Mark 8
8
Yěsû a zə̂ pànə̀ nkaamə̀ nɨ̀kwàa
(Mat 15.32-39; Mrk 6.32-44; Mat 16.1-12)
1Amwuə mɨ̀njyə̂ mɨ̀ghu, àpùŋə̀ pə̀ənə̀ yè noʼnə a chi nshwatə̀ ka pə a ghobə nɨ àzwuumə̀ yè zɨghə̀nə. Yěsû a fuŋə̀ ɨ̀zùŋə̀ ndzùmə̀ ɨ̀pe nshwəŋə̀ ambo pobə lo, 2“Ngwə̀ nkoorə̀ mɨ̀lɨŋə̀ mɨ àpùŋə̀ pànə̀ zə̀, ntiinə pobə pə mə pə̀ənə̀ pɨ pobə njyə̂ ɨtarə ka pə a ghobə nɨ àzwuumə̀ yè zɨghə̀nə; 3ntə pəla ntsàa a ghobə lo pobə̂ lèrə̀ nɨ njyə̀ yi pobə pɨ kaanə̀ kuntə̀ a àlàŋə, mbə̀ʼnə pobə pɨ̀tse furə̀nə la ndyə̌ sàa.”
4Ɨ̀zùŋə̀ ndzùmə̀ ɨ̀pe kẅùə̀ ambo ze lo, “La mbə̀ʼə ŋwùə̀ a lòo mɨ̀zɨghə̀ lə ɨghə amwuə alyiʼə waakə zə lo zə̂ ndùnə̀ pànə̀ pə ghu?” 5Yěsû a pyiitə̀ a ghobə lo, “Nɨ̀ wə̀ nɨ ntsɨŋə̀ àpaanə̀ ɨshiʼə?”
Pobə kẅùə̀ lo, “Ntsɨŋə̀ sàmbaa.” 6A tyiʼə̀ nshwəŋə̀ ambo àpùŋə̀ pànə̀ za lo pobə nwuunə̀ a ɨ̀shyə̂. Nkwùə̀ nɨ pobə lə̀ nwuunə̀nə a ɨ̀shyə̂, a piinə̀ ntsɨŋə̀ àpaanə̀ za sàmbaa ŋŋâ a mɨyàa ambo Nẅùə̀, mbiʼtə̀ a zèrə ŋŋâ ambo ɨ̀zùŋə̀ ndzùmə̀ ɨ̀pe lo pobə ghàpə̀ ambo àpùŋə̀ pànə̀ za, pobə kɨ ngɨ̀rə̀ a lenə. 7Ɨ̀zùŋə̀ ndzùmə̀ ɨ̀pe lə̀ kɨ mbə nɨ pɨ̀mɨlyiʼə pɨ ɨ̀swuə̀ pɨ̀tse. Yěsû à lə̀ kɨ nchyâ mborə̀ aŋunə zèrə nshwəŋə̀ ambo ɨ̀zùŋə̀ ndzùmə̀ ɨ̀pe lo pobə̂ kɨ ngàpə̀ a zèrə ambo pànə̀ pɨ̀ghu. 8Ŋwùə̀ ntsùmə̀ à lə̀ zɨghə̀ ndzwurə̀. Pɨ lə̀ lyàa ɨ̀chepə̀ nɨ lə̀ kẅìnə̀nə a ɨ̀shyə̂ ndẅenə̀ mɨnkaamə sàmbaa. 9Pànə̀ nɨ pɨ lə̀ pənə a alyiʼə ghu lə̀ pə tsaʼa pànə̀ nkaamə̀ nɨ̀kwàa. 10Yěsû à lə̀ shwəŋə̀ ambo pànə̀ pa lo pobə̂ lèrə̀; ndzùŋə̀ nkwuunə̀ amwuə àkànwuʼə pobə ɨ̀zùŋə̀ ndzùmə̀ ɨ̀pe ndèrə̀ a pàa àlaʼà Dalmanutha.
Pɨ̀Farìsî tàʼà a nɨ zəənə̀ àlènə̀ ànwùə̀ ambo Yěsû
(Mat 16.1-4)
11Pɨ̀Farìsî pɨ̀tse lə̀ tô ntànkə̀ mɨ̀nwùə̀ pobə pɨ Yěsû ntàʼà lo nkwàʼnə̀ e, nshwəŋə̀ ambo ze lo, â ghɨ̀rə̀ àlènə̀ ànwùə̀ àtse nɨ a furə̀nə a nɨ̀pwuurə̀ pobə zəənə̀. 12Yěsû à lə̀ zhwùə̀ nɨ ɨ̀tɨ̀ŋnə̀, nshwəŋə̀ lo, “A ghɨ̀rə̀ àkə ɨ̀waanə̀ pànə̀ wə̀ tàʼà lo n̂nèrə̀ àlènə̀ ànwùə̀ yerə̀nə yerə̀nə? Ǹshwəŋə̀ tyìʼə̀ nkǔŋə nkuŋə ambo pɨghə lo ka àlènə̀ ànwùə̀ àtse a pə e ghu nɨ pɨ ghǎ nèrə̀ ambo ɨ̀waanə̀ pànə̀ wə̀.”
13Yěsû a lə̀ myàʼtə̀ a ghobə nkẅirə̀ nkwuunə̀ amwuə àkànwuʼə ntwuumə̀ ndèrə̀ a ndzìnə atəŋə yi.
Mbyə̌ àpaanə̀ pɨ̀Farìsî pobə yɨ̀ Heròdə̀
(Mat 16.5-12)
14Ɨ̀zùŋə̀ ndzùmə̀ Yěsû lə̀ lə̀ənə̀ a nɨ lòo àpaanə̀ àtse, la mbə nɨ taʼà ntsɨŋə̀ àpaanə̀ ndàʼà amwuə àkànwuʼə. 15Yěsû a lə̀ kwàtə̀ a ghobə nshwəŋə̀ lo, “Nɨ̀ zhìʼtə̀ a wɨghə mbə̀ʼə mbyə àpaanə̀ pɨ̀Farìsî pobə yɨ̀ Heròdə̀.”
16Pobə tyiʼə̀ nshwəŋə̀ a zə pobə nɨ pobə lo, “À wə̀ nshwəŋə̀ lə ntiinə ka pə̀ənə̀ pə wəənə̀ nɨ àpaanə̀.”
17Yěsû a zhyə̂ ànwùə̀ nɨ pobə lə̀ mənə nshwəŋə̀, mbyiitə̀ lo, “A ghɨ̀rə̀ àkə nɨ̀ tə nshwəŋə̀ lo ka nɨ̀ pə wɨghə nɨ àpaanə̀? Nɨ̀ pirə̀ a wɨghə tɨ zhyə̂, kə̀ zuʼù a laanə̀ àtwuə̀ pɨghə? Mɨ̀ntɨŋmə̀ ɨ̀mɨghə tɨ̀ŋnə̀? 18Nɨ̀ wə̀ nɨ ɨ̀myə̂ la ka mə zəənə̀ a wɨghə? Mbə nɨ mɨtugrə ka mə zuʼù a wɨghə? A ghɨ̀rə̀ àkə ka nɨ̀ kẅuumə̀ a wɨghə ànwùə̀? 19Njyə̂ nɨ ndə̀ piʼtə̀nə ntsɨŋə̀ àpaanə̀ za ɨtaanə̀ ŋŋâ ambo pànə̀ nkaamə̀ ɨtaanə̀ la, nɨ̀ lə̀ lyàa ɨ̀chepə̀ ndẅenə̀ mɨnkaamə mɨshiʼə?”
Pobə kẅùə̀ lo, “Mɨnkaamə ntsòbə̀ ɨpaa.”
20Yěsû a chi mbyiitə̀ lo, “Ǹkùmə̀ ndə̀ kɨ mbiʼtə̀ ntsɨŋə̀ àpaanə̀ za sàmbaa ŋŋâ ambo pànə̀ nkaamə̀ nɨ̀kwàa la nɨ̀ lyàa ɨ̀chepə̀ ndẅenə̀ mɨnkaamə mɨshiʼə?”
