MATEO 13
13
U quet t'aanil le máac cu paakalo'
(Mc 4.1-9; Lc 8.4-8)
1Ti' le kiino' jóok Jesús ti' le najo' ca j culaj tu jáal ka'anab. 2Tumen much'laj ya'abcach máaco'ob te tu'ux yano', Jesuse' j ooc cutal ti' jun p'éel cheem, ca j p'áat tuláacal le máaco'ob tu jáal le ja'o'. 3Ca tu ca'ansaj ti'ob ya'abcach ba'alo'ob ichil quet t'aano'ob, táan u ya'alic: Jun túul máaque' jóok pakal. 4Táan u paakale' dze'edzec ti' le i'inajo' j lúub tu tzéel le bejo', ca j taal le ch'íich'o'obo' ca tu lukajo'ob le i'inajo'. 5U láak jun jaatze' j lúub ti' tzekelo'ob tu'ux ma' ya'ab lu'um yani'; le i'inajo' séeba'an jóokic tumen ma' taam u lu'umili', 6ba'ale' le ca jóok le kiino' j tóoca'abi' ca j tiji' tumen mina'an u mootz. 7U láak le i'inajo' j lúub ich ki'ixo'ob, le ki'ixo'ob túuno' j ch'íijo'obe' ca tu pech'ajo'ob le paakalo'. 8Ba'ale' u láak jun jaatze' j lúub ti' ma'alob lu'um, ca j ichnaj ma'alob, yaan tu dzajo'ob ciento, u yichi' u láako'obe' sesenta, u láako'obe' treinta. 9Wa te'ex yaan a xiquine'exe' ¡U'uyajnene'ex!
U ba'ax o'olalil le quet t'aano'obo'
(Mc 4.10-12; Lc 8.9-10)
10Le aj canbalo'ob túuno' tu nadzajuba'ob ti' Jesuse' ca tu káat chi'ito'ob ti': Ba'ax ten táan a ca'ansic le máaco'ob yéetel quet t'aano'obo'. 11Jesuse' tu núucaj ti'ob: Ti' te'exe' Jajal Diose' cu dzáic a wojéelte'ex u ta'acbil ba'alo'ob u ajawil ca'an; ba'ale' ti' leti'obe' ma' dza'an u yojéelto'obi'. 12Tumen le máax yaan ti'e' cu dza'abal u láak ti'e', cu yantal túun u asab ya'abil ti'; ba'ale' le máax mina'an ti'e' tac le jun p'íit yaan ti'o' cu lukesa'al ti'. 13Le o'olal quin ca'ansico'ob yéetel quet t'aano'ob; tumen leti'obe' cu paacato'ob, ba'ale' cu p'áatal bey ma' tu yilico'obe'; cu yu'ubajo'ob, ba'ale' cu p'áatal bey ma' tu na'atico'obe', mix tu yu'ubico'ob. 14Beyo' cu dzo'ocpajal ti' leti'ob ba'ax tu ya'alaj aj bóobat Isaías:
Te'exe' tu jaajile' bíin a wu'uye'ex, ba'ale' ma' bíin a na'ate'exi'
tu jaajile' bíin a pacte'ex, ba'ale' ma' bíin a wile'exi'.
15Tumen u pucsi'ikal le máaco'oba' dzo'oc u chichtal, jach máacal u xiquino'ob yéetel muudzul u yicho'ob;
u ti'al ma' u paacato'ob yéetel yicho'ob, mix u yu'ubajo'ob yéetel u xiquino'ob, mix u na'atajo'ob yéetel u pucsi'ikalo'ob, mix u suuto'ob ti' teen u ti'al ca in dzaco'ob.
