Génesis 30
30
1Usa ꞌain ka Raquel ax ꞌën kana Jacob tuá xunima kixun sinani aín xukë́n Líami ꞌitsaira nishakëxa, nishkin ka aín bënë kakëxa:
—ꞌËmiribi kamina bëchiti ꞌain, min ꞌëmi bëchikëmax kana ñuti ꞌain.
2ꞌAínbi ka Jacobnën nishkin kakëxa:
—¿ꞌËx kana Diosma ꞌain? Nukën ꞌIbu ax ka mix tuáñu ꞌiti kuëënima.
3Usakian kakëxun ka kakëxa:
—Ka kuat, ꞌën kana an ꞌë ñu ꞌaxunkë xanu Bilhá kakë a mi ꞌinanin, usa ꞌain ka an tuakëx ꞌënbi tuákësa ꞌiti ꞌikën. Usakin ꞌakëbë ka aín tuá ax ën tuása ꞌiti ꞌikën. 4Ësai abë banatankëxun ka Raquelnën Jacob an ñu ꞌaxunkë xanu Bilhá, aín xanusa ꞌikëa ꞌikinun ꞌinánkëxa. ꞌInánkëx ka Jacob Bilhá abë ꞌiakëxa, 5abë ꞌixun ka Jacobnën achúshi okin ami bëchiakëxa. 6A mi bëchikë isi ka Raquel kiakëxa: Ënë tuá ka Dan kakin anëkë ꞌiti ꞌikën, Nukën ꞌIbu Diosan ka ꞌën ñukákëxun kuakin nuibakin ënë tuá ꞌë ꞌinánxa. 7Usokin ami bëchitankëxun ka amiribishi Jacobnën Bilhámi bëchitëkëankëxa, 8usakian ami bëchitëkëan ka Raquel kiakëxa: Ënë tuá ka Neftalí kakin anëkë ꞌiti ꞌikën, ꞌëx kana ꞌën xukë́n apan ami ꞌitsaira nishan usa ꞌain kana bërí ꞌëxribi tuáñu ꞌain, usa ꞌain kana ami nishíbi kana bërí tuáñu ꞌain.
9Usa ꞌaish ka Lía ax aín tuati sënë́nkë ꞌixun tuakima, an ñu ꞌaxunkë xanu Zilpánën aín bënë Jacob aín xanusa ꞌikëa ꞌikinun ꞌimiakëxa. 10ꞌInánkëxun ꞌikinkin ka Zilpámi achúshi tuá Jacobnën ꞌakëxa, 11usokin tuaxunkë isi ka Lía kiakëxa: ¡ꞌËn sinánkëma ꞌaínbi ka ësai ꞌiaxa! Usa ꞌain ka ënë tuá Gad kakin anëkë ꞌiti ꞌikën. 12Usai abë basipain ꞌitankëxun ka Jacobnën amiribishi aín ñu mëëmikëa bikë xanu Zilpá ami bëchitëkëankëxa, 13usakian bëchitëkëan ka Lía kiakëxa: ¡ꞌËx kana chúamarua tani kuëënin! Usa ꞌain ka xanu raíri kamaxribi ax ka ꞌitsaira kuëënia kiax kiti ꞌikën. Usa ꞌain ka ënë tuákën anë Aser kakë ꞌiti ꞌikën.
14Usa ꞌain ka achúshi nëtën Rubén anun trigo biti ꞌuxë ꞌain, uri nitsi kuankëxa anua ka bimi kaxorisa pëkë́kë mëraxun biakëxa, bibiankin ka aín tita Lía buánxuankëxa. Usokin buania ka Raquelnën bimi isakëxa, iskin ka a bimi kukin tuatisa sinánkin Lía ñukákëxa:
—ꞌË kaina, min tuákën mi bëxunkë kaxorisa bimi bëtsira ꞌinántima ꞌain. 15Kakëxunbi ka Lían aín xukë́n kakëxa:
—¿Min karamina ꞌën bënë ꞌë bikuanti ꞌain? ¡Usa ꞌaínbi kaina ꞌën tuakëan bëkë kaxorisa bimi ënëribi ꞌë bikuantisa tanin!
