MWAMBĨLĨLYO 3
3
Kũvalũka kwa mũndũ
1Na ĩndĩ nzoka yaĩ nzeleke mũno kwĩ nyamũ o na yĩva ya kĩthekanĩ ĩla Yeova Ngai wombie. Na yamwĩa mũndũ mũka atĩĩ, Nĩ w’o, Ngai nĩwaisye, Mũtikaye ma mĩtĩ yonthe ya mũũndanĩ? #Mt 10.16; Ũvu 12.9; 20.2. 2Na ĩndĩ mũndũ mũka eea nzoka, Mosyao ma mĩtĩ ya mũũndanĩ nĩtũtonya ũya: 3ĩndĩ ũsyao wa mũtĩ ũla wĩ katĩ wa mũũnda, Ngai nĩwaisye, Mũĩkaye waw’o, o na mũikakiite, mũikese ũkw’a. #Mwa 2.17. 4Na nzoka yamwia mũndũ mũka, Mũikakw’a nongĩ: #2 Ako 11.3. 5nũndũ Ngai nĩwĩsĩ kana mũthenya ũla mũkaya waw’o, nĩvo mũkasalukw’a metho, nenyu mũkeethĩwa ta Ngai, mũkĩmanya ũseo na ũthũku. 6Na yĩla mũndũ mũka wonie kana mũtĩ nĩ mũseo wa ũya, na nĩ wa kwendeesya methonĩ, na nĩ mũtĩ wa kwendwa kwa kũĩvya mũndũ, atw’a ũsyao waw’o, aya; na ĩngĩ anenga mũũme, nake aya. #Osea 6.7; Alo 5.12; 1 Tim 2.14. 7Na masalukw’a metho moo me elĩ, mamanya nĩ athei; na matuman’ya matũ ma mũkũyũ, meeseũvĩsya ngũa. 8Na meew’a wasya wa Yeova Ngai aitambũka mũũndanĩ syũa yausya: na mũndũ mũũme na mũka wake meevitha katĩ wa mĩtĩ ya mũũnda Yeova Ngai ndakamone. #Yovu 31.33; Sav 139.1–12; Yel 23.23,24.
9Na Yeova Ngai eeta ũ mũndũ mũũme, amũkũlya, Ũĩva we? 10Nake asũngĩa, Nĩneew’a wasya waku mũũndanĩ, na nakĩa, nũndũ nyie nĩĩ mũthei; na neevitha. #Yovu 23.15. 11Nake amũkũlya, Nũũ ũkwĩie wĩĩ mũthei? Nũĩte wa mũti, ũla nakwĩaĩe ndũkaye? 12Na mũndũ mũũme asũngĩa, Mũndũ mũka ũla wanengie ethĩwe nakwa, nĩwe ũnengie wa mũtĩ, na naya. #Nth 28.13. 13Na Yeova Ngai akũlya mũndũ mũka, Ũndũ ũũ wĩkie nata? Na mũndũ mũka asũngĩa, Nzoka nĩngengie, na naya. 14Na Yeova Ngai eea nzoka, Nũndũ nĩwĩkie ũu, nũumanĩwe, we, kwĩ indo syonthe, na kwĩ nyamũ syonthe sya kĩthekanĩ; ũkaendaa na ĩvu, na ũkaĩsaa kĩtoo mĩthenya yonthe ya thayũ waku: #Isa 65.25; Mika 7.17. 15na ngeekĩa ũmaitha katĩ wenyu we na mũndũ mũka, na katĩ wa ũsyao waku na ũsyao wake: akatumba mũtwe waku, naku ũkatumba kĩtiinyo kyake. #Isa 7.14; Mt 1.23,25; Lk 1.34,35; Alo 16.20; Aka 4.4; Ũvu 20.1–3. 16Amwĩa mũndũ mũka, Ngaingĩvya mũno woo waku wa kũsyaa; woonĩ ũkasyaa syana; na kwenda kwaku kũkeethĩwa kwa mũemeu, nake akasumbĩka ĩũlũ waku. #Yoa 16.21; 1 Ako 11.3; Aev 5.22–24; Tito 2.5. 17Na amwĩa Atamu, Nũndũ, nĩweethukĩĩsye wasya wa mũkau, na ĩngĩ waya wa mũtĩ, ũla nakwĩaĩe, ngĩkwĩa, Ndũkaaye waw’o: nthĩ nĩumanĩwe nũndũ waku; ũkaĩsaa wayo woonĩ matũkũ onthe ma thayũ waku; #Mwa 5.29; Mũta 2.22; Alo 8.20–22. 18mĩw’a nayo na thangila ĩkakũmeesya; naku ũkaĩsaa nyũnyi sya mũũndanĩ; 19yuutĩanĩ ya ũthyũ waku ũkaĩsaa lĩu, kũvika yĩla ũkasyoka mũthanganĩ; nũndũ nĩvo waumiw’e: nũndũ wĩ kĩtoo, na nũkasyoka kĩtoonĩ. #Mwa 2.7; Yovu 34.15. 20Na mũndũ mũũme atw’ĩĩa mũka wake syĩtwa Eva; nũndũ nĩwe inyia wa onthe me thayũ. 21Na Yeova Ngai amaseũvĩsya Atamu na mũka wake ngũa sya mbũa, na amavw’ĩka.
22Na Yeova Ngai asya, Sisya, mũndũ nũtw’ĩkĩte ta ũmwe wa ithyĩ, kũmanya ũseo na ũthũku; na yu, ndakese kũtambũũkya kw’oko, ose wa mũtĩ wa thayũ naw’o, na kũya, na kwĩkalaa tene na tene— #Mwa 2.9; 3.5. 23kwondũ wa ũu Yeova Ngai amumya mũũndanĩ wa Eteni, aĩme nthĩ vala waumiw’e. 24Na ĩndĩ alũngya ũla mũndũ; na aia ngalĩ ya wumĩlonĩ wa syũa ya mũũnda wa Eteni Akeluvi, na ũlĩlĩnzĩku wa ũvyũ ũla weethyũũaa ngalĩko syonthe, kũsũvĩaa nzĩa ya mũtĩ wa thayũ. #Mwa 2.8; Sav 104.4; Aevl 1.7.
Одоогоор Сонгогдсон:
MWAMBĨLĨLYO 3: Mbivlia
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
