan tas tuu mich net khënst.
Yeesus awiseyert ti tisiple
35Tan hot Yeesus fer ti tisiple kefroot:
— Hot, filaycht aych etwas kefeelt wii ich aych aus kexikt hon oone thax, oone traache thax un oone santaale?
Ti tisiple hot keantwort:
— Hot kaarniks kefeelt!#Mt 10.9-10; Mk 6.8-9; Lk 9.3; 10.4
36Too saat Yeesus:
— Awer yets, weyer en thax ore en traache thax hot sol se hoole; un weyer khee xwaart hot sol sayne mantel ferkhaafe un en xwaart khaafe. 37Wayl ti Hayliche Xrifte saan: “Eyer is ferklaycht kep wii en pantit.” Ich saan aych tas tas mit mich paseere mus, wayl was kexrip xteet fon mich mus paseere.#Is 53.12
38Too hon sayn tisiple kesaat:
— Hër, too sin tswaay xwaarte.
Too hot Yeesus keantwort:
— Yets is es kenuuch!
Yeesus uf em Oliiwe Përich
Mateus 26.36-46; Markus 14.32-42
39Yeesus is kang, wii sayn kewoonheet, pis an te Oliiwe Përich; un sayn tisiple sin mit em kang. 40Wii eyer an es raus kesuuchtne plats hiin khom is, saat Yeesus:
— Peet un ferlangt tas teyer net in fersuuchunge falt.
41Too is Yeesus unkefeyer traysich meeter fon tort wech kang. Hot sich kekniit un hot aankefang se peete, 42am saan:
— Fater, wën es tayne wile is, tan xpaar es mich ap fon tëm laytung khelich se trinke! Awer tas net kemach kept was ich wil, awer was tuu wilst.
43[Too is en ëngel fom himel khom un hot em animeyert. 44Fol fon kroose noot, hot Yeesus mit noch mee kraft kepeet. Sayn xwees waar wii pluut trope uf te potem am tripse.]
45Wii Yeesus kepeet hat, is eyer uf kextii, is tsurik pis ans plats kang woo ti tisiple waare un hot se aan ketrof am xloofe, wayl tëne sayn traurichkheet waar tsu kroos. 46Un Yeesus saat:
— Warom sayt teyer am xloofe? Xtayt uf un peet tas teyer net in fersuuchunge falt.
Yeesus kept kefang
Mateus 26.47-56; Markus 14.43-52; Yohan 18.3-12
47Yeesus waar noch am xpreche, wan fiile mënxe tsum foerxayn khom sin. Yuutas, ëne fon te tswelef aphostle, waar weyer ti mënxe kefiert hot, is ticht pay Yeesus kang fer em se khuse. 48Awer Yeesus saat:
— Yuutas, is mit en khus woos tuu te Soon fom Man ap kepst?
49Wii ti tisiple woo pay Yeesus waare kesiin hon was paseere teet, hon se kesaat:
— Hër, sole meyer keeche tii layt keen mit unser xwaarte?
50Eene fon tëne hot em Hooche Priister sayne knecht wee kemach mit te xwaart, un hot em es rechtse oer ap kexnit.
51Awer Yeesus saat:
— Heyert uf too temit!
Too hot Yeesus am man sayn oer traan kefaar un hot em keheelt. 52Tëm noo, hot Yeesus fer te priister sayn xëfe un fer ti soltaate fom Thëmpel un ferte yute sayn fiirer woo khom waare fer en in xpërte, kesaat:
— Warom sayt teyer mit xwaarte un kniple khom fer mich se fange, wii wën ich en pantit weyer? 53Ich waar toch yeete taach pay aych am hoof fom Thëmpel, un teyer hot net fersuucht mich fange. Awer tas is ayer xtun un aach ti xtun fon te tunkelheet sayn macht.#Lk 19.47; 21.37
Pheeter saat teet Yeesus net khëne
Mateus 26.69-75; Markus 14.53-54,66-72; Yohan 18.15-18,25-27
54Tii hon Yeesus kefang un hon em pis am Hooche Priister sayn haus kenom. Un Pheeter is, fon waytem, tëne noo kang. 55Wii se fayer kemach hon im mite hoof, is Pheeter sich setse kang mit tëne woo um es fayer rom waare. 56En maat hot em kesiin tort huke ticht am fayer, hot en kuut aan kekukt un saat:
— Tee man waar aach pay Yeesus!
57Awer Pheeter hot kesaat:
— Fraa, ich khëne kaar net tee man!
58En kleen tsayt tëm noo, hot en man Pheeter tort kesiin un saat:
— Tuu pist aach eene fon tëne!
Awer Pheeter hot keantwort:
— Man, ich sin kheene fon tëne.
59Unkefeyer en xtun tëm noo, hot en anere kesaat:
— Tuu waarst kraat pay Yeesus, wayl tuu pist aach en kalileyer.
60Awer Pheeter hot keantwort:
— Man, ich wees net fon was tuu xprechst!
In tëm momënt, wii eyer am xpreche waar, hot te haan kekreet. 61Too hot te Hër sich rom ketreet un hot tiif in Pheeter sayn aue kekukt, un Pheeter hot traan ketënkt an ti wërter woo te Hër tëm kesaat hat: “Hayt, eep te haan kreet, tuust tuu tray mool saan tas tuu mich net khënst.” 62Too is Pheeter tort fort kang un hot pitre trëne keprilt.
Ti soltaate ferhaue Yeesus
Mateus 26.67-68; Markus 14.65
63Ti mëner woo Yeesus uf kepast hon, hon aankefang em ferxpote un hon em ferxlaat. 64Hon em ti aue tsuu ketekt un hon kefroot:
— Weyer hot tich kehau? Root mool!
65Un noch fiil aner tings hon se tëm kesaat fer em se ayre.
Yeesus foer em Hooche Konseel
Mateus 26.57-68; Markus 14.53-65; Yohan 18.19-24
66Wii te moynt khom is, hon phaar yute fiirer, phaar xëfe fon te priister, un phaar Kesets mayster en fersamlung kemach. Tëm noo, hon se kexikt Yeesus pay tëne sayne Hooche Konseel nëme. 67Too hon se kesaat:
— Saa fer uns op tuu te Kristus pist.
Yeesus hot keantwort:
— Wën ich “yoo” saan, tuut teyer tas net klaawe. 68Un, wën ich was frooe, tuut teyer es net antworte. 69Awer fon yets an wayter tuut te Soon fom Man sich an ti rechts sayt fom Aler Mechtiche Hërkot setse.
70Too hon se al kefroot:
— Tan pist tuu em Hërkot sayne Soon?
Yeesus hot keantwort:
— Sayt teyer woo tas am saan sayt.
71Un tii hon kesaat:
— Meyer prayche khee tsayer mee hon. Meyer hon selwer keheyert was tee kesaat hot.
Одоогоор Сонгогдсон:
Lukas 22: NTHunsrik
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
2022 Sociedade Bíblica do Brasil
