Йуһʼәнна 18
18
Гьртьна Иса
(Мәтта 26:47-56; Марԛос 14:43-50; Луԛа 22:47-53)
1Пәй ве хәбәрданерʼа Иса тʼәви шагьртед Хԝә дәрбази ԝи алийе нәԝала Ԛьдроне бу. Ль ԝе дәре бахчәк һәбу, Иса шагьртед Хԝәва кʼәтьне. 2Щьһуда жи йе кӧ ԝе нәмамийа Ԝи бькьра әԝ щи заньбу, чьмки Иса у шагьртед Хԝәва гәләк щара ль ԝе дәре дьщьвийан. 3Аԝа Щьһуда кʼомәкә әскәра у нобәдара хԝәрʼа жь алийе ферьси у сәрәкед кʼаһинада һьлдабу, бь фәнәра, агьр у чʼәка һатә ԝи щийи. 4Иса һәр тьшт заньбу кӧ ԝе чь бе сәре Ԝи, пешда чу у ԝанрʼа гот: «Һун ль кʼе дьгәрʼьн?» 5Ԝана ле вәгәрʼанд у готьне: «Ль Исайе Ньсрәте!» Иса готә ԝан: «ӘЗ ЬМ».
Щьһудайе кӧ нәмамийа Ԝи кьрьбу жи тʼәви ԝан бу. 6Гава гот кӧ: «ӘЗ ЬМ#18:6 Шьровәкьрьне бьн рʼеза Йуһʼәнна 8:58-да бьхуньн. !» сәр пьште чун у кʼәтьнә әʼрде. 7Һьнге Иса диса жь ԝан пьрси: «Һун ль кʼе дьгәрʼьн?» Ԝан гот: «Исайе Ньсрәте».
8Иса ль ԝан вәгәрʼанд у гот: «Мьн ԝәрʼа гот, кӧ Әз ьм. Аԝа һәгәр һун ль Мьн дьгәрʼьн, бьһельн бьра әвана һәрʼьн». 9Әв йәк бу ԝәки әԝ хәбәра ԝийә кӧ бәре готьбу рʼаст дәре: «Әԝед кӧ Тә данә Мьн, Мьн жь ԝан тʼӧ кәс ӧнда нәкьр»#18:9 Йуһʼәнна 6:39. .
10Һьнге Шьмһʼун-Пәтрус әԝ шуре кӧ перʼа бу кʼьшанд у авитә хӧламе сәрәккʼаһин у гӧһе ԝийи рʼасте пәканд. Наве ԝи хӧлами Малхо бу. 11Иса Пәтрусрʼа гот: «Шур текә ԛаве! Әзе чаԝа ԝе кʼаса кӧ Баве дайә Мьн вәнәхԝьм?»
Иса бәр сәрәккʼаһин
(Мәтта 26:57-58; Марԛос 14:53-54; Луԛа 22:54)
12Пәй ве йәкерʼа кʼома әскәра у сәрдаре ԝан у нобәдаред щьһуйа Иса гьртьн у гьредан. 13Пешийе Әԝ бьрьнә щәм Һәнане хәзуре Ԛәйафа. Ԛәйафа сәрәккʼаһине ԝе сале бу. 14Әва әԝ Ԛәйафа бу, йе кӧ щьһу ширәт кьрьбун у готьбу: «Һе рʼьнд ә, бьра йәк бона щьмәʼте бьмьрә».
Пәтрус Иса инкʼар дькә
(Мәтта 26:69-70; Марԛос 14:66-68; Луԛа 22:55-57)
15Шьмһʼун-Пәтрус у шагьртәки дьн пәй Иса дьчун. Әԝ шагьрт кӧ насе сәрәккʼаһин бу, тʼәви Иса кʼәтә һʼәԝша сәрәккʼаһин, 16ле Пәтрус дәрва ль бәр дери сәкьни. Паше әԝ шагьрте насе сәрәккʼаһин дәркʼәт у тʼәви дәргәһване хәбәр да, Пәтрус бьрә һьндӧрʼ. 17Һьнге ԝе щарийа дәргәһван жь Пәтрус пьрси: «Дьбә кӧ тӧ жи жь шагьртед Ви мәрьви йи?» Пәтрус готе: «На, әз ниньм».
18Ԝи чахи, һәԝа кӧ сар бу, хӧлам у нобәдара пе кʼомьре агьр вехьстьбун, сәкьнибун у хԝә гәрм дькьрьн. Пәтрус жи ль щәм ԝан сәкьнибу, хԝә гәрм дькьр.
Пьрса сәрәккʼаһин
(Мәтта 26:59-66; Марԛос 14:55-64; Луԛа 22:66-71)
19Һьнге сәрәккʼаһин жь Иса дәрһәԛа шагьртед Ԝи у һинкьрьна Ԝида пьрси. 20Иса щаб да у гот: «Мьн дьнйайерʼа ашкәрә хәбәр дайә, һәр гав кʼьништада ӧса жи пʼарьстгәһеда, кʼидәре кӧ һʼәму щьһу дьщьвийан һин дькьрьн. Мьн тʼӧ тьшт дьзива нәготийә. 21Тӧ чьма жь Мьн дьпьрси? Жь йед кӧ бьһистьнә бьпьрсә, кʼа Мьн ԝанрʼа чь готийә. Әԝ заньн Мьн чь готийә».
