Maatteeo 3
3
Irrioon Yõaannẽ Batitta
(Tigiil Maarko 1:1-8; ꞌLuuka 3:1-18; Yõaannẽ 1:19-28)
1Ma baa urutaa cĩ irkiꞌnyia ũgĩ, ikia irrioon Yõaannẽ Batitta horrwaa ꞌcĩ õdõhõhĩĩ kak looccaa cĩ ꞌJudeea. 2Baa irrioon nẽẽ nyeemuut ꞌcĩ aĩ, “Ũtũngteek ꞌthẽccanẽẽt cugguung nẽ oboddiaau hĩ Nyekuc, hĩnĩngĩtĩ aau habuccieet cĩnnĩ cĩ hẽẽtkujjieen ojoonu.” 3Baa Yõaannẽ Batitta baa õthõõth põrõvẽtaacĩ Iꞌthaia aĩ,
“Ẽggẽrẽny mõlõõhĩ cĩ eet umwa horrwaa ꞌcĩ õdõhõhĩĩ kak aĩ,
‘Ũkũmatteek ꞌgõõl cĩ Makayyiookto,
aanytĩk ꞌgõõl cĩnnĩ hũũlan.’ ”#Tigiil ꞌBuuk cĩ Iꞌthaia 40:3
4Baa ahimit Yõaannẽ ceremwa ꞌcĩg ẽhẽnytaa ĩmanĩĩ cĩg nyaakaalak nẽ ẽcẽb hadẽẽngõ. Baa ꞌgẽẽn cĩnnĩ ꞌgirooc hĩ loteec. 5Nĩngĩtĩ allũnganniaanĩ eeta cĩg ꞌJeruꞌthalẽmĩ hĩ cĩg looc cĩ ꞌJudeea vẽlẽk, hĩ cĩg unak cĩ hidioo cĩ ꞌJõrdanĩ vẽlẽk hiita hĩ Yõaannẽ, 6nẽ uduktaak ĩnõõnnõ ꞌthẽccanẽẽt cĩggĩĩng, nĩngĩtĩ aggamẽẽkĩ nẽẽ ĩhõõggõ baattithimo#3:6 Baattithimo: Aggam ẽẽtĩ baattithimo, hátĩ hẽtẽrẽtha ngaatĩ ũtũngẽẽhĩ nẽẽ ꞌthẽccanẽẽt cĩgĩnnĩg nẽ ẽlẽm Nyekuc. hidiowwaa cĩ ꞌJõrdanĩ.
7Ma baa acĩn Yõaannẽ Variꞌtheei hĩ Thadutheei#3:7 Variꞌtheei hĩ Thadutheei: Ĩĩn Thadutheei lothippit cĩ ꞌJudeei ꞌcĩg baag aꞌthũũnnĩ nyattal cĩ Mũũꞌtha aĩ aku nyattalĩ cĩ Mũũꞌtha hĩ Nyekuc. Baa hõllõngaa ẽlẽmĩ Thadutheei aajĩlẽẽt hĩ loriẽẽt nẽ tarĩ ũtũbũrĩt thõõth ꞌcĩ arũgnaanĩ eeta ꞌcĩg adaahito. Ĩĩn Variꞌtheei lothippit cĩ ꞌJudeei ꞌcĩg aꞌthũũnnĩ nyattal cĩ Mũũꞌtha nẽ ẽlẽmĩ thõõth ꞌcĩ arũgnaanĩ daakiaha tarĩ nẽ ẽlẽmĩ aajĩlẽẽt hĩ loriẽẽta. Tigiil Dtiicanĩ cĩg ꞌThooyyiahu 23:8. ꞌcĩg mẽẽlĩg ngaatĩ au aggamĩ baattithimo ho, ikia eggerenyeek ĩhõõggõ ĩĩnnĩk, “Niig eeta ꞌcĩg abaꞌthu aaut hĩ hũkaaꞌnya ho, nganĩ ꞌcĩ aduhaakuung ngagiit aĩ, iita baattithimooa, hátĩ iliittia ukẽẽnĩt ꞌcĩ hatĩ aku ho? 8Idticanit thooꞌthiok ꞌcĩg ẽtẽrꞌtha aĩ, ũtũngteehu niig ꞌthẽccanẽẽt cugguung dĩdĩ. 9Ma hammuku hainnu, ‘Haꞌnyaka nẽẽ naag baangeet cĩnaang Abũrahaamõ.’ Haduhaakuunga! Aga Nyekuci ngaatĩ ũũkcĩ biyyiẽẽn iccig hĩĩtõ lõhõlĩ cĩg Abũrahamĩ. 10Nẽẽthĩ ꞌyioko, ataadoothĩk mẽlẽẽhĩ correettaa cĩ heenu ẽlẽk. Eꞌngeddoothĩk hatĩ hẽẽt ꞌcĩ hõllõngaa õddõngta ꞌgẽẽn ꞌcĩ abũnnaa tuu nẽ udhuhoothĩk ꞌgwoyyiatõõ.
11“Haggameekuung naa baattithimo cĩ tũngẽẽnĩt cĩ ꞌthẽccaneetu maamĩ haaga, nẽẽthĩ, aku hatĩ eet umwaa ꞌcĩ ĩllõõannaa nganĩĩta, eet ꞌcĩ aitiõõ naa hõllõngaa hũũppani ngaatĩ hĩĩnnĩ appahaca cĩnnĩ nẽ hitilola caawa cĩgĩnnĩg. Aggameekuung hatĩ nẽẽ ngagiit baattithimo Loriiaa ꞌcĩ Ẽllẽẽmĩthĩ hĩ ꞌgwoyyia. 12Aꞌnyak nẽẽ hẽddẽm cĩ anyiitto attiaa cĩnnĩ. Aany hatĩ nẽẽ haal#3:12 Haal hĩ ngarrimo: Ĩthakꞌthoothĩk haala eet ꞌcĩg athĩhĩ thõõth cĩ Krĩstõ nẽ ĩthahithoothĩk ngarrimo, eet ꞌcĩg abũrĩ Krĩstõ. hilongana nẽ aarĩk ĩragawatõõ nẽ udduutik ngarrimo ꞌgwoyyiaa ꞌcĩ hõllõngaa adĩĩtĩ.”
Aggam Yeesu Baattithimo
(Tigiil Maarko 1:9-11; ꞌLuuka 3:21-22)
13Ma baa ho, ĩtĩngaayyia Yeesu looccaa cĩ ꞌGalileea ĩꞌthõng hõdõlan hidioo cĩ ꞌJõrdanĩ, hikia haggameek Yõaannẽ ĩnõõnnõ baattithimo. 14Aku nõõ hinnia abũrĩ Yõaannẽ ngaatĩ aggamẽẽkĩ ĩnõõnnõ baattithimo nẽ ĩĩnnĩk, “Nganiit ꞌcĩ occa aggameekaa nganĩĩt baattithimo, akuu hinnia nii hĩ nganĩĩta?”
15Ẽdẽcĩ hinnia Yeesu ĩnõõnnõ anneek, “Aꞌnyĩĩk nõõ haau hĩ ꞌyioko ho, hátĩ hĩdĩmanit thooꞌthiok vẽlẽk ꞌcĩg adiimmeet Nyekuci ngagĩĩt hidticanit.” Nĩngĩtĩ ẽlẽmmĩ Yõaannẽ ngaatĩ aggamẽẽkĩ ĩnõõnnõ baattithimo.
16Ngaanĩngĩtĩ aggamĩ Yeesu baattithimo ho, ikia ĩꞌngõtha nẽẽ maamĩ battaala. Ma nĩngaata noho, ẽdẽẽnyõthĩ hẽẽtkujjieen ngaatĩ abbuuhẽnĩ nẽ udtuuha Lori cĩ Nyekuci ngaatĩ alluucciakĩ ĩnõõnnõ, ꞌcĩ aaĩ hĩ bõllõõĩ hikia hiccioloonganĩ ĩnõõnnõ. 17Ma ho, õthõõtha mõlõõhĩ umwaa hẽẽtahujjieen ĩĩ, “Loholeec caannĩ ciee ꞌcĩ hamĩna, haccamanaa naa ĩnõõnnõ gẽrrẽẽt.”#Tigiil ꞌBuuk cĩ ꞌThianaattõ 22:2; Tegellwaanu 2:7; Iꞌthaia 42:1
Одоогоор Сонгогдсон:
Maatteeo 3: did
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Wycliffe Bible Translators, Inc., All rights reserved.