Эвел 1
1
Дюнья арайиз хуб
1Сифте Заанури завна жил арайиз хуру.
2Жил къайдасузди ва ичӀиди вуйи. КӀан ккадру штарин зиин мучӀушин алийи. Заанурин Рюгь штариин шуйи.
3Заанури гъапну: «Гъит, акв ибшри!» Ва акв шулу. 4Заануриз акв кьабул шулу ва думу мучӀушнахьан жара апӀуру. 5Заанури аквназ «йигъ» кӀуру, хъа мучӀушназ – «йишв». Хябяхъ шулу, хъа гвачӀин шулу: му сабпи йигъ вуйи.
6Заанури гъапну: «Гъит, штун кьялаъ ижмишин ибшри, ва ижмишну зиин али шид кӀанакк ккайи шидхьан жара апӀри». 7Заанури ижмишин апӀуру ва зиин али шид кӀанакк ккайи штухьан жара апӀуру. Ва гьаци гъабхьну. 8Заанури ижмишназ «зав» кӀуру. Хябяхъ шулу, хъа гвачӀин шулу: му кьюбпи йигъ вуйи.
9Заанури гъапну: «Гъит, завун кӀанакк ккайи шид саб йишваз уч ибшри ва гъит къурамат ккитӀибгъри». Ва гьаци гъабхьну. 10Заанури, къураматдиз «жил» кӀуру, хъа уч гъаши штариз – «гьюлер». Заануриз му кьабул шулу. 11Дугъу гъапи: «Гъит жили чрушин туври: тум айи укӀар ва бегьер тувру гьубкьу жюрейин гьарар». Ва гьаци гъабхьну. 12Жили чрушин хуру: тум айи гьубкьу жюрейин укӀар ва бегьер тувру гьубкьу жюрейин гьарар. Заануриз му кьабул шулу. 13Хябяхъ шулу, хъа гвачӀин шулу: му шубубпи йигъ вуйи.
14Заанури гъапну: «Гъит завун ижмишниин акв тувру мутмйир ишри. Дурари йигъна йишв жара апӀиди ва вахтар, йигъар, йисар улупиди. 15Гъит дурари завʼан акв туври ва жил аку апӀри». Ва гьаци гъабхьну. 16Заанури завуъ кьюб зурба акв тувру мутмйир арайиз хуру. Дугъу, йигъ тяйин апӀуз, ригъ арайиз хуру, хъа йишв тяйин апӀуз ваз арайиз хуру. Дугъу хядарра арайиз хуру. 17-18Заанури дурар, жилиз акв тувуз, йигъʼинна йишвʼин аьхювал апӀуз ва акв мучӀушнахьан жара апӀуз, завун ижмишниин дерккру. Заануриз му кьабул шулу. 19Хябяхъ шулу, хъа гвачӀин шулу: му юкьубпи йигъ вуйи.
20Заанури гъапну: «Гъит штар чӀивишнари ацӀри. Хъа жилин зиин зав вуйибси ничхрар тӀирхури ишри». 21Заанури гьюлерин зурба гьяйванатар, штуъ аьхючӀвеъ гьубкьу жюрейин чӀивишнар, ва хлинццар хьайи гьубкьу жюрейин ничхрар арайиз гъахи. Заануриз му ужуйи рябкъюру. 22Заанури гьамци кӀури дурар ужувлакк ккаъру: «Артухъ йихьай, артмиш йихьай, гьюлер ацӀай. Хъа ничхрари жил алабцӀри». 23Хябяхъ шулу, хъа гвачӀин шулу: йигъ хьубпиб.
24Заанури гъапну: «Гъит жили гьубкьу жюрейин чӀивишин хури: мал-къара, гьяшаратар ва гьубкьу жюрейин вягьши гьяйванатар». Ва гьаци шулу. 25Заанури гьубкьу жюрейин вягьши гьяйванатар, мал-къара ва аьхючӀвеъ гьяшаратар апӀуру. Заануриз му ужуйи рябкъюру.
26Заанури гъапну: «Ухьусир, Ухьуз ухшар айи адми апӀидихьа. Адмийи гьюлин балугъариин, завун ничхрариин, мал-къарайиин, вари жилиин ва вари гьяшаратариин агъавал апӀиди».
27Заанури, Чавсир, адми арайиз хуру,
Заанурсир Дугъу арайиз хуру;
Жилижви ва дишагьли арайиз хуру.
28Заанури, дурар ужувлакк ккаъну, кӀуру: «Артухъ йихьай, артмиш йихьай, жил алабцӀай, думу хиликк ккапӀай. Гьюлин балугъариин, завун ничхрариин ва жилин вари гьяйванатарин зиин агъавал апӀинай». 29Заанури гъапи: «Узу учвуз, жилиин алибкьан гьарсаб укӀан тум, ва тум айи гьарсаб гьарин бегьер хурагди тувназа. 30Хъа жилин гьяйванатариз, завун ничхрариз ва жан али гьарсаб жилин чӀивишназ Узу укӀан чрушин хурагди тувназа». Ва гьаци шулу. 31Заанури, Чав арайиз гъабхибдилан ул илбицуру – вари гизаф ужуйи вуйи. Хябяхъ шулу, хъа гвачӀин шулу: йигъ йирхьубпиб.
Одоогоор Сонгогдсон:
Эвел 1: ТабГК
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Институт перевода Библии, 2010, 2013, 2016, 2018, 2023
