မ︀တ︀်တ︀ႄး 24

လ︀ွင︀်ႈꩡ︀ဝ်ႛယ︀ေꩬ︀ုၵ︀ႆ︀ႈလ︀ွင︀်ႈꩡ︀ွင︀်းၿိက︀်ႉမ︀ၢꩫ︀်တ︀ီၸ︀ေႛ

(မ︀ႃက︀ု 13.1,2; လ︀ုက︀ႃ 21.5,6)

1ꩡ︀ဝ်ႛယ︀ေꩬ︀ု လ︀ုက︀်ႉꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ဢ︀ွက︀်က︀ႃက︀ီး တ︀ပ︀ေးꩡ︀ဝ်ႛၵ︀ဝ်မ︀ႃးꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ ꩭူဝ်ꩬ︀ိင︀် ꩡ︀ွင︀်းၿိက︀်ႉမ︀ၢꩫ︀် ဢ︀ꩫ︀်ႈꩫ︀ႂ်းဝၢင︀်းဢ︀မ︀ႂ်းꩫ︀ႆ︀ႇၵ︀ဝ်မ︀ႆ︀ႛ ꩡ︀ိုဝ်ႇပ︀ျႃးက︀ꩫ︀်ႈဢ︀ူ။ 2မ︀ꩫ︀်းꩡ︀ဝ်ႛယ︀ႃႇ “ဢ︀ိူဝ်း ꩫ︀ႆ︀ႇၵ︀ဝ်မ︀ႆ︀ႛ လ︀ႅမ︀်းꩫ︀ီႈꩫ︀ီႈ ဝႆ︀ႇလ︀ႃး။ ထွမ︀်ꩫ︀ီႈꩫ︀ီႈလ︀ႃး။ က︀ဝ်ႈဝႃႈက︀ွတ︀်။ ꩭိꩫ︀်ꩫ︀ႆ︀ႇၵ︀ဝ်က︀ၢꩫ︀်ႇက︀ူꩫ︀်ႈတ︀ူက︀်မ︀ူတ︀်ꩬ︀ီတ︀ီယ︀ႆ︀ၢႈက︀ႃက︀ꩫ︀်ႈꩬ︀ႃး” ꩫ︀ဝꩫ︀်ႇ။

လ︀ွင︀်ႈဢ︀ꩫ︀်ႈၵ︀ိူက︀်ႉယ︀ၢက︀်ႉꩫ︀ႆ︀ႇၵ︀ဝ်င︀ႆ︀း ဢ︀ꩫ︀်ႈပ︀ိူꩫ︀်ႈꩫ︀ိက︀်ႉꩬ︀ၢက︀်ႉꩫ︀ႆ︀ႇၵ︀ဝ်

(မ︀ႃက︀ု 13.3-13; လ︀ုက︀ႃ 21.7-19)

3ဝႆ︀ၢးဢ︀မ︀ႂ်း မ︀ိူဝ်ႈꩡ︀ဝ်ႛယ︀ေꩬ︀ုက︀ꩫ︀်ႛꩫ︀ိူဝ်ꩫ︀ွႆ︀ႈတ︀ၢꩫ︀်လ︀ူꩫ︀်မ︀ႆ︀ႛꩫ︀င︀်ႈꩬ︀ီဢ︀ူꩫ︀ႆ︀ႇ တ︀ပ︀ေးꩡ︀ဝ်ႛၵ︀ဝ်ယ︀ႃႇ ၵ︀ဝ်ꩡ︀ဝ်ႛꩫ︀ႆ︀ၢႈမ︀ꩫ︀်းꩡ︀ဝ်ႛမ︀ႆ︀ႛ မ︀ႃးꩬ︀ီ “ဢ︀ꩫ︀်ႈꩡ︀ဝ်ႛဝႃႈꩫ︀ႆ︀ႇၵ︀ဝ်တ︀င︀်းမ︀ိူင︀်း မ︀ိူဝ်ႈလ︀ႂ်ႈꩫ︀ႆ︀ တ︀ီပ︀ီꩫ︀်ႈမ︀ႃးတ︀ီၵ︀ႃႛꩫ︀ႆ︀ႇ။ မ︀ိူဝ်ႈꩡ︀ဝ်ႛတ︀ီက︀ျွႃးမ︀ႃးꩫ︀ၵ︀ႃ မ︀ိူဝ်ႈက︀မ︀်ၸ︀ႃတ︀ီꩬ︀ုတ︀်ꩫ︀ႆ︀ႇ ꩭလ︀ိုဝ်ꩭလ︀ိုဝ်တ︀ီပ︀ီꩫ︀်ႈမ︀ႃးꩫ︀ꩫ︀ႆ︀ႇ တ︀ူႈၵ︀ႃႛမ︀ႆ︀ႛၵ︀ႆ︀ႈပ︀ျႃးꩭႂ်ႛတ︀ီၵ︀ႃႛမ︀ႃးတ︀ႃႉ” ꩫ︀ဢ︀ူ။ 4ꩡ︀ဝ်ႛယ︀ေꩬ︀ုယ︀ႃႇ “ꩬ︀ူꩬ︀တ︀ိက︀ꩫ︀်ႈတ︀ႃႉ။ ꩬ︀ူမ︀ႆ︀ႛၸ︀ႂ်က︀ေႃႇ ပ︀ီꩭႂ်ႛꩫ︀ႆ︀ႛၸ︀ၢမ︀်း။ 5က︀ူꩫ︀်းဢ︀ၢꩫ︀်တ︀ၢꩫ︀်ယ︀ႃႇ ꩭႅꩫ︀်းꩭီတ︀်က︀ဝ်ႈꩬ︀ီ “က︀ဝ်ႈယ︀ႃႇမ︀ေꩬ︀ိယ︀ꩫ︀မ︀်” ꩫ︀ꩬ︀ီ က︀ူꩫ︀်းဢ︀ၢꩫ︀်တ︀ၢꩫ︀်မ︀ႆ︀ႛ တ︀ီမ︀ႃးၸ︀ၢမ︀်းလ︀ေက︀ꩫ︀်ႈꩫ︀မ︀်။ 6မ︀ိူဝ်ႈဢ︀မ︀ႂ်း ၵ︀ၢဝ်ႈၵ︀ၢမ︀်းꩬ︀ိူက︀်ꩫ︀ႆ︀ႇၵ︀ဝ် လ︀ုက︀်ႉတ︀ီႈက︀ႂ်ႛတ︀ီႈက︀ႆ︀ႈမ︀ႆ︀ႛ ꩬ︀ူတ︀ီꩫ︀ႆ︀ႛꩥ︀ိꩫ︀်းက︀ꩫ︀်ႈꩫ︀မ︀်။ ꩫ︀ႆ︀ႇꩫ︀က︀ေႃႇ ပ︀ီက︀ပ︀်ႉꩡ︀ႂ်ႈ။ ဢ︀မ︀ႂ်းၵ︀ဝ် တ︀ီပ︀ီꩫ︀်ႈမ︀ႃးမ︀ဝ်က︀ုတ︀်ႉꩫ︀က︀ေႃႇ ဢ︀ꩫ︀်ႈက︀မ︀်ၸ︀ႃတ︀ီꩬ︀ုတ︀်ယ︀ႃႇꩵ︀ႈပ︀ႆ︀ထိုင︀်။ 7က︀ူꩫ︀်းꩫ︀ႆ︀ႇၵ︀ဝ် ၸ︀ꩫ︀်းလ︀ိူင︀်ႈꩫ︀ႆ︀ႇၸ︀ꩫ︀်းလ︀ိူင︀်ႈ၊ မ︀ိူင︀်းလ︀ိူင︀်ႈꩫ︀ႆ︀ႇမ︀ိူင︀်းလ︀ိူင︀်ႈ တ︀ီတ︀ိက︀်က︀ꩫ︀်ႈꩫ︀မ︀်။ က︀ူႈတ︀ီႈမ︀ႆ︀ႛဢ︀ိုပ︀်က︀ိꩫ︀်ႈက︀ꩫ︀်ႈ၊ တ︀ီဢ︀ိင︀်ႈꩬ︀ꩫ︀်က︀ꩫ︀်ႈꩫ︀မ︀်။ 8ꩫ︀ႆ︀ႇၵ︀ဝ်တ︀င︀်းမ︀ိူင︀်းယ︀ႃႇ လ︀ႆ︀ၢးꩫ︀ိမ︀ိက︀်ႉဢ︀ꩫ︀်ႈမ︀ိူဝ်ႈၸ︀ေးလ︀ူင︀် ꩵ︀ႈပ︀ႆ︀ထိုင︀်မ︀ႃးꩫ︀ႆ︀ႇ တ︀ီပ︀ီꩫ︀်ႈမ︀ႃးဢ︀ွꩫ︀်ႈတ︀ၢင︀်းꩫ︀ႆ︀ႇၵ︀ဝ်ꩫ︀ႆ︀ၢႈꩫ︀မ︀်။ 9မ︀ိူဝ်ႈဢ︀မ︀ႂ်း ꩬ︀ူမ︀ႆ︀ႛပ︀ိူꩫ︀်ႈꩬ︀ႅဝ်ႛင︀ႆ︀း ယ︀ဝ်ႇက︀ီး ꩭႂ်ႛပ︀ူဝ်းꩬ︀ူမ︀ႆ︀ႛပ︀ူင︀်ႈတ︀ၢမ︀်ꩬ︀ီ ဢ︀ဝ်ႈတ︀ႆ︀ၢႈꩫ︀ႆ︀ႇ ꩫ︀ႂ်းမ︀ိုဝ်းꩡ︀ဝ်ႛၵ︀ုꩫ︀်ꩫ︀ႆ︀ႇၵ︀ဝ်မ︀ႆ︀ႛတ︀ီဢ︀ၢပ︀်ႉꩫ︀မ︀်။ လ︀ႆ︀ၢးပ︀ိူဝ်ႈꩬ︀ူက︀ဝ်ႈမ︀ႆ︀ႛယ︀ုမ︀်ယ︀မ︀်ႈꩫ︀ႆ︀ႇꩬ︀ီ ပ︀ိူꩫ︀်ႈတ︀င︀်းမ︀ိူင︀်း ꩬ︀ူမ︀ႆ︀ႛတ︀ီꩡ︀င︀်းက︀ꩫ︀်ႈꩫ︀မ︀်။ 10မ︀ိူဝ်ႈဢ︀မ︀ႂ်း က︀ူꩫ︀်းဢ︀ၢꩫ︀်တ︀ၢꩫ︀် လ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ွက︀်က︀ႃꩬ︀ီ က︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ တ︀ီၸ︀ုꩫ︀်ႇꩬ︀ႅတ︀်ႉꩡ︀ႃက︀ꩫ︀်ႈ၊ တ︀ီꩡ︀င︀်းက︀ꩫ︀်ႈꩫ︀မ︀်။ 11ပ︀ရ︀ေႃးၸ︀ႅတ︀်ႉမ︀ိက︀်ႉꩬ︀ႃꩫ︀ႆ︀ႇၵ︀ဝ်က︀ေႃႇ ဢ︀ၢꩫ︀်တ︀ၢꩫ︀်မ︀ႃးꩬ︀ီ က︀ူꩫ︀်းဢ︀ၢꩫ︀်တ︀ၢꩫ︀်မ︀ႆ︀ႛတ︀ီၸ︀ၢမ︀်းက︀ꩫ︀်ႈꩫ︀မ︀်။ 12က︀ူႈတ︀ီႈမ︀ႆ︀ႛ ဢ︀ꩫ︀်ႈမ︀ဝ်ꩫ︀ီႈꩫ︀ႆ︀ႇၵ︀ဝ်ပ︀ေႇထူမ︀်ႛက︀ႃꩬ︀ီ က︀ူꩫ︀်းꩫ︀ႆ︀ႇၵ︀ဝ်ꩡ︀ႂ်ႈဢ︀ꩫ︀်ႈꩭၢက︀်ႉက︀ꩫ︀်ႈ တ︀ီက︀ႃႈမ︀ႃးက︀ꩫ︀်ႈꩫ︀မ︀်။ 13ꩫ︀ႆ︀ႇꩫ︀က︀ေႃႇ က︀ူဝ်ႇဢ︀ꩫ︀်ႈဢ︀ဝ်ႈထိုင︀်ပ︀ႆ︀ၢႈꩭၢင︀်လ︀ေႚလ︀ေႚ ꩬ︀ႅတ︀်ႉꩡ︀ႃယ︀င︀်းမ︀ႆ︀ႛယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛတ︀ီၵ︀ေꩬ︀ေꩭႂ်ႛꩫ︀မ︀်။ 14က︀ူႈတ︀ီႈက︀ူႈꩫ︀ႅꩫ︀်ႈ က︀ူꩫ︀်းက︀ူႈၸ︀ꩫ︀်းမ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ီႈ လ︀ွင︀်ႈမ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛꩭူဝ်းယ︀ဝ်ႇက︀ႃက︀ီး ယ︀ၢမ︀်းဢ︀ꩫ︀်ႈက︀မ︀်ၸ︀ႃꩬ︀ုတ︀်တ︀ီထိုင︀်မ︀ႃးꩫ︀မ︀်။

လ︀ွင︀်ႈဢ︀ꩫ︀်ႈꩭင︀်ႛဢ︀ꩫ︀်ႈယ︀ုက︀်ႉလ︀ူင︀်

(မ︀ႃက︀ု 13.14-23; လ︀ုက︀ႃ 21.20-24)

15ဢ︀ꩫ︀်ႈၵ︀ိူင︀်ႈꩫ︀ီႈမ︀ုက︀်ႉလ︀ၢႆ︀း ဢ︀ꩫ︀်ႈပ︀ရ︀ေႃးၸ︀ႅတ︀်ႉတ︀ၢꩫ︀်ယ︀ေလ︀ဝႃႈဝႆ︀ႇꩫ︀ႆ︀ႇ ꩡ︀ွင︀်းၿိက︀်ႉမ︀ၢꩫ︀်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ဝ်းဢ︀ူꩫ︀ႆ︀ႇမ︀ႆ︀ႛ ꩬ︀ူတ︀ီꩫ︀ႆ︀ႛꩭꩫ︀်ꩬ︀ႃး။ ၸ︀ူႛဢ︀ၢꩫ︀်လ︀ိက︀်ႉꩫ︀ႆ︀ႇ လ︀ွင︀်ႈꩫ︀ႆ︀ႇက︀ꩬ︀င︀်မ︀ႆ︀ႛၵ︀ႂ်ႈဝႃႈꩫ︀ꩫ︀ႆ︀ႇ ꩬ︀တ︀ိတ︀ႃႉ။ 16ဢ︀မ︀ႂ်းမ︀ႆ︀ႛꩭꩫ︀်က︀ီးꩬ︀ူဢ︀ꩫ︀်ႈတ︀ိူင︀်းယ︀ုတ︀မ︀ႆ︀ႛဢ︀ူꩫ︀ႆ︀ႇၵ︀ဝ်ယ︀ႃႇ ꩫ︀ွႆ︀ႈꩫ︀ႆ︀ႇၵ︀ဝ်မ︀ႆ︀ႛ ဝႃႈၵ︀ုတ︀်ႉပ︀ႆ︀ၢႈက︀ႃက︀ꩫ︀်ႈꩫ︀မ︀်။ 17မ︀ိူဝ်ႈဢ︀မ︀ႂ်း က︀ူꩫ︀်းဢ︀ꩫ︀်ႈꩡ︀ၢꩫ︀်းမ︀ႆ︀ႛ ဢ︀ူꩫ︀ႆ︀ႇယ︀ႃႇ က︀ꩫ︀်ႛꩫ︀ႂ်းၵ︀ွက︀်ႉမ︀ႆ︀ႛၵ︀ဝ်ႛꩬ︀ီ ၵ︀ိူင︀်ႈၵ︀ဝ်းꩫ︀ႆ︀ႇၵ︀ဝ် ꩵ︀ႈဝႃႈက︀ႃဢ︀ဝ်ႈ။ 18က︀ူꩫ︀်းဢ︀ꩫ︀်ႈဢ︀ူꩫ︀ႃးꩫ︀ႆ︀ႇက︀ေႃႇ ꩭိူꩫ︀်းမ︀ႆ︀ႛၵ︀ိူင︀်ႈꩫ︀ုင︀်ႈꩫ︀ႆ︀ႇၵ︀ဝ် ꩵ︀ႈဝႃႈက︀ႃဢ︀ဝ်ႈ။ 19ဝူင︀်ႈမ︀ိူဝ်ႈဢ︀မ︀ႂ်း ꩡ︀ႃႇꩭၢင︀်းၸ︀ူႛယ︀ိင︀်းဢ︀ꩫ︀်ႈတ︀ွင︀်ႇပ︀ွင︀်းꩫ︀ႆ︀ႇၵ︀ဝ်င︀ႆ︀း မ︀ေႈတ︀ဢ︀ေႚꩫ︀ႆ︀ႇၵ︀ဝ်ယ︀ႃႇ ၵ︀ိူင︀်ႈꩫ︀ီႈက︀ူဝ်ႈလ︀ူင︀်ꩫ︀မ︀်။ 20ဝꩫ︀်းဢ︀ꩫ︀်ႈꩬ︀ူဝႃႈပ︀ႆ︀ၢႈꩫ︀ႆ︀ႇꩭႂ်ႛပ︀ူဝ်းမ︀ဝ်ꩥ︀ႃးမ︀ိူဝ်ႈꩫ︀ၢဝ်၊ မ︀ဝ်ꩥ︀ႃးဝꩫ︀်းက︀မ︀်ႈꩬ︀ိꩫ︀်ꩫ︀ႆ︀ႇ ယ︀ွꩫ︀်းꩬ︀ူးက︀ꩫ︀်ႈတ︀ႃႉ။ 21က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ေးၻုက︀်ႉၵ︀ဢ︀ꩫ︀်ႈမ︀ိူဝ်ႈဢ︀မ︀ႂ်းတ︀ီပ︀ီꩫ︀်ႈꩫ︀ႆ︀ႇယ︀ႃႇ ယ︀ႂ်လ︀ူင︀်ꩫ︀မ︀်။ လ︀ုက︀်ႉမ︀ိူဝ်ႈက︀မ︀်ၸ︀ႃတ︀ေပ︀ုꩫ︀်ႛ တ︀ူဝ်ထိုင︀်ဝꩫ︀်းꩫ︀ႆ︀ႇ ꩵ︀ႈꩭွꩫ︀်ပ︀ီꩫ︀်ႈမ︀ႃး။ က︀ꩫ︀်ႛꩫ︀ႃႛမ︀ႆ︀ႛက︀ေႃႇ ꩵ︀ႈပ︀ီꩫ︀်ႈဢ︀ိက︀်ယ︀ဝ်ႇ။ 22ၸ︀ြႃးပ︀ီꩫ︀်ႈꩡ︀ဝ်ႛ ဝꩫ︀်းဢ︀မ︀ႂ်းမ︀ဝ်ဢ︀ဝ်ႈပ︀ွတ︀်ꩭႂ်ႛက︀ီး ၸ︀ႂ်က︀ေႃႇဢ︀ꩬ︀ၢက︀်ႉꩵ︀ႈꩫ︀ိပ︀်။ ꩡ︀ႃႇꩭၢင︀်းက︀ူꩫ︀်းဢ︀ꩫ︀်ႈမ︀ꩫ︀်းꩡ︀ဝ်ႛလ︀ိူက︀်ႉဝႆ︀ႇꩫ︀ႆ︀ႇၵ︀ဝ်ယ︀ႃႇ ဝꩫ︀်းဢ︀မ︀ႂ်းတ︀ီဢ︀ဝ်ႈပ︀ွတ︀်ꩭႂ်ႛꩫ︀မ︀်။ 23မ︀ိူဝ်ႈဢ︀မ︀ႂ်း “ꩭိုဝ်းမ︀ႆ︀ႛမ︀ေꩬ︀ိယ︀၊ ꩭိုဝ်းပ︀ုꩫ︀်ႛမ︀ေꩬ︀ိယ︀” ꩫ︀ꩬ︀ီ ပ︀ိူꩫ︀်ႈဝႃႈမ︀ႃးꩫ︀က︀ေႃႇ ꩬ︀ူပ︀ီယ︀ုမ︀်။ 24က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ေꩬ︀ိယ︀ဢ︀ꩫ︀်ႈယ︀ိူင︀်ႈ၊ ပ︀ရ︀ေႃးၸ︀ႅတ︀်ႉဢ︀ꩫ︀်ႈယ︀ိူင︀်ႈꩫ︀ႆ︀ႇၵ︀ဝ် တ︀ီမ︀ႃးꩫ︀မ︀်။ ၵ︀ဝ်ယ︀ႃႇ လ︀ႆ︀ၢးဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းꩫ︀ႆ︀ႇၵ︀ဝ်၊ ဢ︀ꩫ︀်ႈလ︀ၢက︀်ဢ︀ꩫ︀်ႈလ︀ႆ︀ၢးꩫ︀ႆ︀ႇၵ︀ဝ်ꩭီတ︀်ပ︀ျႃးꩬ︀ီ က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛလ︀ိူက︀်ႉဝႆ︀ႇꩫ︀ႆ︀ႇၵ︀ဝ်မ︀ႆ︀ႛတ︀မ︀ိူင︀်းက︀ေႃႇ တ︀ီၸ︀ၢမ︀်းꩫ︀မ︀်။ 25ထွမ︀်က︀ꩫ︀်ႈတ︀ႃႉ။ မ︀ိူဝ်ႈလ︀ွင︀်ႈꩫ︀ႆ︀ႇၵ︀ဝ်ꩵ︀ႈပ︀ႆ︀ပ︀ီꩫ︀်ႈꩫ︀ႆ︀ႇ က︀ဝ်ႈၵ︀ႆ︀ႈမ︀ႃးယ︀ဝ်ႇ။ 26“မ︀ေꩬ︀ိယ︀ ဢ︀ူထိူꩫ︀်မ︀ႆ︀ႛဢ︀ူ” ꩫ︀ꩬ︀ီꩬ︀ူမ︀ႆ︀ႛပ︀ိူꩫ︀်ႈဝႃႈꩫ︀က︀ေႃႇ ပ︀ီက︀ႃလ︀ႅမ︀်း။ “မ︀ꩫ︀်းꩡ︀ဝ်ႛက︀ꩫ︀်ႛꩫ︀ႂ်းၵ︀ွက︀်ႉမ︀ႆ︀ႛ ပ︀ႆ︀ၢႈမ︀ႅပ︀်ဢ︀ူ” ꩫ︀က︀ေႃႇ ပ︀ီယ︀ုမ︀်။ 27က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ဝ်ႈၸ︀ူႛပ︀ီꩫ︀်ႈလ︀ုက︀်ႉက︀ူꩫ︀်းယ︀ႃႇ ၸ︀ႃႇမ︀ႅပ︀်ႉက︀ီး ဝꩫ︀်းဢ︀ွက︀်ဝꩫ︀်းတ︀ူက︀်က︀ၢင︀်ႈၸ︀ႃႇတ︀င︀်းလ︀ုက︀်ႉမ︀ႆ︀ႛ က︀ꩡ︀ူးလ︀ႅင︀်းက︀ႃꩫ︀က︀ꩫ︀်ႈ ၵ︀တ︀်ႉၵ︀ႅင︀်း တ︀ီက︀ျွႃးမ︀ႃးꩫ︀မ︀်။ 28ꩫ︀ၢင︀်းတ︀ႃႇꩫ︀ႆ︀ႇၵ︀ဝ်တ︀ုမ︀်ႈက︀ꩫ︀်ႈက︀ီး ꩡ︀ွက︀်ႉဢ︀မ︀ႂ်းမ︀ႆ︀ႛ ꩭၢင︀်ႈတ︀ႆ︀ၢႈယ︀င︀်းဢ︀ူꩫ︀ꩬ︀ီပ︀ျႃးꩫ︀က︀ꩫ︀်ႈ လ︀ႆ︀ၢးဢ︀မ︀ႂ်းၵ︀ဝ်ပ︀ီꩫ︀်ႈမ︀ႃးက︀ီး ဢ︀မ︀ႂ်းယ︀ႃႇ လ︀ႆ︀ၢးꩫ︀ိမ︀ိက︀်ႉဢ︀ꩫ︀်ႈက︀မ︀်ၸ︀ႃတ︀ီꩬ︀ုတ︀်ꩫ︀ႆ︀ႇꩫ︀မ︀်။

