Génesis 6
6
Ɨwɨ pewa jeko kachiete reta wae
1Joko wi ɨwɨ pewa reta umbɨpɨ uñemoña jeta. 2Jayawe Tumpa taɨ reta uecha kuimbae reta tayɨ maepöra wae reta, jare uiparawo iyupe jae reta ipɨte wi uipota wae jae reta jembirekorä.
3Jayawe Tumpa jei: “Jokua tekowe amee wae mbaetɨta oï jaeño mái pewa rupi chupe reta, echa’ä jae reta ɨwɨ pewa retaño ko ramo. Jáeramo ameeta chupe reta jaeño 120 año ye,” jei.
4Jare jokua año reta rupi, jare joko wiwe wi, ime yepe amokue kuimbae reta tuichaete jare ipɨrätaete wae reta. Echa’ä Tumpa taɨ reta wɨreko kuñatái reta jare oa isambiaɨ reta. Jare jae reta uyeyapo kuimbae arakae wae reta imbaepuerete jare jeräkua opaete wae pe.
5Jare Tumpa uecha opaete wae jeko kachi jeiete ma ɨwɨ pe. Uecha kërái opaete wae ipɨayemɨngeta jekuaeño mbaembae kachi wae reño. 6Jáeramo Tumpa ipɨatɨtɨ kuimbae uyapo ramo, jare ipɨa osoro wae echa mbɨatɨtɨ rupi umae jae reta uyapo wae re. 7Jare Tumpa jei iyupe: “Ambaita ɨwɨ wi opaete ɨwɨ pewa reta ayapo wae. Ambaita opaete kuimbae jare kuña reta, mbaemɨmba reta, wɨra reta, jare ɨwɨ rupi uyewichɨ wae reta. Echa’ä chepɨatɨtɨ aï jae reta ayapo ramo,” jei iyupe. 8Erëi Tumpa uyerowia umae Noé re.
Noé uyapo chalana wasu
9Kua ko Noé rewa: Noé iko ambɨe ye ïru wae reta wi. Jae ko pëti kuimbae jupi wae jare jeko mbae wae Tumpa jowai. Jae uñemɨïru kawi Tumpa ndiwe. 10Noé ime wɨreko mbapɨ taɨ. Jae reta ko jee Sem, Cam, jare Jafet.
11Jare opaete ɨwɨ pewa reta iñerärose reta jare ikawi mbae waeño uyapo reta Tumpa jowai. Jare ɨwɨ tɨnee ikawi mbae wae peño. 12Tumpa umae ɨwɨ pewa reta re jare uecha opaete uyapo reta ikawi mbae wae. Opaete jae reta jeko kachiete ma. 13Jayawe Tumpa jei Noé pe: “¡Mase! Ambaita aï opaete ɨwɨ pewa reta,” jei. “Echa’ä ɨwɨ tɨnee oï ikawi mbae wae peño jae reta jeko pewa. Jáeramo ambaita aï opaetei jae reta jare opaete mbaembae ɨwɨ pe ñonoï wae wi,” jei chupe.
14“Jáeramo iyapo ndeyupe pëti chalana wasu ɨwɨra gofer#6.14 Ɨwɨra gofer ko pëti ɨwɨra ikawiete wae jare uyeka mbae wae. jee wae pewa. Chalana wasu japɨpe rupi iyapo o raɨ reta. Ipichɨ kawi chalana wasu opaete japɨpe rupi jare ikupe rupi ɨwɨra iyaɨsɨ ipomo wae pɨpe. 15Iyapo kuärái: 140 metro puku wae, veintidós metro y medio ipɨwasu wae, jare catorce metro ɨwate wae. 16Embɨyasoi kawi chalana wasu, jare emɨmbɨre opaete chalana wasu iyɨke rupi medio metro ɨwambɨ iáramo rupi tembipe jare ɨwɨtu pewarä. Iyapo pëtiño öke chalana wasu iyɨke pe. Jare iyapo japɨpe mbapɨ piso reta: pëti ɨwɨ kotɨ, ïruwe mbɨte pe, jare ïruwe ɨwate kotɨ,” jei Tumpa Noé pe.
17Tumpa jei wi chupe: “¡Mase! Che ambouta aï ɨporu wasu opaete ɨwɨ re ambái waerä opaetei ɨwɨ pewa reta tekowe onoi wae,” jei. “Jukuärái opaete wae umanota,” jei. 18“Erëi che ayapota pëti yemɨngeta ikawi wae nde ndiwe. Jare nde ndiketa neï chalana wasu japɨpe – nde, jare nembireko, jare nderaɨ reta jembireko rewe rewe nde ndiwe,” jei Tumpa chupe.
19“Nderuiketa wi pëti mbaemɨmba kuimbae jare pëti mbaemɨmba kuña opaete ambɨe ye ye mbaemɨmba reta wi ndiyandareko waerä jese reta chalana wasu japɨpe nde ndiwe,” jei. 20“Jayawe wɨra reta, jare mbaemɨmba reta, jare opaete ɨwɨ rupi uyewichɨ wae reta wi, opaete ambɨe ye ye wae reta mokui mokui rupi yuweruta nde neï wae pe ndiyandareko waerä jese reta awɨye waerä opa ukañɨ,” jei. 21“Jare embatɨ eupi opa mbae nunga nunga tembiurä wae pemaerä, jare mbaemɨmba reta pewarä, jare wɨra reta pewarä wi,” jei Tumpa Noé pe.
22Jayawe Noé uyapo opaete Tumpa jei chupe wae rupi.
Одоогоор Сонгогдсон:
Génesis 6: gnwPB
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Ethnos360 (New Tribes Mission). All rights reserved.
