Yeso‑ka yo‑yose mai tamine 18
18
Korito‑ya Baoro tokawahane
1Makobote i‑di Baoro toke, Korito‑ka mai tabori‑ya kobone,
2Korito‑ya i‑di Akira wine‑ka yobe‑ya Baoro kobone. Hibati‑ya Boto‑kaya Akira wine, makobote Homa‑ya toke, yara mai‑ka hidi i‑di Karaodio mai‑ya yose,
“Yodeo dai toha, dai nafi tokahi, ahi‑ya dai winamaraboneni.” I‑di Karaodio ati ne.
Ati ene Korito‑ya Akira fadi i‑di Birisira eyehe tokawahe, mai tabori‑ya Baoro kobonane.
3Mai tabori‑ya Baoro winawahane. Bora kita‑ya yobe‑ya mai wa‑wama, mai‑nima i‑di Baoro ne, yama‑ya anitene.
4Sabado‑ya Deoso‑ya Yodeo mai hi‑hiyara‑ke yobe‑ya tokatene. Yodeo mai toha, Kereko mai toha na, mai‑ya hiyaratene, yama‑ya mai watowahabonehe.
5Makobote i‑di Sira, i‑di Timoti mai kobokana, Baoro yama‑ya aninami awire, hiniya hiyarane. Yodeo mai‑ya hiyare,
“Hibati‑ya Yeso Deoso hikadikemata Kirisito tohane.” Baoro ati nemonane.
6Yodeo mai ati yawa, Baoro tamine‑mona‑ya keyehe‑ya mai hirina, Baoro‑ya mai weena, mai ati ihi, Baoro ati yawe, hika bora hibakori‑ya nanahabene, hibakori aba‑nima mai ababone mai awabonehe.
“Hini dai ene dai ababoneni. Owa ene toharaboneni. Bara mai‑ya ohiyarawahaboneni.” Baoro ati nemonane.
7Bara mai‑ya Baoro toke, Deoso‑ya Yodeo mai hi‑hiyara‑ke yobe fowari‑ya Titiyo Yosito‑ka yobe waari‑ya tokane. Titiyo Yosito Deoso‑ya kahiyaratene.
8Deoso‑ya mai hi‑hiyara‑ke yobe hidi i‑di Kirisibo, hika mai nafi eyehe Yeso ati‑ya mai nofawaha, Korito‑ka mai dama Baoro ati‑ya mai mita, Yeso ati‑ya mai nofa, mai mai habahinirisawahani.
9Makobote yama soki‑ya Baoro Deoso ati wadarine‑ya mite,
“Baoro, tiwa habo kitahi. Owa tamine hibati‑ya tikaminamaro, tikaminamatasahi. Tiwati fawariyahi.
10Tiwa‑ya osawebone, tiwa‑ya mai bisini awiraboneni. Mai ihi tiwa habo siitoriyahi. Oka mai dama ahi‑ya mai winateni.” Deoso ati wadarine ati nemonane.
11Korito‑ya Baoro wine, hika abariko 18 tohe‑ya Deoso ati tamine‑ya hiyarane, mai‑ya kanawatori.
12Makobote i‑di Kariyo, Akaiya‑ya mai wi‑wina mai‑ka hidi toheya, Yodeo mai yawawaha, Baoro‑ya mai waratona, i‑di Kariyo‑ya mai hiwakamane.
13Kariyo‑ya mai hiyara,
“Kariyo, Baoro kositinahi. Mose ati‑nima ai rabone ati ne, Yeso ati‑nima Deoso ai hiyarabisabone Baoro ati nene.” Mai ati nani.
14Mai ati‑ya Baoro mite, ati yananebona, ati‑ya i‑di Kariyo kahidi, ati yanane,
“Owati dai mitahi. Baoro mai‑ya bisi, mai‑ya nanahaba ne‑mana, tamine omite nane.
15Hiniya bara mai tamine‑ya Baoro hiyaremona dai ati na, Mose ati tamine tohe, Mose ati owatoterani. Ati dai watobise, dai tokomahi. Dai ati omitamaraboneni.
