प्रेरित 1
1
1हनेमाःम्ह थियोफिलस,
जिगु न्हापांयागु सफुलिइ येशू ख्रीष्टं यानादीगु व स्यनादीगु फुक्क खंनिसें कयाः#लूक १:१-४ 2वय्कलं ल्ययादीपिं प्रेरिततय्त पवित्र आत्मां आज्ञा बियादी धुंकाः स्वर्गय् झायादीगु खँ तक च्वयागु दु। 3दुःख सीधुंकाः वय्कलं पिइन्हु तक धुवांधु इमिथाय् झायाः इमित परमेश्वरया राज्ययागु खँ कँकं वय्कः हानं म्वानावःगु खः धयागु यक्व ग्यसुलाःगु दसि क्यनादिल।
4छन्हु इपिं नाप नयेत फ्यतुनादीबलय् वय्कलं थथे धयादिल – “यरूशलेमं गनं मवँसे बाःनं बियादीतिनि धकाः जिं धयागु वरदान कायेत पियाच्वँ।#लूक २४:४९ 5यूहन्नां ला लखं बप्तिस्मा बिल, आः याकनं हे पवित्र आत्मापाखें छिमिगु बप्तिस्मा जुइतिनि।”#मत्ती ३:११; मर्क १:८; लूक ३:१६; यूह १:३३
येशूयात स्वर्गय् थकाःगु
मर्क १६:१९-२०; लूक २४:५०-५३
6अय्जूगुलिं इमिसं हानं मुंबलय् येशूयात थथे न्ह्यसः यात – “प्रभु, छिं आः हे इस्राएलीतय्त राज्य लित बियादीत्यना ला?”
7अले वय्कलं धयादिल – “बाःनं यानादीगु ज्या छिमिसं छु इलय्, गुबलय् जुइ धकाः न्यना च्वनेमाःगु मदु। 8पवित्र आत्मां छिपिं जायेवं छिमिके शक्ति दइ। अले छिपिं यरूशलेमय्, यहूदियाय् व सामरियांनिसें सारा संसार न्यंक जिगु साक्षी जुइ।”#मत्ती २८:१९; मर्क १६:१५; लूक २४:४७-४८
9थुलि धयादी धुंकाः इमिसं स्वया च्वँच्वं हे वय्कःयात थत यंकाः सुपाँचं त्वपुयाबिल।#मर्क १६:१९; लूक २४:५०-५१ 10वय्कः थाहां झायाच्वंगु मिखा हे लिमकासे आकाशय् स्वयाच्वंबलय् तुयुगु वसः पुनातःपिं निम्ह मनूतय्सं इमिथाय् लिक्क दं वयाः 11थथे धाल – “गालीलय् च्वंपिं मनूत, छाय् वातां दनाः आकाशय् स्वयाच्वनागु? येशू स्वर्गय् झायादीगु छिमिसं खंथें तुं वय्कः हानं अथे हे थन लिहां झायादी तिनि।”
यहूदाया थासय् मेम्ह चेला ल्यःगु
12अले इपिं जैतून डाँडां यरूशलेमय् तुं लिहां वल। जैतून डाँडां यरूशलेम छगू किलोमिटर ति तापाः। 13शहरय् वयेवं इपिं छखा छेँय् दुहां वनाः तले च्वंगु क्वथाय् वन। अन पत्रुस, यूहन्ना, याकूब, अन्द्रियास, फिलिप, थोमा, बारथोलोमाइ, मत्ती, अल्फयसया काय् याकूब, क्रान्तिइ सने धुंकूम्ह सिमोन व याकूबया काय् यहूदापिं च्वनीगु खः।#मत्ती १०:२-४; मर्क ३:१६-१९; लूक ६:१४-१६ 14इपिं फुक्कं छगू हे मनयापिं जुयाः मेमेपिं मिसात, येशूया मां मरियम व वय्कःया किजापिं नाप प्रार्थना यानाच्वनीगु खः।
15लिपा अन सछि व निइम्ह चेलात मुनाच्वंथाय् पत्रुसं दनाः थथे नवात – 16“दाजुकिजापिं, येशूयात ज्वंकूम्ह यहूदाया खँय् न्हापां हे दाऊदया म्हुतुं पवित्र आत्मां नवाःगु खँ धर्मशास्त्रय् च्वयातःगु खः। थथे जुइ हे माःगु खः, अले जु नं जुल। 17व नं झीपिं थें खः, अले वं नं झीसं थें हे ज्या यानाच्वंगु खः।”
18यहूदां मभिंगु ज्या यानावःगु धिबां छकू जग्गा न्यात। अले व हे जग्गाय् कुतुं वनाः आतापति फुक्कं पिहां वयाः सित। 19थ्व खँ यरूशलेमय् च्वंपिं फुक्क मनूतय्सं सिल। अले व जग्गायात इमिगु थःगु भाषां “हकल्दामा”, अथवा “हियागु जग्गा” धकाः नां तल।#मत्ती २७:३-८
20“थ्व खँ भजनया सफुलिइ थथे च्वयातःगु दु –
“‘वयागु छेँ खालि जुइमा,
अले अन सुं हे मच्वनेमा।’
‘वयागु थाय् नं मेम्हय्सिनं कायेमा।’#भज ६९:२५; १०९:८
21“अय्जूगुलिं प्रभु येशू झीनाप दीबलय् निसें न्ह्याबलें झीनाप दुम्ह छम्ह मनूयात ल्यये माल। 22थ्व मनू यूहन्नां बप्तिस्मा ब्यूबलय् निसें येशू स्वर्गय् झायादीबलय् तकं झीनाप दुम्ह जुइमाः। वं झीसं थें येशू सिनाः म्वानावःगु खँय् साक्षी बीमाः।”#मत्ती ३:१६; मर्क १:९; १६:१९; लूक ३:२१; २४:५१
23अले इमिसं निम्ह मनू बारसाबास धाःम्ह योसेफ, (वयागु मेगु नां युस्तस खः) व मतियासयात न्ह्यथन। 24अले इमिसं थथे प्रार्थना यात – “मनूतय्गु नुगलय् दुने च्वंगु खँ स्यूम्ह प्रभु, थुपिं निम्हय् गुम्हय्सित छिं ल्ययादिया, जिमित क्यनादिसँ। 25यहूदा थ्व ज्या त्वःताः गन वनेमाःगु खः अन वने धुंकूगुलिं वया थासय् ज्याय् तयेत व प्रेरित यायेत गुम्ह मनू ज्यू, धयादिसँ?” 26अले इमिसं चिट्ठा तल, चिट्ठा मतियासयात लात। थथे मतियासनापं यानाः आः झिंनिम्ह प्रेरित खात।
Одоогоор Сонгогдсон:
प्रेरित 1: NEW
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2024 Nepal Bible Society, Newa Christian
Literature Center and Wycliffe Bible Translators, Inc.
