Yeso‑ka yo‑yose mai tamine 13
13
Banabe, Saoro mai fama mai‑ya mai yose
1Atioki‑ya Deoso ati‑ya mai mi‑mita mai toha, Yeso ati‑ya mai ka‑kanawato mai toha na, mai wina, i‑di Banabe toha, Simiyaho so‑sokine toha, Rosiyo Sireni‑ke toha, Manaeni Erodi mai yanikimamete mai toha, Saoro toha nane.
2Deoso‑ya mai kahiyara mahi ohari‑ya mai tafarani, Deoso‑ya mai hiyari oharebonehe. Deoso‑ya mai hiyariya, Deoso‑ka Doni mai‑ya hiyarawahe,
“I‑di Banabe i‑di Saoro mai fama mai yoronahi. Oka mai toha, mai oyoseboneni, oka yama ani‑ya mai aninabonehe.” Ati nemonane.
3Deoso‑ka Doni ati ene mahi owa‑ya mai tafara, i‑di Banabe i‑di Saoro mai‑ya mai yahi fore, mai‑ya mai yosemoneni.
Banabe, Saoro Sibe‑ya Deoso ati‑ya mai kamina
4Deoso‑ka Doni ati ene Serosiya‑ya mai toka, Serosiya‑ya maboro‑ya mai foya, faha teberi‑ya mai towaka, faha teberi oni Sibe tohateni.
5Sibe‑ka sidadi one Saramina toha‑ya mai kobona, Yodeo mai hi‑hiyara‑ke yobe‑ya mai tokiyoma, Deoso ati‑ya mai hiyarineni. Yowaho Maroko mai‑ya dabane, mai‑ya kasomebonaha.
6Sibe‑ka tabora dama‑ya mai yakana, sidadi one oni Bafo‑ya mai kobona, Bafo‑ya i‑di Bayeso‑ya mai awa, Bayeso Yodeo mai‑ka inawa tohe, Deoso ati‑ya mi‑mita‑mona ati ne, keyehe‑ya hi‑hiri amane. Bayeso oni fame, oni owa Erima tohane.
7Mai‑ka hidi i‑di Seoso Baoro‑ya i‑di Erima sawitene. Seoso Baoro yama‑ya wato ba‑basi nemona, Banabe, Saoro mai fama mai‑ya Seoso Baoro haanemonane, Deoso tamine‑ya mitebonaha.
8Banabe mai ati‑ya Inawa i‑di Erima nofare,
“Seoso Baoro, mai ati tinofariyahi.” Erima ati nemonane.
9I‑di Saoro oni owa Baoro tohe, Deoso‑ka Doni fai‑ya sawi ene, i‑di Erima‑ya kakatome ati yanane,
10“Satanasi bidi amatini. Yama amosa‑ya tinofara. Yama towe‑ya tinofa, towe amatini, keyehe‑ya hiritinaro. Deoso hawine amose tohe, hawi bara‑ya mai tiyoseriyahi.
11Oda‑ka Hidi yehe kite ene mahi wehene tiawamaraboneni. Tiwa amoni dami‑ya tiwa noko amosawamaboneni.” Baoro ati ne.
Ati fawaneya, Erima yama‑ya awamare, yama soki‑nima noko ne, mai‑ya haane,
“Owa yehe dai damaniya, hawi‑ya owa dai yofikanahi.” Ati nemonane.
12Baoro ene‑ya mai‑ka hidi i‑di Seoso Baoro awe, Yeso ati‑ya nofawahe,
“Deoso ene sibabisarane.” Ati nemonane.
Bisidiya‑ka Atioki‑ya mai kobona
13Bafo‑ya maboro‑ya Baoro mai foya, Banafiriya sidadi oni Beki toha‑ya, Yowaho Maroko maaname, Yerosare‑kaya winitonamemonane.
14Beki‑ya mai fiyakana, Bisidiya‑ka Atioki‑ya mai kobokana, Sabado‑ya Yodeo mai hi‑hiyara‑ke yobe‑ya mai towakiyoma, mai demenarineni.
15Mose‑ka yama hani‑ya yobe hidi kadike, Deoso ati‑ya mai mi‑mita‑mete mai‑ka yama hani‑ya kadikamaki ne, yama hani kadiki‑ya hawa tohe, Baoro mai‑ya haane,
“Ayo, mai dai ati hiyariya, mai dai hiyarahi. Dai ati ene mai ya‑yainaboneni.” Yobe hidi ati ne.