လ︀ွင︀်ႈလ︀ုက︀်ႉက︀ူꩫ︀်းတ︀ီက︀ျွႃးမ︀ႃး

(မ︀ႃက︀ု 13.24-27; လ︀ုက︀ႃ 21.25-28)

29ၸ︀ေးလ︀ူင︀်ဢ︀မ︀ႂ်းထိုင︀်မ︀ႃးယ︀ဝ်ႇက︀ီး က︀ၢင︀်ႈဝꩫ︀်းတ︀ီꩫ︀မ︀်ႈꩬ︀ိင︀်က︀ႃꩫ︀မ︀်။ ꩫ︀ိူꩫ︀်ႈက︀ေႃႇꩵ︀ႈလ︀ႅင︀်းယ︀ဝ်ႇ။ ꩫ︀ၢဝ်ႈꩫ︀ႆ︀ႇၵ︀ဝ်က︀ေႃႇ လ︀ုက︀်ႉက︀ၢင︀်ႈꩭၢဝ်မ︀ႆ︀ႛ တ︀ီꩭူင︀်ႈတ︀ူက︀်က︀ꩫ︀်ႈꩫ︀မ︀်။ တ︀ွင︀်ႇၸ︀ႃႇꩫ︀ၵ︀ႃတ︀ꩫ︀်းၵ︀ူဝ်းက︀ၢင︀်ႈꩭၢဝ်ꩫ︀ႆ︀ႇၵ︀ဝ်က︀ေႃႇ တ︀ီꩬ︀ꩫ︀်ၵ︀ွꩫ︀်းက︀ꩫ︀်ႈꩫ︀မ︀်။ 30ယ︀ဝ်ႇက︀ီး က︀ၢင︀်ႈၸ︀ႃႇမ︀ႆ︀ႛ လ︀ႆ︀ၢးꩫ︀ိမ︀ိက︀်ႉက︀ဝ်ႈၸ︀ူႛပ︀ီꩫ︀်ႈလ︀ုက︀်ႉက︀ူꩫ︀်း တ︀ီဢ︀ွက︀်မ︀ႃးꩫ︀မ︀်။ က︀ူꩫ︀်းꩫ︀ႆ︀ႇၵ︀ဝ်ယ︀ႃႇ က︀ဝ်ႈၵ︀ီမ︀ွက︀်ၸ︀ူꩫ︀်ꩬ︀ီ ဢ︀ဝ်ႈတ︀ꩫ︀်းၵ︀ူဝ်း၊ ဢ︀ဝ်ႈမ︀ူꩫ︀်ႈၸ︀ုင︀်းလ︀ူင︀်က︀ျွႃးမ︀ႃးꩫ︀ႆ︀ႇမ︀ႆ︀ႛꩭꩫ︀်က︀ီး တ︀ီꩭႆ︀ႛက︀ꩫ︀်ႈမ︀ိုင︀်ႈက︀ꩫ︀်ႈꩫ︀မ︀်။ 31ယ︀ဝ်ႇက︀ီး တ︀ုတ︀်လ︀ူင︀်ꩭႂ်ႛပ︀ဝ်ꩬ︀ီ ၵ︀ုꩫ︀်ꩬ︀ၢင︀်က︀ဝ်ႈꩫ︀ႆ︀ႇၵ︀ဝ်မ︀ႆ︀ႛ တ︀ီပ︀ွႆ︀ꩡ︀ႂ်ႇမ︀ႃးꩫ︀မ︀်။ ၵ︀ဝ်ယ︀ႃႇ လ︀ုက︀်ႉလ︀င︀်ꩫ︀ိꩫ︀်ႈၸ︀ၢက︀်ႉပ︀ႃႛလ︀ိူင︀်ႈမ︀ႆ︀ႛ ဢ︀ဝ်ႈထိုင︀်ၸ︀ၢက︀်ႉပ︀ႃႛလ︀ိူင︀်ႈ တ︀င︀်းꩬ︀ီꩫ︀ႃႛမ︀ႆ︀ႛ က︀ူꩫ︀်းဢ︀ꩫ︀်ႈက︀ဝ်ႈလ︀ိူက︀်ႉဝႆ︀ႇꩫ︀ႆ︀ႇၵ︀ဝ်မ︀ႆ︀ႛ တ︀ီၵ︀ွꩫ︀်ႛတ︀ုမ︀်ႈမ︀ႃးꩫ︀မ︀်။

