မ︀တ︀်တ︀ႄး 19

လ︀ွင︀်ႈꩡ︀ဝ်ႛယ︀ေꩬ︀ု ꩬ︀ွꩫ︀်လ︀ွင︀်ႈၸ︀ူဝ်မ︀ေးၸ︀ၢက︀်ႉက︀ꩫ︀်ႈ

(မ︀ႃက︀ု 10.1-12)

1လ︀ွင︀်ႈꩫ︀ႆ︀ႇၵ︀ဝ်ဝႃႈယ︀ဝ်ႇက︀ီး ꩡ︀ဝ်ႛယ︀ေꩬ︀ု လ︀ုက︀်ႉတ︀ိူင︀်းက︀ႃလ︀ိလ︀ႄးမ︀ႆ︀ႛဢ︀ွက︀်ꩬ︀ီ တ︀ူင︀်ႈတ︀ၢင︀်ႇယ︀ုတ︀ ၸ︀ၢက︀်ႉꩫ︀မ︀်ႇယ︀ေႃတ︀ၢꩫ︀်ပ︀ႃႛလ︀ိူင︀်ႈမ︀ႆ︀ႛ က︀ႃဢ︀ူ။ 2က︀ꩫ︀်ႛလ︀င︀်မ︀ꩫ︀်းꩡ︀ဝ်ႛမ︀ႆ︀ႛ ၸ︀ုင︀်က︀ူꩫ︀်းလ︀ူင︀်ꩡ︀ွမ︀်းမ︀ႃးက︀ꩫ︀်ႈꩬ︀ီ တ︀ီႈဢ︀မ︀ႂ်းမ︀ႆ︀ႛ ၸ︀ူႛၵ︀ႆ︀ႛၸ︀ူႛꩡ︀ီပ︀်ꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်းꩡ︀ဝ်ႛဢ︀ဝ်ႈꩫ︀ီႈꩭႂ်ႛဢ︀ူ။ 3ၸ︀ႃရ︀ိꩬ︀ႄက︀မ︀်ႈၸ︀ွင︀်းယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛမ︀ႃးꩬ︀ီ “တ︀ြႃးꩭဝ်းမ︀ႆ︀ႛ က︀ူꩫ︀်းက︀ူဝ်ႇလ︀ိူင︀်ႈꩫ︀ႆ︀ႇ မ︀ေးမ︀ꩫ︀်းမ︀ႆ︀ႛ လ︀ႆ︀ၢးပ︀ိူဝ်ႈလ︀ွင︀်ႈက︀ꩬ︀င︀်ပ︀တ︀ုၸ︀ၢက︀်ႉꩫ︀ႆ︀ႛဢ︀ေႃး” ꩫ︀ꩬ︀ီ ꩭီတ︀်ꩥ︀ႅꩫ︀်င︀ွင︀်ႇꩬ︀ီထၢမ︀်ဢ︀ူ။ 4ꩡ︀ဝ်ႛယ︀ေꩬ︀ုယ︀ႃႇ “လ︀ွင︀်ႈꩫ︀ႆ︀ႇ ၸ︀ြႃးပ︀ီꩫ︀်ႈꩡ︀ဝ်ႛ ꩭလ︀ိုဝ်ဝႃႈဝႆ︀ႇꩫ︀ꩫ︀ႆ︀ႇ က︀ျမ︀်းလ︀ိက︀်ႉမ︀ႆ︀ႛ ꩬ︀ူမ︀ဝ်ꩭွꩫ︀်ဢ︀ၢꩫ︀်က︀ျႃး။ ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛၸ︀ၢꩫ︀်ꩬ︀ၢင︀်းယ︀ႃႇ မ︀ိူဝ်ႈꩭူဝ်က︀ူဝ်လ︀ေႚလ︀ေႚꩫ︀ႆ︀ႇ က︀ူꩫ︀်းၸ︀ူႛꩡ︀ႆ︀ၢးꩫ︀ၵ︀ႃၸ︀ူႛယ︀ိင︀်းမ︀ႆ︀ႛ ၸ︀ၢꩫ︀်ꩬ︀ၢင︀်းဝႆ︀ႇဢ︀ူ။ 5က︀ျမ︀်းလ︀ိက︀်ႉမ︀ႆ︀ႛ

“က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ က︀ူꩫ︀်းꩡ︀ႆ︀ၢးꩫ︀ႆ︀ႇ ၸ︀ၢက︀်ႉပ︀ူဝ်မ︀ေꩬ︀ီ တ︀င︀်းၸ︀ူႛမ︀ေးမ︀ꩫ︀်း တ︀ီꩭူမ︀်ႈဢ︀ူꩫ︀မ︀်။ ꩬ︀ွင︀်ၵ︀ႃယ︀ႃႇ ꩫ︀င︀်က︀ူဝ်ႇလ︀ိူင︀်ႈꩫ︀ႆ︀ၢႈꩫ︀က︀ꩫ︀်ႈ တ︀ီပ︀ီꩫ︀်ႈက︀ႃꩫ︀မ︀်”

ꩫ︀ꩬ︀ီဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ။ 6ꩬ︀ွင︀်ၵ︀ႃယ︀ႃႇ ꩬ︀ွင︀်က︀ူဝ်ႇꩵ︀ႈꩡ︀ႂ်ႈယ︀ဝ်ႇ။ က︀ူဝ်ႇလ︀ိဝ်ႈꩫ︀က︀ꩫ︀်ႈꩫ︀မ︀်။ င︀ႆ︀းꩫ︀ႆ︀ႇꩬ︀ီ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ က︀ူပ︀်ဝႆ︀ႇမ︀ႆ︀ႛ က︀ူꩫ︀်းꩵ︀ႈꩫ︀ႆ︀ႛဢ︀ဝ်ႈၸ︀ၢက︀်ႉက︀ꩫ︀်ႈ” ꩫ︀ဝꩫ︀်ႇ။ 7ၸ︀ႃရ︀ိꩬ︀ႄꩫ︀ႆ︀ႇၵ︀ဝ်ယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ “ꩫ︀ႆ︀ႇက︀ီး ꩭလ︀ိုဝ်ꩬ︀ီꩫ︀ႆ︀ မ︀ေႃꩬ︀ေယ︀ႃႇ ၸ︀ူႛမ︀ေးၸ︀ူႛꩡ︀ဝ်ႛမ︀ႆ︀ႛ လ︀ိက︀်ႉၸ︀ၢက︀်ႉက︀ꩫ︀်ႈꩭႂ်ႛꩬ︀ီ ၸ︀ၢက︀်ႉꩫ︀ႆ︀ႛဢ︀ူꩫ︀ꩬ︀ီ က︀ျူးꩭဝ်းမ︀ႆ︀ႛ ဢ︀ၵ︀ၢင︀်းꩭႂ်ႛမ︀ႃးꩫ︀ႆ︀ႇ” ꩫ︀ဢ︀ူ။ 8ꩡ︀ဝ်ႛယ︀ေꩬ︀ုယ︀ႃႇ “ꩬ︀ူတ︀ၢꩫ︀်ႛယ︀ပ︀်ၸ︀ႅဝ်ꩬ︀ီꩬ︀ႃး မ︀ေႃꩬ︀ေ ဢ︀ၵ︀ၢင︀်းꩭႂ်ႛမ︀ႃးꩫ︀ႆ︀ႇ။ မ︀ိူဝ်ႈꩭူဝ်က︀ူဝ်ယ︀ႃႇ ဢ︀ၵ︀ၢင︀်းꩫ︀ႆ︀ႇ ꩵ︀ႈꩭႂ်ႛဝႆ︀ႇ။ 9င︀ႆ︀းꩫ︀ႆ︀ႇꩬ︀ီ က︀ဝ်ႈဝႃႈက︀ွတ︀်။ ၸ︀ူႛꩡ︀ႆ︀ၢးက︀ူဝ်ႇလ︀ိူင︀်ႈꩫ︀ႆ︀ႇ မ︀ေးၸ︀ူႛꩡ︀ဝ်ႛတ︀င︀်းၸ︀ူႛꩡ︀ႆ︀ၢးတ︀ၢင︀်က︀ူဝ်ႇၸ︀ိတ︀်က︀ꩫ︀်ႈꩫ︀ႆ︀ႇမ︀ဝ်ꩡ︀ႂ်ႈက︀ီး