Matai 21
21
1Vavwene vwu vahegelye mu-Jelusalemu vwu vatsisike mu Betipage vwu valotsitse kukidugala kya mono, pwu akavasuṅa avakongi va mwene vavili 2akata: Mbihage mbutsenge vulya mulolana navwo. Mwu nankatsihave ukulivona iligodovwe ilyu vaku ngile nilyana. Lyu nkavopole mungegele kunu. 3Ngave muvwene ujyunge umunu itsova ilinge pwu nkatetsage: Mańa unkuludeva ikulilonda, pwu nalatsihave ukuvapa. 4Tsitsitsi upwu tsipelaga pwu tsipelaga ukuta mwu tsitsilage itswu atsovaga uńamalago uvi atetsaga: 5Mumbule uminza Syoni mutetsage: Lola unkulude va vako ikwitsakwave undekedeke vuvule, itogile paligodovwe palyana lya lipimbasinu. 6Pwu avakongi vakavuka vakatsivomba itsu avalagye umwene. 7Vakaligega iligodovwe nilyana, vakatandika nisilundwa sya vene paligodovwe. Pwu umwene akatoga akatama. 8Avange avanu avongosu vakatandika isilundwa sya vene munzila avange vakadeńa amapagika ga mibiki, nagene vakatandika munzila. 9Pwu ikipuga kyoni navalongwe mbulongolo navakongaga mumbele vakupililanila ukwilanga vakata: Hosyana ńa-Ndaviti, aginivwagwe uvi ikwitsa mwitavwa lya nkuludeva! Hosyana kukyańa! 10Vwu itsikwingila mu-Jelulsalemu pwu vukahambuka uvutsenge vwoni. Vakavutsania vakata: Vi veni uju? 11Avene avagendaga nave ikipuga kyoni vakavavula vakata: Vi Jesu uńamalago va mu-Nasaleti mu-Galilai.
12Pwu UJesu akatsikwingila mwa Tempeli va Nguluve akavahumya voni avagutsaga navagulaga mwa Tempeli, nisitalati sya vene avananiaga indalama nisitamilo sya vagutsangundya akagwisa vuvule, 13Akavavula akata: Mańa livigilwe mwa kalata ilita: Ińumba jyango jitsovwagwa ukuva ńumba jya kwisajilamwo, uńe mujipelile ukuta mako jya vanambuda. 14Vwu ali mwa Tempeli pwu vakahegelela kumwene avabosu navidońolokaga. Umwene akavaponya voni. 15Avene avateketsi avavaha navamańakalata vwu vasivwene isidego isyu apelaga, vwu vavavwene avanu avilangaga mwa Tempeli avatetsaga: Hosyana vi ńa-Ndaviti! pwu gukavipa. 16Vakambutsa vakata: Vupulika itsu vitsova ava? Umwene UJesu akata: Ena ndipulika. Uńe namulivweni pakalata ilita: Vwigahye uluginyo mundomo nambanehe nambakumavele. 17Pwu akavaleka baho akahuma mbutsenge akabiha mu-Betanija, mwu akatsigona.
18Pavusiku vwu akilivwike ukubiha mu-Jelusalemu pwu akavona jivava inzala. 19Pwu akavona unkuju mpamato guli panzila. Pwu akatsilola akavona naguhupili iseke, pwugale amani gene. Pwu akagukotola akata: Lino nulahupe nitsinge iseke sikutsoni. Pwu unkuju gukumila baho vuvule. 20Vwu vaguvwene avakongi pwu vakata: Kwu kwuma kuki ṅani-ṅani unkuju ugu! 21Umwene UJesu akavavula akata: Jilweli-lweli ndikuvavula ndita: Ngave jilweli ndi nulwidiko ngave namukwinana mwitumbu mwańe, pwu nandapele kene ka ka nkuju aka, bako pwu nakyene ikidugala iki ngave mwitsova nakyo mwita: Toga vwitage muńanza, pwu ndavona kitoga kitsikitaga muńanza,. 22Syoni isyu ngave mudova vwu mukisaja ngave mwidike vuvule lwu lwidiko vwu mudova syu mukwupililaga vuvule syoni.
