Mateo 6
6
Deoso dai nokotonihi
1“Dai one‑ya dai ati kasoma,
‘Mai okasomabone, owa dai awahi.’ Dai ati riyahi.
Haa‑nima dai ati niya, dai‑ka Abi neme‑ke ya‑yaini awirebonane. Dai‑ka yama kasomi manakone‑ya daani awirebonane.
2Dai one Deoso‑ya mai hi‑hiyara‑ke yobe‑ya yama‑ya mai daanabone, ho‑hori‑ya mai afoteni. Yama‑ya mai kihara mai‑ka yama‑bone‑ya mai daanabone, ho‑hori‑ya mai afoteni, mai one kikawama, mai hiawebonaha. Mai ihi‑nima dai ene riyahi. Owati amosa dai mitahi. Mai‑ka yama manakone hawa tohineni. Mai‑ka yama kasomi manakone Deoso daahini awiraboneni.
3Mai‑ka yama‑bone dai daaniya, dai one‑ya dai hiyarariyahi.
4Mai‑ka yama‑bone dai daana, tamine dai one hiwatora, Deoso‑ta hiwatobisa, dai ene manakone‑ya Deoso daanebonane.” Yeso ati nemarine.
5“‘Owa‑ya mai awiya, owa‑ya mai kahiyaraboneni.’ Dai one atibodi ati teni.
Owati amosa dai mitahi. Haa‑nima mai atibodi ati na, hibati‑ya mai manakone hawa tohani. Mai one ihi‑nima dai ene riyahi. Deoso‑ya dai ati hiyariya, dai one noko beheri‑ya dai hiyarahi.
6Mai one ihi‑nima dai ene riyahi. Deoso‑ya dai ati hiyariya, dai one mai noki‑ya dai hiyarariyahi. Nokobi wada, nokobi dai barikawamiya, dai‑ka Abi neme‑ke‑ya dai hiyarahi. Dai‑ya mai awara, Deoso dai‑ya awabise, dai manakone‑ya daanebonane.
7Bara mai toha mai hiyari‑nima dai hiyaririyahi. Mai‑ka deoso‑ya mai hiyara, mai ati yanani dama teni.
‘Oda hiyari yaboya, oda ati‑ya deoso mitebonane.’ Mai atibodi ati teni.
8Haa‑nima dai riyahi. Dai‑ka Abi neme‑ke dai hiyarabone, dai ati‑bone‑ya Deoso wato hawa tohene.
9Deoso‑ya dai hiyarabone, eya dai atiyahi.
‘Abi, neme‑ya tiwina, amosabote amatini.
10Tiwati ihi oda nafi‑ka hidi kitabote tihawahaboneni. Neme‑ya tiwati‑ya mai tokadabi‑nima bofe‑ya oda wi‑wina tiwati oda tokadabaharihi.
11Mahi‑nima oda tefe‑ba daatiyahi.
12Oda ene amosaramaro mai ihi manakone oda haanamara‑nima oda ene manakone haatinamariyahi.
13Tiwa ene yama amosara oda nokotoniriyahi. Oda nafi‑ka hidi tihawahabone, kitabote amatini. Amosabote amatini. Yama maakani awirabone, fara amosineni.’ Dai atiyahi.
14Mai ihi towe mai‑ya dai ati somiya, dai‑ya dai‑ka Abi neme‑ke ati somaharibonane.
15Dai one‑ya dai kakoya, dai‑ka Abi neme‑ke dai‑ya kakoharibonane.” Yeso ati nemarine.
Mai tafara tamine
16“Owati amosa dai mitahi. Deoso‑ya mai kahiyarabone mai ati na, mai tafi maakana, mai noki ohina‑nima mai teni.
‘Owa noko ohina‑nima oniya, owa‑ya mai awiya, —Deoso‑ya nofi nafi ene tafi maakanane.— Mai ati niya, owa‑ya mai nofaboneni.’ Mai atibodi ati na,
Mai manakone hawa tohani. Mai‑nima dai riyahi.
17Dai tafi maakaniya, Deoso‑ya dai hiyarabisahi. Dai noko ohina‑nima dai riyahi. Dai noko dai soko, dai tati kone dai siri, dai nahi.
