Mark 4
4
Àshwəŋnə̀ nàanə nàanə mbə̀ʼə ɨ̀mbyə̀ ɨ̀pwuumə̀
(Mat 13.1-9; Luk 8.4-8)
1A lə̀ chi mbə amwuə yɨ̀tse nkwùə̀, Yěsû a pìʼnə̀ a nɨ nèrə̀ mɨ̀nwùə̀ a nɨ̀pwùnə atəŋə nchyə Galìlyə̂. Àpùŋə̀ pə̀ənə̀ nɨ a lə̀ shwatə̀nə nkamnə̀ e a lə̀ noʼò. A tyiʼə̀ nkwuunə̀ nnwuunə̀ amwuə àkànwuʼə amwuə atəŋə nchyə ghu, àpùŋə̀ pə̀ənə̀ a tyiʼə̀ ntəəmə̀ a mbwùnə mɨ atəŋə nchyə ghu. 2A lə̀ nèrə̀ a ghobə nɨ mɨ̀nwùə̀ mɨ̀noʼnə amwuə ɨ̀shwəŋnə̀ pɨ̀nàanə nàanə, nshwəŋə̀ lo:
3“Nɨ̀ zhwiʼtə̀! Ŋònə̀ ɨ̀tse a lə̀ pə ghu nfurə̀, ndèrə̀ a nɨ ghə̀ mmàʼà mbyə ɨ̀pwuumə̀. 4Tsaʼnə a lə̀ mənə mmàʼà ɨ̀pwuumə̀ amwuə ɨ̀swùumə la, pɨ̀tse lə̀ kẅìnə̀ a àlàŋə, pɨ̀sɨ̀ŋə tô ndyàa nkwurə̀. 5Pɨ̀tse kẅìnə̀ aŋunə ɨ̀shyə̂ nɨ àlàrə̀kə̀ nɨ̀ghòorə lə̀ pənə a ɨ̀sùmə ka àtɨ̀tsaʼa a noʼò e ghu. Mbyə ɨ̀pwuumə̀ ghu lə̀ zàŋə̀ nsaʼà ntiinə ka zèrə lə̀ mìnə̀ e a ɨ̀shyə̂. 6La nkwùə̀ nɨ nẅùumə̀ a lə̀ tânə, a lə̀ tòonə̀ ngẅàrə̀ ɨ̀pwuumə̀ zèrə zə ɨ zwuumə̀, ntiinə ka mɨŋaŋə ɨ̀mobə lə̀ mìnə̀ e a ɨ̀shyə̂. 7Pɨ̀tse lə̀ kẅìnə̀ amwuə alyiʼə ɨ̀shyə̂ àŋwàʼŋwaʼa. Àŋwàʼŋwaʼa zə a tyiʼə̀ nkoʼò ndyipə̀ aŋunə nsòpə̀ ngɨ̀rə̀ ka ɨ̀ chi ndzumə̀ e mɨ̀ntàamə. 8Ngẅàrə̀ ɨ̀pwuumə̀ ghu yɨ̀tse ɨ̀ lə̀ kẅìnə̀ aŋunə alyiʼə ɨ̀shyə̂ yè ɨ̀shìʼnə̀ nsaʼà, nkẅuə̀, ndzumə̀ mɨ̀ntàamə mɨ̀noʼnə. Yɨ̀tse lə̀ zumə̀ mɨ̀ntàamə mɨ̀ghumə̀ ɨtarə, yɨ̀tse zumə̀ mɨ̀ghumə̀ ntuurə̀, yɨ̀tse zumə̀ nkɨrə.” 9Yěsû a lə̀ lẅùutə̀ nshwəŋə̀ lo, “Ŋònə̀ nɨ à pənə nɨ mɨtugrə â zuʼù.”
Ɨ̀sùmə nɨ Yěsû à lə̀ shwəŋə̀nə ɨ̀shwəŋnə̀ pɨ̀nàanə nàanə
(Mat 13.10-17; Luk 8.9-10)
10Nkwùə̀ nɨ Yěsû à lə̀ pənə ze nɨ ze, pànə̀ pɨ̀tse nɨ pobə lə̀ pənə alyiʼə ghu, pobə ɨ̀zùŋə̀ ndzùmə̀ ɨ̀pe pa ntsòbə̀ ɨpaa lə̀ pə a nɨ̀pwùnə ze mbyiitə̀ e nɨ ɨ̀sùmə ɨ̀shwəŋnə̀ pɨ̀nàanə nàanə pə. 11Tsaʼnə pɨ lə̀ pyiitə̀nə e la, a shwəŋə̀ ambo pobə lo, “Nẅùə̀ a ŋâ mə a wɨghə nɨ àzhìʼtə̀ lo nɨ̀ zhyə̂ mɨ̀nwùə̀ mɨ lə̀əmə̀nə nɨ mɨ pənə mbə̀ʼə ànwùə̀ Nɨ̀fò e, la ngə̀ aŋunə pànə̀ pa nɨ ka pobə pə a ghobə a tɨ̀tɨ̀rə̀ pɨghə, pobə zuʼù ɨ̀nwùə̀ ɨ̀tsùmə̀ pə amwuə ɨ̀shwəŋnə̀ pɨ̀nàanə nàanə, 12njiilo,
‘mbə̀ʼə pobə naŋə̀ tə nnaŋə̀
la ndzəənə̀ ghobə apə̀,
nzhwiʼtə̀ tə nzhwiʼtə̀
la ndzuʼù a laanə̀ e àtwuə̀ pobə apə̀.
Ntiinə pobə tə zəənə̀ nzhyə̂ pobə tô ambo Nẅùə̀
a lə̀ənə̀ ɨ̀fànə̀ ɨ̀nwùə̀ pobə.’”
Yěsû a tiitə̀ ɨ̀sùmə àshwəŋnə̀ nàanə nàanə mbə̀ʼə ɨ̀mbyə̀ ɨ̀pwuumə̀
(Mat 13.18-23; Luk 8.11-15)
13Yěsû a pyiitə̀ a ghobə lo, “Ka nɨ̀ zhyə̂ a wɨghə ɨ̀sùmə àshwəŋnə̀ nàanə nàanə zanə? Nɨ̀ ghǎ tyiʼə̀ zhyə̂ ɨ̀sùmə ɨ̀shwəŋnə̀ pɨ̀nàanə nàanə pə lə ɨla? 14Mbyə ɨ̀pwuumə̀ wa a pyə̀ la àshwəŋnə̀ Nẅùə̀. 15Pànə̀ pɨ̀tse pə la tsaʼa mbyə ɨ̀pwuumə̀ nɨ ɨ lə̀ kẅìnə̀nə àlàŋə ndwuumə̀ la. Ngə̀ aŋunə pànə̀ pèrə pə, pɨ pəla mbyə̀ Àshwəŋnə̀ Nẅùə̀ zèrə zə amwuə mɨ̀ntɨŋmə̀ ɨ̀mobə, pobə zuʼù, Satàanə̀ a zùŋə̀ ntô nfuukə̀ a zèrə amwuə pobə. 16Pɨ̀tse pànə̀ tyiʼə̀ mbə tsaʼa mbyə ɨ̀pwuumə̀ nɨ pɨ pyə̀nə aŋunə alyiʼə ɨ̀shyə̂ àlàrə̀kə̀ nɨ̀ghòorə, tyìʼə̀ tsaʼnə pobə zuʼnə àshwəŋnə̀ Nẅùə̀ pobə kẅiirə̀ a zèrə nɨ nɨ̀ghaʼà, 17la ka a kwuunə̀ e mmìnə̀ amwuə pobə mbə̀ʼnə pobə zuʼnə ngẅìimə̀ aŋunə àtùmə nkwùə̀; la nkwùə̀ nɨ ngəʼə̀ pobə nɨ̀nyàŋə̀ a ghobə tônə mbə̀ʼə àshwəŋnə̀ Nẅùə̀ ghu pobə zùŋə̀ mbô mmyàʼtə̀ àpyiimə̀ àzobə. 18Pɨ̀tse pànə̀ pə tsaʼa mbyə ɨ̀pwuumə̀ za nɨ ɨ lə̀ kẅìnə̀nə amwuə àŋwàʼŋwaʼa, pèrə pə la pànə̀ nɨ pɨ zuʼnə ntwuumə̀ Nẅùə̀, 19la mɨ̀nwùə̀ amwuə àtwuə̀ ɨ̀shyə̂ ghobə ɨ̀kòŋnə̀ nkabə̀ pobə mɨ̀tse mɨ̀nwùə̀ nɨ pànə̀ pɨ mɨsoŋə kòŋə̀nə mɨ kwuunə̀ amwuə pobə nkorə̀ àshwəŋnə̀ a Nẅùə̀ ngɨ̀rə̀ ka ɨ zumə̀ e mɨ̀ntàamə. 20Pɨ̀tse pànə̀ tyiʼə̀ mbə tsaʼa mbyə ɨ̀pwuumə̀ za nɨ pɨ lə̀ màʼnə amwuə àpàbə a ɨ̀shyə̂ yè ɨ̀shìʼnə̀, pobə kẅiirə̀ ntwuumə̀ Nẅùə̀, mbyiimə̀ a ẅèrə ntyiʼə̀ ndzumə̀ mɨ̀ntàamə, pɨ̀tse zumə̀ mɨ̀ntàamə mɨ̀ghumə̀ mɨntarə, pɨ̀tse mɨ̀ghumə̀ ntuurə̀, pɨ̀tse nkɨrə.”
Làamə̀ àtwuə̀ aləŋə
(Luk 8.16-18)
21Yěsû a shwəŋə̀ ambo pobə lo, “Pɨ tə mbəla ntswuʼə̀ a làamə̀, nkwuunə̀ nɨ ẅèrə amwuə ndâ pɨ tə̂ pə a ɨ̀sùmə nɨ̀kwùʼə̀ kə̀ a nkɨ̀kwùunə? Ka pɨ tə̂ a ẅèrə la aŋunə aləŋə mbə̀ʼə pànə̀ tsùŋə̀ ndzəənə̀ ɨlyiʼə? 22Ka ànwùə̀ yè lə̀əmə̀nə àtse a pə e ghu nɨ ka a pə ghǎ furə̀ e a sàŋə̀; àzwuumə̀ àtsùmə̀ nɨ pɨ lə̀əmə̀nə zèrə a ghǎ furə̀ a ɨ̀myə̂ pə̀ənə̀. 23Nɨ̀ zhwiʼtə̀! Ŋònə̀ nɨ à pənə nɨ mɨtugrə â zuʼù.”
24Yěsû a chi nshwəŋə̀ ambo pobə lo, “Nɨ̀ zhìʼtə̀ aŋunə mɨ̀nwùə̀ nɨ nɨ̀ wa ndzuʼù; àzwuumə̀ za nɨ wə̀ mɨ̀nkə̀nə àzwuumə̀ amwuə ŋŋâ ambo ŋwùə̀ pɨ ghǎ kɨ mɨ̀nkə̀ la amwuə ŋŋâ ambo ghò chi kẅìʼnə̀. 25Ŋònə̀ nɨ à pənə nɨ àzwuumə̀, pɨ chi kẅìʼnə̀ a zèrə, la ŋònə̀ nɨ ka a pə e nɨ àzwuumə̀, mbaa pə mɨlyiʼə nɨ à pənə nɨ ẅèrə, pɨ kẅiirə̀.”
Àshwəŋnə̀ nàanə nàanə mbə̀ʼə mbyə ɨ̀pwuumə̀ nɨ pɨ pyə̀nə a zèrə ɨ̀ mə nkoʼò
26Yěsû a làŋə̀ nɨ mbyə̀ nshwəŋə̀ lo, “Ànwùə̀ Nɨ̀fò Nẅùə̀ a chyə̂ la tsaʼa ŋwùə̀ à ghə̀ mbyə̀ nkẅùə̀ amwuə ɨ̀swùumə, 27nkwùə̀ nɨ à lyə̂nə ndòo ndzwuə̀, nkẅùə̀ zə̀ ɨ̀ saʼà nkɨ nkoʼò la ka à zhyə̂ e tsaʼnə ɨ làŋə̀nə nkoʼò. 28Ɨ̀shyə̂ za nɨ pɨ pa mbyə̀ ɨ̀pwuumə̀ amwuə la, ɨ za ngɨ̀rə̀ ɨ̀pwuumə̀ koʼò, mbyə̀ mbìʼnə̀ nfuukə̀ ntòo, mbaatə̀ nɨ mɨfuə, mɨfuə tyiʼə̀ nfuukə̀ mɨ̀nkòʼrə nɨ mɨ ma ndẅùutə̀ ndzumə̀ mɨ̀ntàamə. 29Nkwùə̀ nɨ nkẅùə̀ ghu ɨ̀ tɨ̀ŋnə̀nə, a ghə̀ mbəʼə̀ a zèrə, ntiinə nkwùə̀ nɨ̀pəʼə̀ a zèrə ɨ̀ kùʼù.”
Àshwəŋnə̀ nàanə nàanə mbə̀ʼə mbyə àloonə̀
(Mat 13.31-32; Luk 13.18-19)
30Yěsû a chi mbyiitə̀ a ghobə lo, “Pɨ lə̀nkə̀ ànwùə̀ Nɨ̀fò Nẅùə̀ la aŋunə àkə? Pə̀ənə̀ lòo lə a zèrə àshwəŋnə̀ nàanə nàanə ngɨ̀rə̀ ɨ̀twuə̀ pə̀ənə̀ laanə̀? 31Ànwùə̀ Nɨ̀fò a Nẅùə̀ a chyə̂ la tsaʼa mbyə̀ àloonə̀ za nɨ ɨ kɨ̂nə ntsàarə̀ mbyə̀ ntsùmə̀ nɨ mbə̀ʼə pɨ pyə̀ a ɨ̀shyə̂; 32la pɨ pyə̀ mbyə̀ zèrə zə̀, ɨ kẅùə̀ ntyiʼə̀ mbə pə àtɨ̀ghə nɨ a faŋə̀nə ntsàarə̀ mɨ̀tɨ̀ghə mɨ̀tsùmə̀, ŋŋâ mɨ̀fàa mɨ̀ẅùunə nɨ pɨ̀sɨ̀ŋə tô korə̀ mɨ̀nkàanə̀ ɨ̀mobə nzhwùutə̀ a ghobə aŋunə.”
33Yěsû à lə̀ chwìitə̀ mɨ̀ntwuumə̀ mɨ̀noʼnə amwuə ɨ̀shwəŋnə̀ pɨ̀nàanə nàanə tsaʼa pèrə pə amwuə ndwuumə̀ nɨ mbə̀ʼə pobə zuʼù a ghobə apə̀. 34Ka à lə̀ mə nshwəŋə̀ e ànwùə̀ zə̀ ambo pànə̀ tɨghu à shwəŋə̀ pə amwuə àshwəŋnə̀ nàanə nàanə. La nkwùə̀ nɨ à nwuunə̀nə pobə ɨ̀zùŋə̀ ndzùmə̀ ɨ̀pe, a tsùŋə̀ ntiitə̀ a ghobə nɨ ɨ̀sùmə ɨ̀shwəŋnə̀ pɨ̀ghu ɨ̀tsùmə̀.
Yěsû a ghɨ̀rə̀ àghə̀ʼtə̀ a təəmə̀
(Mat 8.23-27; Luk 8.22-25)
35A pə a nkwə̌ njyə̂ ghu, Yěsû a shwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ̀ tô pə̀ənə̀ twuumə̀ ndèrə̀ a ndzìnə yì.” 36Ɨ̀zùŋə̀ ndzùmə̀ ɨ̀pe pa tyiʼə̀ mmyàʼtə̀ àpùŋə̀ pə̀ənə̀ za nkwuunə̀ ntsirə̀ a Yěsû amwuə àkànwuʼə, pobə pɨ pobə tyiʼə̀ mmə ntwuumə̀ ndèrə̀. Pɨ̀tse ɨ̀kànwuʼə lə̀ kɨ mbə ghu. 37Tsaʼnə pobə lə̀ mənə ntwuumə̀ la, àghə̀ʼtə̀ yè ɨ̀tɨ̀ŋnə̀ a pìʼnə̀ a nɨ làŋə̀ ngɨ̀rə̀ nchyə tyiʼə̀ mbə̀grə̀ nkwuunə̀ amwuə àkànwuʼə tə ntyiʼə̀ mmə ntàʼà lẅenə̀ a zèrə. 38La Yěsû à lə̀ nwùunə̀ e amwuə ɨmwuə àkànwuʼə za a ndzùmə̀ mmə ndyə̂ e nnùŋə̀ àtwuə̀ e aŋunə pyənkə̀ àtwuə̀. Ɨ̀zùŋə̀ ndzùmə̀ ɨ̀pe zhwemnə̀ e nshwəŋə̀ ambo ze lo, “Ɨ̀nèrə̀! Wə̀ nwùunə̀ ka kẅâ o la, ka zəənə̀ lo pə̀ənə̌ kwɨghə̀ amwuə àkànwuʼə zanə?”
39Yěsû a lòo a ɨ̀shyə̂ ntəəmə̀ nsaʼà àghə̀ʼtə̀ za, ntyiʼə̀ nshwəŋə̀ ambo nchyə ghù pə̀grə̀nə wa lo “Təəmə̀! Kò wə̀ chi mbə̀grə̀.” Fèrə̀ wa à lə̀ zùŋə̀ ntəəmə̀, ɨlyiʼə zhwemnə̀ nɨ tuʼu. 40Yěsû a pə̀ŋə̀ mbyiitə̀ ɨ̀zùŋə̀ ndzùmə̀ ɨ̀pe pa lo, “Nɨ̀ tô mbô la àkə? Ka nɨ̀ pə a wɨghə nɨ àpyiimə̀ ntɨŋmə̀?”
41Àkẅàrə̀ a kwuunə̀ a ghobə pobə tyiʼə̀ mmə mbyiitə̀ pobə nɨ pobə lo, “Ẅèrə wə̀ ŋwùə̀ à furə̀ lə̀ ɨghə? Nɨ̀ zəənə̀ ndwuumə̀ nɨ àghə̀ʼtə̀ pobə nchyə ghù pə̀grə̀nə zuʼnə̀nə e?”
Одоогоор Сонгогдсон:
Mark 4: pny
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Cameroon Association for Bible Translation and Literacy