22Гава Иса әв йәк гот, нобәдарәки ль ԝьр сәкьни шәмаԛәк ль Ԝи хьст у гот: «Тӧ чаԝа щаба сәрәккʼаһин дьди?» 23Иса ле вәгәрʼанд у готе: «Һәгәр Мьн хьраб хәбәр да, хьрабийа Мьн бежә. Ле һәгәр Әз рʼаст дьбежьм, тӧ чьма Мьн дьхи?» 24Һьнге Һәнан Әԝ гьредайи шандә щәм Ԛәйафайе сәрәккʼаһин.
Пәтрус диса Иса инкʼар дькә
(Мәтта 26:71-75; Марԛос 14:69-72; Луԛа 22:58-62)
25Шьмһʼун-Пәтрус һе ль ԝьр сәкьни хԝә гәрм дькьр. Жь ԝи пьрсин: «Дьбә кӧ тӧ жи жь шагьртед Ԝи йи?» Әԝи инкʼар кьр у гот: «На, әз ниньм». 26Хӧламәки сәрәккʼаһин, жь хԝәхатийа ԝи, йе кӧ Пәтрус гӧһе ԝи пәкандьбу, же пьрси: «Нә бахчәда мьн тӧ тʼәви Ԝи дити?» 27Һьнге Пәтрус диса инкʼар кьр у ԝе дәме дик банг да.
Иса ль бәр Пилато
(Мәтта 27:1-2, 11-14; Марԛос 15:1-5; Луԛа 23:1-5)
28Ԝи чахи Иса жь щәм Ԛәйафа бьрьнә ԛәсьра ԝәли. Сәре сьбәһе зу бу у щьһу нәкʼәтьнә ԛәсьре, ԝәки хԝә ль гора әʼдәтед шуштьн-вәшуштьне нәһʼәрʼьминьн, кӧ бькарьбьн хԝарьна Щәжьна Дәрбазбуне бьхԝьн. 29Һьнге Пилато дәркʼәтә дәрва, һатә щәм ԝан у пьрси: «Һун Ви мәрьви чьда нәһәԛ дькьн?»
30Ԝана ле вәгәрʼанд у готьне: «Һәгәр Әԝ нә йәки зӧлмкʼар буйа, мә Әԝ нәдьда дәсте тә». 31Һьнге Пилато ԝанрʼа гот: «Һане һун хԝәха Ви бьбьн у ль анәгори ԛануна хԝә диԝана Ԝи бькьн». Щьһуйа ле вәгәрʼанд у готьне: «Изьна мә тʼӧнә кӧ әм тʼӧ кәси бькӧжьн». 32Әв йәка бу, кӧ әԝ готьна Иса бе сери, кӧ дабу фәʼмкьрьне, Әԝе чаԝа бьмьрә.
33Һьнге Пилато диса кʼәтә ԛәсьра ԝәли, гази Иса кьр у же пьрси: «Тӧ йи Пʼадше щьһуйа?» 34Иса ле вәгәрʼанд у готе: «Тӧ ве йәке хԝәха дьбежи, йан һьнәкед дьн бона Мьн тәрʼа готьнә?»
35Пилато гот: «Чьма әз щьһу мә? Мьләте Тә у сәрәкед кʼаһина Тӧ данә дәсте мьн. Тә чь кьрийә?» 36Иса щаб да у гот: «Пʼадшатийа Мьн нә жь ве дьнйайе йә. Һәгәр пʼадшатийа Мьн жь ве дьнйайе буйа, бәрдәстийед Мьне шәрʼ кьрана кӧ Әз нәкʼәтама дәсте щьһуйа. Ле пʼадшатийа Мьн нә жь ве дьнйайе йә».
37Һьнге Пилато жерʼа гот: «Ԝәки ӧса йә Тӧ пʼадша йи?» Иса щаб да у гот: «Тӧ хԝәха дьбежи Мьн кӧ: ‹Тӧ пʼадша йи›. Әз бона ве йәке бумә у бона ве йәке һатьмә дьнйайе, ԝәки бона рʼастийе шәʼдәтийе бьдьм. Һәр кәсе кӧ жь алийе рʼастийе йә, гӧһ дьдә дәнге Мьн».
38Пилато же пьрси: «Рʼасти чь йә?»
Диԝанеда һʼӧкӧме кӧштьне ль сәр Иса дәрдьхьн
(Мәтта 27:15-31; Марԛос 15:6-20; Луԛа 23:13-25)
Пәй ве пьрсерʼа, Пилато диса дәркʼәтә дәрва щәм щьһуйа у ԝанрʼа гот: «Әз тʼӧ нәһәԛийе Вида набиньм. 39Ле әв әʼдәте ԝә йә кӧ әз Щәжьна Дәрбазбунеда йәки гьрти бона ԝә бәрʼдьм. Һун дьхԝазьн кӧ әз бона ԝә Пʼадше щьһуйа бәрʼдьм?»
40Һьнге ԝан һе кьрә ԛирʼин, готьн: «Нә кӧ Ви мәрьви, ле Барабас бәрʼдә!» Барабас жи ԛачахәк бу.
Одоогоор Сонгогдсон:
Йуһʼәнна 18: KmrNTC
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Институт перевода Библии, 2000, 2011