ၵ︀ူဝ်ႛꩬ︀ွꩫ︀်လ︀ွင︀်ႈတ︀ူꩫ︀်ႛမ︀က︀်ဝႃႈ

(မ︀ႃက︀ု 13.28-31; လ︀ုက︀ႃ 21.29-33)

32လ︀ုက︀်ႉတ︀ူꩫ︀်ႛမ︀က︀်ဝႃႈမ︀ႆ︀ႛ ꩬ︀ွꩫ︀်ဢ︀ဝ်ႈတ︀ႃႉ။ ၵ︀ႃႈမ︀ꩫ︀်းၵ︀ိဝ်မ︀ႃးꩬ︀ီ လ︀ီပ︀ူင︀်မ︀ႃးက︀ီး မ︀ိူဝ်ႈꩭဝ်ႇက︀ႂ်ႛမ︀ႃးယ︀ဝ်ႇꩫ︀ꩫ︀ႆ︀ႇꩬ︀ူတ︀ွင︀်းဢ︀ူ။ 33ꩫ︀င︀်ꩫ︀ႆ︀ႇꩫ︀က︀ꩫ︀်ႈ ဢ︀ꩫ︀်ႈꩵ︀ႈက︀ႆ︀ႛဝႃႈꩫ︀ႆ︀ႇၵ︀ဝ်မ︀ႆ︀ႛꩭꩫ︀်က︀ီး ယ︀ၢမ︀်းဢ︀ꩫ︀်ႈယ︀ပ︀်ယ︀ၢက︀်ႉလ︀ူင︀်တ︀ီထိုင︀်ယ︀ဝ်ႇꩫ︀ꩫ︀ႆ︀ႇ တ︀ွင︀်းက︀ꩫ︀်ႈတ︀ႃႉ။ 34ထွမ︀်ꩫ︀ီႈꩫ︀ီႈတ︀ႃႉ။ က︀ဝ်ႈဝႃႈက︀ွတ︀်။ မ︀ိူဝ်ႈက︀ူꩫ︀်းဢ︀ꩫ︀်ႈင︀ႆ︀ႚယ︀င︀်းꩫ︀ႆ︀ႇၵ︀ဝ် ꩵ︀ႈပ︀ႆ︀တ︀ႆ︀ၢႈꩫ︀ႆ︀ႇ လ︀ွင︀်ႈꩫ︀ႆ︀ႇၵ︀ဝ်တ︀င︀်းမ︀ိူင︀်းတ︀ီပ︀ီꩫ︀်ႈမ︀ႃးꩫ︀မ︀်ꩫ︀ꩫ︀ႆ︀ႇ မ︀တ︀်ႉဝႆ︀ႇက︀ꩫ︀်ႈတ︀ႃႉ။ 35က︀ၢင︀်ႈၸ︀ႃႇꩫ︀ၵ︀ႃက︀မ︀်ၸ︀ႃပ︀ႅက︀်ႉက︀ႃꩫ︀က︀ေႃႇ ၵ︀ၢမ︀်းက︀ဝ်ႈယ︀ႃႇ မ︀ိူဝ်ႈလ︀ႂ်ႈက︀ေႃႇ ꩵ︀ႈပ︀ႅက︀်ႉ။

ဝꩫ︀်းဢ︀မ︀ႂ်း၊ ယ︀ၢမ︀်းဢ︀မ︀ႂ်းမ︀ႆ︀ႛၸ︀ႂ်က︀ေႃႇꩵ︀ႈတ︀ွင︀်း

(မ︀ႃက︀ု 13.32-37; လ︀ုက︀ႃ 17.26-30,34-36)

36မ︀ိူဝ်ႈက︀ဝ်ႈတ︀ီက︀ျွႃးမ︀ႃးꩫ︀ႆ︀ႇယ︀ႃႇ ဝꩫ︀်းလ︀ႂ်ႈ၊ ယ︀ၢမ︀်းလ︀ႂ်ႈꩫ︀ꩫ︀ႆ︀ႇၸ︀ႂ်က︀ေႃႇꩵ︀ႈတ︀ွင︀်း။ ၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်က︀ေႃႇꩵ︀ႈတ︀ွင︀်း။ က︀ဝ်ႈၸ︀ူႛပ︀ီꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛက︀ေႃႇꩵ︀ႈတ︀ွင︀်း။ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩬ︀ူလ︀ိဝ်ႈꩫ︀ႆ︀ၢႈꩫ︀မ︀်တ︀ွင︀်းꩫ︀ႆ︀ႇ။ 37ꩫ︀င︀်ꩡ︀ူဝ်ႈမ︀ိူဝ်ႈꩫ︀ေႃဢ︀ေးမ︀ႆ︀ႛပ︀ီꩫ︀်ႈမ︀ႃးꩫ︀က︀ꩫ︀်ႈ မ︀ိူဝ်ႈက︀ဝ်ႈၸ︀ူႛလ︀ုက︀်ႉက︀ူꩫ︀်းက︀ျွႃးမ︀ႃးꩫ︀ႆ︀ႇက︀ေႃႇ တ︀ီပ︀ီꩫ︀်ႈꩫ︀မ︀်။ 38ꩡ︀ူဝ်ႈမ︀ိူဝ်ႈꩫ︀ေႃဢ︀ေး မ︀ိူဝ်ႈꩫ︀မ︀်ႇꩵ︀ႈပ︀ႆ︀ထူမ︀်ႛက︀မ︀်ၸ︀ႃꩫ︀ႆ︀ႇ က︀ူꩫ︀်းꩫ︀ႆ︀ႇၵ︀ဝ်ယ︀ႃႇ တ︀ူဝ်ထိုင︀်ဝꩫ︀်းဢ︀ꩫ︀်ႈꩫ︀ေႃဢ︀ေးၵ︀ဝ် ၵ︀ဝ်ႛက︀ꩫ︀်ႛꩫ︀ႂ်းꩬ︀ၢင︀်ႈၸ︀ူဝ်းꩫ︀ႆ︀ႇတ︀မ︀ိူင︀်း က︀ိꩫ︀်ႈꩰမ︀ဝ်းꩰက︀ꩫ︀်ႈ၊ ꩭီတ︀်ပ︀ွႆ︀းဢ︀ဝ်ႈꩬ︀ၢဝ်က︀ꩫ︀်ႈင︀ႆ︀းꩫ︀မ︀်။ 39ၵ︀ဝ်မ︀ႆ︀ႛꩫ︀မ︀်ႇပ︀ူဝ်းတ︀ီထူမ︀်ႛက︀ႃလ︀ေႚလ︀ေႚတ︀မ︀ိူင︀်းက︀ေႃႇ က︀ꩬ︀င︀်တ︀ီပ︀ီꩫ︀်ႈမ︀ႃးꩫ︀ꩫ︀ႆ︀ႇမ︀ဝ်တ︀ွင︀်းꩬ︀ီ ဢ︀ူက︀ꩫ︀်ႈꩫ︀မ︀်။ မ︀ိူဝ်ႈက︀ဝ်ႈၸ︀ူႛပ︀ီꩫ︀်ႈလ︀ုက︀်ႉက︀ူꩫ︀်းက︀ျွႃးမ︀ႃးꩫ︀ႆ︀ႇက︀ေႃႇ ꩫ︀င︀်ဢ︀မ︀ႂ်းꩫ︀က︀ꩫ︀်ႈတ︀ီပ︀ီꩫ︀်ႈꩫ︀မ︀်။ 40မ︀ိူဝ်ႈဢ︀မ︀ႂ်း ၸ︀ူႛꩡ︀ႆ︀ၢးဢ︀ꩫ︀်ႈꩭီတ︀်ꩫ︀ႃးဢ︀ူꩬ︀ွင︀်က︀ူဝ်ႇမ︀ႆ︀ႛ က︀ူဝ်ႇလ︀ိူင︀်ႈဢ︀ဝ်ႈက︀ႃꩬ︀ီ က︀ူဝ်ႇလ︀ိူင︀်ႈတ︀ီဢ︀ဝ်ႈက︀ိူတ︀်ဝႆ︀ႇꩫ︀မ︀်။ 41ၸ︀ူႛယ︀ိင︀်းဢ︀ꩫ︀်ႈတ︀မ︀်ႈၵ︀ဝ်ႛဢ︀ူꩬ︀ွင︀်က︀ူဝ်ႇမ︀ႆ︀ႛက︀ေႃႇ က︀ူဝ်ႇလ︀ိူင︀်ႈဢ︀ဝ်ႈက︀ႃꩬ︀ီ က︀ူဝ်ႇလ︀ိူင︀်ႈ တ︀ီဢ︀ဝ်ႈက︀ိူတ︀်ဝႆ︀ႇꩫ︀မ︀်။ 42ဝꩫ︀်းမ︀ိူဝ်ႈꩡ︀ဝ်ႛꩬ︀ူတ︀ီက︀ျွႃးမ︀ႃးꩫ︀ႆ︀ႇ ꩬ︀ူမ︀ဝ်တ︀ွင︀်းꩫ︀ႆ︀ႇꩬ︀ီ ꩬ︀တ︀ိက︀ꩫ︀်ႈတ︀ႃႉ။ 43ယ︀ၢမ︀်းဢ︀ꩫ︀်ႈၸ︀ူႛလ︀ၢက︀်ႉတ︀ီမ︀ႃးမ︀ႆ︀ႛတ︀ွင︀်းက︀ီး ꩡ︀ဝ်ႛꩭိူꩫ︀်းꩫ︀ႆ︀ႇꩭႂ်ႛပ︀ူဝ်းꩭိူꩫ︀်းမ︀ꩫ︀်းမ︀ႆ︀ႛ ၸ︀ူႛလ︀ၢက︀်ႉမ︀ဝ်မ︀ွင︀်ၵ︀ဝ်ႛꩫ︀ႆ︀ႇ ၵ︀ႅတ︀်ꩬ︀ီတ︀ီပ︀ႂ်ႇဢ︀ူꩫ︀မ︀်ꩫ︀ꩫ︀ႆ︀ႇ ꩬ︀ူတ︀ွင︀်းဢ︀ူ။ 44ꩫ︀င︀်ꩫ︀ႆ︀ႇꩫ︀က︀ꩫ︀်ႈ က︀ဝ်ႈၸ︀ူႛပ︀ီꩫ︀်ႈလ︀ုက︀်ႉက︀ူꩫ︀်း မ︀ိူဝ်ႈလ︀ႂ်ႈတ︀ီမ︀ႃးꩫ︀ꩫ︀ႆ︀ႇ ꩬ︀ူမ︀ဝ်တ︀ွင︀်းꩫ︀ႆ︀ႇꩬ︀ီ မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ၵ︀ႅတ︀်ꩬ︀ီဢ︀ူတ︀ႃႉ။

ၸ︀ူႛꩡ︀ႂ်ႇဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်းꩫ︀ၵ︀ႃဢ︀ꩫ︀်ႈꩬ︀ႅတ︀်ႉꩡ︀ႃမ︀ဝ်ယ︀င︀်း

(လ︀ုက︀ႃ 12.41-48)

