Mark 15
15
Pɨ lòo a Yěsû ntô a mbyə̀ Palètə̀
(Mat 27.1-2, 27.11-14; Luk 23.1-5; Jòn 18.28-38)
1A lə̀ kɨ pə tyìʼə̀ a ngẅùʼə ngẅùʼə, pɨ̀fò màʼà Nẅùə̀, nɨ pɨ̀lɨ̀ŋmə̂, nɨ pɨ̀nèrə̀ mbòomə pobə Kansèrə̀ ntsùmə̀ shwatə̀ ndòo àkwàŋə̀, nkorə̀ mbô mɨ Yěsû ndòo e ngə̀ ŋŋâ ambo Palètə̀. 2Palètə̀ a pyiitə̀ ambo ze lo, “Ghò la ɨ̀fò pɨ̀Jew?”
Yěsû a shwəŋə̀ lo, “Wə̀ shwəŋə̀ a lenə.”
3Pɨ̀fò màʼà Nẅùə̀ lə̀ ẅìimə̀ a Yěsû aŋunə mɨ̀nwùə̀ mɨ̀noʼnə. 4Lenəla, Palètə̀ a kẅirə̀ mbyiitə̀ a Yěsû lo, “Ka wə̀ pə o nɨ ànwùə̀ àtse a nɨ kẅùə̀? Zuʼù ndwùnə̀ mɨ̀nwùə̀ nɨ pɨ pə nshwəŋnə̀ aŋunə ghò.”
5La ka Yěsû à lə̀ shwùʼə̀ e ànwùə̀ àtse. Ànwùə̀ zə̀ a tyiʼə̀ nkə̀ʼnə̀ a Palètə̀ ka mɨ̀zùŋə.
Pobə pyiimə̀ a nɨ zhwuutə̀ a Yěsû
(Mat 27.15-26; Luk 23.13-25; Jòn 18.39–19.16)
6À lə̀ pə mbòomə lo nkwùə̀ ɨ̀tsùmə̀ nɨ pɨ pənə ndzɨghə̀ a nɨ̀ghaʼà àlàŋə̀ mmyàʼtə̀, Palètə̀ a pə a nɨ fuukə̀ a taʼà ngàŋə̀ ɨ̀tsaŋə̀ nɨ pànə̀ pɨ̀ghu tàʼnə fuukə̀ e mmyàʼtə̀. 7A lə̀ pə nkwùə̀ ghu, ŋònə̀ ɨ̀tse nɨ nɨ̀linə̀ ɨ̀tse lə̀ pənə Barabbas à lə̀ pə amwuə pànə̀ nɨ pobə lə̀ kùmə̀nə ndumə nzhwuutə̀ pə̀ənə̀, pɨ chyâ a ghobə a ndâ ɨ̀tsaŋə̀. 8Nkwùə̀ nɨ àpùŋə̀ pànə̀ za lə̀ tônə nshwatə̀ mbìʼnə̀ a nɨ pyiitə̀ a Palètə̀ mbə̀ʼə mbòomə nɨ à wa mbyə̀ ngɨ̀rə̀ aŋunə pobə nkwùə̀ ɨ̀tsùmə̀ la, 9à lə̀ pyiitə̀ ambo pobə lo, “Nɨ̀ tàʼà lo nfuukə̀ a ɨ̀fò pɨ̀Jew ŋŋâ ambo pɨghə?”
10Palètə̀ à lə̀ pyiitə̀ a lenə la ntiinə à lə̀ zhyə̂nə lo à lə̀ ghɨ̀rə̀ àghə̀ʼnə̀ pɨ̀fò màʼà Nẅùə̀ kô a Yěsû ŋŋâ ambo ze. 11La pɨ̀fò màʼà Nẅùə̀ lə̀ pə̀ŋə̀ ɨ̀twuə̀ pànə̀ pa lo pobə̂ shwəŋə̀ ambo Palètə̀ lo â fuukə̀ pə Barabbas ŋŋâ ambo pobə. 12Palètə̀ a chi mbyiitə̀ ambo pobə lo, “Nɨ̀ kùmə̀ ntàʼà lo n̂gɨ̀rə̀ la ɨla nɨ ŋònə̀ wə̀ nɨ nɨ̀ wə̀ nfuŋə̀ nɨ ɨ̀fò pɨ̀Jew lə?”
13Pobə kyiinə̀ nɨ mɨ̀tɨ̀ŋnə̀ nshwəŋə̀ lo, “Kẅùumə̀ e aŋunə àtɨ̀ghə pànkə̀nə.”
14Lenəla Palètə̀ a pyiitə̀ ambo pobə lo, “Ngotə ànwùə̀ tɨ̀pòŋə̀ nɨ à ghɨ̀rə̀nə a àkə?”
La pobə chi nkyiinə̀ nɨ mɨ̀tɨ̀ŋnə̀ nshwəŋə̀ lo, “Kẅùumə̀ e aŋunə àtɨ̀ghə pànkə̀nə.”
15Nɨ ndwuumə̀ wə̀, Palètə̀ à lə̀ fuukə̀ Barabbas mmyàʼtə̀ a nɨ ghɨ̀rə̀ mɨ̀ntɨŋmə̀ mɨ pànə̀ pɨ̀ghu pòŋə̀. Lenəla ngɨ̀rə̀ pɨ kəʼə̀ a Yěsû, a tyiʼə̀ ŋŋâ e ambo pobə lo pobə kẅùumə̀ e aŋunə àtɨ̀ghə pànkə̀nə.
Pɨ̀soyì nyèŋə̀ a Yěsû
(Mat 27.27-31; Jòn 19.2-3)
16Pɨ̀soyì lə̀ lòo a Yěsû nkwuunə̀ amwuə àpùʼù a ntoʼò govɨnò, nfuŋə̀ pɨ̀soyì pɨ̀tsùmə̀ pobə tô nshwatə̀. 17Tsaʼnə pobə lə̀ tônə nshwatə̀ la, pobə lə̀ màʼà atsəʼə nɨ a lə̀ pùgrə̀nə mbàŋə̀ aŋunə ze, ntsùŋə̀ a tɨ̀làarə̀ pɨ̀kɨkobə ntuŋə̀ a àtwuə̀ ze. 18Lenəla, pobə lə̀ pìʼnə̀ a nɨ chàʼtə̀ e mmə nshwəŋə̀ lo, “Nɨ̀chyə̂mbyə̂ o â sàa mbǎ ɨ̀fò pɨ̀Jew!” 19Pobə lə̀ làŋə̀ nɨ mbyə̀ nkəʼə̀ àtwuə̀ e nɨ mbàŋə̀, ntẅùə̀ mɨ̀tẅuə̀ aŋunə ze nkẅiʼtə̀ a mbyə̀ nnyèŋə̀ e nshwəŋə̀ lo pɨ pə nsəəkə̀ e. 20Nkwùə̀ nɨ pobə lə̀ myàanə̀nə a nɨ nyèŋə̀ e, pobə lə̀ tsoʼò atsəʼə yè pùgrə̀nə mbàŋə̀ za aŋunə ze ntyiʼə̀ nkẅirə̀ mmàʼà ɨtsəʼə ɨ̀pe aŋunə ze ndòo e nfurə̀ lo ghə̀ kẅùumə̀ e aŋunə àtɨ̀ghə pànkə̀nə.
Pɨ kẅùumə̀ a Yěsû aŋunə àtɨ̀ghə pànkə̀nə
(Mat 27.32-44; Luk 23.26-43; Jòn 19.17-27)
21Ŋònə̀ ɨ̀tse nɨ nɨ̀linə̀ ɨ̀tse lə̀ pənə Shimùnə̀ mbə ŋwùə̀ Sìrenə̀ nkɨ mbə tǎ pɨ Àlèzandà pobə Rufùsə̀ à lə̀ furə̀ a àlaʼà mmə nkwə̂ kwuunə̀ amwuə mbòmpə àlaʼà, pɨ̀soyì kô e nyìimə̀ e lo â pìʼì àtɨ̀ghə pànkə̀nə Yěsû. 22Pobə lə̀ lòo a Yěsû ndèrə̀ a alyiʼə àtse nɨ pɨ lə̀ mənə nfuŋə̀ nɨ Golgotà, nɨ ɨ̀sùmə nɨ̀linə̀ tsɨ̀ghu ɨ̀ chyə̂nə mbə lo, “Alyiʼə àghòʼrə àtwuə̀.” 23Pobə lə̀ ŋâ e nɨ mɨ̀lùʼù mɨ̀tse nɨ pobə lə̀ nyàamə̀nə nɨ afuə àtse nɨ pɨ pa nfuŋə̀ nɨ myrrh, la Yěsû a twuunə̀ e a mèrə. 24Lenəla, pobə lə̀ kẅùumə̀ e aŋunə àtɨ̀ghə pànkə̀nə, mmàʼà ɨpirə mbə̀ʼə zəənə̀ tsaʼnə pobə̌ ghàpə̀ ɨtsəʼə ɨ̀pe a tɨ̀tɨ̀rə̀ pobə. 25Nkwùə̀ nɨ pɨ lə̀ kẅùumə̀ e ɨ̀ lə̀ pə a ngẅùʼə aŋunə pɨ̀nẅùumə̀ nɨ̀pwùʼə. 26Pobə lə̀ ŋwàʼnə̀ ànwùə̀ nɨ a lə̀ ghɨ̀rə̀nə pobə chyâ ɨ̀sàʼa àtwuə̀ ze mbaanə̀ a àtwuə̀ ze aŋunə àtɨ̀ghə pànkə̀nə lo, “Ɨ̀fò pɨ̀Jew”. 27Pɨ lə̀ kẅùumə̀ e nɨ pɨ̀zə̀ərə̀ pɨpaa a nɨ̀pwùnə ze. Taʼà a pə a pàa àpô ze yè zɨghə̀nə, ẅùə̀ a kɨ mbə a pàa àpô ze yè kẅàbə̀. 28[Lenəla, a lə̀ furə̀ ndẅenə̀ ànwùə̀ nɨ a pənə amwuə Àŋwàʼnə̀ Nẅùə̀ lo, “Pɨ lə̀ shaŋə̀ e amwuə ngàŋə ngɨ̀rə̀ ɨ̀nwùə̀ tɨ̀pòŋə̀”]. #15.28 Ka pɨ̀ ŋwàʼnə̀ e a zə̀ ànwùə̀ amwuə pɨ̀tse ɨ̀ŋwàʼnə̀.