Pobə kẅùə̀ lo, “Mɨnkaamə sàmbaa.”
21Yěsû a pyiitə̀ ambo pobə lo, “Nɨ̀ pirə̀ a wɨghə tɨ zhyə̂ tə mbyàa tɨ̀tsòŋə̀?”
Yěsû a parə̀ a ɨ̀fə̀ a Betsedà
22Pobə lə̀ furə̀ ngə̀ nkwuunə̀ a Betsedà. Pànə̀ pɨ̀tse tô nɨ ɨ̀fə̀ ambo ze mbuʼù mbô lo Yěsû â pètə̀ e. 23Lenəla, Yěsû a lə̀ ẅìimə̀ àpô ɨ̀fə̀ wa pobə ze furə̀ ndèrə̀ a nɨ̀pwùnə nɨ àlaʼà. A lə̀ tẅùə̀ mɨ̀tẅuə̀ a ɨ̀myə̂ ze nnùŋə̀ mbô ɨ̀me aŋunə ze, mbyiitə̀ e lo, “Wə̀ zəənə̀ àzwuumə̀ àtse?” 24A pə̀ʼkə̀ àtwuə̀ e nnaŋə̀ nkẅùə̀ lo, “Ee, ndzəənə̀ pə̀ənə̀; la pobə pə tsaʼa mɨ̀tɨ̀ghə nɨ mɨ mə ngyìinə̀.”
25Yěsû a kẅirə̀ nnùŋə̀ mbô ɨ̀me aŋunə ɨ̀myə̂ mɨ ɨ̀fə̀ wa. A tsùŋə̀ nchi nnaŋə̀ ɨlyiʼə, ɨ̀myə̂ ɨ̀me zùŋə̀ nnyaʼkə̀, a pìʼnə̀ a nɨ zəənə̀ ɨlyiʼə. 26Yěsû a shwəŋə̀ ambo ŋònə̀ wa lo, â lèrə̀ a ntswùə̀ ndâ ze, nkwàtə̀ e nshwəŋə̀ lo, “Kò wə̀ chi nkwuunə̀ o amwuə àlaʼà.”
Pità a tiitə̀ a ŋònə̀ nɨ Yěsû à pənə ẅèrə
(Mat 16.13-20; Luk 8.18-21)
27Yěsû pobə ɨ̀zùŋə̀ ndzùmə̀ ɨ̀pe lə̀ lèrə̀ amwuə ɨ̀laʼà a pàa Kàsaryà Filipì; nkwùə̀ nɨ pobə lə̀ pyàanə àlàŋə, à lə̀ pyiitə̀ a ghobə lo, “Pànə̀ shwəŋə̀ lo mɨ̀ŋə̀ la ɨ̀wə̌?”
28Pobə kẅùə̀ ambo ze lo, “Pànə̀ pɨ̀tse shwəŋə̀ lo ghǒ Jònə ngàŋə̀ àŋâ àkẅiirə̀ nchyə, pɨ̀tse shwəŋə̀ lo a Elijah, pɨ̀tse shwəŋə̀ àzobə lo a taʼà ngàŋə̀ ntwuumə̀ Nẅùə̀ wa ghùtse.”
29A tyiʼə̀ mbyiitə̀ ambo pobə lo, “La nɨ̀ shwəŋə̀ àzɨghə lo mɨ̀ŋə̀ la ɨ̀wə̌?”
Pità a kẅùə̀ lo, “Ghò la Kristù.” 30Yěsû a kwàtə̀ a ghobə lo “Kò nɨ̀ shwəŋə̀ a ŋònə̀ nɨ m̀bənə ẅèrə ambo ŋònə̀ ɨ̀tse.”
Yěsû a shwəŋnə̀ mbə̀ʼə ngəʼə̀ nɨ ǎ zəənə̀ ghobə nɨ̀wɨghə̀ e
(Mat 16.21-28; Luk 9.22-27)
31Yěsû à lə̀ pìʼnə̀ a nɨ nèrə̀ ambo ɨ̀zùŋə̀ ndzùmə̀ ɨ̀pe tsaʼnə Moonə̀ Ŋwùə̀ à chyə̂ a nɨ zəənə̀ ngəʼə̀ noʼnə; pɨ̀lɨ̀ŋmə̂ pɨ àlaʼà pobə pɨ̀fò màʼà Nẅùə̀ nɨ pɨ̀nèrə̀ mbòomə pɨ̀Jew twuunə̀ e. Pɨ ghǎ zhwuutə̀ e, njyə̂ làŋə̀ ɨtarə â zhwuumə̀ a nɨ̀wɨghə̀. 32À lə̀ shwəŋə̀ ànwùə̀ zə̀ ngɨ̀rə̀ a tsùŋə̀ ndaanə̀ àtwuə̀ pobə. Lenəla, Pità a lə̀ lòo e mmìntə̀, mbìʼnə̀ a nɨ saʼà e. 33La nkwùə̀ nɨ Yěsû à lə̀ pə̀ŋə̀nə ndzəənə̀ ɨ̀zùŋə̀ ndzùmə̀ ɨ̀pe, à lə̀ saʼà a Pità nshwəŋə̀ lo, “Lòo a ndzùmə̀ mɨ̀ŋə̀ Satàanə̀! Ntiinə ka wə̀ pə o amwuə pàa Nẅùə̀, la mbə o pə amwuə pàa pànə̀ pɨ mɨsoŋə.”
34Yěsû à lə̀ zùŋə̀ nfuŋə̀ àpùŋə̀ pànə̀ za pobə ɨ̀zùŋə̀ ndzùmə̀ ɨ̀pe, nshwəŋə̀ ambo pobə lo, “Ŋònə̀ ɨ̀tse à tə mmə ntàʼà zùŋə̀ mə̀, a twuunə̀ mbɨ̀ŋmə̀ e, mbìʼì àtɨ̀ghə pànkə̀nə e ndzùŋə̀ mə̀, 35ntiinə ŋwùə̀ wa ntsùmə̀ nɨ à tàʼnə lo chwarə̀ a nɨ̀chyə̂mbyə̂ e à pɨ pî a ẅèrə, la ŋwùə̀ wa ntsùmə̀ nɨ à pɨ pî a nɨ̀chyə̂mbyə̂ e mbə̀ʼə mə̀ pobə ntwuumə̀ ghù ɨ̀shìʼnə̀ wa la, à pɨ chwarə̀ a ẅèrə. 36Mbə̀ʼə a yèmpə̀ a ŋònə̀ lə nɨ àkə, mbə̀ʼə a pə nɨ ɨ̀pwuumə̀ ɨ̀tsùmə̀ a àtwuə̀ ɨ̀shyə̂ la mbî nɨ̀chyə̂mbyə̂ e? 37Kə̀ mbə̀ʼə ŋwùə̀ a ŋâ lə àkə a nɨ lòo nkẅebə̀ a nɨ̀chyə̂mbyə̂ e? 38Ŋwùə̀ à tə pəla mbə nɨ ɨ̀sɨŋnə̀ mbə̀ʼə mə̀, kə̀ mbə̀ʼə ànwùə̀ nɨ ǹshwəŋə̀nə amwuə àtwuə̀ ɨ̀shyə̂ àfànə̀ pobə ngɨ̀rə̀ ɨ̀nwùə̀ tɨ̀pòŋə̀, yi Moonə̀ Ŋwùə̀ à ghǎ kɨ pə nɨ ɨ̀sɨŋnə̀ mbə̀ʼə e amwuə nkwùə̀ za nɨ à ghǎ kẅirə̀ tô pobə pəngèrə̀ pa nɨ pɨ laanə̀nə mmyàanə̀ amwuə àghuʼtə̀ Tǎ ɨghobə.”
Одоогоор Сонгогдсон:
Mark 8: pny
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Cameroon Association for Bible Translation and Literacy