Yeso‑ka yo‑yose mai tamine 16
16
Baoro i‑di Sira mai‑ya Timoti dabawahe
1Derebi‑ya Baoro mai towaka, Risita‑ya mai towakawaha, Risita‑ya Timoti wine. Timoti madi Yeso ati‑ya no‑nofa, Yodeo toha, badi‑ta Kereko toha nemonane.
2“Timoti ene amosatene.” Yeso‑ka mai ati na.
Risita‑ka mai, Ikoniyo‑ka mai na, Timoti‑ya mai nofamoneni.
3I‑di Baoro mai‑ya i‑di Timoti sawibona, sowiri tati ataro i‑di Baoro wisinakosane. Timoti badi Kereko tohe‑ya Yodeo mai nafi wata, fara Timoti sowiri tati ataro‑ya wisinakosane, mai yawarabonehe.
4Mai tabori dami‑ya mai toka, mai tabori‑ya mai kobona, Yeso‑ka yo‑yose mai toha, Yeso ati‑ya mai no‑nofa mai‑ka bote mai toha na, mai‑ka yama hani Yerosare‑ya mai hikanahanamete, ati‑ya mai kamina,
“Mai‑ka yama hani ati‑nima dai niyahi.” Mai ati namoneni.
5Baoro mai ati ihi Yeso‑ka mai habi kitawaha, mai dodamawahamoneni.
Masedoni‑ke mai‑ka owa Baoro‑ya wadari haane
6Tabora webote oni Firikiya‑ya, mai fiyakana, tabora webote one Karatiya‑ya mai fiyakana, tabora webote one Asiya‑ya Yeso ati‑ya mai kaminabone mai atibodi ati na, Deoso‑ka Doni mai‑ya ati barine.
7Tabora webote Misiya‑ya mai kobona, tabora webote Bitiniya‑ya mai ati toka, Yeso‑ka Doni mai‑ya ati baritase,
8Tabora webote Misiya‑ya mai fiyakana, Torowadi‑ya mai kobona,
9Torowadi‑ya Baoro wada‑ya awe, Masedoni‑ke ai owa ati wadarine‑ya mitane,
“Masedoni‑kaya dai kakihi, oda dai kasomabonehe.” Ati wadari ati ne.
10 # 16:10 Roka i‑di Baoro mai‑ya sawiwahe. Baoro‑ka wada ati ihi, Masedoni‑kaya oda tokabone oda atibodi ati na,
“Deoso ene amane. Masedoni‑kaya Yeso Ati Amosabote‑ya mai‑ya ai kaminaboneni.” Oda ati namaroni.
Yeso ati‑ya Ridiya nofawaha
11Maboro‑ya oda foya, faha teberi oni Samotasi‑ya oda towaka, mahi owa‑ya faha widi Ni·abori‑ya oda kobokana,
12Ni·abori‑ya oda fidotona, tabora webote oni Masedoni‑ka tabora ba‑basi na oni Firibo toha‑ya oda tokawaha, Firibo‑ya homano mai dama mai wina, mai tabori‑ya oda winawahani.
13Firibo‑ya Deoso‑ya mai hi‑hiyara‑ke yobe wadare ene Sabado‑ya mai fanawi yorotokana, faha widi‑ya Deoso‑ya mai hiyarateni. Mai‑ya oda tokomake, mai oda hiyarawahamaroni.
14Fana ohare oni Ridiya toha, tabori bote oni Tiyatira tohateni. I‑di Ridiya bora amosa‑ya da‑daa, yinero‑ya kanikateni. Deoso‑ya nofa, Yeso tamine‑ta wato awisara. Baoro Yeso tamine‑ya kamine, ati‑ya Ridiya mita, Yeso ati‑ya nofawaha,
15Ridiya hika mai eyehe habanisa, oda‑ya hiyara,
“Yeso ati onofamone dai ati na, oka yobe‑ya dai winawahi.” Ati na.
Hika yobe‑ya oda winawahamaroni.
Kadeya‑ya Baoro, Sira mai fama mai foyawaha
16Deoso‑ya mai hi‑hiyara‑ya oda tokatasa, fana mai hikanikamete oda‑ya kobona, madi towe fana‑ya foyane. Madi towe ene yama nabone‑ya fana kamina ihi hika hidi yinero nafi‑ya mai kayafateni.
17Oda nowati‑kaya fana kamake, mai‑ya haana,
“Deoso kitabote yokana‑ka yo‑yose mai toha, mai ati dai tokadaba, dai abiya, Deoso tabaro‑ya dai winaboneni.” Ati namaroni.
18Mahi‑nima fana ati yanani dama ihi Baoro ati yawe, kiinawame, madi towe‑ya hiyare,
“Yeso ati ene tikahi. Fana atibodi‑ya tifoyamariyahi.” Ati ne,
ati ene madi towe toke, ene fana yama nabone‑ya watomara, hikaminamaramaroni.
19Fana‑ka hidi mai ati yawawaha,
“Fana‑ya madi foyamare ene yinero oda kayafamara oda naboneni.” Fana‑ka hidi mai ati namaroni.
