Yohan 2
2
Yeesus keet uf en hochtsayt
1Tswaay taache tëm noo, waar en hochtsayt in Kanaa, in te rechioon fon te Kalilëya, un Yeesus sayn mama waar tort. 2Yeesus un sayn tisiple waare aach in kelaat kep fer tii hochtsayt. 3Wii te wayn al kep is, hot Yeesus sayn mama fer tee kesaat:
— Te wayn is al kep.
4Yeesus hot keantwort:
— Is net nootwenich tas tuu mich saast was ich mache sol. Mayn tsayt is noch net khom.
5Too hot sii fer ti aarwater kesaat:
— Macht was tee xike tuut.
6Tort ticht waare seks waser kruuche; in yeete eene hon fon achtsich pis hunert tswansich liter waser rin kepast. Ti yute hon tas waser woo se in tii kruuche uf kehoop hon in sayn purifikatsioon serimoniie penutst. 7Yeesus saat fer ti tiiner:
— Filt ti kruuche mit waser.
Un tii hon se pis an te rant kefilt. 8Klaych tëm noo hot Yeesus kexikt:
— Yets hoolt en pisye fom waser fon tëne kruuche raus un nëmt tas hiin fer te xëf fon te tiiner.
Un tii hon tas hiin kenom. 9Tan hot te xëf fon te tiiner tas waser kexmekt, un tas waser hot sich in wayn transformeyert kehat. Tee wust net fon woo tee wayn khom waar, awer ti tiiner wuste. Tesweche hot eyer te praut keruuf 10un saat:
— Ti kewoonheet is eyerxt te peste wayn aus teele un, wën ti inkelaatne xon fiil ketrunk hon, te keweenliche wayn aus teele. Awer tuu host te peste wayn pis yets wech ketuun.
11Yeesus hot tee sayne eyerxte wuner in Kanaa, fon Kalilëya, kemach. Soo hot eyer sayn kloor reweleyert, un sayn tisiple hon an em keklaapt.
12Tëm noo, sin Yeesus, sayn mama, sayn kexwister un sayn tisiple noo te xtat Kafarnaum kang un sin phaar taache too keplip. #Mt 4.13
Yeesus keet pis an te thëmpel
Mateus 21.12-17; Markus 11.15-19; Lukas 19.45-48
13Phaar taache foer te yute sayn Oostre, is Yeesus pis an ti xtat Yeruusalëm kang.#Êx 12.1-27 14Uf em hoof fom Thëmpel hot eyer layt ketrof woo okse, xeef un taupe am ferkhaafe waare; un hot aach tii woo, an sayn tixe am huke, tas kelt um ketrokt hon fer tas folek. 15Too hot eyer em paytx fon xtrike kemach un hot tas kanse folek fon too wech keyaat un aach ti xeef un ti okse. Hot ti tixe fon tëne woo tas kelt um ketrokt hon rom kextilept, un ti nikle hon sich uf em potem ferxtraut. 16Un saat fer tii woo ti taupe am ferkhaafe waare:
— Nëmt tas ales too wech! Heyert uf en kexefts haus mache fon mayne Fater sayn haus!
17Too hon tëm sayn tisiple an te wërter fon te Hayliche Xrifte ketënkt, woo saan: “Mayne liipe iwich tayn haus, oh Hërkot, prënt in mich wii fayer.”#Sl 69.9
18Too hon ti yute fiirer kefroot:
— Was fer wuner khanst tuu mache fer uns pewayse tas tuu autoriteet host fer tas se mache?
19Yeesus antwort:
— Xmayst tee Thëmpel um, un ich tuun em noch mool uf paue in tray taache!#Mt 26.61; 27.40; Mk 14.58; 15.29
20Tii hon kesaat:
— Tas hot seks un fërtsich yoer ketauert fer tee Thëmpel uf paue, un tuu saast tas tuu en noch mool uf paue khanst in tray taache?
21Awer te thëmpel woo Yeesus triwer am xpreche waar, waar sayne aychne khërwer. 22Wii Yeesus peleept kep is, hon tëm sayn tisiple traan ketënkt tas tee tas kesaat hat un tan hon se an te Hayliche Xrifte un an tëm sayn wërter keklaapt.
Yeesus wees was ti layt tënke
23Wii Yeesus in Yeruusalëm waar, iwich tas Oostre Fest, hon fiil an tëm keklaapt wayl se ti wunere kesiin hon woo eyer kemach hot. 24Awer Yeesus hot khee sicherheet kexpiert, wayl eyer hot se al kuut kekhënt. 25Un nimant praucht mit iim xpreche iwich yemant, wayl eyer wust was yeete persoon am tënke waar.
Одоогоор Сонгогдсон:
Yohan 2: NTHunsrik
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
2022 Sociedade Bíblica do Brasil