—Usama ka —Min tuakëan bëkë kaxorisa bimi ënë kupín ka Jacob ënë imë́ mibë ꞌuxti ꞌikën —kixun ka Raquelnën aín xukë́n kakëxa. 16Usakian kakë ñantabukëbë ka Jacob ninu nitsi kuanpuni uakëxa ukëbë ka Lía, aín ꞌikënuax chikikinbi aia mërakin kakëxa:
—Bërí kamina ënë imë́ ꞌëbë uxti ꞌain, ꞌën kana Raquel kupíon kaxorisa bimi ꞌën tuákën bëkë anun.
Usa ꞌain ka a imë́ Jacob Líabë ꞌuxakëxa.
17Usai abë ꞌitankëxun ka Jacob amiribishi mapai achúshi okin tuáxuankëxa, Nukën ꞌIbu Diosan an ñukákëxun kuakë kupin. 18Usa ꞌain ka Lía kiakëxa: Ënë tuakëx ka Isacar kakin anëkë ꞌiti ꞌikën, Nukën ꞌIbu Diosan ka ꞌë ꞌinaishiaxa an ꞌë ñu mëëxunkë xanu ꞌën bënë ꞌinánkë kupín. 19Usakin ꞌatankëxun ka Lían amiribishi Jacob tuáxuankëxa, mapai achúshi ꞌimainun achúshi tuá ꞌitánun, 20usakin ꞌatankëx ka kiakëxa: Nukën ꞌIbu Diosan ka ꞌë achúshi ñu upíira ꞌinaishiaxa. Usa ꞌain ka bërí ꞌën bënën ꞌë upíokin nuibati ꞌikën, ꞌën kana mapai achúshi ꞌimainun achúshi okin tuáxuan. Usa ꞌain ka ënë tuá Zabulón kakin anëkë ꞌiti ꞌikën. 21Usokin nukëbënë okin pain tuapatankëxun ka, anuishi ñomëkin Lían xanu achúshi tuakëxa, a ka Dina kakin anëakëxa.
22Usa ꞌain ka Nukën ꞌIbu Dios an ñukákëx Raquelmi sinánkëxa; sinánkin ka an ñukákëxun kuakin tuáñu ꞌinun ꞌimiakëxa. 23Usokian sinánxunkëx ka aín rëkuë́n tuápain ꞌatankëx kiakëxa: Nukën ꞌIbu Diosan ka ꞌëx tuaima rabinkë a ꞌë nëtënxuanxa. 24ꞌË sapi ka bëtsi bëbu tuá Nukën ꞌIbu Diosan tuakasmai rabinkë a ꞌë mënioxuanxa. A tuá ka José kakin anëakëxa.
Jacob ꞌimainun Labán paránan ñuikë bana
25Usa ꞌain ka nëtë itsi ꞌikëbëtan Raquel aín tuá José bakënkë ꞌain, Jacobnën aín kuku Labán kakëxa:
—ꞌËn menubi kuantëkëntanun kaina ꞌë xutima ꞌain. 26Usa ꞌain kamina ꞌën bëchikë ꞌimainun ꞌën xanu rabë́ ꞌë ꞌinánti ꞌain, kana a kupín ꞌitsaira mi ñu mëëkian, usa ꞌain kamina buántanun ꞌë xuxunti ꞌain. Min kamina ꞌunan uisakin karana ꞌën mi ñu mëëxuan kixun.
27Kakëxunbi ka aín kuku Labánën kakëxa:
—Usama ka ꞌëbëbi ꞌi kamina bërúti ꞌain. ꞌËn kana ꞌunanin Nukën ꞌIbun ka ꞌën sinánkëxun mix ënu ꞌëbë ꞌain ꞌitsaira ꞌë ꞌakinia usa ꞌain. 28Usa ꞌain kamina ꞌë kati ꞌain uiti kaina kanantisa tanin, atibi kana mi kupíoti ꞌain.
29Ësokian kakëxun ka Jacobnën kakëxa:
—Min kamina upíokin ꞌunan uisakin karana ꞌën min ñu mëëa kixun ꞌimainun karana uisakin min ñuinakama bëruan kixun ꞌunan; 30ꞌëx ukëmapan ꞌain ka min ñuina ꞌarakakëkama ꞌitsamashi ꞌiakëxa, usa ꞌaínbi ka ꞌën bërúaia Nukën ꞌIbu ꞌakinkëx bërí ꞌaisamaira min ñuina ꞌikën; ꞌaínbi karana, ¿Uínsaran ꞌënanbi ñu mëi ꞌën xanu ꞌimainun ꞌën bëchikë kamanan ñu ꞌarakati ꞌain?