29Pànə̀ nɨ pɨ lə̀ pənə ndàŋə̀ a àlàŋə lə̀ zòomə̀ e, nchyìʼə̀ ɨ̀twuə̀ ɨ̀pobə nshwəŋə̀ lo, “Lə̌ ghò wa nɨ wə̀ lə̀ shwəŋə̀nə lo wə̌ kùmə̀ Ndâ Mɨ̀shwàʼà Nẅùə̀ kẅirə̀ korə̀ a zèrə aŋunə njyə̂ ɨtarə! 30Tɨ̀tsòŋə̀, shwuʼə̀ aŋunə àtɨ̀ghə pànkə̀nə za nchwarə̀ ɨ̀pɨ̀ŋmə̀ o!”
31Lə kɨ mbə tsaʼnə pɨ̀fò màʼà Nẅùə̀ pobə pɨ̀nèrə̀ mbòomə lə̀ mənə nnyèŋə̀ a Yěsû nshwəŋə̀ lo, “À lə̀ chwarə̀ pànə̀ pɨ̀tse la mbə chwarə̀ e ɨ̀pɨ̀ŋmə̀ e apə̀. 32Tyiʼə̀ pə̀ənə̀ naŋə̀ ndzəənə̀ Kristù nɨ à pənə ɨ̀fò pànə̀ pɨ Israel â shwuʼə̀ aŋunə àtɨ̀ghə pànkə̀nə zə̀, zaʼà pə̀ənə̀ pòŋə̀ pyiimə̀ e!”
Pànə̀ nɨ pɨ lə̀ kẅùumə̀nə a ghobə pɨ pobə lə̀ kɨ nnyèŋə̀ e.
Nɨ̀wɨghə̀ Yěsû
(Mat 27.45-56; Luk 23.44-49; Jòn 19.28-30)
33Ndzùmə ɨ̀ lə̀ nàanə̀ àlaʼà àtsùmə̀ a nɨ pìʼnə̀ aŋunə pɨ̀nẅùumə̀ ntsòbə̀ ɨpaa ngə̀ mbyàa aŋunə pɨ̀nẅùumə̀ pɨtarə. 34Tsaʼnə pɨ̀nẅùumə̀ pɨtarə lə̀ kùʼnə̀, Yěsû a kyiinə̀ nɨ ngyə̀ ntɨ̀ŋnə̀ nshwəŋə̀ lo, “Eloi, Eloi, lema sàbatanì?” Zhyə̀ nɨ a pənə lo, “Nẅùə̀ mə̀, Nẅùə̀ mə̀, wə̀ waʼà mə̀ mbə̀ʼə àkə?”
35Pànə̀ pɨ̀tse nɨ pɨ lə̀ pənə a alyiʼə ghu lə̀ zuʼù nshwəŋə̀ lo, “Nɨ̀ zhwiʼtə̀, à ẅùə̀ nfuŋə̀ a Elijah!” 36Taʼà ŋwùə̀ ɨ̀ghobə ghùtse a zùŋə̀ nkɨ̀ɨrə̀ ngə̀ ntsùbə̀ a kùntsa amwuə mɨ̀lùʼù mɨ ŋwaŋnə̀nə ntuŋə̀ aŋunə nɨ̀twuə̀ nɨ àtɨ̀ghə, ntsàa ambo Yěsû lo â nyoŋə̀, nshwəŋə̀ lo, “Nɨ̀ pyabə̀ pə̀ənə̀ zəənə̀ lo Elijah ǎ tô shwuʼkə̀ e aŋunə àtɨ̀ghə pànkə̀nə zə̀ tə̂ a ɨ̀shyə̂ lo.”
