Лука 3
3
Глава 3
Иоанн Хэвкигри хотарагаддан
1Мян тунӈилатан анӈаннан тэгэмэр Тиберий ӈунэмэчиддэкэн, ок-ка Понтий Пилат Иудеяла бэгэрэддэкэн, Ирод дыгитэн бэгэнтэн#3:1Дыгитэн бэгэнтэн – здесь: четвертовластник, тетрарх. Галилеяла бисэкэн, аканни-нян Филипп – дыгитэн бэгэнтэн Итурея, Трахонитидала-да бисэкэн, Лисаний-нян – дыгитэн Абилена бэгэнни бисэкэн, 2дюлэгэл хиргэмӈэл Анна, Кайафа-да бисэкэтэн, тарав анӈану ониӈагла Хэвки Иоану, Захария хуттон, таимканин. 3Нян Иоанн Иордан чэлэлин төрэӈнин гиркавачидилрин, эйдувэн бэилбу эридилрин, мэрур хэвкигдэтэн, төнӈэкичитэн-дэ аталабдан, мөлэ мэрур авдатан. 4Пророк Исайя дукундулан эчин дукуттан: «Иркамӈа дылганни ониӈагла исни: Хунӈит хотарӈан хотарлилра, дюгармаган ӈунэмэч овкалра, 5авлар-да гудалбадатан, урэкчэр, хөпкэчэр-дэ тобэмкулбэдэтэн, кяваӈил-да хотарал ӈунэлбэдэтэн, мукалрапчил хоторал булдатыл одатан: 6таракам кубэч төрлэ инил бэил Хэвки айчириван итчир».
7Иоанн хэвкигнэрилтэки бэилтэки гөвэттэн:
– Дябда балдавканчанни! Ӈи хуну хупкурин биннэдук милэндук аибаннавусан? 8Айдитач хэвкигриннэвур аю овканчадюр уталукалра! Эмэкэнтэкэн мэркэсэл эчин мулгатта: «Мут Авраамач амантарап», – хунтэки гөнэм, Хэвки эдук-тэ дӫлдук Авраам хурэлгэн хутэлбэвкэндин. 9Укал тобар хякита ӈиӈтэн анчиндулан дэсчин: хякитав, аю исунмэю этыв балдавкатты, чикиватта, нян тогла дурдэн улэвэттэ.
10Бэил-нян ноӈман улгэмритэн:
– Яв-нян бу некчиру?
11Иоанн ноӈартакин барагрин:
– Ӈи-ккэ дӫрди урбаклаттан, тарак ач урбаклаттыду гяӈи бөдэн; ирэк-кэ деплэӈэлкэн, тачинда бөритматтан.
12Тамам чакачимӈал#3:12Тамам чакачимӈал – здесь: сборщики налогов. тачинда хэвкигдэвур эмритэн, нян ноӈман улгэмритэн:
– Хупкучимӈэ! Яв-нян бу некчиру?
13Ноӈан ноӈартакитан баргуттин:
– Хунду бөннэвутэн ойдэлин хулэку эмэкэн гасчир.
14Кусимӈэл-дэ ноӈман улгимиритэн:
– Яв-нян бу некчиру?
Нян Иоанн ноӈартакитан гөнин:
– Ӈив-дэ эмэкэн осэйрэ, ӈив-дэ эмэкэн олэкчир, нян мэр таманнадюр-такан бигрэӈэсэн.
15Чэлэн бэил алачиддакатан, эйдучэндюр-дэ мэргэндюр чэлэдин Иоам мулгачиддакатан, эсни-нян Христос эрэк бис, 16Иоанн эйдуткин барагрин:
– Би хуну мөч хэвкиггөттэм, тарбач миндук Эӈидьмэр эмэддэн, тарак унтан дялипкиррон-да мин эннэву онелгэӈэ, Ноӈан хуну Хиргэптыч Хирань, тогач-та хэвкигдин. 17Ноӈан эрунни ӈаллан бисни, нян Ноӈан мэн эдэмкэчидеки тэсчин, тадук-нян пшеницав нэкулэй чакчин, эмэпчэв-нян пшеница ораттон этич хиврэ тогач дурутчин.
18Унэт хояв гэрбэтэӈу бэилтэки ноӈан аю мэтуттин, таралбу хупкутникэн. 19Нян дыгитэн бэгэн Ирод, мэн акми атикаӈдулин Иродиадали Иоанду усалтавкамча, хөнтэли-дэ эйдулин кэнелич овканчалий, 20унэт тарак ойдэлин усу хаврин: Иоам хинючакла тэгукэнин.
Иисус Христос хэвкидекэн
21Ок-ка чэлэн эйдучэндюр бэил хэвкигэддэкэтэн, Иисус-та, хэвкивчэ укал, нэӈэддин: нянин аӈаптин, 22тадук-нян ноӈандулан Хиргэпты Хиран, дэги голубь бадань бадлатты, ӈэнрин, няниндук-та дылган илрин: «Хи Мин аявриву Хуту, Хи Мин аявривчиму обдан Эетчимӈэву!»
Иисус Христос балдадяктакин ханилни
23Иисус мэн некэнмэи некэдилрэкэн, иланмяр анӈанаӈан бисин, бэил мулгачиӈчинтан, ноӈан Иосиф Хутэн нян Илия, 24Матфат, Левий, Мелхий, Ианнай, Иосиф, 25Маттафий, Амос, Наум, Еслим, Наггей, 26Мааф, Маттафий, Семей, Иосиф, Иуда, 27Иоаннан, Рис, Зоровавель, Салафиил, Нирий, 28Мелхий, Аддий, Косам, Елмодам, Ир, 29Иосий, Елиезер, Иорим, Матфат, Левий, 30Симеон, Иуда, Иосиф, Ионан, Елиаким, 31Мелеай, Маин, Маттаф, Нафан, Давид, 32Иессей, Овид, Вооз, Салмон, Наассон, 33Аминадав, Арам, Есром, Фарес, Иуда, 34Иаков, Исаак, Авраам, Фарр, Нахор, 35Серух, Рагав, Фалек, Евер, Сал, 36Каинан, Арфаксад, Сим, Ной, Ламех, 37Мафусал, Евнох, Иаред, Малелеил, Каинан, 38Енос, Сиф, Адам – хутэтэн бисин, Адам-нян Хэвки хутэн бисин.
Одоогоор Сонгогдсон:
Лука 3: eve
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