31—¿Uiti mi kupíoti kaina kuëënti ꞌain? —kixun ka Labánën aín piaka karaishikin kakëxa.
—ꞌË kamina kuríkinën kupíotima ꞌain —kixun ka Jacobnën katëkëankëxa—. Mixmi ꞌën usakin kamina ꞌati ꞌai kixun kakëx kuëënkëbë kana amiribishi min ovejakama bërúain kuantëkënti ꞌain kixun ka aín kuku kakëxa: 32usa ꞌain kamina bërí ꞌë anua min ñuina ꞌarakakëkama ꞌikë anu xuti ꞌain, anuxun kana carnero tunankama ꞌimainun kamabi cabra tsákatsaka akama amo sëtë́nati ꞌain. Ax ka anúnmi ꞌë kupíoti ꞌiti ꞌikën. 33Usa ꞌain ka uinsaran kaina uisatanin a nëtën utankëxun isti ꞌain; ꞌën ñuinakamanu cabra tsaka tsaka ꞌimainun tunan akamanua iskëxa anu tsaka tsakakama ꞌianan ñun shikësa ꞌianan tunan ꞌënanu ꞌain kamina ꞌën kana minan mëkama kixun ꞌunánti ꞌain. 34—Ësokian kakëxun ka asabika, min sinánkë ax ꞌikën —kixun Labánën kakëxa.
35Usokin katankëxun ka Labánën a nëtënbi aín ñuinakama amo sëtë́nakin chibu aín bënë shióshio ꞌimainun tsákatsaka, ꞌimainun kamabi cabra tsákatsaka ꞌaish uxun pukukësa akama këñunbi, kamabi oveja tunan akamabi amo sëtënaxun aín, bëchikëkaman bërúanun kixun ꞌinánkëxa. 36Usokin ꞌabiani ka aín ñuinakama buani anuaxa Jacobë banakë anuax kuani rabë́ ꞌimainun achúshi nëtë ꞌikiani kuankëxa.
Usai kuankian ëbiankëx ka Jacob ax aín kukua kuantamainun aín ñuina raírikama bërúai anu bërúakëxa. 37Usai anu bërúxun ka uisokin kara aín ñuinakama ꞌitsaira ꞌimiti ꞌikë kixun sinánkin i pëñan paxa álamo kakë, ꞌimainun ꞌamukuta kastaña akama, aín uxu pikutanun ratápakëxa; 38-39usokin ꞌatankëxun ka i pëñan xukakëkama, anua ñuinakamax ꞌumpax xëai timë́kë anu nitsíankëxa. Ax ka anua ñuina aín bënëkama aín xanubë mërananx ꞌikë ꞌiakëxa, ꞌimainun ka i nitsínkë iskian ꞌakëx, ñuinakama ax aín tuá shiónshion, ꞌianan raírinëx tsákatsaka ꞌimainun raírinëxribi tunan ꞌiakëxa. 40Usa ꞌain ka Jacobnën aín kuku Labánën ñuina aín bënëkama shióshio ꞌimainun tunan akama ukëbëtan an ꞌanun kixun anu ëankëxa. Usakin ꞌakin ka Jacobnën ꞌain kukun ñuinakama anuabi ainan ꞌiti ꞌamo sëtënakëxa. 41Ñuina xuábukama ain xanu imikë tunanën ꞌakëtibi ka Jacobnën ꞌi pëñan xukakë a uinu kara ñuinakaman ꞌumpax ꞌai timëtia anu nitsíankëxa, usakin ka aín xanu ꞌakin ꞌakin ñuinanën isnun nitsíankëxa; 42ꞌaínbi ka uínsaran kara ñuina chumínkëkaman, aia anun i pëñankama nitsiama ꞌikën. Usa ꞌain ka ñuina ꞌatima chumínkëkama aín kuku Labánna ꞌinun ëanan, xuaira ꞌaish upíibu a Jacobnën ainan ꞌinun biakëxa. 43Usokin ñu ꞌai ka Jacob ax ꞌaisamaira ñuñu ꞌaish kuríkiñuira ꞌianan, an ñu mëëxunkë uni ꞌimainun an ñu ꞌaxunkë xanu ꞌimainun an ꞌarakakë ñuina ovejakama, camello ꞌimainun asno ñuinakama ainan ꞌitsaira ꞌiakëxa.
Одоогоор Сонгогдсон:
Génesis 30: cbrPB
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 1978, 1995, 2008, 2022 Wycliffe Bible Translators, Inc. All rights reserved.