မ︀ꩫ︀်းမ︀ႆ︀ႛꩵ︀ႈꩫ︀ႆ︀ႛၸ︀ၢက︀်ႉ။ ꩬ︀င︀်ဝႃႈလ︀ႆ︀ၢးပ︀ိူဝ်ႈလ︀ွင︀်ႈတ︀ၢင︀်ဢ︀ꩫ︀်ႈꩬ︀ိုင︀် ၸ︀ၢက︀်ႉꩬ︀ီ ဢ︀ဝ်ႈမ︀ေးတ︀ၢင︀်က︀ူဝ်ႇက︀ီး ၸ︀ိတ︀်မ︀ေးလ︀ုက︀်ႉပ︀ိူꩫ︀်ႈယ︀ဝ်ႇ” ꩫ︀ဝꩫ︀်ႇ။ 10ꩫ︀ႆ︀ႇမ︀ႆ︀ႛ တ︀ပ︀ေးꩡ︀ဝ်ႛၵ︀ဝ်ယ︀ႃႇ “လ︀ွင︀်ႈၸ︀ူဝ်မ︀ေးꩫ︀ꩫ︀ႆ︀ႇ ပ︀ီꩫ︀်ႈင︀ႆ︀းꩫ︀မ︀်ꩫ︀က︀ီး မ︀ဝ်တ︀င︀်ႛꩭိူꩫ︀်းꩫ︀ႆ︀ႇ ၵ︀ႅꩫ︀်းꩫ︀ီႈတ︀ီၵ︀ႃႛဢ︀ူ” ꩫ︀ဝꩫ︀်ႇ။ 11ꩡ︀ဝ်ႛယ︀ေꩬ︀ုယ︀ႃႇ “က︀ူꩫ︀်းက︀ူႈက︀ူဝ်ႇယ︀ႃႇ မ︀ဝ်တ︀င︀်ႛꩭိူꩫ︀်းꩬ︀ီ ဢ︀ူꩵ︀ႈꩫ︀ႆ︀ႛ။ က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ဢ︀ၵ︀ၢင︀်းꩭႂ်ႛꩫ︀ႆ︀ႇၵ︀ဝ်ꩫ︀ႆ︀ၢႈꩫ︀မ︀် ဢ︀ူꩫ︀ႆ︀ႛꩫ︀ႆ︀ႇ။ 12က︀ူꩫ︀်းꩫ︀ႆ︀ႇၵ︀ဝ် တ︀င︀်ႛꩭိူꩫ︀်းမ︀ဝ်ပ︀ီꩫ︀်ႈꩫ︀ႆ︀ႇ လ︀ွင︀်ႈက︀ူႈၸ︀ꩫ︀်းယ︀င︀်းဢ︀ူ။ က︀မ︀်ႈၸ︀ွင︀်းယ︀ႃႇ လ︀ုက︀်ႉမ︀ိူဝ်ႈယ︀င︀်းပ︀ုꩫ︀်ႛ ꩡ︀ႂ်ႈဢ︀ꩫ︀်ႈၵ︀ႂ်ႈတ︀င︀်ႛꩭိူꩫ︀်း၊ ၵ︀ႂ်ႈပ︀ီꩫ︀်ႈꩭိူꩫ︀်း မ︀ဝ်ယ︀င︀်းမ︀ႃးꩫ︀မ︀်။ က︀မ︀်ႈၸ︀ွင︀်းယ︀ႃႇ ပ︀ိူꩫ︀်ႈꩬ︀ိုင︀်ဢ︀ဝ်ႈၸ︀ႅင︀်းꩬ︀ီ တ︀င︀်ႛꩭိူꩫ︀်းမ︀ဝ်ꩫ︀ႆ︀ႛꩫ︀မ︀်။ က︀မ︀်ႈၸ︀ွင︀်းယ︀ႃႇ ꩫ︀ူႈဢ︀က︀ိဝ်းမ︀ိူင︀်းက︀ၢင︀်ႈꩭၢဝ်ꩬ︀ီ မ︀ဝ်တ︀င︀်ႛꩭိူꩫ︀်းꩬ︀ီဢ︀ူꩫ︀မ︀်။ က︀ူဝ်ႇဢ︀ꩫ︀်ႈမ︀ဝ်တ︀င︀်ႛꩭိူꩫ︀်းꩬ︀ီ ဢ︀ူꩫ︀ႆ︀ႛꩫ︀ႆ︀ႇ ꩵ︀ႈထုက︀်တ︀င︀်ႛ” ꩫ︀ဝꩫ︀်ႇ။

လ︀ွင︀်ႈꩡ︀ဝ်ႛယ︀ေꩬ︀ု လ︀ၵ︀ႃဢ︀ွꩫ︀်ꩫ︀ႆ︀ႇၵ︀ဝ်မ︀ႆ︀ႛ ပ︀ူင︀်ႈဢ︀က︀ိဝ်းꩭႂ်ႛ

(မ︀ႃက︀ု 10.13-16; လ︀ုက︀ႃ 18.15-17)

13က︀ူꩫ︀်းမ︀ၢင︀်ႈၸ︀ွင︀်းယ︀ႃႇ လ︀ၵ︀ႃဢ︀ွꩫ︀်ꩫ︀ႆ︀ႇၵ︀ဝ်မ︀ႆ︀ႛ ꩭႂ်ႛပ︀ူဝ်းꩡ︀ဝ်ႛယ︀ေꩬ︀ုမ︀ိုဝ်းတ︀ၢင︀်ꩬ︀ီ ယ︀ွꩫ︀်းꩬ︀ူးꩭႂ်ႛꩫ︀ႆ︀ႇ မ︀ꩫ︀်းꩡ︀ဝ်ႛမ︀ႆ︀ႛ ꩭွင︀်ႇမ︀ႃးက︀ꩫ︀်ႈဢ︀ူ။ တ︀ပ︀ေးꩡ︀ဝ်ႛၵ︀ဝ်ယ︀ႃႇ က︀ူꩫ︀်းဢ︀မ︀ႂ်းၵ︀ဝ်မ︀ႆ︀ႛꩭိူတ︀်ꩬ︀ီꩡ︀တ︀်က︀ꩫ︀်ႈဢ︀ူ။ 14ꩡ︀ဝ်ႛယ︀ေꩬ︀ုယ︀ႃႇ “လ︀ၵ︀ႃꩫ︀ႆ︀ႇၵ︀ဝ် ꩭႂ်ႛမ︀ႃးက︀ွတ︀်။ ပ︀ီꩡ︀တ︀်။ မ︀ိူင︀်းက︀ၢင︀်ႈꩭၢဝ်ယ︀ႃႇ ꩡ︀ႃႇက︀ူꩫ︀်းꩫ︀င︀်ၸ︀ꩫ︀်းလ︀ၵ︀ႃꩫ︀ႆ︀ႇၵ︀ဝ်ဢ︀ူꩫ︀မ︀်” ꩫ︀ယ︀ဝ်ႇက︀ီး 15လ︀ၵ︀ႃꩫ︀ႆ︀ႇၵ︀ဝ်မ︀ႆ︀ႛ မ︀ိုဝ်းတ︀ၢင︀်င︀ႆ︀း ပ︀ူင︀်ႈꩬ︀ူးꩭႂ်ႛဢ︀ူ။ ယ︀ဝ်ႇက︀ီး မ︀ꩫ︀်းꩡ︀ဝ်ႛလ︀ုက︀်ႉဢ︀မ︀ႂ်းမ︀ႆ︀ႛဢ︀ွက︀်က︀ႃဢ︀ူ။

လ︀ွင︀်ႈၸ︀ူႛမ︀ီးက︀ူဝ်ႇလ︀ိူင︀်ႈ

(မ︀ႃက︀ု 10.17-31; လ︀ုက︀ႃ 18.18-30)

16ဝꩫ︀်းလ︀ိူင︀်ႈ ꩡ︀ဝ်ႛယ︀ေꩬ︀ုမ︀ႆ︀ႛ က︀ူꩫ︀်းꩫ︀ုမ︀်ဢ︀ꩫ︀်ႈမ︀ီးလ︀ူင︀်က︀ူဝ်ႇလ︀ိူင︀်ႈမ︀ႃးꩬ︀ီ “ꩬ︀ြႃꩴ︀း ꩭႂ်ႛပ︀ူဝ်းဢ︀ꩬ︀ၢက︀်ႉထႃဝရ︀ꩫ︀ႆ︀ႛꩫ︀ႆ︀ႇ က︀ဝ်ႈၵ︀ႃႛလ︀ွင︀်ႈꩫ︀ီႈက︀ꩬ︀င︀်ꩫ︀ႆ︀ ဝႃႈꩭီတ︀်တ︀ီၵ︀ႃႛꩫ︀ႆ︀ႇ” ꩫ︀ꩬ︀ီထၢမ︀်ဢ︀ူ။ 17ꩡ︀ဝ်ႛယ︀ေꩬ︀ုယ︀ႃႇ “ꩭီတ︀်က︀ꩬ︀င︀်ꩫ︀ႆ︀ က︀ဝ်ႈမ︀ႆ︀ႛမ︀ႃးထၢမ︀်လ︀ွင︀်ႈꩫ︀ီႈꩫ︀ႆ︀ႇ။ ꩡ︀ဝ်ႛဢ︀ꩫ︀်ႈꩫ︀ီႈယ︀ႃႇ ပ︀ႃးလ︀ိဝ်ႈꩫ︀ႆ︀ၢႈꩫ︀မ︀်ယ︀င︀်းꩫ︀ႆ︀ႇ။ မ︀ႂ်းၵ︀ႂ်ႈꩫ︀ႆ︀ႛဢ︀ꩬ︀ၢက︀်ႉထႃဝရ︀က︀ီး ꩬ︀ိꩫ︀်ဢ︀ꩫ︀်ႈꩫ︀ႆ︀ႇၵ︀ဝ်က︀မ︀်ႈက︀ႅင︀်းတ︀ႃႉ” ꩫ︀ဢ︀ူ။ 18မ︀ꩫ︀်းယ︀ႃႇ “ꩬ︀ိꩫ︀်ဢ︀ꩫ︀်ႈလ︀ႂ်ႈတ︀ီၵ︀ႃႛꩫ︀ႆ︀” ꩫ︀ဝꩫ︀်ႇ။ ꩡ︀ဝ်ႛယ︀ေꩬ︀ုယ︀ႃႇ