16Ba'ale' te'exe' qui' a wóole'ex, tumen ca paacate'ex yéetel a wiche'ex yéetel ca wu'uyaje'ex yéetel a xiquine'ex. 17Tu jaajil quin wa'alic ti' te'exe' ya'ab aj bóobato'ob yéetel ma'alob máaco'ob tu yóoltajo'ob u yilo'ob le ba'alo'ob ca wilique'ex te'exa', ba'ale' ma' tu yilajo'obi'. Tu yóoltajo'ob u yu'ubo'ob le ba'alo'ob ca wu'uyique'ex te'exa', ba'ale' ma' tu yu'ubajo'obi'.
Jesuse' cu tzolic u quet t'aanil le máac cu paakalo'
18U'uye'ex túun ba'ax u káat u ya'al u quet t'aanil le máac cu paakalo': 19Le máaxo'ob tu yu'ubajo'ob u tze'ecta'al u ma'alob péectzilil u ajawil ca'ano', ba'ale' ma' tu na'atajo'obe', beyo'ob le i'inaj j lúub tu tzéel le bejo'; cu taal kasilba'ale' cu lukesic le ma'alob péectzil j pa'ak tu pucsi'ikalo'obo'. 20Le i'inaj j lúub ti' tzekelo' leti' le máaxo'ob cu yu'ubico'ob le ma'alob péectzilo' yéetel cu kamico'ob yéetel qui'imac óolal, 21ba'ale' tumen mina'an u mootzo'obe' cu t'ililo'ob chéen dze'edzec kiin, le quéen u mukyajto'ob yaayaj óolal yéetel ch'a'apachtajil tu yo'olal le ma'alob péectzilo', cu lúubul u yóolo'ob. 22Le i'inaj j pa'ak ich ki'ixo'obo', leti' le máaxo'ob cu yu'ubico'ob le ma'alob péectzilo', ba'ale' cu sen tucultico'ob u ba'alo'obil le yóokolcaaba' yéetel cu tu'usulo'ob tumen le ayikalilo'. Tuláacal lela' cu cupic yiik le ma'alob péectzilo' yéetel ma' táan u cha'ic u yichanquil ti' le máaco'oba'. 23Ba'ale' le i'inaj j pa'ak ti' ma'alob lu'ume', leti' le máaxo'ob tu yu'ubajo'ob le ma'alob péectzilo' tu na'atajo'ob, yéetel cu dzáico'ob ich. Dze'edzeque' tu dzaj ciento u yich, u láako'obe' sesenta, u láako'obe' treinta.
U quet t'aanil le kaakas xíiwo'
24Jesuse' tu tzicbaltaj ti'ob le u láak quet t'aana': U ajawil ca'ane' bey je'el bix jun túul máac tu pakaj ma'alob trigo tu coole'; 25ba'ale' ca'aliquil tuláacal táan u wenelo'obe' j taal jun túul u aj p'eec u yuumil le coolo' ca tu pakaj kaakas xíiwo'ob ichil le trigoo' ca j bini'. 26Le ca j ch'íij le trigo ca yanji u yi'ije' ca j chíicpaj xan le kaakas xíiwo'. 27Le j palitzilo'ob túuno' j bino'ob u ya'alo'ob ti' u yuumil le coolo': Dzuul ¿ma' wa ma'alob le trigo ta pakaj ta coolo'? ¿tu'ux túun u taal le kaakas xíiwo'? 28U yuumil le coolo' tu ya'alaj ti'ob: Jun túul aj p'eec beet lela'. Le palitzilo'ob túuno' tu káat chi'ito'ob ti': ¿A káat ca xi'ico'on c joc le kaakas xíiwo'? 29Ba'ale' leti'e' tu ya'alaj ti'ob: Ma', tumen bic a joque'ex le trigo pa'ate' yéetel le kaakas xíiwo'. 30Asab ma'alob ca a p'ate'ex u múuch' ch'íijilo'ob tac tu kiinil le jocho'; le kiin túuno' bíin in wa'al ti' le j meyajo'obo'; mole'ex táanil le kaakas xíiwo', ca a beete'ex u cúucuchal u ti'al tocbil, cu dzo'ocole' líikese'ex le trigo tin ch'iilo'.
U quet t'aanil u neek mostaza
(Mc 4.30-32; Lc 13.18-19)
31Jesuse' tu tzicbaltaj ti'ob le u láak quet t'aana': U ajawil ca'ane' je'el bix jun p'éel u neek mostaza cu paakal tumen jun túul máac tu lu'ume'. 32Tu jaajile' leti' u asab chichanil ichil tuláacal le neeko'obo'; ba'ale' le quéen ch'íijique', cu asab nojochtal ti' le pakalo'obo' yéetel cu béeytal je'el bix jun cúul che'e, tac le ch'íich'o'ob cu taalo'ob u beeto'ob u ku'ob tu kabo'obo'.
U quet t'aanil le levadurao'
(Lc 13.20-21)
33Bey xan tu tzicbaltaj ti'ob le u láak quet t'aana': U ajawil ca'ane' je'el bix le levadurao', tu ch'a'aj u xa'akt jun túul co'olel yéetel óox p'éel u p'iisil harina u ti'al u beetic u líikil tuláacal le sacano'.
Ba'ax teen cu ca'ansaj Jesús yéetel quet t'aano'ob
(Mc 4.33-34)
34Jesuse' tu ya'alaj tuláacal le ba'alo'ob ti' le máaco'obo' yéetel quet t'aano'ob, mix ba'al tu ca'ansaj ti'ob wa ma' yéetel quet t'aano'obi'. 35Lela' j úuch u ti'al ca dzo'ocpajac ba'ax tu ya'alaj le aj bóobat le ca tu dzíibtaj:
Bíin t'aanaquen yéetel quet t'aano'ob;
bíin in wa'al ba'alo'ob ta'acanili' le ca j chu'unpaj yóokolcaabe'.
Jesuse' cu tzolic u quet t'aanil le kaakas xíiwo'
36Jesús túune' tu utzil túuxtaj le máaco'obo' ca j ooc ich naj, te'elo' tu nadzajuba'ob u aj canbalo'ob ti'e' ca tu ya'alajo'ob ti'; Tzol to'on u quet t'aanil le kaakas xíiw yanji te j coolo'.
37Jesús túune' tu ya'alaj ti'ob: U Paal Máac máax pakic le ma'alob trigoo'; 38le coolo' yóokolcaab. Le ma'alob trigoo' leti' le máaxo'ob yano'ob te j ajawilo', le kaakas xíiwo' leti' le máaxo'ob u ti'al kasilba'alo', 39le aj p'eec tu pakaj le kaakas xíiwo', kaasiba'al. Le joocho' u káat ya'ale' u kiinil u xu'ulul yóokolcaab, le máaxo'ob cun u molo'ob le joocho' leti' le ángelo'obo'. 40Bey je'el bix u mo'olol le kaakas xíiw u ti'al tocbil ti' káako', bey xan bíin úuchuc quéen xu'uluc yóokolcaab. 41U paal Máaque' bíin u túuxt u ángelo'ob u ti'al u molo'ob ti' u ajawil tuláacal le máaxo'ob cu beetico'ob u kebantal u láak máaco'obo', bey xan le máaxo'ob cu beetico'ob le kaaso'; 42u ti'al u pulo'ob ti' káak tu'ux cu yúuchul okol yéetel jach' coj. 43Le máaxo'ob cu beetico'ob ba'ax u káat Jajal Diose', yaan u léenbalo'ob tu ajawil u Taataob je'el bix u léenbal le kiino'. Wa te'ex yaan a xiquine'exe' u'uyajnene'ex.
U quet t'aanil le ayikalil muca'ano'
44U ajawil ca'ane' bey je'el bix jun p'éel ayikalil muca'an ti' lu'ume'. Jun túul máaque' cu caxantic le ayikalilo', cu dzo'ocole' cu ta'aquic tu ca'a téen tu cúuchil; chuup u pucsi'ikal yéetel qui'imac óolale' cu bine' cu conic tuláacal ba'al yaan ti'e', cu dzo'ocole' cu manic le lu'umo'.