45ၸ︀ူႛꩡ︀ႂ်ႇဢ︀ꩫ︀်ႈꩬ︀ႅတ︀်ႉꩡ︀ႃယ︀င︀်းꩬ︀ီ ပ︀ိင︀်ꩥ︀ႃယ︀င︀်း ꩫ︀ꩫ︀ႆ︀ႇ ꩫ︀င︀်ꩭိုဝ်ꩫ︀ႆ︀။ က︀ူဝ်ႇဢ︀မ︀ႂ်းယ︀ႃႇ က︀ူဝ်ႇဢ︀ꩫ︀်ႈꩡ︀ဝ်ႛမ︀ꩫ︀်း ယ︀ုမ︀်ꩬ︀ီꩬ︀ူဝ်းꩭိူꩫ︀်းဢ︀ၢပ︀်ႉဝႆ︀ႇင︀ႆ︀း ၸ︀ူႛꩡ︀ႂ်ႇတ︀ၢင︀်က︀ူဝ်ႇꩫ︀ႆ︀ႇၵ︀ဝ်တ︀ွင︀်ႇမ︀ႆ︀ႛမ︀ႃးက︀ီး ဢ︀ꩫ︀်ႈက︀ိꩫ︀်ႈပ︀ꩫ︀်ႈꩭႂ်ႛꩫ︀ႆ︀ႇꩫ︀မ︀်။ 46မ︀ိူဝ်ႈꩡ︀ဝ်ႛမ︀ꩫ︀်းပ︀ွက︀်ႉမ︀ႃးꩫ︀ႆ︀ႇ ၸ︀ူႛꩡ︀ႂ်ႇဢ︀မ︀ႂ်း ဢ︀မ︀ူးဢ︀ꩫ︀်ႈꩫ︀င︀်ꩡ︀ဝ်ႛမ︀ꩫ︀်းꩡ︀ႂ်ႇဝႆ︀ႇꩫ︀ႆ︀ႇ ꩭီတ︀်ꩬ︀ီဢ︀ူꩫ︀ႆ︀ႇမ︀ႆ︀ႛ ꩡ︀ဝ်ႛမ︀ꩫ︀်းꩭꩫ︀်က︀ီး ၸ︀ူႛꩡ︀ႂ်ႇဢ︀မ︀ႂ်း တ︀ီꩡ︀ူမ︀်းꩭုမ︀်လ︀ူင︀်ꩫ︀မ︀်။ 47ထွမ︀်ꩫ︀ီႈꩫ︀ီႈတ︀ႃႉ။ က︀ဝ်ႈဝႃႈက︀ွတ︀်။ င︀ႆ︀းက︀ီး ꩡ︀ဝ်ႛမ︀ꩫ︀်းꩫ︀ႆ︀ႇ ၵ︀ူဝ်းလ︀ိင︀်းမ︀ꩫ︀်းတ︀င︀်းမ︀ိူင︀်းက︀ေႃႇ မ︀ꩫ︀်းမ︀ႆ︀ႛဢ︀ၢပ︀်ႉꩭႂ်ႛꩬ︀ီတ︀ီꩭႂ်ႛမ︀ိုင︀်ႇꩫ︀မ︀်။ 48ꩫ︀ႆ︀ႇꩫ︀က︀ေႃႇ ꩬ︀င︀်ဝႃႈမ︀ꩫ︀်းꩫ︀ႆ︀ႇပ︀ီꩫ︀်ႈၸ︀ူႛꩡ︀ႂ်ႇဢ︀ꩫ︀်ႈမ︀ဝ်ꩫ︀ီႈက︀ီး င︀ႆ︀းꩵ︀ႈꩭီတ︀်။ ꩡ︀ဝ်ႛက︀ဝ်ႈင︀ႆ︀ၢႈꩰꩵ︀ႈပ︀ႆ︀ပ︀ွက︀်ႉမ︀ႃးꩫ︀ꩬ︀ီ 49ၸ︀ူႛꩡ︀ႂ်ႇတ︀ၢင︀်က︀ူဝ်ႇꩫ︀ႆ︀ႇၵ︀ဝ်မ︀ႆ︀ႛ တ︀ုက︀်ႉꩰပ︀ူဝ်ႇꩰင︀ႆ︀း တ︀င︀်းယ︀ႃလ︀ဝ်ႛꩫ︀ႆ︀ႇၵ︀ဝ် တ︀ီက︀ိꩫ︀်ႈပ︀ိဝ်ꩬ︀ီဢ︀ူꩫ︀မ︀်။ 50ဝꩫ︀်း၊ ယ︀ၢမ︀်းမ︀ိူဝ်ႈမ︀ꩫ︀်းမ︀ဝ်တ︀ႂ်းဝႆ︀ႇꩫ︀ႆ︀ႇ ꩡ︀ဝ်ႛမ︀ꩫ︀်းပ︀ွက︀်ႉမ︀ႃးꩬ︀ီ မ︀ꩫ︀်းꩭီတ︀်င︀ႆ︀းဢ︀ူꩫ︀ႆ︀ႇမ︀ႆ︀ႛꩭꩫ︀်က︀ီး 51မ︀ꩫ︀်းမ︀ႆ︀ႛ တ︀ီတ︀ုက︀်ႉꩰပ︀ူဝ်ႇꩰၵ︀ွတ︀်ꩫ︀မ︀်။ ယ︀ဝ်ႇက︀ီးမ︀ꩫ︀်းမ︀ႆ︀ႛ တ︀င︀်းၸ︀ူႛက︀ႅမ︀်ႛꩫ︀ႃႛꩫ︀ႆ︀ႇၵ︀ဝ် တ︀ီꩭႂ်ႛꩭူမ︀်ႈၵ︀ၢမ︀်တ︀ၢမ︀် ဢ︀ꩫ︀်ႈက︀တ︀်ၵ︀ိဝ်ႛက︀တ︀်က︀ၢင︀်းꩬ︀ီဢ︀ူꩫ︀မ︀်။

Одоогоор Сонгогдсон:

မ︀တ︀်တ︀ႄး 24: kht

Тодруулга

Хуваалцах

Хувилах

Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү

Khamti Shan-ийн талаар илүү ихийг мэдэж авах

မ︀တ︀်တ︀ႄး 24