16Baoro waamise, yehe mai‑ya ati barine,
“Yodeo dai toha, Deoso ati dai nofa, dai na, owati dai mitahi.
17Hibati‑ya Isara·eo‑ka nodi mai‑ya Deoso kayafe, mai tabori yokana awisara, Eyito‑ya mai wina, mai‑ya kayafane. Eyito‑ya Deoso ene mai dodama, Eyito mai‑ka hidi mai‑ya seekani nofare, Eyito‑ka mai‑ya Deoso ene kite tohe, nowati‑ya mai‑ya seekane,
18tabora awiri‑kaya faha fowe 40 kana‑ya mai yakana, Deoso mai‑ya sawi, ati‑ya mai tokadabara, mai‑ya kasomanasa ne,
19Kanaha‑ya mai wi‑wina tohamete, mai‑ka hidi mai 7 kana toha, Deoso ene mai mai hinahaba, mai tabori‑ya ai‑ka idi mai kayafamete, fara mai tabori ai kayafawahameteni.
20Faha fowe 450 tohiya, mai one‑ya Deoso kadike, mai ihi‑ya kadikebonaha. Makobote Deoso ati‑ya mi‑mita‑mata i‑di Samo·eo mai ihi‑ya kadike.
21I‑di Samo·eo bote toheya, mai‑ka hidi webote‑bona‑ya mai haaneni. Mai ati‑ya Deoso mite, Besami‑ka nodi i‑di Kisi bidi i‑di Saoro‑ya Deoso kadike, mai‑ka hidi webote tohawahe, faha fowe 40 kana mai‑ka hidi webote tohematane.
22I‑di Saoro‑ya Deoso nofamare, i‑di Dafi mai‑ka hidi webote tohawahebonane.
‘Dafi onofabisa, i‑di Yese bidi ene ya‑yai·ona, hini owati‑nima nebonane.’ Deoso ati nematane.
23Dafi‑ka nodi i‑di Yeso tohe, Deoso ati ene ai nafi manakone‑ya Yeso nanahabane. Hibati‑ya Deoso ati yananemata ati‑nima yama nawahani.
24Yeso kamaki awisareya, Isara·eo‑ka nodi mai dami‑ya Yowaho Batita hiyare,
‘Deoso ati dai nofaramaro, Deoso‑ya dai‑ya dai kaminiya, dai haba·onirisaboneni.’ Ati nemonane.
25Yowaho ati fawani yanatoneya, mai‑ya hiyare,
‘Deoso‑ka Ka‑kadika oha‑mone dai ati na awineni. Deoso‑ka Ka‑kadika ohi awirini. Owa nowati‑kaya ai owa kamaki, amosabotebisa amane. Hika sanidariya madone‑ya kakasawa amosi ba‑basi ne, owa‑ta owa amosi bi‑bidi nibisa ama·oni.’ Yowaho ati nemonane.
26Soho, Abaraho‑ka nodi dai toha, Deoso ati dai no‑nofa, dai na, ai manakone‑ya Deoso‑ka Ka‑kadika nanahabebona tamine‑ya Deoso ati‑ya mai mi‑mita‑mete mai kanahanameteni.
27Deoso ati‑ya mai mi‑mita yama hani mai hikanahanamete‑ya Sabado‑ya mai kadikateni. Yerosare‑ya mai wi‑wina mai‑ka hidi mai toha na, yama‑ya mai kadika, yama hani ati‑ya mai watoramaro, yama hani ati‑nima Deoso‑ka Ka‑kadika‑ya mai nanahaba,
28Yeso towe tohi awire, amosabise, hiniya Birato hinahabebonaya, mai kahabana,
29yama hani ati‑mete‑nima mai na, hawa tohe, awa‑ya waane‑ya mai idibasa, yati hodi‑ya mai hinafoye,
30abe Deoso hinakitamemonane.
31Yeso kitame‑ya mai awarima na, hika da‑daba mai hiawa, Karireya‑ya mai sawemaro mai hiawa, Yerosare‑ya mai eyehe kameya, mai awa na, mai dami‑ya tamine mai hiyarawahane.
32Ai‑ka idi mai‑ya Deoso Ati Amosabote‑ya hiyaremata, fare Ati Amosabote dai‑ya oda kaminineni.
33Ai‑ka idi mai‑ya hiyare, ati‑mata‑nima yama na, ai awawaha, Yeso‑ya Deoso nakitamebona ati nemata, fare hinakitamawahene. Yeso tamine‑ya Deoso kamine, ati‑ya Dafi kanahanomata,
‘Oka dao amatini. Hibayata tiwa oka dao oneni.’ Deoso ati nematane.
34Fare hinakitame, abamaterebona, bataterebona,
‘Dafi okasomamaro, tiwa okasomahareboneni.’ Deoso ati ne.
35Dafi‑ka yama hani one ati,
‘Oka Ka‑kadika bataterebonane.’ Deoso ati ne.
36Owati dai mitamakihi. Hibati‑ya Deoso ati‑ya Dafi nofe, bote toheya, abo batematane.
37Yeso‑ta Deoso hinakitame, bataterene.
38Soho, yama dai watomakihi. Yeso ene Deoso ai‑ya ati somawamatene.
39Yeso ati ai nofa, ai‑ya Deoso ati somawamatene. Mose‑ka yama hani ati ihi ai‑ya Deoso ati somawamare, Yeso ati ai nofa‑ta Deoso ai‑ya ati somawamatene.
40Dai noko wadahi. Deoso ati‑ya mai mi‑mita‑mete mai ati‑ya mai tokadabara mai‑ya yama towe kobonameteni. Fara mai ati dai nofara yama towe dai‑ya kobonahareboneni.
41Dai habo kita, Deoso ati dai mitahi.
‘Owati‑ya mai mita owa ene‑ya mai awa, tiwa‑ya mai kamina, mai ati dai nofaraboneni. Mai ati dai nofara, dai habo siitona, dai abawahaboneni.’ Deoso ati nematane.” Baoro ati nemonane.
42Mai tokabone, Baoro‑ya mai hiyara,
“Sabado one‑ya tiwati oda mitamatasaboneni.” Mai ati namoneni.
43Mai toka, mai nowati‑ya Baoro mai‑ya mai one dabamake, Yodeo mai one toha, Bara mai one toha na, Baoro mai‑ya mai dabamake, mai‑ya Baoro mai hiyara,
“Deoso ati‑ya dai ati kadamowamariyahi. Deoso ati amose dai nofahi.” Baoro, Banabe mai ati namoneni.
44Sabado one‑ya mai dama mai yorotokanineni, Deoso ati tamine‑ya mai mitabonehe.
45Mai dama, mai‑ya Yodeo mai awa, mai ati yawawaha,
“Baoro keyehe‑ya hirine. Deoso ati‑ya kamini awire, Satanasi ati‑ya kaminabisane.” Mai ati namoneni, mai yawaro.
46Baoro, Banabe, mai fama mai ati fawani awira,
“Yodeo dai toha, Deoso ati ene dai oda hiyari baha, dai ati a‑arira, Deoso ati dai nofara, Deoso tabaro‑ya dai wini awirabone, dai abi ohareboneni. Dai ati ene Bara mai‑ya oda tokiya, mai oda hiyarawahaboneni.
47Deoso oda‑ya hiyare, ati oda mite,
‘Bara mai‑ya dai toka, mai‑ka yama wahi‑nima dai naboneni. Mai manakone‑ya Yeso nanahabe tamine mai watowahabone, mai tabori dami‑ya dai ati‑ya mai nofiya, owa tabaro‑ya mai winamakeboneni.’ Deoso ati nemarine.” Baoro ati nemonane.
48Baoro ati‑ya Bara mai mita, mai ya‑yaina, Deoso ati‑ya mai kahiyara, Deoso mai‑ya kadikemata, Yeso ati‑ya mai nofawahani.
49Tabora dami‑ka Yeso tamine‑ya mai nafi mitawaha,
50Yodeo mai ati ihi sidadi‑ka hidi fana mai toha, hidi makidi mai toha na, mai ati yawa, mai ihi mai nafi ati yawa, mai ihi tabora bara‑kaya Baoro, Banabe mai towakawahani.
51Baoro mai tame mekori‑ya mai nanahaba,
“Oda teme mekori oda nanahabi‑nima dai abawahaboneni, Deoso ati dai nofararo.” Mai ati na.
Ikoniyo‑ya mai towakawahamoneni.
52Yeso ati‑ya mai no‑nofa, Deoso‑ka Doni mai‑ya sawi ene mai ya‑yainamoneni.
Одоогоор Сонгогдсон:
Yeso‑ka yo‑yose mai tamine 13: jaaNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