23Vwu atsisike mwa Tempeli vwu ali pakuvamańisa inongwa avanu, pwu vakahegelela kumwene avateketsi avavaha navańivaha avenekivumbuko kya vańa-Isilaeli vakambutsa vakata: Itsu vuvomba vuvombela maka maki? Veni akupye amaka aga? 24Umwene UJesu akanda akata: Leka nuńe ndivavutse ilinge ilimeńu, ndingave ndivwene lyu mumbulile pwu nuńe ndikuvavulaga amaka ugwu ndivombela tsitsitsi ukwu gahumile. 25Ulwakwotsa lwa Johani lwahumile ndaku? Nda lwahumile kukyańa, ndalwahumile kuvanu vuvule, ndeti? Pwu avene vakatsivulana vwu vikwegile vakatsita: 26Lola tungave twita lwahumile kukyańa pwu umwene alata, pwu mwale nakiki ukumwidika? Tungave twita lwahumile kuvanu vuvule, bako-ulwakuva tukuvadwada avanu ikipuga iki. Mańa voni vita UJohani ńamalago. 27Pwu vakatsikumwanda vakatsita: Bako natulumanili. Pwu namwene akata: Pwu nune nandikuvavula ukwu gahumile amaka ugwu ndivombela tsitsitsi.
28Ndeti uńe? Ujyunge umunu ale navaswambe vavili. Pwu akatsitsova nave umbaha akata: Vi nswambango bihaga lino nkilimila kyango ikya masilu kilya. 29Umwene akanda akata: Bako nandinogwa. Pambele untima gukapya pwu akabiha kwilima. 30Pwu udadajavo akatsitsova kundebe akatsikumbula lilyo. Vi akata: Ena nkuludeva, akavuja akatama. 31Vwu vavili ava atsikongile aliku itsu avasuṅaga udadajavo? Vakata ju ndongotsi. Pwu UJesu akavavula akata: Jilweli-lweli ndikuvavula ndita: Nava sangutsi navaligu vikuvalekelelaga uńe ukwingila kuludeva lwa Nguluve. 32Mańa upwu itsage kwane UJohani palya avavulage inzila jya vugolosu, pwu namwidike uńe. Avene avasangutsi navadala avaligu vamwidike. Uńe upwu mbavwene ukwidika pwu nagupili untima gwińo, nambihi pakumwidika nuńe.
33Ukwi ndivavule nikinge ikihwanihitso. Alikwo ujyunge umunu umwenevutsenge, vi akavyala ungunda gwa masilu, akata nuluvigo akavigila, akata nińumba jya kukamilamwo amasilu akajava, akata nulukonze lwa kugulolela akatsenga, akavikamwo navanu va kuvombela pwu akabiha kukilunga ikinge. 34Vwu gwitsile umwaka gwa masilu pwu akavasuṅa avakivaga avaku-tsikuntolela iseke tsa mwene tsa masilu kuvene avavombelaga. 35Avene avavombelamasilu vwu vakavibata avakivaga va mwene, ujyunge vakantova, ujyunge vakambuda, ujyunge vakamoma namaganga. 36Umwene akavuja akasuṅa avange avakivaga avongosu nakuvalya avalongwe ulwongotsi. Avene navene vwu vakagaha navo vuvule-vule. 37Ulwambele pwu akavasuṅila unswambe akata: Vikundwadaga unswambango. 38Avene avavombelaga amasilu vwu vambwene unswambe, pwu vakavulana vakata: Vi vi mwenevuhale uju, tsukwi tumbudage tuvetsage twi va pavuhale vwa mwene uvwe. 39Pwu vakamwibata, vakamumya mungunda gwa masilu vakatsikumbuda. 40Lungave lusiku angave itsile jujwa vi mwenengunda gwa masilu pwu alagaha ndeti navo avavombelamasilu ava? 41Avene vakata: Avanu avavivi ava alavabuda nalavalilile ikisa. Ugwene ungunda gwa masilu alavapyanihitsa avange avakuvombela amasilu ga mwene avikungegela iseke tsa mwene pamwaka gwa tsene. 42Umwene UJesu akata: Uńe namupavweni lusiku mwa kalata upwu ita: Iliganga ilyu valigilye avatsengańumba, lyu lyipelile ukuva lya kwitotekapwo ińumba jyoni. Vwu agahile unkuludeva ukulipela vuvule-vule, atye livetsage lya kudega uvwe vwu twilola. 43Pwu ndita: Uludeva lwa Nguluve lulańagwa kwańe, valapevwa avanu avihupa iseke tsa ndudeva. 44Uvi igwa piganga ili vi alatikińulwa. Uvi likumwikila lilyo vi lilantikinula vuvule. 45Avateketsi avavaha navapalisai vwu vapulike isihwanihitso sya mwene sisisi pwu vakasivona vakata ikututsova uvwe. 46Vakata tumwibate, mańa vakadwada kuvanu avalundamine ikipuga kyoni, ulwakuva vwu vatetsaga namalago umwene.
Одоогоор Сонгогдсон:
Matai 21: Kinga
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
New Testament in Kikinga © British and Foreign Bible Society, 1961.