37Yěsû à lə̀ kyiinə̀ nɨ ngyə̀ ntɨ̀ŋnə̀ ndzùŋə̀ nkwɨghə̀ e.
38Atsəʼə nɨ a lə̀ kànə̀nə amwuə Ndâ Mɨ̀shwàʼà Nẅùə̀ a lə̀ saanə̀ ɨ̀pàa ɨpaa, a nɨ furə̀ a àtwuə̀ mbyàa a ɨ̀sùmə. 39Àtwuə̀ pɨ̀soyì nɨ a lə̀ təəmə̀nə a mbyə̀ Yěsû a lə̀ zəənə̀ tsaʼnə Yěsû à kwɨghə̀nə, nshwəŋə̀ lo, “A nkǔŋə nkuŋə lo ŋònə̀ wə̀ à lə̀ pə Moonə̀ Nẅùə̀.”
40Pə̀ngyə̌ pɨ̀tse lə̀ kɨ ntəəmə̀ a ndyə̌ sàa mmə nnaŋə̀. Amwuə pə̀ngyə̌ pɨ̀ghu à lə̀ pə Màriyà nɨ à lə̀ furə̀nə a Magdalà, pobə Màriyà mǎ pɨ Jemə̀ ghu nkɨ̂ nɨ Josèsə̀ pobə Sàlomè. 41Pə̀ngyə̌ pə̀ lə̀ mə ndzùŋə̀ e ngyèmpə̀ e nkwùə̀ nɨ à lə̀ pənə a Galìlyə̂. Pɨ̀tse pə̀ngyə̌ pɨ̀noʼnə nɨ pobə pɨ Yěsû lə̀ koʼnə ntô a Yèrusalèmə̀ lə̀ kɨ mbə a alyiʼə ghu.
Pɨ tẅəŋə̀ a Yěsû
(Mat 27.57-61; Luk 23.50-56; Jòn 19.38-42)
42Tsaʼnə njyə̂ àlaʼà ɨ̀ lə̀ pənə ntô, a pə nkwùə̀ nɨ pɨ pa ntsùŋə̀ ɨ̀pwuumə̀ njyə̂ ɨ̀ laanə̀ mbə njyə̂ àlaʼà pɨ̀Jew, 43Jòsebə̀ ŋwùə̀ Àrəmàtyâ, nɨ à lə̀ pənə taʼà ŋònə̀ ngẅùunə amwuə Kansèrə̀ nkɨ mmə ntàʼà a nɨ kwuunə̀ ànwùə̀ Nɨ̀fò Nẅùə̀, à lə̀ ẅìimə̀ ntɨŋmə̀ ndèrə̀ ambo Palètə̀ mbyiitə̀ àkwuə̀ Yěsû. 44A lə̀ kə̀ʼnə̀ a Palètə̀ a nɨ zuʼù lo Yěsû à kɨ pəla nɨ à kwɨghə̀ mə. A zùŋə̀ nfuŋə̀ àtwuə̀ pɨ̀soyì nkɨrə mbyiitə̀ e lo, “Yěsû à kɨ pəla nkwɨghə̀ nkǔŋə nkuŋə!” 45Nkwùə̀ nɨ à lə̀ zuʼnə ambo àtwuə̀ pɨ̀soyì za lo à kwɨghə̀ mə, à lə̀ pyiimə̀ lo Jòsebə̀ â lòo àkwuə̀ Yěsû ngə̀ ntẅəŋə̀.
46Tsaʼnə Palètə̀ à lə̀ pyiimə̀nə la, Jòsebə̀ à lə̀ zwuunə̀ atsəʼə fuə, nshwuʼkə̀ àkwuə̀ za aŋunə àtɨ̀ghə pànkə̀nə ndyibə̀ amwuə atsəʼə fuə ghu ntẅəŋə̀ amwuə nɨ̀shyə̀ nɨ pɨ lə̀ shìʼnə aŋunə àlàrə̀kə̀ nɨ̀ghòorə, ntyiʼə̀ mbɨgrə̀ àpàpə̀ nɨ̀ghòorə nkumnə̀ a ntswùə̀ nɨ̀shyə̀ ghu. 47Màriyà nɨ à lə̀ furə̀nə a Magdalà nɨ Màriyà mǎ pə Josèsə̀ lə̀ zəənə̀ alyiʼə nɨ pɨ lə̀ tẅəŋə̀nə e ghu.
Одоогоор Сонгогдсон:
Mark 15: pny
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Cameroon Association for Bible Translation and Literacy