Israelfɔ Ɩlʋ 45
45
Owie Ɔkatsia Ɩlʋ
Kora abi atosuna ɩlʋ ha ɩlʋ osunapʋ. Dimbisʋ-saprada ɔmɛ bɔ́pʋwa mʋ́. Ɔdwɛ-ɩlʋ.
1Ɩlakɩta mɩ ɩklʋn ánɩ́
nɔ́wanlɩn owie ɩwɩ ɩlʋ.
Mɩ ɔdandʋ bʋ ɔsa, fɛ atɔ ɔwanlɩnpʋ ɩbɩ.
2Nanain, ɔhaa má akɩlɛ ɔyasubi fɛ fʋ!
Asʋn ánɩ́ ɩbʋ anulɛ bɔ fʋ ɔnɔ.
Bulu layula fʋ brɛ fɛ́ɛ́.
3Otumipʋ, tsu fʋ ɔdayi tsan.
Kɩta fʋ numnyam pʋ́ fʋ iwiegyitɔ.
4Kɩta fʋ iwiegyitɔ, afʋkɔ yɔ nkpa.
Kɔ ha ɔnɔkwalɩ mʋ́a yilebwɛ pʋ́ ɩwɩasɩba.
Fʋ gyɔpɩ ɩlɛ fʋ ofula ɔwan.
5Fʋ mbɩn pɩɔnpɩɔn ifuti fʋ alupʋ klʋn,
ɔmá-ɔmá abʋba ɩwɩasɩ fʋ ansɩtɔ.
6Oo Bulu, fʋ owie-obia mɛ́ɛta ɛkɛkɛɛkɛ.
Ɔnɔkwalɩ gyi fʋ akɔnfra.
7Fʋtekle yilebwɛ. Lalahɛbwɛ mʋ́ a, fʋtekisi.
Mʋ́ sʋ fʋ Wie Bulu lada fʋ ofuli,
pʋ ansigyi bʋla fʋtɔ dʋn fʋ aba.
8Ohuam, pɩprɩ, ɔhɩɛn pʋ́ atɔ fanfan
ɩdɛ ɔfan wa fʋ atadɩɛ tɩntɩntɔ fanfaanfan.
Owie woyiá bɔpʋ srʋfɔ-ɩsɛn hɩhɩɛ mʋ́tɔ,
ndondo aná dɛ mʋ́tɔ tsia bʋ fʋ ɔdwɛ.
9Awie abi tsɩhɛ bʋbʋ fʋ akatɔ.
Ɔtsɩá owie detsia lɔwa Ofir sika#1 Aw. 9:28; 10:11; Hiob 22:24; 28:16 atɔ wanklaan, ɔlɩɩ fʋ gyɔpɩsʋ.
10Ɔtsɩ, kɩ, yaa asʋ afʋnu.
Tan fʋ abusuanfɔ pʋ́ fʋ sɩ woyisʋ,
11mɛnɩ owie ansɩ bégyi fʋ ɩwɩ.
Fʋ wie nɩ. Mʋ́ sʋ ba ɩwɩasɩ ha mʋ.
12Tirofɔ bɔ́sʋra atokiehɛ ba.
Ɔyɩtɔ ɩwɩ anyapʋ bɔ́pɔpɔ fʋ.
13Owie mʋ bi tsɩhɛ onumnyampʋ anfɩ tsie obutotɔ.
Ɔlɔwa atadɩɛ tɩntɩn ánɩ́ bɔpʋ sika pɛpɛ lʋ mʋ́.
14Ɔlɔwa atadɩɛ tɩntɩn ánɩ́ ɩhɩɛ bʋ akɩlɛ, bakpa mʋ bɛya owie amʋ.
Mʋ aba mbitebi bʋbuo mʋ.
15Ansigyi mʋ́a oseyee
bapʋkpa mʋ bɛya owie-woyitɔ.
16Nanain, fʋ abi yinhɛ bétsia fʋ asɩ́ mbiasʋ.
Fɛ́yaɩ amʋ́ awie ɔmá-ɔmátɔ.
17Bulu ɔbɛ́ha abi-aná fɛ́ɛ́ bɛ́kaɩn fʋ ɩdasʋ.
Ɩnɩ sʋ ɔmá-ɔmá bɛ́kanfʋ fʋ brɛ fɛ́ɛ́.
Одоогоор Сонгогдсон:
Israelfɔ Ɩlʋ 45: nko
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation