Лук 6:1-26

Тэр нэгэн Амралтын өдөр, тариан талбайгаар дайран өнгөрч явахад шавь нар нь тариан түрүү шувтран авч гартаа цайруулан иджээ. Гэтэл фарисайчуудын зарим нь —Та нар чинь Амралтын өдөр хууль бусыг юунд үйлдэнэ вэ? гэхэд Есүс —Давид болон түүнтэй хамт байгсад өлсөхдөө юу хийснийг та нар уншаагүй гэж үү? Тэр Бурханы өргөөнд орж, зөвхөн тахилч нараас өөр хэн ч идэж үл болох тавиг талхнаас авч идсэн төдийгүй мөн нөхдөдөө өгсөн шүү дээ гээд, тэдэнд —Хүний Хүү бол Амралтын өдрийн ч Эзэн мөн гэлээ. Өөр нэгэн Амралтын өдөр Түүнийг синагогт орж, сургаалаа зааж байхад тэнд баруун гар нь хатангиршсан хүн байжээ. Фарисайчууд ба хуулийн багш нар Түүнийг буруутгах шалтаг олохын тулд тэр хүнийг Есүс, Амралтын өдөр эдгээх эсэхийг нь ажиглан ширтэж байлаа. Харин Тэр тэдний бодлыг мэдээд, хатангир гартай хүнд —Босоод, урагшаа гарч ир гэсэнд тэр босож урагшаа гарлаа. Есүс тэдэнд —Би та нараас асууя, Амралтын өдөр сайныг эсвэл ёрын мууг үйлдэх, амь аврах эсвэл амь хөнөөхийн аль нь хуульд нийцэх вэ? гээд, тэднийг бүгдийг нь тойруулан харснаа түүнд —Гараа сунга гэв. Тэр тэгсэнд гар нь зүгээр болсон байлаа. Харин тэд уур хилэнгээр дүүрч, Есүсийг хэрхэх талаар өөр хоорондоо ярилцацгаав. Тэр өдрүүдэд Есүс залбирахаар ууланд гарч, бүхэл шөнийг Бурханд залбирсаар өнгөрөөв. Өглөө болоход Тэр шавь нараа Өөр дээрээ дуудаад, тэднээс арван хоёрыг сонгон, элч нар гэж нэрлэв. Эдгээр нь Петр гэж нэрлэгдсэн Симон болон түүний дүү Андрей, Иаков, Иохан, Филип, Бартоломай, Матай, Томас, Алфайн хүү Иаков, Зеалот гэгдэх Симон, Иаковын хүү Иудас, урвагч болсон Искариотын Иудас нар болой. Тэгээд Тэр тэдний хамт уруудан бэлд бууж ирээд зогсов. Тэнд асар олон дагалдагч нар нь байсан бөгөөд бүх Иудей, Иерусалим, Тир болон Сидоны эрэг хавийн нутгуудаас ирсэн үй олон хүн Түүнийг сонсох бас өвчнөө эдгээлгэх гэж иржээ. Мөн бузар сүнсэнд тарчилсан хүмүүс ч илааршиж байлаа. Түүнээс хүч гарч, бүгдийг эдгээж байсан учир цугласан олон бүгд Түүнд гар хүрэхийг чармайн байв. Есүс шавь нарын зүг харцаа хандуулан —Ядуус та нар ерөөлтэй еэ! Бурханы хаанчлал та нарынх юм. Эдүгээ өлсөж буй та нар ерөөлтэй еэ! Та нар цатгагдах болно. Эдүгээ гашуудан уйлж буй та нар ерөөлтэй еэ! Та нар инээх болно. Хүний Хүүгээс болж хүмүүс та нарыг үзэн ядаж, гадуурхан, доромжилж, нэрийг чинь ёрын муу мэтээр үзэж үл ойшоох цагт та нар ерөөлтэй еэ! Тэр өдөр баярла, баясан цовхч. Юу гэвэл, харагтун, тэнгэр дэх шагнал чинь агуу билээ. Тэдний эцэг өвгөд эш үзүүлэгчдэд ч тэгж хандсан юм. Харин баячууд та нар золгүй еэ! Та нар тайвшралаа дүүрнээр хүлээн авсан. Эдүгээ цатгалан буй та нар золгүй еэ! Та нар өлсөх болно. Эдүгээ инээж буй та нар золгүй еэ! Та нар гашуудан уйлах болно. Бүгд та нарын тухай сайнаар ярих цагт та нар золгүй еэ! Тэдний эцэг өвгөд хуурамч эш үзүүлэгчдэд ч тэгж хандсан юм.