Buraambi 24
24
Bayudaaya bawaabila Paulo isi gafana Felikisi
1Lwanyuma lwe bifukhu biraano, umusaayi ufuura bukhulu Ananiya weekha i Kayisaliya, ni babaandi khu bakhulu n'umuundu ukuundi umunamakaambila umukanikhi naabi ulaangiwa Terutuulo. Baboolela gafana Felikisi bilomo bye khuwabila Paulo. 2Ne Paulo n'alaangibwa, Terutuulo waarakikha khuumuwaabila nga aloma ari: “Uwe lukoosi Felikisi, khulwoowo khwayikhala mu lukoosi, nilwe buraambi bwoowo bulayi, bibiindu bikali byaŋonewele mu linaambo lino. 3Bino byoosi khubifukiilila musaambo yoosi, ni mu bifwo byoosi nga khukhusiima naabi, uwe lukoosi Felikisi. 4Ne khulekha khukhwonakisila iwe imbuka yoowo ta, ikhuloomba lwe shiisa shoowo ukhureekelesekho khafwiiti.
5“Umusaani yuno khwamunyoolile nga umusaani umubi naabi, enyusa bisaayumba mu Bayudaaya boosi, babaali mu shiibala shoosi. Niye umuraangilisi we khatuuli khe Banazareesi. 6Naluundi akhakilekho khuukhola bye imbikho mu Lisaayilo lyeefwe Likhulu, nafwe khuryo khwamuwaamba, (khwakana khumukhalile kumusaango nga kamakaambila keefwe ni kaloma. 7Ne Lusiya umukhulu we liye, weetsa wamukhurusakho mu makhono keefwe ni kamaani, 8aryo walakila ari babamuwabila beetse is'uli). Ne iwe wamweene nga wamureebelesile, kane umanye khukhwaama is'ali ibyo byoosi byeesi khumuwabila.”
9Ni Bayudaaya boosi betubaasa khu Terutuulo nga baloma bari ibyo byoosi byeesi aloma byaba bya ŋali.
Paulo ewotsakho mu moni tsa Felikisi
10Ne lwanyuma nga gafana wameseele Paulo ari naye akanikhe, Paulo waaloma ari: “Musakhulu, lwekhuuba naamanyile ndi ubeele umukayi we linaambo lino khuumala kimiiko mikali, nase nekhoyele khukhwiwotsakho is'uli. 11Nawe wamweene nga n'ukane ushimanye, bifukhu sibifuura mwikhumi na bibili ta, khukhwaama nga ni naniina i Yerusalemu khukhwisaaya. 12Ne babaandu babambaabila sibanyoolakho nga ndi khukhaandisana n'umuundu yeesi mu Lisaayilo Likhulu ta, namwe nga ninyusa shisaayumba mu ntsu tsye khukhwisaayilamo namwe mu shiriimba ta. 13Namwe sibanyala khukhuntsuntsumilisa lwe bilomo byeesi bambaabiile ise is'uli ana ari ta. 14Ne shino ishibuula ndi ise nisaaya Wele we bakuuka beefwe, nga inondelela Intsila nibo yeesi balaanga bari iye bubeeyi. Naluundi ifukiilila byoosi bibyaronebwa mu makaambila ka Musa ni mu baŋoosi. 15Ndi ni khukhwiyikina mu Wele nga bano nabo babeene ni beyikina; indi ilibawo khulamukha khwe bakhosefu ni naabo babaakhali bakhosefu ta. 16Shikila mu bino byoosi, ikhakakho naabi khuuba ni kumwoyo kukhali ni kumusaango isi Wele n'isi babaandu ta.
17 #
Bur 21.17-28
“Lwanyuma lwe kimiiko mikalikho ni kyabirawo, ise natsya i Yerusalemu khuyilila babaandu be linaambo lyase babaali bataambi biwaanwa ni bibiwaanibwayo. 18Ni naba nga ikhola shino, banyoola mu Lisaayilo Likhulu nga namalile khukhola bye khukhwipyeluusa, nga mbaawo lituuli lye babaandu namwe khutabukha khwoosi ta. 19Ne Bayudaaya babaandi khukhwaama mu Asiya, abe nibo babaakhiile babeene khuuba ano khureera khuwaba khwawe, noola bali ni lomo yoosi khusiise. 20Namwe bano babeene babaali ano baakha baboola likaambila lyeesi ise nafuniaaka, nga ni baambonamo ise ni nemikha mu moni tse lukhobo lukhulu. 21#Bur 23.6Akhali shishiindu shitweela sheesi nalomela mu likono lye angaaki, nga nemile akari mu nibo ndi, ‘Ise ndi khukhalilwa kumusaango ni nanywe lwekhuuba ifukiilila ndi baafu balilamusibwa.’ ”
22Lwanyuma Felikisi uwaba wamanya bulayi bye Ntsila, wikalawo lubusano, nga aloma ari, “Nga Lusiya umukhulu we liye wetsile, kane ise ikhalewo bye kumusaango kwoowo.”
23Aryo walakila umusilikhale khuliindila ilala Paulo, ne nga amufukiilila khubakho ni lukoosi, ni khufukiilila basaale beewe khumwakaanisayo byakana.
Paulo nga ali mu moni tsa Felikisi ni Durusiila
24Lwanyuma lwe bifukhu bibyoolakho, Felikisi weetsa n'umukhasi weewe Durusiila, uwaba Umuyudaaya. Warumanisa ari balaange Paulo, wamuwuliilisa byaloma khu bilomo bye khufukiilila mu Kristo Yesu. 25Ne Paulo n'aba nga akanikha khubye bukwalaafu, khukhwiliinda bulayi, ni khubye shifukhu khweesi Wele alikhalilakho kumusaango, Felikisi warya naabi, nga aloma ari, “Ibyo bimala, ari unyala watsya. Nindiba nga nakhukanile, indikhurumanisa.” 26Ne lwekhuuba mu mbuka nyeneyo aba weyikinile ari Paulo kane amuweyo tsinusu khumukulilila, weloosela khumurumanisatsaka, ni khukanikhakho ni naye. 27Ne ni abirawo kimiiko kibili, Porukiyo Fesito weela mu bukhulu bwa Felikisi nga gafana. Ne Felikisi lwe khuukana Bayudaaya bamusiime, walekha Paulo nga ashiili mu mapuusu.
Одоогоор Сонгогдсон:
Buraambi 24: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.