U quet t'aanil jun p'éel perla ya'ab u tojol
45U ajawil ca'ane' bey xan je'el bix jun túul j coonol cu máan u caxant qui'ichquelem perlaobe'. 46Le quéen u caxant jun p'éel ya'ab u tojole' cu bine' cu conic tuláacal ba'al yaan ti'e', cu dzo'ocole' cu manic le perlao'.
U quet t'aanil u káanil chuc cay
47U ajawil ca'ane' bey xan je'el bix u káanil chuc cay cu pu'ulul ka'anabe' cu jóokesic tuláacal u jejeláasil cayo'ob. 48Le quéen chu'upuc le u káanil chuc cayo', le j chuc cayo'obo' cu jóokesico'ob jáal ja', te' túuno' cu cutalo'ob u yéeyo'ob le cayo'; cu dzáico'ob le ma'alob cay ti' xaaco'obe', le ma' paatalo' cu pulico'ob. 49Bey cun j úuchul tu xuul yóokolcaab: yaan u jóokolo'ob le ángelo'ob u jun páaycunt le máaxo'ob kasa'ano'obo', ti' le máaxo'ob utzo'obo', 50bíin u pulo'ob le máaxo'ob kasa'ano'obo' ti' káak tu'ux cu yúuchul okol yéetel jach coj.
Túumben ayikalil yéetel úuchben ayikakil
51Jesús túune' tu káat chi'itaj ti'ob: ¿Ca na'atique'ex wa tuláacal le ba'alo'oba'? Leti'obe' tu ya'alajo'ob: C na'atic Yuumtzil.
52Tu ya'alaj túun ti'ob: Jun túul u aj ca'anbesajil le a'almaj t'aano' le quéen u can u ba'alo'obil u ajawil ca'ane', cu kuchul béeytal je'el bix u yuumil jun p'éel naje', ti' le ayikalil yaan ti'o' u yojel u jóokes ba'alo'ob túumbentac yéetel ba'alo'ob úuchbentac.
Jesuse' cu bin Nazaret
(Mc 6.1-6; Lc 4.16-30)
53Le ca tu dzo'ocsaj Jesús u ca'ansic le quet t'aano'oba', j luk te'elo' 54ca j bin tu caajal, te'elo' jo'op' u ca'ansaj tu sinagogail caajo'. Le máaco'ob túuno' tumen jaka'an u yóolo'obe' tu ya'alajo'ob: ¿Tu'ux tu canaj le máac le ba'alo'oba'? ¿Bix u páajtal u beetic le chíiculalo'oba'? 55¿Ma' wa leti' u paal le aj póolche'o? ¿Ma' wa María u maamai'? ¿Ma' wa leti' u sucu'un Jacobo, José, Simón yéetel Judasi'? 56¿Ma' wa way caja'ano'ob xan ichilo'on u x ch'upul íidzino'obe'? ¿Tu'ux túun tu canaj tuláacal le ba'alo'oba'?
57Le o'olale' ma' tu dzaj u yóolo'ob ti'i. Ba'ale' Jesuse' tu ya'alaj ti'ob: Tuláacal máaque' cu yaabiltic jun túul aj bóobat, chéen ba'ale' ma' tu yaabilta'al tumen u yéet caajalo'ob mix tumen u yéet otochnáalo'ob.
58Ma' tu beetaj ya'ab chíiculalo'ob te'elo', tumen leti'obe' ma' tu yocsajo'ob u yóolo'ob ti'i.
Одоогоор Сонгогдсон:
MATEO 13: YUA04Ev
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Maya de YucatánTumben Nupt'an NT © Sociedad Bíblica de Mexico, 2004.