18Dai‑ya mai awiya, dai‑ya mai watoraboneni. Dai fime, dai‑ka Abi neme‑ke dai‑ya awabise, dai manakone‑ya daanebonane.” Yeso ati nemarine.
Neme‑ka yama dai nokotonihi
19“Bofe‑ya yama dama dai nokotoniriyahi. Dai‑ka yama one‑ya yama aboni kaba, one fehoso hikaba, one mai hiboti hiteboneni.
20Neme‑ya dai‑ka yama dama‑bone dai nokotonihi. Neme‑ya yama aboni yama‑ya kabarihi, fehoso yama‑ya kabarihi, yama‑ya mai botirihi, teni.
21Bofe‑ya dai yehe honene dama wadiya, bofe‑ka yama dai nokotoniheboneni. Neme‑ya dai‑ka yama dama tohabisiya, neme‑ka yama dai nokotonibisaboneni. Ai‑ka yama dama wadi tohi‑kaya yama ai nokotoniteni.
22Ai nokobodi ene yama ai awateni. Dai nokobodi amosa, yama nafi‑ya dai awateni.
23Ai nokobodi towe toha, yama‑ya ai awaterani. Yama bara‑ya dai nokotoniya, dai noko towe toha‑nima dai na, Deoso ati dai watoraboneni.
24Dai‑ka hidi mai fama, hidi owa ati dai tokadababisa, hidi owa ati dai tokadabaraboneni. Hidi owa dai nokotoniya, hidi owa dai kakaboneni. Deoso ati dai nofabisiya, yinero dai nokotoniraboneni.” Yeso ati nemarine.
Dai habo siitoriyahi
25“Yama kaba wadarihi, faha fa‑fawa wadarihi, dai‑ka bora one wadarihi niya, dai habo siitoriyahi. Mai tafe toha, mai‑ka bora toha na mai‑ya kasomi nafira, mai one ohi, mai one aba nineni.
26Bani bidi mai dai awahi. Bani bidi mai‑ka yamata‑bone‑ya mai kamaterani. Fadara‑ya mai kiharihi, mai tafe yoberi wadarihi teni. Bani bidi mai tafe‑bone‑ya ai‑ka Abi neme‑ke daanibisatene. Bani bidi mai manakone bi‑bidi, dai manakone nafibisateni.
27Dai habo siitoniya, dai‑ya dai kasomaterani.
28Bora one‑ya dai kihariya, dai atibodi yama‑ya kadikariyahi. Awa mowe dai awahi. Awa mowe bora‑ya wamaterani.
29I‑di Saromaho‑ka bora amosa damamete, awa mowe amosabisa, Saromaho‑ka bora amosi bi‑bidi nametemoneni.
30Awa mowe aba kanibote na makobote ai sarikiteni. Awa mowe‑ya Deoso nokotoni nafire, ai‑ya nokotoni nafibisatene. Deoso ati ene awa mowe amosani. Awa mowe‑ya Deoso kasome, ai‑ka bora‑bone‑ya daanaharibonane. Deoso ati dai nofi nafira, ati dai nofi nafihi.
31‘Hini yamata ai kaba, hini yamata ai fawa, hini yamata ai sako, ai nibati?’ Dai atibodi ati riyahi.
32Bara haa‑nima mai atibodi ati teni. Mai‑nima dai riyahi. Ai‑ka Abi neme‑ke dai‑ya watotene.
33 # 6:25-34 Ai‑ka yama anini tamine tohi awira, ai habo siitorabone tamine amani. Ai‑ka yamata‑bone ai sibana, ai wasira, ai habo siitoraboneni. Yeso ati nematamonane. Neme‑ke ai nafi‑ka hidi kitabote tohawahebona dai nokotoniya, Deoso ati dai tokadabiya, dai‑ka yama‑bone‑ya Deoso daanebonane.
34‘Mahi owa‑ya hini yamata oda kabibati? Oda‑ka bora abiya, hini yamata oda sakonibati?’ Dai atibodi ati riyahi.
Dai habo siitoriyahi. Mahi owa‑ka yama dai kayawariyahi. Mahi owa‑ya yama kobonibisaboneni. Hibayata‑ka yama towe toha, mahi owa‑ka yama hini tohamatahi.” Yeso ati nemarine.
Одоогоор Сонгогдсон:
Mateo 6: jaaNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү