Крар 9
9
Шаул имандал атун
1-2Шаула Реббидин тилмизрин кьилел тӀурфан акъудзавай, ам абур яна рекьиз кӀанз хъиле кузвай. Шаулаз Шам шегьерда Исадихъ иман авунин рекье авай ксар – гьам итимар, гьамни папар – гъилер кутӀунна Ярусалимдиз хкиз кӀанзавай. И кар авун патал ада кьилин хахамдивай Шамда авай синагугриз чарар кхьин тӀалабна. 3Ам Шамдив агакьзавай рекье, садлагьана цава куькӀвей экуьни кьуд пата нур туна. 4Шаул чилел ярх хьана. Адаз вичихъ элкъвена рахазвай са ван хьана:
– Шаул, я Шаул, вуна Зун вучиз хурук кутазва?
5– Вун вуж я, я Агъа? – жузуна Шаула.
– Зун вуна хурук кутазвай Иса я, – жаваб гана ванци, – 6исятда къарагъна шегьердиз алад, ана вуна вуч авуна кӀандатӀа ваз лугьуда.
7Шаулахъ галай инсанар анал къах хьана амукьна, садавайни сивяй гаф акъудиз хьанач. Абуруз ван атана, амма акур кас хьанач. 8Шаул чилелай къарагъна, амма вилер ахъаяйла, ам затӀни такваз амукьна. Шамдиз ам гъил кьуна гъана. 9Пуд йикъан къене адаз затӀни акуначир, ада я тӀуьнни авуначир, я хъунни.
10Шамда Гьанани тӀвар алай са тилмиз авай. Адаз са карагун акуна. Адахъ галаз Ребби рахана:
– Гьанани!
– Гьай, Ребби, – лагьана жаваб гана ада.
11– «Дуьз» тӀвар алай куьчеда авай Ягьудан кӀвализ фена, ТӀарас шегьердай тир Шаул лугьудай кас хабар яхъ, ингье, ада дуьаяр ийизва, – лагьана Реббиди.
12Шаулаз вичин патав Гьанани лугьудай кас керематдин жуьреда атайди ва Гьананиди адан вилерал гъилер эцигна абур ахъа хъувурди карагна.
13– Я Ребби, – жаваб гана Гьананиди, – а касди Ваз талукьбуруз Ярусалимда авур писвилерикай заз гзаф ванер хьана. 14Ам иниз Ви ТӀвар кьур кьванди къазаматда твадай ихтиярар чӀехи хахамривай къачуна атанвайди я.
15– Алад! – лагьана Реббиди. – А кас Зи ТӀвар пачагьрин ва Исраилдинни маса халкьаррин арада машгьур авун патал За хкянавай алат я. 16Зи ТӀварцин патахъай вичи гьикьван азаб-азият чӀугвадатӀа За адаз къалурда.
17Гьанани фена, вичиз лагьай кӀвализ гьахьна. Ада Шаулал гъилер эцигна, лагьана:
– Шаул стха, вун иниз къведай рекье пайда хьайи Ребби Исади ви вилериз экв ахквадайвал ва вун Пак Руьгьдив ацӀудайвал зун ви патав ракъурнава.
18Гьа и арада Шаулаз вичин вилерилай перде алатай хьиз хьана, адан вилер ачух хъхьана. Ада, къарагъна, цик акахьун къачуна. 19Ахпа ада фу тӀуьна, адан чандиз такьат хтана.
Шаул Шамда
Шаул са шумуд юкъуз тилмизрихъ галаз Шамда хьана. 20Гежел тевгьена, ада синагугра Иса Аллагьдин Хва тирдакай вязер ийизвай. 21Адан ван хьайи вирида тажуб яз лугьудай:
– Ярусалимда Исадин ТӀвар кьурбур терг ийиз хьайиди гьам туширни? Ам иниз иманияр кьуна чӀехи хахамрин патав хутахиз атанвайди туширни?
22Шаулан вязер къвердавай къуватда гьатзавай. Иса Месигь я лугьуз субутариз, Шамда авай чувудриз ада лугьудай гаф тазвачир.
23Са кьадар вахт алатна фена, чувудри Шаул яна рекьин кьетӀна. 24Амма Шаулаз абурун чӀуру къастуникай хабар хьана. Абуру, ам яна рекьиз кӀанз, йифиз-юкъуз шегьердин варарихъ къаравулвал чӀугуна. 25Амма йифиз Шаулан тилмизри ам куткунда аваз шегьердин цлалай авадарна.
Шаул Ярусалимда
26Шаул Ярусалимдиз хтана, гьана ам тилмизрик акахьиз алахъна, амма абуруз адахъай кичӀе тир, ам имандал атунин чӀалахъ абур жезвачир. 27Барнабади адаз куьмек гана ва ам илчийрин патав гъана. Ада абуруз Шаулаз Шамдин рекье Ребби акурвал, Ребби адахъ галаз рахайвал ва Шаула Шамда викӀегьдаказ Исадин ТӀварцӀикай вязер авурвал ахъайна. 28Са кьадар вахтунда Шаул Ярусалимда иманийрин амадаг хьана, ада Реббидин ТӀварцӀелай викӀегьдиз вязер ийизвай. 29Ам юнан чӀалал рахадай чувудрихъ галаз гьуьжетра гьатдай. Гьавиляй абур ам рекьиз алахънай. 30Иман гвай стхайриз и кардикай хабар хьайила, абуру Шаул Кесар шегьердиз тухвана, анайни ТӀарасдиз рекье туна.
31Гьа и чӀавуз Ягьудатда, Галилейда ва Самариятда иманийрин кӀватӀалар патал ислягь йикъар алукьна. Пак Руьгьдин куьмекдалди кӀватӀалар мягькем, иманийрин кьадарни гзаф жезвай. Абуру Аллагьдикай кичӀе яз уьмуьр гьалзавай.
Эней сагъарун
32Уьлкве тирвал къекъвей Петру Месигьдиз талукь инсанрал кьил чӀугун патал Луьда шегьердизни атана. 33Ана Эней лугьудай са кас авай. Ам фалужди яна, муьжуьд йисан къене меселай къарагъзавачир. 34Петруди адаз лагьана:
– Эней! Иса Месигьди вун дири хъийизва. Къарагъ! Жуван месни кӀватӀ хъия.
Эней гьасятда къарагъна. 35Луьда шегьердинни Шарун арандин агьалийриз ам сагъ хъхьайди акурла, абур Аллагьдихъ элкъвена.
Табита
36Яфа шегьерда Исадихъ иман ийизвай са паб авай, адан тӀварни Табита, яни «Жейран» тир. Табитади гзаф хъсанвилер ийидай, кесибриз куьмекар гудай. 37Гьа и вахтунда ам азарди кьуна кьена. Адан мейит чуьхвена винеллай кӀвале эцигна. 38Луьда шегьер Яфадин патав гвай. Петру Луьдада ава лагьана ван хьайи тилмизри адан патав кьве кас ракъурна, минетдалди лагьана:
– Геж тавуна чи шегьердиз ша ман!
39Петру абурухъ галаз фена. Атана агакьайла, абуру ам винеллай кӀвализ тухвана. Ина вири хендедаяр атана адал алтӀушна. Абуру, чпиз Жейрана вичел чан аламай чӀавуз цвайи булушкаярни маса пекер къалуриз, шел-хвал ийизвай. 40Петруди абур вири кӀваляй акъудна, метӀер чилиз яна, дуьаяр авуна, кьенвайдахъ элкъвена, лагьана:
– Табита, къарагъ!
Табитади вилер ахъайна. Петру акурла, ам хкаж хьана ацукьна. 41Петруди адан гъил кьуна, адаз къарагъиз куьмекна. Ахпа ада хендедайризни Месигьдиз талукьбуруз эверна, чан ахкьалтнавай Табита къалурна. 42И кардикай вири Яфада хабар хьана. Гьавиляй гзаф кьадар инсанар Реббидихъ ийизвай имандал атана.
43Яфада Петру яргъалди амукьна, ана ам табагъар ийидай Симунан кӀвале хьана.
Одоогоор Сонгогдсон:
Крар 9: ЛезПК
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Институт перевода Библии, 2010-2024