“ဢ︀ꩬ︀ၢက︀်ႉက︀ူꩫ︀်းပ︀ီဢ︀ဝ်ႈတ︀ႆ︀ၢႈ။

ၸ︀ူဝ်ပ︀ိူꩫ︀်ႈ မ︀ေးလ︀ုက︀်ႉပ︀ိူꩫ︀်ႈမ︀ႆ︀ႛပ︀ီၸ︀ိတ︀်။

ၵ︀ွင︀်ပ︀ိူꩫ︀်ႈပ︀ီလ︀ၢက︀်ႉ။

ပ︀ႃႛဢ︀ꩫ︀်ႈၸ︀ိတ︀်မ︀ႆ︀ႛပ︀ီꩭီတ︀်ꩬ︀ၢက︀်ႉꩬ︀ေ။

19ပ︀ူဝ်မ︀ေမ︀ႆ︀ႛ ယ︀မ︀်ႈင︀ဝ်းတ︀ႃႉ။

ပ︀ိူꩫ︀်ႈမ︀ႆ︀ႛ ꩫ︀င︀်ၸ︀ူႛꩡ︀ဝ်ႛꩫ︀က︀ꩫ︀်ႈꩭၢက︀်ႉတ︀ႃႉ” ꩫ︀ဢ︀ူ။

20ၸ︀ူႛမ︀ီးꩫ︀ႆ︀ႇယ︀ႃႇ “ꩬ︀ိꩫ︀်ꩫ︀ႆ︀ႇၵ︀ဝ်တ︀င︀်းမ︀ိူင︀်း က︀ဝ်ႈၵ︀ႃႛလ︀ုက︀်ႉမ︀ိူဝ်ႈဢ︀ွꩫ︀်ပ︀ုꩫ︀်ႛ က︀မ︀်ႈက︀ႅင︀်းမ︀ႃးတ︀ီၵ︀ႃႛယ︀ဝ်ႇ။ က︀ꩬ︀င︀်ꩫ︀ႆ︀ ဝႃႈꩭီတ︀်ဢ︀ိက︀်တ︀ီၵ︀ႃႛꩫ︀ႆ︀ႇ” ꩫ︀ဝꩫ︀်ႇ။ 21ꩡ︀ဝ်ႛယ︀ေꩬ︀ုယ︀ႃႇ “မ︀ႂ်းက︀ူႈꩡ︀ွင︀်ႈၵ︀ႂ်ႈတ︀ီမ︀်ႈက︀ုမ︀်တ︀ေႇတ︀ေႇက︀ီး မ︀ိူဝ်းတ︀ႃႉ။ ၵ︀ူဝ်းလ︀ိင︀်းမ︀ႂ်းတ︀င︀်းမ︀ိူင︀်းၵ︀ႆ︀ၢꩬ︀ီ ၸ︀ူႛၸ︀ၢꩫ︀်ꩫ︀ႆ︀ႇၵ︀ဝ်မ︀ႆ︀ႛ ပ︀ꩫ︀်ႈꩭႂ်ႛတ︀ႃႉ။ င︀ႆ︀းက︀ီး မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ႂ်းꩬ︀ူးꩫ︀ႆ︀ႛဢ︀ူ။ ပ︀ꩫ︀်ႈယ︀ဝ်ႇက︀ီးꩬ︀ိုင︀် က︀ꩫ︀်ႛလ︀င︀်က︀ဝ်ႈမ︀ႆ︀ႛ ꩡ︀ွမ︀်းမ︀ႃးတ︀ႃႉ” ꩫ︀ဢ︀ူ။ 22ꩫ︀ႆ︀ႇꩫ︀က︀ေႃႇ မ︀ꩫ︀်းယ︀ႃႇ ပ︀ီꩫ︀်ႈၸ︀ူႛမ︀ီးလ︀ူင︀်ꩫ︀ႆ︀ႇꩬ︀ီ ၵ︀ၢမ︀်းꩫ︀ႆ︀ႇꩫ︀ႆ︀ႛꩥ︀ိꩫ︀်းက︀ီး ꩡ︀ႂ်ႈꩬ︀ဝ်ႛꩬ︀ီဢ︀ွက︀်က︀ႃဢ︀ူ။ 23ꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုယ︀ႃႇ “ထွမ︀်ꩫ︀ီႈꩫ︀ီႈတ︀ႃႉ။ က︀ဝ်ႈဝႃႈက︀ွတ︀်။ ၸ︀ူႛမ︀ီးꩫ︀ႆ︀ႇၵ︀ဝ်ယ︀ႃႇ ꩭႂ်ႛပ︀ူဝ်းꩫ︀ႆ︀ႛၵ︀ဝ်ႛမ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ ယ︀ပ︀်လ︀ူင︀်ꩫ︀မ︀်။ 24ၵ︀ႂ်ႈလ︀ႂ်ႈꩫ︀ႆ︀ယ︀ပ︀်ꩫ︀ႆ︀ႇꩫ︀က︀ီး ꩭူးၵ︀ီမ︀်မ︀ႆ︀ႛ မ︀ႃႇဢ︀ုတ︀်ႉၵ︀ဝ်ႛꩫ︀ႆ︀ၢႈက︀ေႃႇ ꩡ︀ၢင︀်ႈင︀ႆ︀ၢႈဢ︀ူ။ ꩫ︀ႆ︀ႇꩫ︀က︀ေႃႇ ဢ︀ꩫ︀်ႈၸ︀ူႛမ︀ီးꩫ︀ႆ︀ႇၵ︀ဝ်ꩬ︀ိုင︀် တ︀ီၵ︀ဝ်ႛမ︀ိူင︀်းက︀ၢင︀်ႈꩭၢဝ်ꩫ︀ႆ︀ႇယ︀ႃႇ ယ︀ပ︀်လ︀ူင︀်ယ︀ပ︀်လ︀ၢင︀်ꩫ︀မ︀်” ꩫ︀ဝꩫ︀်ႇ။ 25ၵ︀ၢမ︀်းꩫ︀ႆ︀ႇမ︀ႆ︀ႛ တ︀ပ︀ေးꩡ︀ဝ်ႛၵ︀ဝ်ꩫ︀ႆ︀ႛꩥ︀ိꩫ︀်းက︀ီး ဢ︀ၢမ︀်းတ︀ႆ︀ၢႈꩰက︀ႃက︀ꩫ︀်ႈꩬ︀ီ “ꩫ︀ႆ︀ႇက︀ီး ၸ︀ႂ်ꩫ︀ႆ︀ တ︀ၢင︀်းၵ︀ေꩬ︀ေတ︀ီꩫ︀ႆ︀ႛတ︀ီၵ︀ႃႛꩫ︀ႆ︀ႇ” ꩫ︀ꩬ︀ီမ︀ꩫ︀်းꩡ︀ဝ်ႛမ︀ႆ︀ႛထၢမ︀်ဢ︀ူ။ 26ꩡ︀ဝ်ႛယ︀ေꩬ︀ုယ︀ႃႇ ꩫ︀ႃႛၵ︀ဝ်မ︀ႆ︀ႛꩫ︀ူႈꩬ︀ီ “လ︀ွင︀်ႈꩫ︀ႆ︀ႇယ︀ႃႇ က︀ူꩫ︀်းꩵ︀ႈပ︀ီꩫ︀်ႈပ︀ေႇ။ ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူႈလ︀ွင︀်ႈပ︀ီꩫ︀်ႈပ︀ေႇဢ︀ူ” ꩫ︀ဝꩫ︀်ႇ။ 27ꩫ︀ႆ︀ႇမ︀ႆ︀ႛ ပ︀ေတ︀ရ︀ုယ︀ႃႇ “ꩡ︀ဝ်ႛꩴ︀း တ︀ူႈၵ︀ႃႛတ︀င︀်းမ︀ိူင︀်းၵ︀ွတ︀်ꩬ︀ီ က︀ꩫ︀်ႛလ︀င︀်ꩡ︀ဝ်ႛမ︀ႆ︀ႛ ꩡ︀ွမ︀်းမ︀ႃးတ︀ီၵ︀ႃႛယ︀ဝ်ႇ။ တ︀ူႈၵ︀ႃႛဢ︀က︀ိဝ်းက︀ꩬ︀င︀်ꩫ︀ႆ︀ တ︀ီꩫ︀ႆ︀ႛတ︀ီၵ︀ႃႛꩫ︀ႆ︀ႇ” ꩫ︀ꩬ︀ီꩬ︀ွက︀်ႉဢ︀ူ။ 28ꩡ︀ဝ်ႛယ︀ေꩬ︀ုယ︀ႃႇ “ထွမ︀်ꩫ︀ီႈꩫ︀ီႈတ︀ႃႉ။ က︀ဝ်ႈဝႃႈက︀ွတ︀်။ မ︀ိူဝ်ႈတ︀င︀်းလ︀ုင︀်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈပ︀ီꩫ︀်ႈဢ︀ꩫ︀်ႈမ︀ႂ်ꩫ︀ႆ︀ႇ က︀ဝ်ႈၸ︀ူႛပ︀ီꩫ︀်ႈလ︀ုက︀်ႉက︀ူꩫ︀်း ပ︀လ︀ၢင︀်မ︀ႆ︀ႛတ︀ီꩫ︀င︀်ႈꩫ︀မ︀်။ မ︀ိူဝ်ႈဢ︀မ︀ႂ်း ꩬ︀ူၸ︀ူႛပ︀ီꩫ︀်ႈတ︀ပ︀ေးက︀ဝ်ႈꩫ︀ႆ︀ႇၵ︀ဝ်က︀ေႃႇ ပ︀လ︀ၢင︀်ꩬ︀ိပ︀်ꩬ︀ွင︀်ဢ︀ꩫ︀်ႈမ︀ႆ︀ႛꩫ︀င︀်ႈꩬ︀ီ ဢ︀ီတ︀်ꩬ︀ြေးꩬ︀ိပ︀်ꩬ︀ွင︀်ၸ︀ꩫ︀်းမ︀ႆ︀ႛ တ︀ီဢ︀ုပ︀်ႉပ︀ိုင︀်ꩫ︀မ︀်။ 29ꩡ︀ႃႇလ︀ိူင︀်ႈ က︀ူဝ်ႇဢ︀ꩫ︀်ႈလ︀ႆ︀ၢးပ︀ိူဝ်ႈထွမ︀်ၵ︀ၢမ︀်းက︀ဝ်ႈꩬ︀ီ ပ︀ူဝ်မ︀ေ၊ ပ︀ီႈꩫ︀ွင︀်ႇ၊ လ︀ုက︀်ႉလ︀ၢင︀်းꩫ︀ႆ︀ႇၵ︀ဝ်၊ ꩭိူꩫ︀်း၊ ꩫ︀ႃးꩫ︀ႆ︀ႇၵ︀ဝ်မ︀ႆ︀ႛ ꩫ︀ႆ︀ႛၵ︀ွတ︀်ꩫ︀ႆ︀ႇယ︀ႃႇ ဢ︀က︀ိဝ်းပ︀ၢက︀်ꩡ︀ူးꩫ︀ႆ︀ႛပ︀ွက︀်ႉꩬ︀ေႇမ︀ဝ်က︀ႃးဢ︀ꩬ︀ၢက︀်ႉထႃဝရ︀တ︀မ︀ိူင︀်းꩫ︀ႆ︀ႛဢ︀ူ။ 30ꩫ︀ႆ︀ႇꩫ︀က︀ေႃႇက︀ူꩫ︀်းဢ︀ꩫ︀်ႈင︀ႆ︀ႚဢ︀မ︀်ꩬ︀ႃပ︀ိူꩫ︀်ႈဢ︀ၢꩫ︀်တ︀ၢꩫ︀်ယ︀ႃႇ တ︀ီက︀ွႆ︀ႛပ︀ိူꩫ︀်ႈက︀ႃꩫ︀မ︀်။ က︀ူꩫ︀်းဢ︀ꩫ︀်ႈင︀ႆ︀ႚက︀ွႆ︀ႛပ︀ိူꩫ︀်ႈဢ︀ၢꩫ︀်တ︀ၢꩫ︀်ယ︀ႃႇ တ︀ီဢ︀မ︀်ꩬ︀ႃပ︀ိူꩫ︀်ႈမ︀ႃးꩫ︀မ︀်” ꩫ︀ဝꩫ︀်ႇ။

Одоогоор Сонгогдсон:

မ︀တ︀်တ︀ႄး 19: kht

Тодруулга

Хуваалцах

Хувилах

Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү

Khamti Shan-ийн талаар илүү ихийг мэдэж авах

မ︀တ︀်တ︀ႄး 19