16Oka yobe‑ya dai nahoriyahi.” Kariyo ati nane, mai‑ya weeneri.
17 # 18:17 Sotenesi Yeso ati‑ya nofe ai watowahani.
Korito daidi 1:1
Deoso‑ya Yodeo mai hi‑hiyara‑ke yobe mai‑ka hidi i‑di Sotenesi‑ya mai waratona, Kariyo‑ka yobe‑ya mai hiwakame, Kariyo‑ka yobe‑ya mai kosihineya, hiniya Kariyo mai‑ya kakatomane.
Birisira, Akira mai tosawiwama
18Korito‑ya Baoro wine, amoni ba‑basi namakiya, Senekereya‑ya tokawahane. Senekereya‑ya wine‑ya tati kone nafi‑ya nanahabe, Deoso hikasome ene Baoro ya‑yai, tati kone‑ya nanahabane, Deoso‑ya kahiyarebonaha. Hawa toheya, i‑di Baoro, i‑di Birisira, i‑di Akira mai na, maboro‑ya mai foya, Siriya‑ya mai tokaboneni.
19Efesiyo‑ya mai kobona, Deoso‑ya Yodeo mai hi‑hiyara‑ke yobe‑ya Baoro tokiyome, mai‑ya kanawatone. I‑di Birisira, i‑di Akira mai winabisaboneni. Baoro‑ta tokebona ati ne.
20“Baoro, oda tabaro‑ya tiwinahi.” Mai ati na.
“Hibayata dai tabaro‑ya owini awirabone,
21Deoso ati sibareya, okomatasabani.” Baoro ati nane.
Maboro‑ya foyamatasane.
22Sesareya‑ya fiyakane, Yerosare‑ya toke, Yeso‑ka mai‑ya hiyare, makobote Atioki‑ya tokome,
23Atioki‑ya wine, makobote Karatiya mai tabori dami‑kaya tokomatasa, Firikiya mai tabori dami‑kaya tokomatasa ne. Yeso ati‑ya mai no‑nofa Baoro ati ene mai habi kitawahamoneni.
I‑di Aboro tamine
24I‑di Aboro, Yodeo tohe, Aresadiriya‑ya wademata, Efesiyo‑ya kame, Deoso ati‑ya wato ba‑basi ne.
25Hibati‑ya i‑di Yeso Deoso‑ka Ka‑kadika kobone tamine i‑di Yowaho Batita mai‑ya hiyare, mai‑ya habanirisane. Tamine‑ya Aboro wato, tamine mai one‑ya kanawatomakine. Yeso abe, kitame, ai manakone‑ya nanahabe tamine‑ya Aboro wato awisare, fara tamine mai‑ya kanawatorene.
26Deoso‑ya Yodeo mai hi‑hiyara‑ke yobe‑ya Deoso‑ka Ka‑kadika tamine‑ya i‑di Aboro hiyare, habo siitore, ati‑ya i‑di Birisira i‑di Akira mai mita, mai tabori‑kaya mai hiwakame, Deoso hawine‑ya mai hikaminawahane.
27Makobote Akaiya‑ya Aboro tokebona ati ne, ati‑ya mai mita, Aboro‑ya mai kasoma, Akaiya‑ya mai wi‑wina Yeso ati‑ya mai no‑nofa mai‑ka yama hani‑bone‑ya mai kanahana, Aboro‑ya mai daaneni.
“Aboro ati sibare, ati dai mitahi. Dai‑ka one oda amani. Yeso ati oda no‑nofa oda amani.” Efesiyo‑ya mai wi‑wina mai‑ka yama hani ati nineni.
Akaiya‑ya Aboro kobone, Yeso ati‑ya mai no‑nofa mai‑ya kasomemonane.
28Yodeo mai yorotokana mai‑ya hiyare,
“Deoso ati dai mitahi, Yeso ai‑ka Hidi Deoso‑ka Ka‑kadika amane.” Aboro ati neya,
mai weena, Deoso‑ka yama hani‑ya Aboro yofikane, mai ati fawanamoneni.
Одоогоор Сонгогдсон:
Yeso‑ka yo‑yose mai tamine 18: jaaNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
