Matiyu 3
3
Ruu Laa ɓɔɔ Yɔhana ɓɔɔ palɛ zang batizima ráng ɓɛɛ
(Mar 1:1-8; Luk 3:1-18; Yɔh 1:19-28)
1Ka diki kaɓa, Yɔhana ɓɔɔ palɛ zang batizima rǎng zang yee Laa ka waala Yahudi, diki diki. 2Kɔɔ zang tɔɔ, “Nɔɔ yaa vuu shi kpang manɛ ta, nɔ́ɔ kɔ̃sɔ yeti manɛ, ka ruu ɓɔɔ, kpanti roonang Laa a naabm tɔ ɓɛɛ.” 3Ishaya zang nyaa shonang Laa rang yee ka yuu Yɔhana keɓe kɔ, kɔɔyi tɔɔ,
“Zang tãa yee zang ɓɔɔ kagn,
rang yee Laa ka yeti waala tɔɔ,
Nɔɔ palɛ Kpanti Laa gbalang ta,
nɔɔ shiiri katɔ ɓororo.”
4Yɔhana hãa fɔ̃ɔrɔ ɓɔɔ zang palɛ nɛɛ shãngti vuu vaa ɓɔɔ zang ɓaa nɛɛ hòlòng ɓɛɛ, a ti mã guruji ka sang ɓiɓɛ. Vuu shaanang ɓiɓɛ ɓi zɔɔrɔ nɛɛ mii warɛ. 5A zang Urushalima nɛɛ zang Yahudi, nɛɛ zang ɓɔɔ ka tipi ɓɔɔ ka nyaa rang Urudung dɔɔli, ri alɛ ka bìí Yɔhana. 6Ri kɔɔrɔ Laa vuu shi kpang ɓarɛ, a Yɔhana palɛ ri batizima ka mii rang Urudung.
7Ɓu doo ɓɔɔ Yɔhana zi zang Farisi nɛɛ zang Saduki, ɓɔɔ ri alɛ̀ gaagaa nɛɛ wu naa pàlɛ̀ ri batizima hn ɓɛɛ, hɛ̃ɛ ri nɛɛ, “Rɛɛ pudi keɓe, ɓu wi kɔɔ nɔɔ nɛɛ nɔ́ɔ yúu jĩng dannang ɓɔ̀ɔ́ Kpanti Laa ɓɔɔ a kana naabm wiya? 8Nɔɔ palɛ vuu ɓɔɔ tusu zang nɛɛ nɔɔ kɔ̃sɔ yeti manɛ tɔ, nɔɔ yaa vuu shi kpang tɔ ɓɛɛ.
9“Nɔ́ɔ shing danggn manɛ nɛɛ nɔɔ naa wɔ jĩng dannang kaɓa katɔ, ka ruu ɓɔɔ, nɔɔ manɛ wujɛ Ibirayi ɓɛɛ kpang. N kɔɔ nɔɔ, Kpanti Laa zunung ɓɔɔ wu nwàngsɛ́ Ibirayi jaa nɛɛ tari kɔ ka tipi ɓee katɔ. 10Kãntang keɓe, zang ɓáa nyaa kãasãng tɔ ka dimbang laa, laa piti ɓɔɔ ra jaa tɔ̃ɔ kpang, zang dɔngnɛ zang tasɛ ka yeti waa.
11“N pàlɛ́ nɔɔ batizima m nɛɛ mii, ka ruu yeti ɓɔɔ nɔɔ kɔ̃sɔ ɓɛɛ. Zang ɓɔɔ a ka knti mɛɛ, ɓá m bannang katɔ, n daa naa ɓɔɔ n tu koodoo ɓiɓɛ kpang. Wukɔ naa palɛ nɔɔ batizima nɛɛ Suru Laa nɛɛ waa. 12Vuu ɓɔɔ wu hã́lɛ̀ vuu nɔng, kagn naa ɓiɓɛ, naa kòoró dadong ɓiɓɛ ditɔ, tɔ̀ɔ, wu kpalɛ jĩng vuu ɓiɓɛ ka bɔ̃nɔ, wu yaa gãrɛ ɓiɓɛ, wu dɔɔ nɛɛ waa ɓɔɔ ning ɓi kpang ɓɛɛ.”
Naa ɓɔɔ Yɔhana palɛ Yeesɔ batizima ka mii ɓɛɛ
(Mar 1:9-11; Luk 3:21-22; Yɔh 1:31-34)
13Ka diki kaɓa, Yeesɔ seepaa nɛɛ Galili, a ka rang Urudung, nɛɛ Yɔhana wu naa palɛ wu batizima. 14A Yɔhana kasɛ nɛɛ wu pàlɛ̀ Yeesɔ batizima kaa takpang. A hɛ̃ɛ Yeesɔ tɔɔ, “Ɓɔɔ mɔkɔ nɛɛ pàlɛ́ m batizima jong, mɔɔ nɛɛ nkɔ n pàlɛ̀ mɔɔ jong ya?”
15A Yeesɔ kasɛ wu nyaa tɔɔ, “Pàlɛ̀ m gbã̀ágbãa, tɔ̀ɔ vuu ɓɔɔ Kpanti Laa kɔɔyi, wu ɓee nyaa kati.” A Yɔhana naa kasɛ, palɛ Yeesɔ batizima kati.
16Ɓɔɔ Yɔhana pàlɛ̀ wu batizima hn, Yeesɔ nwang kaa nɛɛ mii, a lapa tantɛ kaa puunang, a zi Suru Laa shooro kaa naa koro, naa nwáng ka yuu ɓiɓɛ. 17Ri ti tãa yee nɛɛ lapa tɔɔ, “Wee jaa mɛɛ ɓɔɔ yeti mɛɛ kasɛ wu gbãng gbãng ɓɛɛ kɔ.”
Одоогоор Сонгогдсон:
Matiyu 3: mzmNT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust