Амос 9
9
Израилийн сүйрэл
1Тахилын ширээний хажууд зогсож буй
Эзэнийг би харав.
Тэр “Босгуудыг нь ганхуулахын тулд
Баганануудын толгойг цохь.
Бүгдийнх нь толгой дээр тэдгээрийг эвд.
Үлдэгсдийг нь Би илдээр ална.
Оргогч нь үл зайлна,
Зугтагч нь эс мултарна.
2Үхэгсдийн орон уруу ухаад орсон ч
Мутар минь тэднийг тэндээс барина.
Тэнгэр өөд гарсан ч
Тэднийг би эндээс буулгана.
3Кармелын оргилд нуугдсан ч
Тэндээс би тэднийг хайн олж, барина.
Тэнгисийн ёроолд харцнаас минь өөрсдийгөө бас далдалсан ч
Тэнд Би могойд#9:3 нэгэн орчуулгад тэнгисийн мангас: Тэнгист аварга мангас амьдардаг бөгөөд бусад амьдын адил Бурханы хяналтад байдаг гэж үздэг байжээ. тушааж, тэр тэднийг хатгах болно.
4Дайснуудынхаа өмнө бас олзлогдон явсан ч
Илдэнд Би тушааж, тэр тэднийг тэнд хядах болно.
Сайны төлөө бус, харин хор хөнөөлийн төлөө
Мэлмийгээ Би тэдэнд чиглүүлнэ” гэж айлдав.
5Түг түмдийн Эзэн БУРХАН
Газарт хүрэх аваас газар нь хайлж
Газарт оршигч бүхэн гашуудаж,
Тэд бүгд Нил шиг босовч,
Египетийн Нил шиг эргэн бууна.
6Тэнгэрт дээд өрөөгөө баригч,
Тэнгэр огторгуйн суурийг дэлхий дээр тавигч нь,
Тэнгисийн усыг дуудаж,
газрын гадаргуу дээр асгагч нь
Тэр билээ.
Түүний нэр бол ЭЗЭН билээ.
7“Израилийн хөвгүүд ээ,
Миний хувьд та нар Етиопийн хөвгүүдтэй адил биш гэж үү?” гэж
ЭЗЭН тунхаглаж байна.
“Би Израилийг Египетийн нутгаас,
Филистчүүдийг Кафтораас,
Арамчуудыг Кирээс авчраагүй гэж үү?
8Харагтун, нүгэлт хаанчлал дээр
Эзэн БУРХАНы мэлмий байдаг.
Би түүнийг газрын гадаргаас устгах болно.
Гэсэн ч Би Иаковын гэрийг бүрмөсөн устгахгүй” гэж
ЭЗЭН тунхаглаж байна.
9“Учир нь, харагтун, Би тушааж байна.
Буудайг шигшүүрээр шигшдэг лугаа адил
Израилийн гэрийг бүх үндэстний дунд
Би сэгсрэх болно.
Гэвч нэг ч хайрга газарт унахгүй.
10Миний ард түмний доторх бүх нүгэлтэн,
«Гай зовлон биднийг нөмрөхгүй, бидэнд учрах ч үгүй» гэж хэлэгсэд
Бүгд илдэнд үхэх болно.
Давидын хаанчлалыг сэргээнэ
11Тэр өдөр Давидын нурсан асрыг Би босгож,
Цөмөрхийнүүдийг нь шавж битүүлнэ.
Балгаснуудыг нь босгож,
Эртний өдрүүдийнх шиг нь дахин барина.#Үйл 15:16–18
12Ингэснээр тэд Едомын үлдэгсдийг болоод
Нэрээр минь дуудагдах бүх үндэстнийг өмчлөх юм” хэмээн
Үүнийг үйлдэгч ЭЗЭН тунхаглаж байна.
13ЭЗЭН тунхаглаж байна.
“Харагтун, газар хагалагч нь хураагч хүнд,
Усан үзмийн худалдаачин үр таригч хүнд ойртох үед
Уулс амтат дарсыг дуслуулж,
Толгод бүр уусах өдрүүд ирж байна.
14Би олзлолоос Израиль түмнээ эргүүлж,
Нуранги хотуудыг тэд дахин босгож амьдрах болно.
Усан үзмийн төгөл тарьж,
Дарсыг нь уун цэцэрлэгүүдийг байгуулж,
Жимсийг нь идэх болно.
15Би бас тэднийг газар дээр нь тарина.
Миний тэдэнд өгсөн газраас
Тэд дахин сугалагдахгүй” гэж
Бурхан ЭЗЭН чинь айлдаж байна.
Одоогоор Сонгогдсон:
Амос 9: АБ2013
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ariun Bible © Mongolian Union Bible Society 2013.