Baoro, Sira, mai fama mai‑ya fana‑ka hidi mai waratona, mai‑ya mai horoni towakamamaroni kofeno‑ka mai‑ya.
20Kofeno‑ka mai‑ya mai hiyara,
“Yodeo mai toha, mai ihi towe toha, oda tabaro‑ya mai towe tonihi teni.
21Ai‑ka hidi ati‑nima mai ihi ni awira. Homano ai toha, mai ati‑nima ai terani.” Kofeno‑ka mai‑ya fana‑ka hidi mai ati namaroni.
22Mai naha, Baoro mai‑ya mai weena, kofeno‑ka mai ati ihi Baoro, Sira mai‑ka bora‑ya mai tanina, mai‑ya mai kosinamaroni.
23Mai kosini‑ya mai hawa toha, kadeya‑ya mai‑ya mai nafoyabone, kadeya hidi‑ya mai hiyara,
“Mai tiwakatomahi. Mai towakariyahi. Mai towakiya, tiwa‑ta tiwa oda nanahababoneni.” Kofeno‑ka mai ati na.
24Mai ati‑ya kadeya hidi mite, Baoro mai‑ya towakame, kadeya dori‑ya mai‑ya nafoye, mai tameribi‑ya awa webote‑ya barikanemarine.
Yeso ati‑ya kadeya hidi nofawahe
25Yama soki bai‑ya Baoro, Sira mai fama, mai wayoma, Deoso‑ya mai hiyara na, kadeya‑ya mai fo‑foya mai one wayomi‑ya mai mitamoneni.
26Wami wawawakawaha, wawakani ihi kadeya abi yanatona, kadeya nokobiri seekana, kadeya dori‑ka mai nafi seekana namoneni.
27Kadeya hidi amone, wami wawawakana ihi dodafi, kadeya nokobiri seekana‑ya awe, Yima‑ya hini‑ya nanahabebona,
“Kadeya‑ya mai foya mai toka awineni.” Atibodi ati nemonane.
28Hini‑ya watikane‑ya Baoro haane,
“Tiwa arabatinahi, oda nafi nahoneni. Oda toki awirini.” Baoro ati ne.
29Kadeya hidi hika yama wahi‑bone‑ya haane, mai‑ya tokomaki, yobati‑kaya itane, wawawakaneri.
30Mai‑ya himane, mai‑ya towakamane.
“Hini yamata‑nima obati, Deoso tabaro‑ya owinabonehe?” Kadeya hidi ati ne.
31“Ai‑ka Hidi Yeso Kirisito ati tinofiya, tiwa manakone aba, tika mai manakone aba, Deoso tabaro‑ya dai winaboneni.” Mai ati nineni.
32Kadeya hidi hika mai eyehe‑ya Deoso ati‑ya mai kamineni.
33Mai hiyari hawa toha, mai mai kosihina, mai‑ka ko‑kosi ihi‑ya kadeya hidi sokonawahane. Yeso ati‑ya kadeya hidi nofawahe, hika mai eyehe habanisawahane.
34I‑di Baoro, i‑di Sira mai fama mai‑ya towakame, hika yobe‑ya mai‑ya natafane. Kadeya hidi, hika mai eyehe Deoso ati‑ya mai nofa, mai ya‑yainineni.
35Yama wahabisari‑ya kofeno‑ka mai ati ihi sodado mai toka, kadeya hidi‑ya mai yose,
“Mai seetikanahi.” Mai ati na.
36“Sira dai see·okanabone mai ati na, dai see·okana, dai towakamahi. Dai‑ya mai weenamaraboneni.” Baoro‑ya kadeya hidi ati ne.
37Ati‑ya Baoro mite, ati yanane,
“Homano oda toha, mai dama mai noki‑ya oda‑ya mai bisina, homano mai ai bisiterani. Oda ene amosa, hiniya oda‑ya mai bisina, kadeya‑ya oda‑ya mai yaditona, hibayata hiniya oda‑ya mai yose, oda tokomabone mai ati na. Hiniya oda toki awiraboneni. Ahi‑ya mai kamiya, mai aboni oda‑ya mai seekanahi.” Baoro ati nane.
38Kofeno‑ka mai‑ya sodado mai tokoma, Baoro ati‑ya mai kamineni. Sodado ati‑ya mai mita, kofeno‑ka mai atibodi mai dika,
“Homano mai toha, mai oda bisina, hini oda ene oda‑ka hidi oda‑ya mai bisinawahaba awineni.” Mai atibodi ati na.
Mai habi siitoneni.
39Kadeya‑ya mai toka, Baoro mai‑ya mai hiyara,
“Towe oda amani, dai‑ya oda bisinaro. Dai towakamahi. Oda‑ya dai ati somawamahi. Dai oda bisinamaterabani. Tabora one‑ya dai towakamahi.” Mai ati na.
40Ridiya‑ka yobe‑ya i‑di Baoro mai towakama, Yeso ati‑ya mai no‑nofa mai yorotokana, mai‑ya i‑di Baoro hiyare, mai ya‑yaina, hiyari hawa tohe, i‑di Sira mai fama mai towakamamaroni.
Одоогоор Сонгогдсон:
Yeso‑ka yo‑yose mai tamine 16: jaaNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
