Yeso‑ka yo‑yose mai tamine 10
10
Koneriyo Tamine
1Sesareya‑ya i‑di Koneriyo winane, Itari·ano mai‑ka sodado mai‑ka hidi toheri,
2Deoso ati‑ya i‑di Koneriyo hika mai eyehe nofe, Deoso‑ya hiyaratene. Yama‑ya mai kihara mai‑ka yama‑bone‑ya daatene.
3Mahi towitawiti‑ya wada‑nima yama na‑ya Deoso‑ka yo‑yose‑ya Koneriyo awe,
“Koneriyo,” Deoso‑ka yo‑yose ati ne,
4Deoso‑ka yo‑yose‑ya awe, habo siitone,
“Ayo, hini yamata‑ya tiwati koboniti?” Koneriyo ati ne.
“Deoso tiwati‑ya mite, tiwa yehe honene mai‑ya daatina, tiwa‑ya awatene, tiwa‑ya nofe, ati somane.
5Yabe‑ka mai tabori‑ya tika mai tiyosehi, i‑di Simaho Bedoro‑ya mai kakamabonehe.
6Maa widi‑ya bani ataro‑ya wa‑wama, i‑di Simaho wine, Simaho‑ka yobe‑ya Simaho Bedoro wine, mai hiwakameya, ati dai mitebonane.” Deoso‑ka yo‑yose ati nemonane.
7Deoso‑ka yo‑yose tokomeya, Koneriyo hika yo‑yose mai fama mai‑ya haa, sodado ohari‑ya haa ne, mai kakiya, mai‑ya yosebonane. Deoso ati‑ya sodado nofe, Koneriyo‑ka yama‑ya anitene.
8Deoso‑ka yo‑yose ati‑ya mai‑ya kaminane. Yabe‑ya mai‑ya yosene, Bedoro‑ya mai tonakabonehe.
Bedoro neme‑ya yama kisa‑ya awe
9Mahi owa nokorise‑ya Yabe yakari‑ya mai yakaniya, Simaho‑ka yobe tati mese‑ya i‑di Bedoro tokomisane, Deoso‑ya hiyarebonaha.
10Bedoro fimi, tafebona, tefe‑bona mai hawahiniya, wada‑nima yama na‑ya awane.
11Neme seekana‑ya yama kisa‑ya awemonane. Neme‑ya, bora ibe webote‑nima yama na kisa‑ya awe, bora ibe fowari‑ya ai 4 kana damana‑nima yama na, kisa, bofe‑ya kawitamoneni.
12Bora dori‑ya yama‑ka bani mai dama mai toha, bani mai afe wada mai toha, maka mai toha namoneni.
13Neme‑ya ati kaki, ati i‑di Bedoro himite,
“Bedoro, tiwaamisiya, bani tinahabiya, bani tikabahi.” Ati ne,
14“Ayo, bani haa‑nima mai na, mai okobaterani. Bani towe mai kabaterani.” Bedoro ati ne.
15Neme‑ya ati kakitase,
“Yama kababone Deoso hina, kabi towe amani dai ati riyahi,” Ati nemonane.
16Hibati‑ya yama hiawa‑ya awamatase, hika yama awi 3 tohiya, bora ibe‑nima yama na, neme‑ya tokomisamawahani.
17Bedoro hini‑ya hiyare,
“Hini yamata‑nima yama na‑ba amaniti?” Bedoro atibodi ati ne.
Atibodi yama‑ya dikeya, Koneriyo‑ka mai kobona, Simaho‑ka yobe‑ya mai sibana, yobe nokobiri‑ya mai naha,
18Nokobi‑ya mai haana,
“Simaho Bedoro wine awane?” Mai ati na.
19Bedoro atibodi yama‑ya dikeya, Deoso‑ka Doni ati yanane,
“Owati timitahi. Maki mai fama owa oharine tiwa‑ya mai sibanani.
20Tikisamiya, mai‑ya tisawiyahi. Tiwa eme kitahi. Owati ihi mai kakineni.” Deoso‑ka Doni ati ne.
21Bedoro kisame,
“Fara owa dai sibana, fara ama·oni. Hini yamata‑ya dai ati koboniti?” Bedoro ati ne.
22“Sodado mai‑ka hidi i‑di Koneriyo oda‑ya yosene. I‑di Koneriyo amosabote amane. Deoso ati‑ya nofe, Yodeo mai nafi hinofatene. Mahi owa‑ya Deoso‑ka yo‑yose‑ya awe, tiwa‑ya haanebona, tiwati‑ya mitebona Deoso‑ka yo‑yose ati nemonane.” Mai ati na.
23“Sibarini, ahi‑ya dai amoniya, ai bosatonamabani.” Bedoro ati ne.
Mai amona, Bedoro mai‑ya tosawime, Yabe‑ka mai one Yeso ati‑ya mai no‑nofa, Bedoro‑ya mai one daba,
24mai amoni oharimaki‑ya Sesareya‑ya mai kobona, Koneriyo hika mai eyehe mai‑ya nimanemonane.
25Bedoro‑ya Koneriyo awe, yobati‑kaya ite, moinise, Bedoro‑ya kahiyarane.
26Koneriyo mano‑ya Bedoro waratone,
“Tiwaamisamahi. Fara tiwa‑nima ona, ama·oni.” Bedoro ati ne.
27Mai yakana, mai ibi hi‑hiyara tosina, mai tokiyoma, mai dami yorotokana, mai‑ya Bedoro awe,
28“Yama‑ya dai wata awineni. Bara mai tabori‑ya Yodeo oda toha, oda tokaterani. Bara mai tabori‑ya oda toka,
‘Towe dai amani.’ Mai ati teni.
Deoso owa‑ya kanawatowahe, mai nafi sibarani. Mai‑ya oda daba, oda sibarineni, oda towe toharani.
29Hini yamata‑ba owa‑ya dai haaniti? Owa‑ya mai idikebone mai kama, mai‑ya wee·ora, Deoso ati ene mai‑ya sawi kanibote onani.” Bedoro ati ne.
30Ati‑ya mite, Koneriyo hiyare,
“Hibati‑ya owa amoni 4 toha, oka yobe doro‑ya Deoso‑ya ohiyarani. Mahi towitawiti‑ya, ai owa bora sawa‑ya weyene wai, wehene kite, owa‑ya hiyare,
31‘Koneriyo, tiwati‑ya Deoso mite, tiwa yehe honene daatina‑ya awane.
32Yabe‑ya maa widi‑ya bani ataro‑ya wa‑wama, i‑di Simaho wine, Simaho‑ka yobe‑ya Simaho Bedoro wine, tinakamakiho.’ Bora sawa‑ya weyene ati ne.
33Fare ati ene tiwa haa·onani. Tiwa ene sibarini. Oda yorotokana, tiwati oda mitaboneni. Hini yamata‑nima Deoso ati nati?” Koneriyo ati nane.
Bedoro mai‑ya hiyare
34Bedoro mai‑ya hiyarawahe,
“Ka! Deoso noko‑ka fara ai nafi hinama toha owatowahani.
35Tabora dami‑kaya Deoso ati‑ya mai nofa, Deoso ati‑nima mai na, mai‑ya Deoso ati somawamatene.
36Hibati‑ya Deoso Bidi‑ya yosene, Isara·eo‑ka nodi mai‑ya Ati Amosabote hikaminebonaha. Yeso Kirisito ati‑ya mai nofa, Deoso mai‑ya ati somawamebonane. Fare‑nima Yeso Kirisito ati dai nofa, Deoso dai‑ya ati somawamaharibonane.
37Yodeya‑ka yama tamine dai mitatekarini? Hibati‑ya i‑di Yowaho Batita mai‑ya habanirise, makobote Karireya‑kaya yama yanana, tamine dai mitahare awineni.
38Yeso Nasare‑ke tamine dai mite awane. Deoso ene Deoso‑ka Doni Yeso‑ya sawi, mai tabori dami‑ya toke, ene amose, kite, madi mai‑ya mai foya, Yeso ene madi mai kanana, mai kiyanamaro, mai kitamawahani.
39Yerosare, Yodeya na‑ya Yeso ene oda awa, awa‑ya mai baahikane, abe, oda awa nemarine.
40Amoni fama, amoni owa ohari ne‑ya Deoso hinakitame. Kitami oda awemarine.
41Mai nafi hiawi awire, oda‑ya Deoso kadikemata tamine oda kaminebona, oda‑ta oda awemarine. Hibati‑ya oda‑ka da‑daba, kitami oda awemarine. Oda eyehe tafe, faha‑ya fawa nemarine.
42Oda‑ya hiyare,
‘Owa tamine mai‑ya dai hiyarahi. Owati‑ya mai nofiya, sibaraboneni. Mai hasina mai toha, mai abamete mai toha, mai na, Deoso ene mai ihi okadikaboneni.’ Ati nemarine.
43Hibati‑ya Deoso ati‑ya mai mi‑mita‑mete Yeso tamine‑ya mai kanahanameteni. Ati mai hinofeya, Deoso mai‑ya ati somawamebona mai ati nameteni.” Bedoro ati nemonane.
Bara mai‑ya Deoso‑ka Doni sawi
44Bedoro mai‑ya hiyare, ati‑ya mai mita, Deoso‑ka Doni mai‑ya sawiwahane.
45Bedoro‑ya mai sawe, mai ibi hiyara,
“Ka! Deoso‑ka Doni Bara mai‑ya sawine. Bara mai‑ya Deoso‑ka Doni sawiterebona oda atibodi ati nani.” Mai ati namoneni.
46Homano mai toha, mai ati one‑ya Deoso‑ya mai kahiyara, mai ati‑ya Yodeo mai mita, Bedoro ati yanane,
47“Deoso‑ka Doni ai‑ya sawi, mai‑ya sawine. Mai ai habanirisahi.
‘Ai‑ya Yodeo mai ati bari awiraboneni.’ Owatibodi ati nineni.” Bedoro ati nemonane.
48Bedoro ati ene Yeso ati‑ya mai no‑nofa mai‑ya mai habanirisawahani. Bedoro‑ya Koneriyo mai haana,
“Oda tabaro‑ya tiwa amoni fa‑famaraba nahi.” Mai ati namoneni.
Одоогоор Сонгогдсон:
Yeso‑ka yo‑yose mai tamine 10: jaaNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
